Hmoob Ntuj Tshiab lub tsev PAJ HUAM & kab lis kev cai Hmoob

Hmong ntuj tshiab wrote:

Npau suav mus ntsib nkauj iab

Tus ntawm no---------------yog Hmoob leej tub
yuav los qhub-------------------ib tsab xov tawm
Lub keej khawm---------------txoj uas kev hlub
Ntuj thaum ub-------------------lub caij noj tsiab

Pem toj siab------------------nyob koom zej zos
Niaj hmo yos-------------------tuaj nyob sib zov
Sib xa xov--------------------txog txoj kev plees
Hais seev yees-------------------tsis xav tso tseg

Mob tej teg------------------ua plawv yuav nres
Yam tus ntses----------------tau pas dej ntshiab
Nyob kaj siab---------------mus lawm tag hnub
Lawv tsis pub--------------------wb los sib yuav

Cuag ntuj nchuav----------------lub ntiaj teb tig
Av qhuav nkig----------------------dej sib tw lau
Thiaj ncaim tau------------peb caug tawm xyoo
Koj lub moo----------------------twb ploj zuj zus

Wb tej lus--------------------------uas tau cog cia
Twb mob ntxhia----------------yuav rov qab zoo
Tseg tsis nroo---------------------ua siab tsis nco
Cas nag hmo--------------------ho rov npau suav

Pom koj tuav---------------------kuv ib sab npab
Zaum ib sab-------------------tham txog kev nco
Sim neej no------------------------cas nco ua luaj
Pom koj quaj------------------kua muag ntws sis

Kuv khoov ntshis-------------muab kuv tes tsho
Coj los so----------------------koj cov kua muag
Kuv khawm puag -------------koj rau xub ntiag
Ib me pliag----------------------koj kua muag tu

Hnov koj hu---------------------lub npe thaum ub
Hmoob leej tub-------------------yog tiag los dag
Zaum no ntag------------------xav kom yog tiag
Kuv tig kiag---------------------los tuav koj plhu

Tsa ncauj hu-------------------hais tias nkauj iab
Me nplooj siab-----------------tsis yog npau suav
Wb tham dhuav-----------------ces wb mus tsev
Taug tej kev------------------------nce toj qis hav

Ntoo siv lav-------------------tawg paj dawb vog
Noog poog pog-------------ntxais paj zom zaws
Paj zeeg tshaws---------------------rau ub rau no
Wb tig hlo---------------------saib rov pem roob

Pom hav xyoob-----------------hav ntoo kaj nrig
Hnov nraj yig----------------quaj suab xiv nqiab
Nyaj cuam liab---------------suav kau zom zaws
Me paj raws----------------tawg txhij tawg txhua

Hnov cuab npua-----------puag pem Hmoob zos
Suab kab nqos-----------------quaj kho siab tshaj
Txiv nqos ntsaj------------------siav kawg kiag li
Wb luag ntxhi----------------------mus de los noj

Kuv saib koj------------------------koj zoo li qub
Tseem ntxim hlub---------------li ntuj yav dhau
Kuv tseem yau---------nyuam qhuav tiav hluas
Wb tham txuas----------------tsis muaj tsawg lo

Ces wb ho-----------------mus nraum teb ntxhab
Hnov suab kab-------------quaj saum ntsis ntoo
Cua tuaj loo---------------------ua ntoo rawv tag
Wb tso dag------------------tham luag mob plab

Tau sib thab----------------------sib zeg taug kev
Pom txiv cev--------------------siav daj pes vog
Wb mus txog-------------puag pem roob npoob
Me ntsuag xyoob------------sam leej zom zaws

Wb tshwm plaws------------pem dej cawm siav
De nplooj txhiav------------------los ce dej haus
Sib tham txaus-----------------mus txog teb yeeb
Lus meej xeeb----------------yav puag thaum ub

Kev sib hlub----------------------rau sim neej no
Tuav npab hlo-----------------------tsis tso koj tes
Wb mus nres----------------pem roob xyuam yaj
Kho siab tshaj----------------tham ncig yuj yeev

Hnov koj seev---------------suab hais kwv txhiaj
Saib nram tiaj------------------hav ntoo roj hmab
Hnov suab kab-----------------quaj nrov zig ziag
Cua tuaj ntxiag------------------wb cev txias zias

