Yeej Thoj Nam Nab Phoos

**koojziagkabzaug** 10th March 2010, 9:58 am

koojziagkabzaug: Moderator; Messages : 3529
Date d'inscription : 2010-02-28

Post n°1

Yeej Thoj Nam Nab Phoos

koojziagkabzaug 10th March 2010, 9:58 am

YEEJ THOJ NAM NAM PHONG 5/11/1975-3hlis 1976

NCAIM NPLOG TEB

Hnub no yuav ua ib siab......... tuaj tham txiaj saub kev seev
Thuaj tham lub neej............................... yav ntuj thaum ub
Muaj ib ntus................................................. hauv lub neej
Ib leeg ib zaj dab neeg.......................... tsiv teb tsaw chaw
Hnub yuav khiav ntawd...................... yog ib hnub Tuesday
Yav hnub qaij................................. thaum lub 5hlis tim 14
Muaj neeg paub............ tias Yawg Hlob Vaj Pov yuav khiav
Lawv tuaj hais qhia.................... kuv nyob tom tsev ntawv
Tias yuav sawb................................ lawj hmo ntawd ntag
Taig kis ntuj kaj............................... twb qev kauv txhais
Ntuj teb fos ntais..................tsis xav txog tias yuav ncaim
Tej npoj yaig............ mus tag ib sid yuav tsis rov sib ntsib
Lub siab lwj dhi......... hais tsis tau ib los rau leej twg paub
Vim ntshai plaub.......... thiaj ua tij ywm ua tav muag ntsia
Lo lus ncia....................................... khuam kuv lub siab
Lub plawv dhia........................... mob lub siab khoob lug
Hu kiag 3 tug.......................... ntxhais hmoob los sab laj
Seb yuav ua cas..................................... thiaj tau tawm
Daj zoj tias tshoob kos rawm.................... nyob tsev tos
Mus ib hmos............................................ yuav rov tuaj
Mus sau zoj yuas( sign)......................... xav zoj tsis tau
Khaws nkaus lub tais hlau............. cob ntxhais Nplog tes
Nyem ua ib teg................................... ntxhi lo lus kawg
"Kuv me Nplooj tsawb......................yog kuv tsis rov los
Koj khaws qhov no.......................... tau saib dab muag"
Tso tes plhuav..................................... nkag kiag tsheb
Lem kiag ib tsem kev........ tig rov los ntsia lub qhov rais
Cov me npoj yaig................................. co tes ntwb tos
Lem tsheb hlo..................................... rau sab tsev tod
Siab xav zoj... zaum no yuav tsis pom ib zaug ntxiv lawm
Kuv lub teb chaws................ cas yuav zoo nkauj ua luaj
Txoj kev ua ntsuag.................. tseem yuav tshwm ntxiv
Ntsuag niam ntsuag txiv.......... ntsuag phooj ntsuag ywg
Ntsuag teb ntsuag tswv............ txij hnub ntawd los...tsis rov ntsib leej twg li lawm...

LUB NEEJ NYOB YEEJ NAB PHOOS

Nab Phoos yog thawj thawj lub yeej Thoj Nam Hmoob nyob Thaib teb. Yog As Mes kas npaj tos 1000 tus Hmoob nrog Yawg Hlob Vaj Pov khiav. Thaum CIA yuav tso Nplog teb tseg, lawv tau hais rau Yawg Hlob kom khiav, Yawg Hlob tsis kam khiav ib leeg, lawv thiaj tias yog li ces peb coj 1000 leej Hmoob nrog koj, koj puas kam? Yawg teb tias kam ces lawv thiaj npaj lub qub yeej cob peeb zeej tos Hmoob thoj nam. Lawv tsis nco qab faj tias hmoob yuav khiav coob npaum ntawd thiab.

Thawj thawj cov Hmoob khiav yog tuaj ncaj qha pem Looj Ceeb tuaj, li nej tau paub los lawm. Lawv caij dab hlau ncaj qha tuaj tsaws rau Nab Phoos.

Cov zeeg ob yog cov xub khiav tuaj rau Nong Khais thiab Si Xieng May, Thaib muab car thauj lawv los mus pw ib cov Hotel zoo nkauj heev ntawm ntug Udon Thany thiab nqa ib cov zaub mov qab heev, muaj ntau ntau yam noj tuaj rau lawv noj. Pw ib hmo taig kis kaj ntug, nqa tshais tuaj rau lawv noj tag ces muab car tuaj tos lawv mus caij dav hlau mus rau Nam Phoos.

