Tsab ntawv nrhiav tus qub puag thaum ub
Hmoob ntuj tshiab-------------------tsab me ntawv hlub
Nrhiav tus qub----------------------me hluas nkauj xwb
Nws kuv wb----------------------------tau cog lus lawm
Teem sij hawm----------------------rau lub xyoo tshiab
Ntuj ntxhov niab-------------------lub teb ntxhov nyho
Kuv thiaj ho-------------------------tau plam nws lawm
Hmoob nkauj ntxawm--------------tus zoo ntxim hlub
Poob tim ub-------------------------rau teb chaws nplog
Kuv thiaj nrog----------------------cov laus khiav lawm
Tau tsiv tawm---------------------mus txawv teb chaws
Thiaj plam plaws-----------------------txoj me kev hlub
Rau tim ub-------------------------------sab ntuj qub qab
Peb khiav ntab--------------------------tuaj rau thaib teb
Ncaim mus deb-------------------------rau teb chaws no
Kuv thiaj nco--------------------------------nws ua luaj li
Thiaj muab ntxhi--------------------seev qhia nws paub
Xya caum plaub------------------------thaum lub tsib hli
Suav txij li--------------------------hnub kuv ncaim mus
Nws lo lus------------------------------kuv twb tsis hnov
Ib tsab xov-------------------------------los yeej tsis pom
Lub meej mom-----------------------tus zoo ntxim tawb
Hmoob roob tsawb-------------------tus me ntxim tshua
Caij ntuj qhua------------------------wb tham luag ntxhi
Siab quaj dhi----------------------------xav coj nws mus
Kuv mam pus------------------------nws nrog kuv khiav
Npaj tsis tiav------------------------------thiaj coj tsis tau
Lub siab npau------------------------npaum dej kub hlab
Npaj rov qab-------------------------mus nrhiav nws dua
Rau ntuj ncua----------------------------txoj me kev deb
Ib rooj teb------------------------------yav puag tom tsev
Tej qub kev-------------------------------wb me chaw so
Niaj hnub nco----------------------------mov tsis xav noj
Nco wb txoj-----------------------------kev nyob sib zov
Sib xa xov-----------------------------txog txoj kev plees
Hais seev yees----------------------------tsis xav tso tseg
Mob tej teg---------------------------ua plawv yuav nres
Yam tus ntses-------------------------twb tuag ntab ntab
Tsis pom qab----------------------------yuav hais lo twg
Me phooj ywg--------------------------tus kuv hlub es!!!
Es nws ne!-----------------------------siab puas fav xeeb
Lub neej keeb-----------------------yav ntuj puag thaum
Peb sib yaum----------------------mus lov ntsuag xyoob
Puag tim roob---------------------------zos dej tsua ntab
Tau sib thab------------------------------sib zeg taug kev
Sib yaum ev----------------------ntsuag xyoob ntiv qeej
Nws tus kheej---------------------------tsis nco nroo sab
Mus tsheej pab---------------------seev suab kwv txhiaj
Zaum tsheej phiaj---------------------lom zem xauv npo
Yeej tsis nco-----------------------txog kev txhawj xeeb
Lus tseem ceeb----------------------tau tham khee kawv
Tuav tes rawv------------------------------ua ke tag hnub
Kev sib hlub---------------------------thiab kev sib tshua
Tau tham txhua-------------------txaus siab tshaj plaws
Peb sawv daws----------------------txhua tus feem coob
Teem roob tshoob-------------------rau lub xyoo tshiab
Yeej txaus siab-----------------------txhua tus tub hluas
Teb chaws puas--------------------nrov ncha mus thoob
Peb cov coob----------------------------sib tw khiav ntab
Dhau thaib sab------------------------mus rau nom nrim
Lub siab chim---------------------------tau tsa suab quaj
Vim ncaim tuaj-------------------------rau teb chaws no
Kuv thiaj nco----------------------------nws ib leeg tshaj
Txoj kev npaj-------------------------------ho tsis sib tau
Los sib sau---------------------------ua neej sawm txhiaj
Muam maiv nyiaj---------------------tus me ntxim tawb
Plu mos dawb-------------------------lub suab seev yees
Ces ntxhee yees-------------------cuag nkauj ntsais lias
Ncaim nab fais------------------------lub zos roob tsawb
Nkauj siab dawb---------------------------tus cev tsis loj
Nws niam noj-----------------------------dab tsi yug nws
Nplooj siab ntsws---------------------zoo cuag nkauj hli
Es thiaj ci-----------------------------mus thoob ntiaj teb
Ua rau peb--------------------------------nco nws ua luaj
Puas yuav muaj------------------------hnub rov sib ntsib
Ntshe yuav pib--------------------------tham kev sib nco
Tsheej tag hmo-----------------------los tham tsis dhuav
Kev npau suav---------------------------los tham tsis tag
Lus tso dag--------------------------------los yeej ib yam
Txoj kev tham----------------------ntshe tsis pov khawv
Ntuj yuas lawv-------------------------tus me nkauj xwb