Siab yuj lias-------------------xav nyob nrog koj
Wb tig zoj------------------------saib rov los tsev
Pom tsag kev----------------------si toj zim lawm
Puag tim dawm----------------lawv zos roob zoo

Pom hav ntoo---------------ntsuab xiab tsaus nti
Wb thiaj li----------------------saib rov tsuas daj
Kho siab tshaj---------------tsis xav ncaim mus
Koj tej lus--------------------tham seev yuj yees

Txoj kev plees--------------yav puag thaum ub
Kev sib hlub------------------nyob pem toj siab
Me nkauj iab--------------------sib pab ev nplej
Caij kwv dej-------------------tej chaw sib tawb

Hav paj dawb-----------------------fab ti kwj tse
Tim ncauj ke------------------kev ncaim nce toj
Kuv thiab koj------------------mus dob teb zaub
Noog puj daub------------quaj nrov ntsho nrooj

Hmoob tshuab nplooj--------nrov kho siab zim
Sab puag tim--------------------zos tiaj kuj yem
Nyob puag pem------------lawv roob teb npleg
Tshuab tsis tseg----------suab nplooj xiv nqiab

Nrov kho siab-----------------tshaj plaws li tiag
Suab nplooj ntsiag---------hnov hais kwv txhiaj
Puag nram tiaj-------------------teb hav naj phuv
Koj thiab kuv---------------------wb mus de zaub

Nram teb taub-------------------hav pob kws cauj
Wb kev nkauj------------------thiab kev ua nraug
Caij ntuj tsaug---------------------wb kuj sib cuag
Wb rov zuag-----------------tham lus tseem tseeb

Lus meej xeeb--------------wb tham khee kawv
Wb los sawv----------------puag pem dawm zeb
Lub suab ntxheb---------------tham kev sib nco
Sim neej no------------------------nco koj luaj li

Tham lus ntxhi-------------------rau koj tsis tseg
Hnub tuaj ntseg-------------------wb tig rov qab
Tuaj koj npab-------------------los txog ntug zos
Hmoob tuav cos -----------suab nrov doog diaj

Hnov suab tsiaj----------------sib tog zom zaws
Wb tshwm plaws------------ntawm nej tog tsev
Sib tham ntev-----------------tsis xav sib ncaim
Koj nyob nraim------------hauv kuv nruab siab

Cia xyoo tshiab---------------wb mam sib yuav
Kuv quaj zuav-------------------tsis xav rov qab
Koj siab fab---------------------tsis xav sib nrug
Siab kub lug-------------------txog kev sib tshua

Ob leeg ua -------------------kua muag ntws nto
Sim neej no----------------------wb nco luaj tiag
Quaj kawg kiag----------------vim sib nco dhau
Lawv thiaj tau--------------sawv phov txaj nrov

Kuv thiaj hnov----------------tsim dheev los no
Ua cas ho--------------------yog npau suab xwb
Kua muag twb-----------ntxaum hauv ncoo tag
Hais cuag dag---------------ntub tog hauv ncoo

Nws ntub loo--------------npaum xuas dej tsuag
Rov qi muag-----------------kom npau suav dua
Lawv sawv ua---------------tshais ntxov los noj
Dab ntub ploj---------------mas chim siab dhau

Zaum tsaws npau-------------kho kuv siab tshaj
Lawv tsis ncaj--------------muab koj yuam mus
Wb tej lus--------------------tau hais qhov tseeb
Thiaj khuam xeeb------------ua kua muag nrog

Nco los txog--------------------niaj hnub nim no
Kuv thiaj nco------------------------koj ua luaj li
Hnub thawm hli----------thiaj tshem tsis tawm
Kev txij nkawm--------plam thaum ntawd kiag

Koj tig ntiag----------------mus nrog luag nyob
Kuv siab mob--------------cuag kua txob ntsim
Lub siab chim-------------------mob tag ib tiam
Vim koj niam----------------koj txiv siab phem

Tau rhuav tshem---------------wb txoj hauv kab
Txoj kev tab---------------------lub cuab lub yig
Nws thiaj tig--------------------mus rau lwm tus
Hmoob leej nus-----------------thiaj tsis tau koj

Lub plawv ntoj-----------------ces siav yuav yaj
Nco koj tshaj-------------------nyob rau tiam no
Xyov yuav nco--------------mus txog hnub twg
Me phooj ywg-------------------tus kuv hlub e!!