Cov zeeg peb, lawv khiav hla dej rau Nong Khais , ces Thaib muab car mus tos lawv tuaj rau Nam Phoos. Pab los kawg nkaus nov, lawv los txog yog kaj ntug ntawm Nab Phoos, tsis zoo li txhua zaus es los txog tsaus ntuj. Kuv pom lawv los coob coob, tsis muaj chaw nyob, los nyob pawg lug ntawm tej thi tsev Loos Mom, muaj ib tug tub hluas, nyuam qhuav nto hluas, yog neeg npag tsawv tuag ( tej zaug yog tuag hauv tsheb los lawm). Lawv muab nws xyab rau ntawm thi tsev Loos Mom, tsis muaj dab tsi vov li, nws nyob ib leeg rau ntawd, tsis muaj neeg zov nws...Yog thawj thawj tug tuag nyob Nab Phoos.

Nyob Nab Phoos kuj yog tsis muaj kev puas ntsoog loj pes tsawg. Raws li kuv nco tau, nyob ib xyoo ntawd muaj: Nyiaj Lwm lawv peb kwv tij txiv tub, Lis Txiaj Vaj uas pw cia li nrog dab ntub lawm, tus tub hluas kuv hais saud, Ntsuab ntxhais Xyooj ib tug me nyuam poob qhov dej ( dej tsev plob), ib tug me nyuam tub Hmoob Yaj, lawv ncaws npas raug plab tuag thiab tus tub Hmoob Vaj uas dev vwm tom tuag. Kuv nco tau li nov xwb.

Lub yeej Nam phoos thaum ub lawv cob peeb zeej tsuas ua rau 300 leej nyob xwb. Hmoob thoj nam mus nyob 10.000 leej rau 4 koog thiab 2.000 leej nyob tom Koog 5. Tag nrho peb muaj 12.000 leej Hmoob nyob Nab Phoos.

KEV NOJ HAUS

Thaum nyuam qhuav los txog tshiab tshiab, neeg tseem tsawg heev, As mas Liv Kas ntiav ib cov Thaib tuaj ua mov rau Hmoob noj. Lawv ua mov hauv cov yias thawj tsheb loj loj, muab duav hlau los do mov thiab daus mov, muab seev tsaj los vov mov thaum ncu. Ua ntau ntau ces mov txeev kub nyhiab, noj mov tsw kub nyhiab tab sis ho tsis siav li ntau xwb. Zaub ces lawv txhoov kiag nqaij hau xyaw zaub li zaub npuas kiag. Noj li nov tau tsis muaj pes tsawg hnub ces cov Hmoob kuj tuaj yeem mus ua mov nyob Thaib chaw. Thaum cov Hmoob mus ua mov lawm ces lawv txawj ua dua, tsis tau noj mov nyoos thiab mov kub nyhiab lawm. Lawv tseem ua tau cov mov qab qab thiab ua kaub puab tab tom zoo zoo noj xwb. Neeg thiaj nyiam noj kaub puab mov ua rau coob tus mob nyhuv tws...Yuav luag tsis muaj cov khoom phais nyhuv tws txaus tib tiag...

Thaum xub thawj ces ua ko tw mus noj mov hauv tsev noj mov. Mus txog ces lawv dhau rau cov tais uas thaum ub cov peeb zeej siv noj, uas yog ib lub phaj txhuas muaj 2-3 kem.

Thaum nyuam qhuav los tshiab tshiab, tsis tau muaj kev tswj hwm dab tsi, cov pej xeem xyaw cov nom tswv, me nyuam neeg xyaw tej neeg muaj meej mom...Kuj muaj kev kub ntxhov heev...Vim cov tsis muaj kev thoob tsib, nyob ntuj qub qab tsis muaj fwv tsam tau tsuj cov muaj meej mom kom qes, lawv ntxab ntxawm thaum lub caij ntxhov nyho ntawd thuam cov neeg muaj hwj chim...yam saib tsis taus neeg kiag li. Lawv nyiam hais los lus tias: Hnub qub poob Nab Khoom tag lawm, sawv daws zoo ib yam lawm xwb. Ces tej tug neeg muaj plhus mas cem mas phab mas lis, siv cai rau hauv tsev mov yam kub ntxhov heev.

