Kev Zam Txim Yog Ua Li Cas

Kev txhaum txim, kev muaj txim mas muaj ntau yam heev uas yuav teev tsis txhua. Txawm yuav muaj kev txog kev txhaum ntau npaum li cas, los yeej muaj kab muaj kev muab cais kom meej kom tseeb es thiaj pom qab taug.

Pawg ib ces yog kev txhaum txheej. Kev txhaum txheej yog kev uas ib tug neeg ua tsis haum lwm ib tug neeg lub siab vim nyias muaj nyias cev thiab nyias muaj nyias siab ntsws. Ib tug neeg txoj kev xav txawv lwm ib tug neeg txoj kev xav; ib tug neeg txoj kev coj noj coj ua tsis thooj lwm ib tug neeg txoj kev coj noj coj ua. Vim li ntawd, thaum ib tug neeg ua raws nws siab xav thiaj tsis haum lwm tus neeg siab. Thaum uas lwm tus neeg muaj kev tsis haum siab rau ib tug neeg twg, ces tus neeg ntawd yog muaj txim nrog lwm tus neeg lawm. Kev txhaum txheej mas muaj ob kis hais. Kis ib ces yog txhaum los ntawm kev tsis paub, tsis faj, los sis feeb tsis meej. Kev txhaum rau kis ib no ces yog yuam kev xwb. Kis ob ces yog txhaum los ntawm kev sim kev twv. Kev txhaum rau kis ob no ces yog txhob txwm ua. Kev txhaum txheej yog kev uas ua rau neeg tsis sib hauv xeeb. Yog neeg sib paub zoo zoo thiab sib ncawg heev heev, ces kev txhaum txheej kuj tsawg tsawg thiab sib sib. Kev daws pob caus ntawm kev txhaum txheej ces yog kev thov txim thiab kev zam txim. Nyob hauv qab ntuj no ib haiv neeg nyias muaj lawm nyias kev thov txim thiab kev zam txim. Muaj tej haiv neeg mas thaum thov txim tag thiab zam txim dhau lawm ces nyias rov nyob nyias li thaum uas tsis tau txhaum txheej. Nyob ntawm Hmoob mas yog tus thov kheev tau qhov nuj nqis hauv tus zam siab, ces lub txim tag tiam sis plaub ntug tsis tiav vim nkawv muaj kev cib nyeej lawm. Ib hnub tom ntej qhov ntawd yeej tseem yuav rov los aiv nkawd dua. Yog yuav kom daws tau peb Hmoob txoj kev tawg tshwj mas peb yuav tsum hloov peb txoj kev thov txim thiab zam txim.

• Thov txim:
  1. Thov tas mas tsis txhob ua txhaum ntxim lawm.
  2. Thov tas mas tsis txhob coj mus khav mus hais ntxiv.
  3. Thov tas mas tsis txhob muaj kev ntxub.

• Zam txim:
  1. Zam tas tsis txhob khaws kev chim tseg__npaj siab yuav pauj rov qab
  2. Zam tas tsis txhob nros__npaj siab yuav tsis txhawb li lawm ntag
  3. Zam tas tsis txhob tu siab__txav tawm kiag mus rau lwm sab ntuj

Pawg ob ces yog kev txhaum cai. Kev txhaum cai yog kev uas ua yuam kiag txoj cai lawm. Txoj cai yog tej kab kev uas sawv daws yeej pom zoo siv, pom zoo yuav, los sis pom zoo yoog lawm. Nyob tawm tej haiv neeg uas muaj ntaub muaj ntawv ces luag muab tej cai los teev rau hauv ntaub hauv ntawv tseg. Nyob ntawm tej haiv neeg uas tsis muaj ntaub tsis muaj ntawv ces lawv tsuas yog siv tej laus neeg uas pom dua thiab tau ua dhau los lawm los ua cov tuav cai. Cov neeg uas muaj ntaubntawv mas luag cov cai nyob taus li qhov qub ntev ntev. Cov neeg uas tsis muaj ntaubntawv mas lawv cov cai yuav ib sij hloov ib zaug ntawm ib phaum neeg rau lwm ib phaum. Kev txhaum cai ces yuav tau mag lub txim raws txoj cai, thiab yuav tsum yog txoj cai thiaj zam tau lub txim txhaum.

Nyob zoo os Lub paj ntshua nplaim,

Tej thaum yus nyob nyob ces cia li lam muaj tej lub tswv yim tawg paj hauv lub hlwb tuaj. Yog yus tsis muab sau tseg ces tsis ntev lub tswv yim ntawd cia li ploj lawm. Muaj ntau zaus kuv pheej muab sau rau tej daim ntawv me me, tiam sis kev ua li ntawd yeej tsis txawv li tsis ua li vim daim ntawv me me ntawd pheej ploj thiab nqa tsis tau nrog yus mus txhua qhov. Yog li ntawd, kuv thiaj muab nej qhov chaw no ua ib daim ntawv rau kuv theej tej tswv yim zoo li ntawd. Ntxiv li ntawd, nws kuj tseem ho yuav tau tej lub tswv yim zoo dua ntawd los ntawm lwm tus los txhab ntxiv rau yog muaj coob tus nrog pom. Cia siab hais tias nej yuav tsis xav li cas.

Lub paj ntshua nplaim, koj cov tswv yim ntawd zoo kawg nkaus lawm. Cia kuv maj mam yoog seb puas yuav yoog tau.