Es koj ne!! ------------------puas nco kuv thiab?
Me nkauj iab-----------------------tus cev tsis loj
Koj niam noj----------------------dab tsi yug koj
Zoo tam zoj----------------me ntxhais nkauj hli

Es yuav ci--------------------mus thoob ntiaj teb
Ua rau peb--------------------nco nej txhua hnub
Vim tus hlub----------------mus yuav txiv lawm
Kev txij nkawm---------------thiaj ncav tsis tau

Nws thiaj dhau----------------------mus zoo li no
Kuv thiaj nco----------------------mus tag ib sim
Yeeb yog vim----------------zuag tau ntawv nco
Nyob tiam no-----------------tsis tau ntawv hlub

Kuv thiaj rub--------------------tsis tau koj npab
Ua kuv nyab-----------------mus nrog kuv nyob
Siab thiaj mob----------------cuag dej kub npau
Nws thiaj dhau-----------------mus ua dab neeg

Muab tham deeg---------------nrog huab cua ya
Li thov xa-------------------------ib tsab xov tuaj
Nrog suab quaj---------------saib koj puas hnov
Neej nram ntxov---------------nyob qub zej zos

Yog yuav tos------------------ntev npaum li cas
Siab khis ras------------------cuag rwj aws ncus
Tham lo lus------------------yeej hais tsis tawm
Kev txij nkawm---------------yog yuav rov pib

Saib puas ntsib-----------------nyob rau tiam ob
Neej pov plob----------------puas nphau rov los
Tej lus ntos-------------------------seev koj tas li
Zais tuag nthi---------------rau hauv nruab siab

Koj tus ntxhiab---------------kuv tseem cim cia
Ntsib mam qhia---------------rau koj lawm xwb
Hais txog wb------------------lub neej pem suab
Thov saub muab----------wb ntawv nyiaj keeb

Los nrog teeb--------------ua ntawv puaj txwm
Tuav keeb kwm-------------kom ho muaj ntxiv
Thiaj tsis chiv-----------------kev mob siab dua
Xws nthwv cua--------nplawm ntuj ntws lawm

Kom hmoov sawm------------wb txhob sib cais
Yog yuav hais--------------yeej tham tsis txhua
Kuv thiaj ua------------------npau suav pom koj
Siab ntsws ntoj---------------nco koj heev dhau

Thiaj li tau-----------------muab los tham tawm
Kom plawv nqawm---------siab ntsws ho nqig
Tej tsuj plig---------------------rov los puab cev
Siab ho ntev------------------ua neeg mus ntxiv

Yog yuav chiv------------------npau suav li qub
Puas muaj hnub--------------rov tau lawm mog
Tseem xav txog---------------lub neej yav dhau
Wb tseem yau-----------nco npaum nkauj hnub

Ntsib dab ntub-----------tseem tham luag ntxhi
Txiv nraug hli---------------nco koj tshaj plaws
Yog tham ntxaws-----------ces kua muag poob
Me nkauj Hmoob------------tus me ntxim hlub

Nkauj dab ntub------------txiv nraug npau suav
Tham tsis dhuav-----------------ua ke tsis txaus
Hais tsis xaus---------------------tej lus sib hlub
Nkauj dab ntub----------thiab nraug npau suav

Nws puas tshuav------------ib zaug lawm thiab
Me nkauj iab--------------------tus me neeg zoo
Yog puag loo-----------------mus yeeb yaj kiab
Thiaj zoo siab------------------os me leej muam

Tej lus xuam---------------thov tsis txhob chim
Vim koj dim-------------------mus ua luag nyab
Kuv thiaj npab-------------nyob lwj siab ntsuav
Li noog puav---------------------ua neej dai taw

Tsis muaj chaw------------------li no lawm tiag
Lub xub ntiag-------------------thiaj pw txias to
Seev tag hmo-------------------rau tej npoo txaj
Lub ntuj kaj--------------------los tsis xav sawv

Ntuj yuas lawv------------------tus me neeg zoo
Tsis muaj hmoo-----------------thiaj tsis tau koj
Yog tuag ploj------------------wb puas sib ntsib
Nywj vag ib-----------------nyob rau nruab dab

Tuav koj npab---------------haus paj zaub quag
Rov tau puag----------------nyob kuv xub ntiag
Paj zaub qiag-----------------li kab npauj npaim
Ya nrog nraim---------------------ua ke ywj siab

Mus thawj thiab----------------xeeb rov los dua
Kom txhob tshua--------------------ib zaug li no
Txoj kev nco------------------tsis pub kom muaj
Tej kev quaj--------------------tsis pub kom ntsib

Nplooj siab ib----------------tsis txhob sib ncaim
Tuav tes nraim----------nyob luag ntxhwb ntxhi
Zoo xws li------------------------rev paj tawg zoo
Puag koj loo------------------xwb tiag nkauj iab!!