Li nov cov ib txwm coj noj coj ua nyob Nplog teb, thiaj tau xaiv tsa kev coj. Lawv thiaj tsis lam tau lam sau neeg ib leeg ib zeeg mus ua zaub mov lawm, lawv tau xaiv cov tub ntxhais txawj hais lus, siab ntev ntawm ib lub Tsev LOj zuj zus tuaj mus daus zaub, daus mov rau cov neeg...Ntawm peb lub, kub kuj raug xaiv mus thiab...Thaum lawv xaiv cov neeg nyiam kev tiaj tus mus li nov mus faib zaub faib mov ces thiaj muaj kev ncaj ncees faib rau txhua tus sib npaug thiab tsis hais lus chob neeg rau txhua leej.

Kuv nrog lawv faib zaub mov liv no ntau li 1 hlis xwb ces kuv mus nrog lawv ua mov pem Loos Mom rau cov neeg mob noj. Nyob pem Loos Mom mas tau ua hauj lwm xwm yeem thiab zaub mov nqaij ntau heev, noj seem noj sos li. Kuv mus ua hauj lwm pes, lawv faib zaub mov ped rau kuv tsev neeg ntxiv thiab, nram tsev Mess Loj nov los faib thiab, peb zaub mov noj tsis tshua tag...

Ces kuv nrog lawv ua mov tau 1-2 hlis xwb, Thaj Mom Yaj Thaiv paub tias cov Naas Mom Qub yuav tau tawm mus USA tag, ces nws thiaj kom Naas Mom Cua Thoj qhia ib pab los hloov, ces kuv mus nrog lawv kawm Naas Mom lawm...

Ces noj mov hauv tsev noj mov taus tsis ntev kiag li ces lawv faib rau nyias coj mus noj nyias pem tsev...Tsis ntev kiag tom qab, ua mov siav faib tab sis nqaij thiab zaub ces faib nyias mus ua nyias...Thaum no ces mov yog muab Gaz ua nyob nram Mess, tab sis zaub ces nyias yuav tau mus txiav taws sab nrau los ua lawm...Nab Phoos yog teb chaws tiaj tiaj, muaj tus puav ntoo xwb, muaj ib cov hav xyoob, tuaj deb saib mas yog mos txhov, tab sis txog ze mas yog ib cov xyoob me me li mos txhov...ntau ntau kawg nkaus qhov muag ntsia tsis kawg li.

DEJ SIV

Ntawm ob lub tsev ua mov, muaj dej huv.
Nyob sab nram Koog 1 & 2 muaj ob tug ciav dej ze ntawm kev tshuam hauv nruab nrab yeej, ob tug ciav dej nov yog dej haus. sawv daws nqa thoob tuaj cug mus ua noj...Hehheeh...2.500 leej neeg koom ib tug cia dej xwb kuj txaus thiab!!!

Dua li ib Koog twg muaj ob lub tsev plob, muaj li 8 kem tsev plob hauv, ntxiv rau ob lub tsev dej, ua ib lub dab dej ciment loj loj, nyaj yuav luaj li 6mX3m li, muaj ib tug cia dej los hlob rau hauv lub dab dej, thaum tso loj tuaj, dej tawm luaj caj npab los ntag...thaum nyuam qhuav mus txog mas dej yeej txaus siv tsis tag. tab sis tom qab no dej kuj ib sij tu ib zaug...Tsis muaj dej siv ces sawv daws tsuas mus cug cov dej haus los hau nkaus xwb. Tsev plob tej los tsis muaj dej ntxuav ces qias neeg ntsuav xwb...cov muaj peev xwm kuj tawm mus sab laj kab sab raud, tab sis nruab hnub lo ntshai neeg pom, mus deb los ntshai Thaib txhom. Hmo ntuj mas tsos kab tawm kiag li. Vim Nab phoos muaj dev vwm coob heev. Tsaus ntuj kiag xwb mas d ev vwm los ncig ntawm tej ntug laj kab ua au-b ncaug nrog zig xwb.

