Paj huam ntuas txiv tsev
Zaj me no--------------------------yog lus paj huam
Yuav hais tshuam-----------------rau cov txiv neej
Ua nws yeej----------------------muaj lub cuab yig
Neej zoo cig------------------------cuag tes tsau kaj
Poj zoo tshaj-----------------------tus duab tshav ci
Muaj tub ki-------------------------puv vaj puv tsev
Tau zoo sev----------------------los nrog luag puag
Nws tseem zuag-----------------txoj kev txhoj pob
Coj siab hlob----------------ntshaw muaj poj coob
Txiv neej Hmoob--------------ntshaw ntau tus sev
Tus niam tsev----------------------uas yog niam loj
Nws twb coj------------------------lub cuab yig nto
Zoo tam hlo-----------------txoj koob hmoov nyiaj
Neej sawm txhiaj----------------twb tau nrog txais
Muaj tub ntxhais--------------zoo nkauj zoo nraug
Lub neej taug-----------------------tau txoj kev zoo
Neej nto moo-----------------caum cuag luag thiab
Nyob kaj siab----------------------tshav ntuj li nrig
Lub cuab yig-------------------zoo raws keeb kiam
Nws tseem nyiam-----------------coj lub siab mos
Pheej mus yos----------------------ntuj teb tag hmo
Es hnub no-----------------------coj siab dub nciab
Yuav niam tshiab-----------------ho cais niam qub
Nws tsis hlub------------------------coj siab fee das
Yeej tsis ras-----------------------txog txoj kev zoo
Tsuas hnov nroo------------------txoj kev ua hluas
Txawm yuav ntuas--------------nws yeej tsis hnov
Niaj hnub phov-----------------ntshaw ntau tus poj
Tej tub loj-----------------------twb tsis muaj nyab
Tsis los pab---------------------nrhiav nyab los rau
Tej ntxhais yau----------------tsis nrog qhuab qhia
Nws tsuas xia-------------------kev hluas tsis txaus
Neej yav laus-----------------twb ntshaw muaj tub
Los nrog hlub-------------------nws tus kheej thiab
Lub neej tshiab-----------------luag thiaj tsis xyav
Yeej tsis xav----------------------txog yav tom ntej
Hos luag tej----------------------thiaj yuav tsis cem
Pheej ua phem---------------------tag npaum li koj
Tus Niam loj------------------------los koj tsis hlub
Koj Tej Tub-------------------------los hlub tsis tau
Ntshaw niam yau--------------------ua neej dab tsi
Yog koj li--------------------------koj twb tsis hlub
Tseem mus rub-------------------niam me los thiab
Coj lub siab------------------zais ntshis nyaum tsiv
Koj ua txiv------------------------------yog coj li no
Leej twg ho----------------------------thiaj li uv tau
Tau niam yau-----------------------los yeej tsis zoo
Koj lub moo----------------nrov ncha qeeg nkaws
Thoob teb chaws------------------txoj kev ua hluas
Koj tseem qhuas---------------------tias koj ua yog
Tsis nco txog-------------------------yus tus me poj
Tub twb loj----------------thiab ntxhais tiav Nkauj
Luag tsis xauj------------------vim tsis hloov pauv
ntxhais muaj Vauv-------------los twb muaj lawm
Cov tseem kawm----------------ntawv tsis tau tiav
Tsis pab nrhiav---------------------laj kam zoo rau
Tej tub yau-------------------kuj txom nyem kawg
Koj tub ntxawg----------------twb hlob tiav hluas
Lub neej puas----------------------koj ua tus rhuav
Vim koj yuav----------------------niam mos ab los
Niam loj nros-------------------------tsis xav ua noj
Koj tsis coj---------------------kom xws teb chaws
Hlub sawv daws--------------niam hlob niam yau
Muaj poj ntau-------------------yuav tsum coj raug
Pub sib npaug-------------------txhob cais niam loj
Yog koj poj-------------------hlub kom txhua nrho
Koj puas nco---------------Thaum mus yuav nws?