( xaus li no )

Hmoob nt wrote:

[size=24]Hmoob lub kua muag ntshav

Ntawm no mus……………………yog lus paj huam
Yuav hais tshuam…………..Hmoob poj txwv yawm
Nws xeeb txawm……………..nyob moos nkaus lias
Muam nkauj nplias……………….thiab tsab yim huj

Teev tswv ntuj………………………los ua thawj coj
Haiv Hmoob loj…………………muaj koob nto npe
Nyob ua kev………………………...ib haiv sib hlub
Tsis sib ntxub………………...koom nyob ywj pheej

Kev ua neej …………………….tsis nco qab txhawj
Hmoob tsis thawj………………….….leej twg hlo li
Muaj txuj ci……………………….ua neej huaj vam
Suav kooj sam……………….dag Hmoob cais xeem

Hmoob txawm yeem……………...…li suav tau hais
Ntes Hmoob hlais…………..…….thiab ua rog raws
Hmoob teb chaws………….……thiaj nrog poob tag
Raug suab dag………………..cov ruam ntxeev siab

Coj ntau txhiab…………………...rov taw tuam ntuj
Qhia Hmoob txuj………………… rau suav lwj lam
Suav liab mam………..……..txo Hmoob txiv yawg
Hmoob thiaj tawg…………….……mus ua ntau pab

Khiav ua sab……………….….…thiab nyob ua sua
Ntau pab lua…………………….rau suav kooj sam
Hmoob thiaj plam……………teb chaws tuam tshoj
Ho khiav zoj……………………..los dhau ciam teb

Thiaj muab ntxheb……..……ntos Hmoob lub keeb
Nyob moos theeb……………….teb chaws cob tsib
Hmoob rov pib…………….…….sawv ua rog vwm
Tuav keeb kwm……………….raws Hmoob txuj ci

Es thiaj li…………………………..yog vwj paj cai
Sawv tsis ntshai……………………los ua thawj coj
Kev nyob noj………………….thaj yeeb nyab xeeb
Hmoob tua txeeb……………….kev muaj vaj huam

Fab kis yuam ………………………thiab sau se loj
Teev niam toj…………………...raws fab kis tawm
Muaj tswv cawm…………….....los muab hais xaus
Txawm pib nkaus…………………...ua rog cob tsib

Nyab laj pib………………………..ua rog loj nteev
Nyob nram xeev……………….txhua txhia lub yeej
Viej koom keej………………….ua rog kawg nkaus
Nkagtuaj ntaus………………….….tub rog mes kas

Nyob lub nras…………………nroog tiaj rhawv zeb
Ua rau peb………………………...…tsis zoo ua noj
Hmoob tus coj……………………yog  hlob vaj pov
Mes kas thov………………....kom Hmoob mus pab

Ua laj kab……………………..thaiv lawv haiv neeg
Hmoob thiaj ntseeg………………...mes kas lus cog
Peb sau zog………………………...ua luag tub txib
Nyab laj pib……………………….ua rog tuaj ntaus

Keeb hauv paus………………………..ces yog li no
Pib swb hlo……………………. .lub yeej pham thiv
Hmoob thiaj tsiv………………..….los rau looj ceeb
Nyab laj txeeb…………………...ntaus nce tuaj mus

Swb zuj zus…………………......tas lawm tsheej tog
Ob phav nplog…………………..thiaj los  sau ntawv
Cog lus tawv…………………....muaj kaum yim nqe
Sau ua ke…………………………..tsis txhob sib tua

Los sib sua……………………koom nyob ywj pheej
Kom txhua leej…………........tsis muaj txim txhaum
Dag hais haum………………...nplog liab pib nrhiav
Ntes mus txiav……………………tsis pub neeg pom