PijPauj, twb yog koj lub tswv yim ua rau kuv lub tswv yim thiaj txhawv tuaj thiab xwb.

Yog li koj hais lawm, thaum muaj tej yam txhawv hauv yus nruab siab, yuav tsum muab sau tseg. Nyob hauv no Kzkz lub Vas Sab no tsis muaj neeg tuaj sau coob tiam sis hauv no yog chaw khaws txuj xwb, yog chaw sau yus tej txuj ci tseg. Lwm qhov tos Kzkz wb tsis mus sau los vim luag tham kev plees nkauj nraum thiab luag ua si xwb, luag kev ua si txawm sau txog tsheej phab tsheej pheev los luag tsis rov qab mus tshawb nyeem. Zoo li peb tuaj sau hauv no mas peb sau tas lawm peb yeej yuav khaws tseg nyob nyob tau rov qab nthuav nyeem kom yus thiaj paub ntxiv.

Koj yog ib tug neeg thoob tsib thiab muaj kev txuj txawj txhawv zoo, thov koj tuaj sau koj tej txuj tseg thiab ua hneev taw rau hauv no, nyob nyob peb puv 120 xyoo peb dua toj lawm los thiaj tsis ploj mog. Ua koj tsaug ntau koj tseem tuaj xaiv thaj chaw "HMOOB TSHAV NTUJ" no sau koj tej txuj ci thiab nawb. Kuv mas zoo siab kawg

Nyob zoo os Lub paj ntshua nplaim,

Zoo siab uas neb tsis xav li cas. Ua tsaug ntau od mog.

Tos luag pejkum haiv neeg vammeej taus los vim lawv sib txuas hnub nyoog. Ib leej tib neeg nyob ntev kawg kiag tsuas yog 120 xyoo xwb. Tab sis, yeej muaj tsawg tus kawg uass thiaj nyob txog 120 xyoo. Tsis tas li ntawd xwb, qhov uas ib tug muaj peev xwm tsim tau ub no rau neeg sawv daws siv ces tsuas yog txij hnub nyoog 10 xyoos mus txog rau 60 xyoo xwb. Ua ntej 10 xyoos thiab tom qab 60 xyoo lawm ces tsua yog lam muaj sia xwb yeej tsis tshua muaj txiaj ntsig rau pawg neeg lawm. Muab hais los ces neeg tsuas zoo tswv yim li 50 lub xyoo xwb. Nyob rau hauv 50 xyoo no yog sawv daws paub muab hnub nyoog sib txuas li cov neeg Western, sawv daws yeej tsis tau tej yam zoo zoo tseg rau tej xeeb leej xeeb ntxwv. Qhov txuas hnub nyoog ntawd ces yog muab tej uas yus paub thiab yus txawj sau ua ntawv tseg qhia cov tseem hluas. Cov tseem hluas txoj haujlwm ces yog khaws siv tej uas tej laus twb peem peem dhau lawm, thiab ho ua ntxiv tej qhov uas tej laus ua tsis tau txog rau__txua ua yam tshiab mus.

Ib tug neeg siv ib sim neej los tshawb fawb ces nyuam qhuav txaus lwm ib tug kawm li 1-2 xyoos xwb yog tus tshawb fawb muab tej tsim nyog ua thiab tsis tsim nyog ua sau zoo zoo tseg. Tej qhov tsis tsim nyog ua ces muab zam tsis kov li lawm; tej qhov uas tsis nyog ua ces muab tsi ntsee ua kiag kom tawg paj txi txiv.

Yog peb tsis ua li ntawd ces txhua phaum neeg yeej xeem pib tom hauv paus rov tuaj. Koj ua ua laus li kuv ces tsua txawj li kuv txawj; kuv ua ua txog ntu koj ua los yeej tsua paub li koj paub xwb. Peb ua mus ua los los yeej kawg nyob qhov qub xwb. Tos tsiaj ho tsis ntse los vim lawm tsis txawj sib tham, sib qhia. Txhua yam uas ib tug tsiaj paub mas yuav tsum yog nws twb ntsib dua los lawm xwb.

Lawv cov neeg vammeej mas muaj encyclopedias, dictionaries, manuals, los sis text books txog tej lawv ua dhau los lawd.

Nyob zoo Pijpauj thiab Lubpajntshuanplaim,

Ua tsaug rau neb cov lus nyiaj lus kub, lus cia siab lus hlub.
Ua neeg nyob yog txawj zam luag li yus ntshaw kom luag zam yus, txawj thov txim luag li yus xav kom luag thov ces yeej zoo tag nrho xwb. Tab sis neeg feem ntau pheej ntshaw luag ua zoo rau xwb, luag twb ua zoo tshaj qhov luag yuav ua tau los nws tseem txim ntxiv, nws tus kheej nws ho tsis kam faib rau luag thiaj tsis muaj kev sib haum li.
Kuv xav kom txhua leej tuaj nyeem neb cov lus es khaws neb ob zaug 13 nqe lus mus ua pov haum ces peb Hmoob yuav tsis muaj nkhib nkhaus, yuav nyob ua neej ua tsav noj sib pab haus sib cev tsis muaj hnub tu siab tu saus...Cas lub neej nim tsis zoo li neb hais, pem toj nram hav nim muaj sib ceg sib cav, ua rau tej siab ntsws puas tsus tsis muaj lub ntsej muag luag nyav...Tu siab tshaj li...