D EV VWM TOM

Li nov muaj ib tug tub Hmoob Vaj, Hmoob Sam Neua mus xauj hluas nkauj qhov tsev tom cov tsev ntaub, ib tug d ev vwm thiaj tom raug nws tus ntiv te rwg qab hle tawv me me xwb. Nws mus kuaj, Thaj mom Yaj Thaiv twb hais tias yog d ev vwm, kom nws mus txhaj tshuaj, nws mus txhaj ob peb koob xwb ces nws tsis kam mus lawm. Cov tshuaj d ev vwm no lawv txhaj ntawm puj ntaws xwb ces nws hais tias mob mob li tsis mus...Ces tau tsis ntev tom qab no nws mob tuaj mas txaus hlub kawg nkaus...Thaum yuav tuag, heev dhau lawm ces lawv muab nws com rau ntawm ib lub txaj hlau, muab nws tso rau nraum tshav puam Loos mom, nws nyooj ib suab...qheb qhov ncauj loj loj...qhaws qhov ncauj mas cov au-b ncaug txaws dhia deb li 10m cua tsuag dej xwb...Tu siab kawg li...

Thiab Col. Nyiaj Lwm Vaj ib tug tij laug, thaum lawv txiv tuag ces lawv mus zov, nyob ntawm Loos Mom sab nraud tom ntug yeej, yawg nyob nyob lig ces txawm ib nyuag qhau cev pw, cas muaj ib tug d ev vwm cia li los tom nws sab plhu me ntsis dog dig xwb...Nws cia li tau mob ces tsis ntev nws cia li tuaj lawm thiab...

Col. Nyiaj Lwm 1 hnub ua ntej nws yuav tuag, muaj kab npaws tshwm nyob hauv yeej ces lawv ntshai tsam ib kis. Lawv kom cov neeg cheeb tsam muaj kab npaws tshwm tuaj kuaj ntshav kom paub ua ntej tsam kho tsis tau. Peb tab tom kuaj sawv daws ntshav, kuv pom Col. Nyiaj lwm taug kev hla los ze ntawm peb, Nais mom Vaj Tsu hu nws, nws hais rau Naim Mom Vaj tsu tias cas mob mob nws taub hau li...Ces nais Mom Vaj Tsu txawm muab ib qho tshuaj cev rau nws kom nws noj seb puas zoo...Ces nws txais thiab nqes mus nram lawv tsev lawm...Taig kis tom qab xwb nws cia li tuag lawm mas kuj khuv xim yawg kawg nkaus li...

Xyoo 1975 teb chaws tawg

https://www.youtube.com/watch?v=ozLw7yeeD4k

Last edited by koojziagkabzaug on 27th July 2011, 12:32 pm; edited 3 times in total

**koojziagkabzaug** 10th March 2010, 10:16 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°2

Re: Yeej Thoj Nam Nab Phoos

koojziagkabzaug 10th March 2010, 10:16 am

TSA TUS TSWJ

Los txog Nab Phoos tsis ntev kiag xwb ces lawv muaj xaiv tsa Nais Koog, ib Koog twg muaj ib tug Tswj, ib lub As Khas twg muaj ib tug Tswj. Tus Tswj saib zaub mov, zoo li lawv hloov li ib lis piam ib pab.

QHIA NTAWV

- Thaum txog lub caij me nyuam rov kawm ntawv, lub 9 hlis pib ces lawv rov tshawb nrhiav cov Qub Xib Hwb qhia ntawv tim Nplog teb rov los qhia me nyuam yaus. Lawv qhia ntawv Nplog ib yam qub. Cov me nyuam yaus muab faib ua ob peb pab kawm, lawv kawm ntawm lub tsev uas peeb zeej kawm.

- Nrhiav cov As Cas txheej siab los qhia cov tub kawm ntawv loj, nyias muaj nyias Phab nej...Cov hlob nov lawv mus ua ib cov tsev ntoo thiab xyoob rau nruab nrab kev mus Khoob 5 thiab Koog 1 nruab nrab. Muaj kev pab cuam ntawv kawm, ntawv sau mem tej tuaj rau cov tub kawm ntawv loj. Tab sis mus ib hnub, lawv faib ntawv tag xwb ces tsis muaj neeg mus li lawm. Lawv lam ua cov tsev los pleev qhov muag kom tau faib cov khoom pab cuam rau cov tub ntxhais kawm xwb. Nyias twb yuav mus nyias ib rab teb, ib roog ntuj.

- Dua li muaj cov neeg siab dawb tuaj yeem qhia ntawv Fab kis, ntawv Aas Kiv, ntawv Hmoob rau sawv daws, lawv qhia thaum tsaus ntuj lo hnub uas me nyuam tsis kawm ntawv. Thaum nov, txhua tus ua dab tsi los tseem ua dawb xwb tsis muaj them nyiaj li.