Hmoob cov nom……………..…ploj lawm coob leej
Kev paub meej……………..……yog phas nyas npis
Nplog sab xis………………….……….46 txhiab tus
Raug coj mus…………………..….tua rau moos xais

Nrog huab tais………………....lawv tsev neeg kheej
Cov txiv neej…………………...…..tsis hais leej twg
Yeej ntshai rwg……………….…....ib tsam raug ntes
Muaj npe ces………………........yeej raug txhom tag

Yeej tsis dag……………………..muaj tseeb tiag tiag
Thiaj sau kiag……………………..tseg ua puav pheej
Hmoob lub neej………………yav tas los lawm
Rau nej kawm …….............thiab tseg ua tshuaj

Cov tsis tuaj……………….tham ntshai kawg nkaus
Loj me laus………………..piav hais tib yam
lawv tuaj tham…………….qhia cov ua ntej
peb Hmoob nej…………….raug luag muab txov

hlob vaj pov…………………thiaj li khiav ntab
dhau thaib sab………………mus rau nom nrim
nplog liab tsim………………cov nyob tom qab
Rog cob fab………………..li pib sawv chiv

Teev niam txiv……………..cob fab tswv ntuj
Yog yam txuj………………..tsis tau hnov dua
Hmoob sawv tua……………nyob roob phuv npiab
Xyoo ib txhiab………………..cuaj puas xya caum rau

Hmoob sib sau………………yeej coob heev diam
Muaj poj niam……………….nrog nraim txhua pab
Npe cob fab ……………………yog nplog tis rau
Peb Hmoob tau……………..ib lub npe zoo

Muaj txoj Hmoo……………..ua neej huaj vam
Leej twg tham………………txog npe cob fab
Ntuj tseem pab……………….tsis pub kom ploj
Pab thawj coj………………nyaj nej yuav hnov

Lub npe nrov……………………rau yav nram ntej
Qhia rau nej…………………….tias yaj xaiv suav
Sawv los tuav…………………..pawg pav tiv kas
Kaus mas das…………………cim zoov zuag hawj

Ua tuam thawj………………….tuav pawg cob fab
Nkawv ob pab………………..sib koom ua luag
Sawv los puag ………………..peb haiv me Hmoob
Nkaum toj roob……………….hauv pes txhua tag

Nyob tiv nag……………….sawv nrog lo av
Zaum tiv tshav…………….nyiaj tshaib yoo nqhis
Sawv tswj lis…………………hauj lwm tauj tab
Muaj ib pab ………………..yog cov pub thawj

Niam na kawv……………….los teev koom txoos
Lawv kuj khoos………………..tua nyob nas tub
Yog kha xub………………..ua tus tuam thawj
Cov pub thawj………………..coj fab tub rog

Yuav piav txog……………….cov khej kaum ob
Phu koos qhob………………..yog xyooj ntsuab pov
Coj ib cov…………………….pawg tub rog coob
Nkaum toj roob………………rau sab phu npas

Kaus mas das…………………..yawg vaj nchaiv hwj
Sawv los tswj …………………..sab puag thab xuab
Pab Hmoob ntsuab……………….yog vaj tsav kab
Coj ntau pab…………………….nyob rau tsua tawg

Muaj ib pawg………………..sawv sab qaum teb
Li muab ntxheb…………………rau nej nrog hnov
Muas txawj pov…………………ua pawg khov kho
Nyob tsua tho……………………hav pas dej ntshiab

Coj ib txhiab………………………..tus tub rog leem
Hav naj theem…………………..yog vaj tswv kim
Sawv los cim…………………….lub me npe Hmoob
Nrov mus thoob………………..toj roob phuv npiab

Pab naj hiab……………………..yog vam kaim vwj
Sawv los tswj…………………sab puag moos mauj
Sib cog lauj…………………….cov qub riam phom
Sawv kwv nyom……………….raws nplog liab tua

Nyob roob qhua………………..zos phu pham cob
Hos cov nyob……………………teb chaws moos pheeb
Thoj tooj neeb………………….. ntawm pawg Hmoob thoj
Sawv los coj………………..tua nyob tiaj qhib

Pab ham ib……………………nrog cov naj gwj
Pawg tsua qwj………………….yog yawg lauj thoob
Ntau pab Hmoob………………nyob roob phuv xam
Lawv kuj tham………………..nrog cov naj los

