Lub Yeej no yog nyob ze sab Qaumteb ntawm Nong Khai, Thailand uas nyob sab ntug dej Mekong River npuab ntsia ntsoov rau tim Nplogteb (Laos) lub tsev kho mob Mahasort(Mabhamxauv). Lub yeej hais los no nws me me xwb yog yuav muab hais los tsis tsimnyog hu ua ib lub yeej, nws tsuas phim hu ua Chaw Kaw Neeg no xwb vim nws nyob npuab kiag lub tsev Tub Ceevxwm (police station) hos thaj chaw tsuas luaj li 4 lub tsev loj los yog li 150 feet x 150 feet tej xwb. Raws li yav ua ntej ntawm xyoo 1984 lub 6 hli uas kuv tau los nyob ntawd muaj ib cov kwvtij Hmoob tau los nyob uantej mas lawv tseem nyob hauv lub vaj tsuas xov lajkab ncig xwb. Hos thaum peb los txog lawv twb muab thaj chaw no khawb ua ib tug kwj dav li 10 feet ncig thoob plaws ces tso dej los rau tus kwj mam li tuam choj mus rau hauv li tso Hmoob thiab Nplog mus nyob rau hauv thooj av uas tsuas dav li 75 feet x 75 feet lawm xwb.
Lub yeej no nyob tau txomnyem kawg kiag li vim tsis muaj txaj pw lawv tsuas yog muab ntoo coj los teem saum npoo av ces muab nruab pua pw xwb. Yus pw ib hmos tagkis sawv los cuanab twb nkag los nrog yus pw thiab yus muab cuanab tais q.uav paim lo yus thiab pam tag hos tsis tas li yoov tshajcum mas coob tshaj plaws. Lub chav dej tawm rooj los nyob npuab kiag thiab ib hmos xwb twb puv tag hos q.uav phwj tawm sab nraud tsw ntxiag ua rau yus noj mov tsis qab.
Xav Kom Hmoob Nco Ntsoov
Peb los nyob hauv Thaib hlub Nplog dua Hmoob. Tos kuv hais li Thaib faib mov tsawg heev rau Hmoob noj xws li 5 leeg koom ib phaj mov nplaum uas yog tiag ces tsuas txaus li 2 leeg noj xwb hos Nplog li mas lawv noj tag mov tseem seem tseg cia rau hauv pobtawb tseg. Peb Hmoob tshaib plab txhua txhua hnub, feem ntau peb cov hluas ces mus luaj Thaib cov tsev Haujsam pub dawb es lawv pub mov mog thiab ncuav rau peb noj thiaj nyob taus dhau hnub. Muaj ib hnub Thaib ua ntsuag qaub rau peb noj, peb hajyam tshaib plab vim qaub ua rau mov xam sai. Hnub ntawd peb thiab Nplog thiab Thaib tau sib ceg kiag tom qab ntawd Thaib thiaj li muab mov ntau zog rau peb noj. Thaib siab phem heev lawv ua ib cov nthav nyuj xyaw taub txaij thiab ntses pam thum xyaw tau txaij xwb ho kuv noj tau 2 zaug lawv tseem muab cov plaubhau pojniam ntsis es ua tej pob pav me me luaj li tej pob xov ua pajntaub pov xyaw cov zaub uas muab nqaij ntses rig tag, xav tias tsis noj los tshaib ua luaj li ces lam muab noj lawm thiab. Tsis tag li ua ntej peb los nyob hauv muaj ib pab kwvtij Hmoob uas los ua ntej ntawd muaj ib khub Niamtxiv Hmoob tus Pojniam tseem raug cov tub Ceevxwm Thaib dag hais tias tsam lawv nyiag kev khiav mus rau Yeej Vinai ces cia muab cov txivneej thiab pojniam nyias kaw nyias thiaj li khiav tsis tau, Thaib tseem coj tus Pojniam mus deev yuav luag txhua txhua hmo.
Kuv thov muab sau cia rau peb kwvtij Hmoob, tej Tub Ki kom sawvdaws nrog paub tias luag lwm haivneeg tsim txom thiab lawv tau ua phem rau peb txhua yam. Kom peb ntsoov tej kev phem no peb txawj sib hlub rau lub neej yav pem suab, yog tias HMOOB TSIS SIB HLUB HMOOB ces tsis muaj leejtwg yuav hlub Hmoob.
Zoo siab thiab ua tsaug koj tuaj nyeem.