Ntawv Hmoob ces qhia nyob haus tej qab ntoos ntawm tsev kheej qab xwb. sau ntawv ntawm haus caug los nkees ces sau hauv av li me nyuam yaus ...

NOJ PEB CAUG

Thaib kuj yuav qaib, qe thiab nqaij zoo heev tuaj rau Hmoob ua Peb Caug. Lawv kuj ua ntawv pub Hmoob mus yuav khaub ncaws hnav ua Peb Caug tom Khon Kenh thiab. Peb nyob Nam phong mas kaw nti tsis tau mus qhov twg tiag tiag li...Thaum ntawd Hmoob tseem tsis tau txawj txhoj puab thiab Thaib los tsis txawj hlub Hmoob thiab ces tsis tawm mus qhov twg li. Cov hluas keej tshaj ces mus txog tom lawv nchua Quav Sw ( khib nyawb) xwb.

Yog thawj xyoo uas ib txhia tsev neeg sib ncaim...Tus lom zem los muaj, tus tu siab los muaj...Kuv tseem nco tau, thawj hnub xiab 1 thaum sawv ntxov...kuv ib tug viv ncaus hais rau kuv tias: ...lawv niam lawv txiv tsis tuaj es lawv tu tu siab, lawv kauv pam quaj tsis sawv mus pov pob li...Ces kuv hais tias: Yog li ces kuv twb nqa tau ib cov qe os pem Loos Mom los thiab. Peb qe ntau ntau ces kuv hau 3 lub hau es peb nqa mus rau lawv. Lawv yog 3 tug tub hluas Hmoob Yaj, cia li khiav Vees Cam tuaj lawm xwb, lawv tsis tau xaaj las niam txiv, tsis hnov moo li,..Ces kuv hau qe siav, peb nqa mus txog, lawv pw 3 leeg ua ke, nyob theem txaj sab saud. Peb hu lawv lawv tsis teb...Ces peb muab 3 lub qe tso rau nram lawv ko taw ces peb cia li los tsev lawm..

Mus ntxias tub Hmoob Yaj tag los, mus txog pem Loos Mom, cas ib tug tub Hmoob Hawj, tuaj ib leeg thiab xwb, chim chim siab, khiav nkag rau kem X-Ray mus qheb tsis tau li...Peb tseem sib koom mus ntxias nws kom nws qheb qhov rooj tawm lo thiab...Nws quaj ces peb cov sab nraud nrog nws quaj tib si...Thaum tuaj nws cia li khiav nrog cov caij dav hlau tuaj lawm xwb, nqa tsis tau dab tsi li, muaj ob ce khaub ncaws sib hloov thiab nkawm khau khiab ntawm ko taw xwb...pom nws nkawm khau khiab yaig ti nkaus nws txhais ko taw....Nyiaj tx iag los nqa tsis tau thiab mas kuv pom nws txom nyem heev...Tab sis kuv tus kheej los tsis muaj niam muaj txi, tseem tshuav cov yau rau kuv saib xyuas thiab ces kuv twb ntxeem yuav luag tsis dhau rau kuv thiab, thiaj pab tsis tau ib yam rau luag lwm tus. Tab sis kuv ho ua me ntsis paj ntaub muag ces ho tau me ntsis nyiaj los yuav khau khiab rau...

Peb tau mus pov pob me ntsis ib ncig ntawm lub tsev kheej xwb...Kuj lom zem kawg thiab...Cov nom kuj tua ib tug nyuj noj rau tom Koog 5, sab laj kav sab nraud...tsis muaj rooj muaj tog ces ua tau, pua hauv av noj xwb...Li nov los yog kev sib haum xeeb ces twb zoo zoo lawm.

Noj Peb Caug Nab Phoos

MUS TXAWV TEB CHAWS

Cov hluas ces peb khiav los nyob ntuj nag tu xwb ces lawv pib mus tus puav txawv teb chaws lawm.

Thaum xub thawj yog tus puav tub hluas uas muaj xam kham thiaj ua tau ntawv tuaj mus kawm txawv teb chaws xwb. Kuv muaj ib tug nus, nws tau mus cuag Mission Italian nyob Bangkok, pab nws tuaj rau fabkis teb. Yog cov Mission Italian them pib dav hlaus rau nws tuaj mus...Thaum nov cov hluas nkauj hluas nraug yuav sib ncaim, pom lawv quaj mas tu siab tshaj li...Vim tsis zoo li cov tom qab no es paub tias mus qhov twg, nyob qhov twg...Tsis paub li...Nyob kaw nti xwb...

