koojziagkabzaug 29th December 2011, 1:29 am
Hmoob tus Vaj dua nra
Peb Hmoob muaj lub ntuj hlub
Ntau tiam yawm saub tso ib tug
Peb Hmoob muaj lub ntuj pov
Ntau txheej yawm saub tso ib tug los coj
Thaum ntuj tsim teb raug
Tswv Ntuj tsim muaj Hmoob thaum lub hauv paus
Thaum ntuj tshwm teb xeeb
Yawm saub tsim tau Hmoob nrog luag ua neeg
Hmoob xeeb tau nrog luag
Tsim teb rhawv chaw nyob tsheeg cuab
Hmoob tsim muaj nom muaj tsw
Tsim muaj Huab Tais Txiv Yawg ua vaj ntxwv
Tswj teb kav chaw ntswg liaj ntswg iav
Tsim muaj qoob loo cog tau nplej pob kws siav
Tswj teb kav chaw ciam dej ciam av
Tsim muaj kab hlau ua twj thaiv laj kab
Suav tuam tshoj muab tsis yeej ntau tsis tau
Thiaj koom ntau teb chaws tuaj ntaus
Hmoob thiaj tawg ua sab ua sua
Huab Tais Txiv Yawg txais kev puas tsuaj
Ua rau Peb Hmoob quaj ntsuag
Rov tos dua tus vaj nqes los dua
Ntau txheej ntau tiam dhau mus
Yawm saub rov hlub Hmoob ib ntus
Tso tus vaj tshiab los cawm Hmoob
Tseev tsom Hmoob lub koob
Coj Peb Hmoob lub neej nce ib theem
Mus rau ntiaj teb kev vam meej
Yam tsis muaj tus tau ua los
Yog Peb Yawg Hlob Vaj Pov
Tus Yawm saub muab koob hmoov
Thiaj muaj lub hwj chim coj Peb Hmoob
Mus nce tus ntaiv ntuj
Muaj koob nto npe tsim nuj
Muaj vaj huam sib luag nrog ntiaj teb neeg
Muaj koob npe nrog lub sim ceeb
Kuv me nyuam neeg thov nqa tes ua koj tsaug mog
Kuv leej niam leej txiv, huab tais vaj ntxwv, yawg hlob Vaj Pov
Thov koj mus zoo,...Tej koob Hmoov koj tau muab rau me nyuam Hmoob pem roob....Tswv Ntuj yuav muab txhiab puas zaus tshaj rau koj. Kuv tseem nco txog koj lub txiaj ntsim uas tau muab rau peb txhua leej, thaum kuv nrog koj cov me nyuam ua si nyob tim Looj ceeb. Tswb, Maiv Kaus, Maiv Ko yog tus hlob...Kuv pom koj ua lub Collège Lao Houam Phao nram Vees Cam, uas kuv cov phooj ywg tshau tsis tau mus txheej siab tau tuaj kawm kom muaj fij xws li luag...Kuv pom koj tseev tsa muaj cov Nais Khu Pab Xab Npas, muab koj nyiaj qab nas, peev qab hub los txhawm kom koj Haiv Hmoob TXAWJ. Kuv pom koj tseev tsim tau ib cov nais mom, kho mob saib kev noj qab haus huv rau txhua lub zos Hmoob. Kom Hais Hmoob muaj kev noj qab nyob zoo. Tej nyiaj txiag luag xa tuaj ua tsov ua rog, seem me me koj coj los txhawb koj Haiv Hmoob kom zoo thiaj vam meej yam coob tus twb xav tsis txog.
Yawg Hlob Vaj Pov, Tswv Ntuj tso koj los txhawb Peb Hmoob zaum no, koj yeej ua tau raws lis Peb Hmoob txoj kev thov Tswv Ntuj, Yawm Saub tau ntau txheej ntau tiam los. KOJ mus lawm, koj lub koob npe yuav nyob tsis muaj caij kawg hauv Peb Hmoob lub siab mog.
Koj mus lawm los koj nco ntsoov tig rov los saib koj haiv neeg mog.
Thov koj tsom kwm kom Peb Hmoob txawj sib hlub thiab txawj tuav rawv koj lub koob.
Yam nyob hauv kuv lub siab, kuv hais tsis tau tawm, vim tsis muaj ib los lus yuav hais tau, cia kuv tsa tes ua koj tsaug xwb mog.
Yawg Hlob, kuv hais zaj paj huam tsis tag, koj paub hais tias yog li cas.
Yawg Hlob, kuv hais zaj paj huam tsis tiav, txhais tias Hmoob tseem tos koj rov los HLUB dua Peb Hmoob rov lwm tiam...
Home
