Pab peb kwvtij Hmoob tusiab ntau uas nej tsis muaj lub zeemmuag pom kev deb kawg ncua txog ntawm luag lwm haivneeg txoj kev los rhuav tshem nej sib tawg koom tsis tau nyob ua kev sawv ua ib lub zog. Thov nej los muab kuv cov lus nram no coj mus xav tso.
1. Yog vim li cas Hlob Vaj Pov yog tus tuav tes sib cog lus nrog tus C.I.A. los pab tus America tawm tsam tus Nyablaj Qaumteb (North Vietnam) lawv ho tsis hu kom Hlob Vaj Pov tuaj nrog nej sib sab laj, ho yog cia nej cov uas tom qab tom tw los tsim tej no xwb. Yog vim li no thaum nej caw Hlob Vaj Pov tuaj koom nrog nws thiaj li tsis kam tuaj.
2. Hnub tim 22 lub 7 hli yog Hlob Vaj pom tau tias muaj nujnqis npaum li nej hais tiag ua cas tsis hnov nws hais rau peb mloog ib zaug li, tsuas yog ziag no mam li hnov nej tham xwb? Tsis tag li lub 7 hli peb Hmoob tsis muaj keebkwm dabtsi tseemceeb nyob rau hauv thiab yuav ua cas nws thiaj li yuav muaj nujnqis rau yus tsavneeg thiab luag lwm haivneeg thiaj li ho yuav nrog yus lees paub?
3. Lub 5 hlis tim 14 tsis yog ib hnub zoo rau Hmoob tiamsis muaj hnub uas yog Hmoob poob tebchaws, qhov no yog ib qhov yuav ua rau peb txhua tus nco thiab ua keebkwm tseg ua povthawj tim khawv.
Qhov tiag ntawm lub koomhaum tsim tsa thiab hnub uas muaj koobtsheej nyob rau Colorado hais nram qab no yog LUAG MUAB IB YA POBTXHA LOS NTXIAS NTAU TUS AUB KOM LAWV SIB TOG SAWVDAWS NYOB TSIS TAUS UAKE XWB. Peb paub zoo lub sijhawm ntawd yog xyoo 1996 los sis 97 tej thawj coj uas tuaj koom lub koomhaum ntawd thiab tej Hlob twb tsis sib haum lawm, yog li thaum dej hlob zoo dov cav ces luag tab tom zoo los muab Hmoob dov cav xwb. Ua cas peb Hmoob tej hlwb yuav rwj ua luaj tsis pom tej teebmeem no li, tus twg los tseem tias nws yog tus ua tau thiab muaj cuabkav xwb.
Yog nej hlub Hmoob tiag yuav tau xav tom ntej tom qab ua tib zoo tsa qhovmuag saib kom deb me ntsis tso yuav ua dabtsi los mam li ua koj thiaj li yuav yog ib tug CAWMSEEJ rau koj tsavneeg nyob rau lub neej yav pemsuab.
Ua tsaug ntau