Mus nrog tos…………………cov kieb xais qhais
Sib cog pais………………….koom siab zov kev
Pab phuv xev…………………..yog yawg koos ham
Coj thab ham…………………tua lav nees nkaum

Lawv kuj caum………………..nyab laj nas xus
Hmoob tau mus……………….tua choj kev loom
Lawv sib koom………………….siab ua kawg kiag
Pab roob yiag………………yog koo txawj nchai

Sawv tsis ntshai………………nrog yawg yaj neeb
Nkawv tua txeeb……………..sab roob pham guj
Teev tswv ntuj……………….los nrog thaiv ntag
Roob xyoob dag……………….nrog cov phuv hej

Hmoob tuav nplej………………ua mov phaj tshab
Coj ntau pab…………………tua qhov txhia chaw
Kab lwj hlaw…………………yog nyab laj khiav
Hmoob tau txiav……………….ntau txoj kev tsheb

Nyob tsis deb……………………….ntawm sab hoib qha
Qhaib nab qa…………………..kuj raug Hmoob tua
Nram liaj qhua………………….Hmoob kuj txeeb tau
Pham au lau………………………..Hmoob kuj tau nyob

Qab tsuas xob…………………….yog xaiv suav pawg
Nyab laj tawg……………….khiav txog looj ceeb
Hmoob kuj txeeb………………tau nroog moos oo
Ntau lub xyoo…………………coj poj tub se

Ua nyob ke ………………….tiv tua tsov rog
Yuav piav txog……………….sab zos dej tshuam
Yaj txoov tuam……………..ua tuam thawj coj
Kev nyob noj……………….ti sab phuv laj

Zov nyab laj………………txog pham thab khoob
Xyooj vam soob…………..nyob sab thas xes
Sawv los nres………………roob hav xam leej
Thiaj qhia meej……………rau nej paub tseeb

Yawg xyooj xeeb…………..nres sab nab loom
Nws kuj koom …………….sab puag moos oom
Peb kuj pom………………..yawg lauj paj npliam
Thau phom riam………………phom peb cuv tsib

Sawv los qhib………………..tua cov nplog liab
Yawg qha kieb……………….thiab yawg npus cas
Plhu puas tas………………..khiav tsis saib qab
Rau moos cab…………………lawm tiag cov npawg

Lawv cov yawg……………….sawv los nrog coj
Kev nyob noj………………….rau ntuj qub qab
Kuj tshaib plab………………….thiab txom nyem heev
Rho nyiaj keev…………………..yuav mos txwv tiv

Nrhiav kev tsiv…………………thiaj tshwm sab thaib
Li tuaj laib ………………………rau teb chaws no
Tshuav ib co……………………..tseem nyob xub tsuag
Cov seem tuag……………………..thiaj li yog peb

Li muab ntxheb…………………..rau nej paub zoo
Noj caus ntoo………………………ntxuag me nplooj hmab
Ntuj qub qab…………………….kuj tseem tshuav coob
Nyob toj roob ……………………tseem kwv riam phom

Nplog liab txhom…………………..thiab raws lawv tua
Lus moo cua………………………peb tseem hnov thiab
Mob lub siab……………………npaum kua txob ntsim
Txoj kev chim…………………….tsis muaj caij xaus

Hmoob tej laus…………………….thov pab tswv yim
Kom lawv dim………………………thiab coj lawv tuaj
Txoj kev quaj………………………thaj yuav tsis pom
Thov cov nom……………………..nrog peb mus hais

Vim nplog cais……………………thiab tsis hlub lawv
Peb sau ntawv…………………….mus rau koom haiv
Kom lawv xaiv…………………….kev rau Hmoob taug
Thiab tsis raug……………………..nplog muab lawv tua

Li tej npua…………………………thiab tej me qaib
Cawm puas laib…………………..cov nyob hav zoov
Noj mov soov……………………ntxuag mov qos ncoom
Thov sib koom ………………….siab mus nrog tos

Cov nyob los…………………….lawv txom nyem kawg
Nej cov yawg…………………….lus siab puas ras
Peb xav mas……………………..lawv tuav lub koob
Ntawm peb Hmoob……………..lub neej pem suab

Thov peb muab………………….lawv ua keeb kwm
Nrhiav kev tshwm…………………cev tes mus pab
Cov hav fab………………… raws peb kom laib
Txoj kev tshaib……………..thiaj yuav tsis ntsib

