kawm ua doctor hav nyom

koojziagkabzaug wrote:

Hmoob Leej Tub,

Ua tsaug ntau rau nws zaj no, yog ib zaj zoo heev.
Kuv twb pom dua tej tug neeg ciam quav xwb tuag lawm, tej tug kuj ua rau yuav luag tuag. Tej tug kuj noj kem ces mob huam leej huam ceem cia li tuag kiag lawm. Ua tsaug ib zaug ntxiv.

Ua li nws puas muaj qhov uas thaum yus nyuaj nyuaj siab ais yus cov leeg rub yus lub nraub qaum, zaws kom yus txhob nyuaj siab lawm...? Hahahah...!

Koojziagkabzaug,

Thov txim ntau uas nws twb tos ntev txog qhov nws nug ntawd. Nyob li ntawm nws lo lus nug tias thaum nyuaj siab es cov leeg pheej rub lub nraub qaum, yuav zuaj li cas thiaj pab tau. Hmoob leej tub xav kom nws sim 3 yam li nram qab no seb puas pab tau.

Ntxhov siab ua mob.

1. zuaj qhov mob nraub qaum txij ntawm 2 lub raum rov saud.
2. zuaj kom nws tsaug zog zoo nws thiaj hnov qab txoj kev nyuaj siab.
3. zuaj daws nws qhov kev chim siab thiab kho siab.
Ib nqe twg nws kuj muaj ntau theem li yuav piav nram qab no:

1. Yus lub nraub qaum nws muaj 12 tshooj pob txha, ib theem pob txha twg nws muaj daim phiaj viam los sis roj hmab kem. Nws kuj muaj cov xov fais thiab leeg dawb leeg ntshav ntau yam nyob raws tus txha nraub qaum. Muaj cov hlab ntsha leeg ntau txoj tawm mus tuav lub raum. Kev mob nraub qaum los ntawm kev nyuaj siab los sis zaum tsis haum es mob, muaj peev xwm yuav zuaj daws tau qhov mob. Yog tias tim tej pob txha teem ua rau daim phiaj viam los sis daim roj hmab ntawd nws to ces yuav tau mus ntsib kws tshuaj xwb thiaj li yuav pab tau. Yog nyuaj siab mob, zuaj:
1.1. zuaj ob txoj leeg raws tus txha nraub qaum mob qhov twg zuaj qhov ntawd. Yog mloog tsis raug tias mob qhov twg kiag. zuaj sab laug; qho ib nyob li ib xib hauv qab ntawm daim nplooj pus xaus; qhov ob nyob ncaj nkaus ntawm theem duav nqia los sis hauv qab ntawm tus tav kawg li 2 nti nram hav.
1.2. sab xis, qhov ib nyob ncaj nkaus lub raum, thiab qhov ob ntawm lub ntsag.
1.3. txoj leeg plab hlaub sab nraud, pib ntawm qab hauv caug li 3 ntiv nram hav zuaj taug mus rau nram qaum cos taw. Txoj leeg plab hlau no nws tuav kiag yus lub cos taw sab nraud. Zuaj nqis kom tshuav li 3 nti txog lub cos taw mam tso tseg.
1.4. Ntawm qaum cos taw li 1 xib puas rau ntawm qab plab hlaub, nias teem rau tus txha
hlaub thiab thawb nqes hav rau hauv thiaj raug qhov mob.
1.5. Ntawm lub cos taw sab nraud puas rau txoj leeg raws.
1.6. ntawm ob sab nplooj ntseg theem siab sab nruab nrog.
1.7. ntawm lub cos ntsej puas plhu, nias sab laug thawb sab hauv qhov ntsej teem rau tom plhu, thiab sab xis nias nraum tawv plhu teem mus rau lub qia ntsej.
Mam soj saib nqe 2 thiab 3 rau hnub tom ntej.

koojziagkabzaug wrote:Nyob zoo HmoobLeejTub,

Zaum no nws muab tau tsob kuab muaj tsuas tuaj cog rau peb lub zos nov lawm, ntiaj teb yuav tshiab qaum ntuj yuav ci ntsa iab, lub ntuj yuav kaj lub teb yuav tawg paj. Leej neeg yuav rov pom kev lom zem, lub neej yuav rov muaj nqes...Yuav ua neej nyob luag ntxhi tam Nkauj Ntsuab Nraug Nab nyob ntuj hnub qub ci...Hahahah...! Ua tsaug rau nws lub siab zoo nawb mog...Tab sis ntau me ntsis lawm, ntshe yuav xyaum ntev tsawv thiaj li yuav siv tau.