Peb li ces yog kuv tus nus ua ntawv thov Secours Catholique pab peb tam me nyuam Ntsuag, ces Secours Catholique tau hais mus rau Crix Rouge nyob Bangkok, Croix-Rouge ncaj qha Bangkok tuaj xam phaj peb 4 nus muag uas tseem tsis tau muaj 18 xyoo. Lawv coj koob thaij tuaj thaij duab kiag ua ke, lawv hu peb mus ces peb sau npe tsuag tsuag, zoo li 6 hli tom qab xwb peb npe twb tawm lawm.

Thaum nov peb tsis hnov xov Nplog teb li, xa tsis tau xov rov qab li thiab. Ces cov Croix-Rouge nqa tau ib cov ntawv Télégramme, ntsuab ntsuab, xwm fab xwm meem, hais tias sau tau 25 npes ntawv xwb, kuv thiaj muab tau ib daim, sau rau kuv ib tug phooj ywg nyob Nplog teb. Lawv kuj nqa mus xa tiag tiag li rau kuv.( Tsis zoo li txhua zaus es nyob hauv yeej, lawv tias leej twg xav sau ntawv sib nug moo los tau, yus sau rau tom Nong Khais xwb los lawv muab yus cov ntawv mus nyeem ua si, luag yus tag ces muab pov tseg lawm tsis xa rau yus). Ces tsis ntev tom qab no kuv tus phooj ywg ntawd thiaj teb tau ib tsab ntawv xa rau Croix-Rouge Bangkok xa rau kuv. Lawv kuj xa tuaj txog kuv thiab tab sis thaum ntawd tsis tau xov ncaj qha tim Nplog teb tuaj li ces, tej me nom loj los xav xav paub ces xyov lawv muab kuv tsab ntawv ntawd nyeem dhau pes tsawg leej lawm mam li txog kuv..Xij peem lawv nyeem los tsis ua cas...Yog lawv xav paub xov tim ub thiab xwb...tsuav lawv tseem xav txog kuv ces twb yog ib qho zoo lawm...

KEV NKAUJ NRAUG

- Nyob Nab Phoos mas kuj muaj kev lom zem nkauj nraug thiab tab sis tsis muaj neeg sib yuav coob kiag li. Vim sawv daws tseem npaj yuav mus kawm ntxiv xwb. Tsawg tsawg tus thiaj sib yuav xwb. Nyob ti ti ua ke, tej nkauj nraug tsis muaj chaw sib ntsib, sib txuas lu li, lawv lam zaum ntawm tej nyuag qab ntoos me ntsis, sib pom tej plwb pliag xwb, sawv daws kuj tseem coj kev cai heev ces tsis pom muaj cov taug kev piav yuj yeev ua ke li cov tom qab no.

YUAV LOS RAU VIB NAIS

Noj Peb Caug tag ces hnov lawv hais zom zaws tias: Yuav muaj cov neeg nyob Nab phoos faib ua 3 pab, ib pab mus nyob Nan, ib pab mus Phiksanuklok, ib pab mus Loei...Tiag tiag mas lawv yuav xa sawv daws los mus nyob Vib Nais tag nrho xwb. Tab sis kuv tsis paub hais tias yog tim li cas ho tsis muaj neeg paub meej txog li. Thaj Mom yaj Thais saib lub tsev kho mob kiag los yeej tsis paub txog li thiab...

Thawj pab los mus rau Vib Nais yog cov Hmoob ntsuab, Protestant, lawv thiaj los tsim lus tsev Teev Ntuj Christian tim Xoom 1, pab ob yog yog Col. Tub Looj lawv...

Thaum pab ib thiab pab ob mus ces tseem tsis tau paub tias mus nyob ua ke...Kuv muaj ib tug niam hluas ...nrog ib cov uas lawv yuav mus pab ob nyob, ces lawv yuav coj nws nrog lawv, peb tsis kam sib ncaim, tab sis lawv yuav coj mus ces peb yog me nyuam yaus, tsis muaj tej laus lawm...Ua rau peb khiav khawv khuav zoo li tej me nyuam qaib tsis muaj chaw ncooj, tsis muaj leej twg pab kom peb txhob sib ncaim...Mus hais leej twg los tsis muaj tus xav quav ntsej peb...Peb quaj quaj, tsa suab hlo quaj cuag zij nkauj nyab tshiab xwb...Tu siab tshaj li...Cas thaum yus lopj tiav neeg lawm no luag tej kuj txawj ua zoo heev rau yus...Ces kuv tus niam hluas mus txog Vib Nais, nws thiaj sau ib tsab ntawv rau cov Thaib tsav tsheb nqa los rau peb, nws hais tias cov Hmoob Protestant uas xub mus twb nyob ua ke ped, peb los yuav mus nrog lawv nyob ua ke thiab no...Peb thiaj zoo siab xwb...