Li paub pib………………….lub neej tom ntej
Hos lawv tej…………………txiaj ntsha txiaj ntsim
Peb muab cim………………….sau rau nruab ntaub
Qhia Hmoob paub…………………rau cov xeeb leej

Sau hais meej……………………qhia cov xeeb ntxwv
Txhob muab lwv………………….cia ua puav pheej
Hmoob lub neej…………………….nyob rau xov tshoj
Txoj kev ploj………………………Hmoob tuag lawm coob

Puv toj roob……………………..thiab cov kwv ha
Lub koob ncha……………………mus thoob ntiaj teb
Luag paub peb…………………….ces neej Hmoob tshwm
Hmoob keeb kwm……………………yuav nrog tshwm los

Kuv lus ntos…………………………..mas muaj li no
Thov nej nco………………………cov ntuj qub qab
Nyob hav fab………………………ua npua teb dais
Thov pab txais………………….thiab hlub lawv mog

Txawm  nyob nplog……………….los kuj tib yam
Vim lawv plam………………….poob rau tom qab
Los thaib sab…………………..nyob rau qhov tsua
Rau thaib tua……………………thiab mag thaib ncaws

Thaib muab raws………………….tuaj vaj tsev nqha
Hmoob tej ntxa……………………kuj raug thiab khawb
Zos dej dawb…………………los raug thiab tsim
Tsis muaj txim………………..kuj lam raug nkuaj

Thaib tseem tuaj………………….ncaws tawm vaj tsev
Nyob ntug kev…………………….mov noj tsis muaj
Niaj hnub quaj……………………los kua muag ntshav
Ib qho av………………………..tsis muaj ua tsev

Rub siab ntev…………………….npaum li naj khab
Noj nplooj hmab…………………nplooj ntoos yug siav
Thiaj muab piav………………….tej kev txom nyem
Raug thaib lem………………….thiab raug nplog tua

Li tej npua………………….thiab tej nyuag tsiaj
Muab cuab phiaj………………sim hmuv sim phom
Yog nej pom……………………puas pab nrog hlub
Raug thiab dub …………………muab yuam rov nplog

Ntau tus pog………………………thiab ntau tus txiv
Raug nplog siv…………………muab coj xauv tes
Quaj nrov les…………………..nyob tsev tsaus ntuj
Txawm muaj txuj…………………..los yeej tsis dim

Nyob pw txim…………………………ploj ntsiag tag tiam
Tshuav cov niam…………………….thiab cov uas yau
Ces nyo hau………………………..rau nplog lawm tiag
Thiaj sau kiag………………………tseg ua paj huam

Qhia cov ruam………………………kom paub ib yam
Thov muab tham…………………….khaws tau kom tseeb
Kev khib xeeb……………………….mob Hmoob lub siab
Mus ib txhiab……………………….tsis muaj hnub ploj

Tsis txhob ntoj…………………….txoj kev no mog
Yog ua rog……………………….tsis muaj luag pab
Xws cob fab………………………ces kawg kev tws
Txawm yuav yws…………………..ntiaj teb tsis txawb

Yog mab dawb………………………luag yeej tsis khes
Yam cov ntses……………………..nyob rau luag pas
Maj mam nyas……………………..noj ib tug zus
Ntev xyoo mus…………………..ces kawg tu noob

Peb cov Hmoob…………………….nej puas to taub
Txawm paj kaub………………….twb raug luag ntov
Hais txog cov……………………….muaj txoj sia nyob
Xws yawg hlob……………………….nai phoo vaj pov

Raug luag txov………………………zoo tib yam li
Luag sib ntxhi………………………soj ntsuam Hmoob qab
Yog twg thab………………………ces kawg raug txo
Zoo li no………………………….nej xav li cas

Kuv xav mas……………………tu siab tshaj plaws
Nej sawv daws…………………puas pom thiab os./.

( xaus li no )[/size]


Text copyright ©  by Dee Vang in jun 04 / 2011.
All rights reserved by Hmoob ntuj tshiab kev sau txuj ci.
Please call or writing to Hmoob ntuj tshiab kev sau txuj ci.
for permission of any reproduction. Att:  Hmoob ntuj tshiab- kev sau txuj ci,
1167 Thorndale St Green Bay, WI 54304