Kuv mas twb-------------------------niaj hnub seev nws
Nplooj siab ntsws--------------------nco txog hnub ploj
Siab xav zoj--------------------------puas rov ntsib thiab
Ua nplooj siab--------------------------rov fab lwm tiam
Yog nws niam------------------------nws txiv lawv kam
Rov mus tham-------------------------thiab coj nws mus
Ua kuv tus----------------------------mus nrog kuv nyob
Kuv muaj mob-----------------------thiaj muaj nws saib
Yog nws tshaib-----------------------kuv nrhiav nws noj
Kuv mob loj----------------------------ces nws nrog kho
Sim neej no-------------------------------nco nws ua luaj
Tsa suab quaj--------------------------vim tsis ntsib nws
Kuv siab ntsws-----------------------------ua voj ua vias
Yuj li lias-------------------------------------rov qab li zoj
Plawv thiaj ntoj-----------------------cuag siav yuav yaj
Nco nws tshaj---------------------------nyob rau tiam no
Nws puas nco-------------------------------tus zoo li kuv
Wb chaw thuv------------------------ntshe twb tuaj nroj
Ciav zoov loj-----------------------teb hav ntshuab tsws
Hais txog nws-------------------------puas nco kuv thiab
Me nplooj siab--------------------------tus kuv nco tshaj
Yeej tsis daj-----------------------------os me leej muam
Lus paj huam------------------------thov tsis txhob chim
Yeeb yog vim-----------------------------lub ntuj lub teb
Ua ntxhov ntxheb-------------------------tsis tiaj tsis tus
Thiaj ncaim mus------------------lawm ploj ntsiag niab
Mob kuv siab------------------------ib nthwv yuav poob
Nco nkauj Hmoob----------------------txoj me kev hlub
Neej thaum ub---------------------nyob ntawm nws tsev
Kuv dua kev-------------------------nws suab luag ntxhi
Ntuj tsaus hli-------------------------sawv ntawm ib sab
Tuav nws npab----------------------thiab hnia nws plhu
Hnov nws hu------------------------------tias koj tuaj los
Cov lus ntos------------------------tseem nco ntsoov cia
Zais tsis qhia----------------------------rau leej twg paub
Niaj hnub saub------------------------txog nws xwb tiag
Tib me pliag-------------------------ncaim nws mus deb
Ib rooj teb------------------------------sab ntuj nraum ub
Tus kuv hlub--------------------------nco tshav ntuj nrig
Ntuj puas tig----------------------------------wb los ua ke
Noj sib ce---------------------------------rov tau sib hlub
Li thaum ub----------------------------lub teb chaws zoo
Ncaim ntau xyoo--------------------ntshe nws hnov qab
Ua luag nyab----------------------------muaj tub muaj ki
Luag ntxhawv ntxhi-------------------nws tej qaws tiab
Tsis kho siab----------------------------li kuv lawm paub
Tsis hnov saub--------------------------los txog hnub no
Muab nws nco------------------------tsis paub yuav ploj
Twb mus ntoj--------------------nrhiav nws hauv nplog
Kuv mus txog-------------------------------tsis zoo li qub
Yav thaum ub--------------------------nyob zos toj roob
Tej zos Hmoob------------------------nyob pem toj siab
Huab pos niab-------------------------saum tej hauv tsua
Muaj huab cua-------------------nplawm ntws txias zias
Xav hais tias--------------------------yuav tsis sib ncaim
Tseem xav nraim-------------------nrog nws txiav taws
Lub teb chaws-----------------------yeej pauv txawv tag
Cuag hais dag----------------------nplooj tsis paub hlav
Pom pa av--------------------------------ncho oov li niab
Tej me kiab-----------------------------thiab cov me khw
Tsis hnov tsw--------------------------------pa qij pa dos
Qub zej zos--------------------------pom ciaj hav ntxhov
Kuv thiaj rov----------------------------los teb chaws no
Txawm yuav nco-------------------nws tshaj txhua yam
Ntshe tsis tham------------------nrhiav nws ntxiv lawm
Hmoob nkauj ntxawm----------------tus me ntxim hlub
Thiaj muab qhub---------------------seb nws puas hnov
Neej nram ntxov---------------------nws puas nco lawm
Cev nkauj ntxawm-----------------------puas zoo li qub
Hmoob leej tub---------------------tseem nco nws kawg
Teb chaws tawg------------------------ncaim tuaj tav no
Yeej tseem nco--------------------txog nws kawg nkaus
Cev lam laus-----------------------------siab nyob li qub
Teb av dub----------------------------yeej tseem cim tau
Puag thaum yau-------------------------los txog hnub no
Nws puas nco------------------------tias tshuav leej twg
Tus phooj ywg-----------------------tau nrog koom siab
Tham ntuj tshiab-----------------tawm plaws ntuj tsaug
Kev nkauj nraug--------------------yav puag thaum yau
Puas nco tau-------------------------nws lawm os mog./.
Xaus li no