Kzkz thiab ib tsoom phooj ywg,

Hnub no peb los saib thiab xyaum kev zuaj daws mob ncauj plab los sis plab kiav txhab. Kev mob ncauj plab, nws yog los ntawm tus neeg muaj kev nyuaj siab, noj tshuaj tua mob ntau dhau, thiab nyiam haus dej cawv ntau. Mob ncauj plab yeej muaj txhua hom neeg tsis hais poj niam txiv neej. Mob ncauj plab, thaum xub thawj tsuas hnov ntsim ntsim hauv siab (hmoob hu tias kiab siab) qhov ntsim ntawd yuav auv los rau ntawm qab kaus siab ua ntej noj mov thiab tom qab noj mov tas. Thaum tshaib yuav mloog mob heev tshaj. Sawv ntxov, tus neeg mob muaj ntsis muaj xeev siab xav ntuav. Thaum mob heev zuj zus los sis ntev zuj zus, tus muaj mob yuav tawm rooj tau cov xos liam dub.
Yog tus twg mob txog qib tso tawm rooj tau cov xos liam dub lawm ces yuav tau mus ntsib kws tshuaj. Kws tshuaj thiaj li yuav muaj cuab kav cev yajtsom mus tsom saib seb qhov mob ntawd loj los me. Kev zuaj mob ncauj plab tsuas pab tau thaum tseem mob me xwb.

Zaws plab.

Mob ncauj plab, zuaj:

1. ntawm ob txoj sawv plab li ib nti saum toj ntawm lub ntiv ntaws.
2. ntawm nruab nrab lub ntaws thiab tus kaus siab, txoj leeg nruab nrab plab.
3. ntawm hauv siab nruab nrab ntawm ob lub mis.
4. ntawm ob sab roob qhib 1 xib nram hav qab hauv caug.
5. ntawm nruab nrab roob qhib nruab nrog los saum hauv caug thiab txhais taw.
6. ntawm ob sab nkhib taw puas tus ntiv taw xoo.
7. ntawm ob sab qaum taw qhov ze rau cov yas txha ntiv taw sib txuas.
8. ntawm daim nplooj ntseg nruab nrog thiab ntawm lub cos ntsej puas plhu sab ntsej xis.
9. ntawm daim nplooj ntseg nruab nrog, sab pob ntseg laug. Sab xis quj kiv raws lub moos khiav thiab saub laug quj kiv rov qab.

koojziagkabzaug wrote:

Nyob zoo Hmoob Leej Tub,

Nws sau ntau los haj yam zoo xwb, twb tsis yog tham pem ua si, twb yog zoo txuj mus zoo ci, thaj tag hnub thawm hli los yeej puab leej tib, nws yeej tsis tab kaum kuv li. Yog nws lub scan pw tsev kho mob tawm los no nws mam li xa duab tuaj rau kuv hloov cov uas kuv nrhiav los tso nov thiaj li meej dua.

Nws tham ntau yam zoo heev, twb tsis yog qhov zuaj xwb, nws tseem qhia tus yam ntxwv mob thiab mas yog ib qho zoo kawg nkaus. Kuv ua nws tsaug nawb mog.

Kzkz,

Thov txim ntau uas tau ob peb hnub los no, kuv me ntsis khaub thuas lawm es thiaj tsis qab siab tuaj sau ntxiv rau sawv daws nyeem.