Yuav hlub xws--------------------lub teb lub chaw
Kom txhob ntshaw---------------lwm tus kev hlub
Yuav tsis pub----------------------lub neej kev tws
Tsis pub nws------------------nyob txom nyem hlo
Tus ntawm no-----------------------yog koj tus pog
Vim nws yog-------------------tus tiam ntawv raug
Ua nkauj nraug-------------puag thaum tseem yau
Koj thiaj tau-----------------------nrog nws ua neej
Ob leeg kheej-----------------twb haum txoj hmoo
Nws yeej zoo-----------------------koj thiaj xav tau
Tus niam yau------------------------los yog koj poj
Me niam loj-----------------------yog koj lub chaw
Tus koj ntshaw------------------yav ntuj thaum ub
Koj tus hlub-------------------------lub neej tag los
Lub cev mos------------------------koj tau tag nrho
Tus koj nco-----------------thaum koj tseem hluas
Nws cev puas-----------------------vim yog koj siv
Koj yog txiv---------------------nws yog leej niam
Vim ntawv tiam------------------koj noj tsis dhuav
Koj thiaj yuav--------------------vim yog nco dhau
Thiaj sib sau-----------------------los koom ua neej
Koj tus kheej--------------ntshaw nws tshaj plaws
Tag teb chaws-------------------koj yeej tsis nyiam
Tuav pheem liam-------------ua niag vwm ntsuav
Yog tsis yuav----------------------yeej tsis ua neeg
Nws tib leeg--------------------zoo tshaj txhua leej
Maiv tus kheej--------------------koj thiaj xav hlub
Yog tsis pub----------------------koj yuav ces tuag
Quaj kua muag---------------ntws nto ntawm plhu
Tsuas hnov hu--------------------txog nws lub npe
Thaum koj me-------------------nws tseem me yau
Neb yeej tau-----------------------cog lus ruaj khov
Yuav tsis phov---------------muab kev hlub rhuav
Maiv li yuav------------------------raws koj cov lus
Nws yog tus--------------------koj ntshaw tag nrho
Vim li no---------------------------koj thiaj tau nws
Lub siab ntsws--------------------tso pluav rau koj
Txawm yuav noj------------me mov ntxuag ntsev
Rub siab ntev--------------------yuav tsis cem yws
Hos ntawm nws-------------------xav tias koj hlub
Tsis muaj hnub------------------yuav muab koj tso
Niaj hnub no-----------------hlub kawg siab ntsws
Vim tias nws--------------------tau muab tus kheej
Thiab lub neej------------------------tso tag rau koj
Txoj kev coj-------------------yeej tsis txhawj txog
Vim koj yog------------------------tus tuav txoj sia
Thov tig ntsia---------------niam nkauj txhav qaib
Tig mus saib-----------------txiv nraug txhav noog
Nws yeej yoog----------------raws koj siab nyiam
Ua leej niam---------------------kav cuab yim neej
Hlub txhua leej--------------------tsis cais noj haus
Kev hlub txaus----------------------rau koj lub neej
Nws tus kheej--------------------coj siab tsis hloov
Yog koj hmoov-----------------tus thaum koj hlub
Thiaj muaj tub---------------------muaj ki puv tsev
Rub siab ntev------------------------tsis coj siab me
Hos koj ne!!----------------------puas nco yav tas?
Pheej fee das----------------------tsis nco txog nws
Niaj hnub yws-------------------------tsis xav ua ke
Tau niam me------------------txhob xav tias ntxub
Yuav tau hlub-----------------nws thiab nawb mog
Coj kom yog--------------------tsis txhob lam cem
Txhob siab phem----------------thiaj tau ntuj ntoo
Coj siab zoo------------------hlub kom txhua nrho
Vim hnub no---------------------twb nrog muaj tug
Neb twb yug--------------------------tub ki puv npo
Yeej tsis nco-----------------yuav ntshaw luag poj
Tub ntxhais loj-------------lawv ntshaw muaj txiv
Koj twb chiv---------------------muaj lub neej zoo
Vim txoj hmoo-------------------thiab lub ntuj pub
Koj tsis hlub------------------------ho yug lawv los
Ua neej nros----------------------xws puav dai taw
Yam lawv ntshaw-----------ntawm lawv tus kheej
Lawv lub neej-------------------muaj txoj kev ntoj
Xav kom koj-----------------------ho cev tes plhws
Kawg siab ntsws-------------txhawb lawv ua neej
Lawv tus kheej-------------------xav kom koj nres
Ho cev tes-----------------txhawb lawv thiaj tsheej
Mus ua neej----------------------lawv thiaj cia siab
Ho qhia thiab--------------------neej thiaj tsis piam
Txawm lawv niam-----------------koj tsis hlub los
Yeej tsis nros----------------------yuav tu siab txog
Lawv twb yog----------------------koj li roj ntshav
Ua zoo xav----------------------------yog koj tub ki
Yog yus li--------------------------yus yug rhev los
Kuv lus ntos---------------------------ces muaj li no
Thov koj nco------------------txog lawv thiab mog
Yog nco txog-------------------txhob tso lawv tseg
Tsis ua leg------------------kom koj ntxhov plawv
Txhob tso lawv------------------mus ua ntsuag ciaj
Tsis muaj nyiaj-----------------thiab tsis muaj kub
Tsuav sib hlub--------------------xwb ces yeej zoo
Muaj txoj hmoo-------------------nyob rau tiam no
Ntuj thiaj tso--------------------------los ua txiv tub
Thov txhob ntxub----------------------koj tej tub ki
Yog koj li---------------------noob roj noob ntshav
Yog luag xyav----------------lawv lub koob phem
Koj tsis cem----------------------thiab tsis cob qhia
Luag thiaj ntsia---------------------lawv zoo li tsiaj
Tsis tsim txiaj-----------------------los yog vim koj
Leej txiv coj-----------------------tus qauv tsis zoo
Koj lub moo-----------------------yeej puas ib yam
Thiaj muab tham-------------------ua lus paj huam
Tsis yog thuam---------------tsuas hais qhov tseeb
Thaum khib xeeb---------------ces mob koj xwb./.
( xaus li no )
Home