Hnub no ho yuav rov los tham me ntsis txog kev daws mob muaj pob zeb nyob hauv raum. Pob zeb nyob hauv raum nws kuj yog ib hom mob uas leej twg tau ntsib ces nyuaj siab hauj sim. Kev mob nws yuav mob ntsim chob npaum li riam hlais thiab yuav mob ntawm ob sab duav nqis mus rau hauv lub zais zis. Qee tsam kuj tso tsis tau zis. Kev zuaj tsuas daws tau qhov mob kom txog rau thaum tus mob mus ntsib tau kws tshuaj xwb. Nws yuav zoo tsis tu qab kom txog rau thaum muab lub pob zeb rho tau tawm. Yog tias lub pob zeb tseem me tej zaum kuj yuav ntws tawm tau los rau hauv lub zais zis thiab thaum kawg kuj nrog zis tawm tau los yam tsis raug phais. Mob pob zeb nyob hauv raum, zuaj:
1. ntawm tus ntsis tav kawg ncaj lub duav ntxee rau sab nraub qaum tseem tsawv.
2. nruab nrab ntawm tus pob txha ntha thiab tus ntsis tav thib 2 suav hauv tuaj.
3. ntawm sab ntha ncaj puab tais, 1 - 3 puav leej yog sab xis.
4. ntawm ob sab duav hmlos.
5. ntawm ob sab nkhib taw puas tus ntiv taw xoo.
6. ntawm ob sab qia ntsej.
7. ntawm ob daim qaum nplooj ntseg theem siab.

Ntawm ob sab qaum nplooj ntseg thiab hauv ob sab nkhib taw, yuav tsum sib zog zuaj npaum li yuav sib zog tau thiaj li yuav daws tau qhov mob, uas muaj pob zeb nyob hauv lub raum.

Yog tus mob mloog tau tias mob pob zeb nyob hauv raum, yog mob sab twg tiag ces zuaj nqe 6 thiab 7 sab ntawd xwb los tau.

koojziagkabzaug wrote:

Tij Laug Hmoob Leej Tub,

Muaj sab foob los ncaj nws lov? Nkees los thaum twg xyeej siab mam tuaj sau los tsis ua cas lis nawb mog. Kuv los ntshe yuav tsis tshua khoom lawm thiab...Vim muaj me ntsis hauj lwm...Es yog nws tsis pom kuv tuaj lawm los nws thob ntau siab yau, nws khoom yeej meem tuaj tso zaj, kuv mam li tuaj kho rau.

Koojziagkabzaug,

Thov txim uas tau ntau hnub lawm tsis tau los sau daws kev mob nkeeg lawm.

Hnub no peb ho tig los saib thiab kawm txog tej ncej puab los sis plab hlaub pheej muaj cov leeg ntshav su ua tsheej thooj raws yus tej tawv nqaij. Ntawd vim yus tej hlab ntsha txhaws los sis muaj qee yam dab tsi khub cov leeg ntshav lawm thiaj ua rau ntshav khiav tsis zoo ces nws thiaj li su loj zuj zus. Thaum muaj ntshav khov khuam rau thaj twg lawm ces nws pheej yuav muaj cov los nplaum ntxiv, ntev zus thiaj pom tej thooj leeg ntshav dub loj zuj zus tuaj. Feem ntau cov neeg muaj cov teeb meem li hais los no vim tus neeg ntawd nws ua hauj lwm sawv ntsug ntau tshaj li tau zaum. Thaum paub tias nws pib muaj tej leeg ntshav su ho dub lus hauv tej tawv nqaij tuaj lawm, yus yuav tau zuaj, ob peb hnub twg zuaj ib zaug rau kom tej leeg ntshav ntoj xwm yeem thiaj li yuav tsis su loj ntxiv. Ntev mus tej zaum nws kuj yuav rov ploj taus. Txawm tsis ploj tas tas los nws yuav tsis su loj ntxiv tuaj lawm. Hlab ntshasu o, zuaj:

1. ntawm lub cos taw sab laug nruab nrog.
2. ntawm nkhib taw puas tus ntiv xoo sab laug thiab xis.
3. ntawm qab hauv caug, roob qhib xaus-nruab nrog sab ceg xis.
4. ntawm ob sab nplooj ntseg theem siab nruab nrog.

Zuaj li hais lo saum no yuav pab tau kom tsis txhob muaj hlab ntsha tawg ua rau tej leeg ntshav su o tej twb thooj raws yus tej tawv nqaij ntawm ncej puab thiab plab hlaub.