Tham Nab Phoos los xaus li nov xwb. Yog leej twg ho muaj zaj, thov tuaj tham ua puav pheej cia thiab/ Ua tsaug

**koojziagkabzaug** 10th March 2010, 10:56 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°3

Re: Yeej Thoj Nam Nab Phoos

koojziagkabzaug 10th March 2010, 10:56 am

Cov muaj hmoo tau nyob nab phoos.

ntawm no mus_______________ ho yuav hais ntxiv
ho yuav piv_________________cov nyob nab phoos
lawv tsis ntsoos _____________vim muaj tus loj
hmoob tus coj______________txiav siab khiav ya
dav pib nqa______________tsoom thawj tub r-og
tsev neeg nrog_______________tau coj tuaj nyob
luag thaj tsob________________kom phim tus coj
nrog cov loj________________ces tsis txom nyem
nyob lom zem_________________muaj peb caug noj
txawm hnov zoj ______________vaj pov yuav mus
txhua txhua tus_______________mus rau tom tiaj
pov vaj thiaj_______________tsa ncauj los qhub
suav txij hnub______________peb tau ncaim tuaj
vim yuav nyuaj_____________thiab nyob tsis tau
thiaj yuav dhau _____________mus ntuj nraum ub
yog ntuj pub_________________teb chaws rov zoo
tsis tsawg xyoo ___________nyaj yuav tau ntsib
txhob xam khib_______________kom nyob sib hlub
nws mam rub_________________sawv daws tau tuaj
sawv daws quaj___________ yeej tauv tsis tau
tag hlob yau__________________los lub kua muag
nws rov ntuas________________kom txhob sib tos
tso tub pos_____________________los ua tus coj
kom hmoob npoj______________muaj kev haum xeeb
tshuav cov txheeb ___________khuam rau tom qab
thov ntuj pab_________________cev tes rub lawv
kom hmoob sawv________________rov muaj neej ua
lus tham txhua_________________mam so kua muag
tsis xav luag_________________noj mov tsis qab
cov nom nrab_________________sab laj tsis haum
kuj xav caum_________________los mus tsis tau
pov mus dhau___________________ib cuaj xya rau
thiaj li tau_______los nyob vib nais lawm tiag.

Tus sau: Ntxoov L. Vaj
19 May 2009 - 07:03 PM

**koojziagkabzaug** 10th March 2010, 11:36 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°4

Re: Yeej Thoj Nam Nab Phoos

koojziagkabzaug 10th March 2010, 11:36 am

KOJ NCAIM KUV XYOO 75

XYOO 75 KOJ TAU NCAIM KUV MUS DEB
MUS IB ROOG TEB DEB DEB NTSIA KAWG NTSUA MUAG
HIAV TXWV LOS QUAS KUV KIAG RAU IB RAB TEB
TXIAV KUV HAUV KEV KUV THIAJ NCAV TSIS CUAG KOJ

NTEV NIAJ NTAU XYOO UAS KOJ TAU NCAIM KUV MUS
MUS IB ROOG NTUJ TSIS HNOV KOJ IB TSAB XOV
KOJ PUAS TSEEM NCO TIAS TSEEM TSHUAV KUV NYOB DEB
NYOB RAU NPLOG TEB NTXEEV NTUJ SAB PUAG NRAUM UB

KOJ MUS TAU ZOO MUS NYOB NOJ QAB PW SO
KOJ THIAJ TSIS NCO TXOG KUV TUS NEEG TXOG NYEM
NYOB IB RAB TEB NYIAJ TSHAIB YOO NQHIS TXHUA HMO
UA LUB NEEJ NYOB NTXOV SIAB TSAUS NTUJ LI NTI

LUB TEB CHAWS NPLOG NIM NO THAJ YEEB TIAJ TUS
KUV THIAJ SEEV HU ZAJ NKAUJ NO XA XOV TUAJ
THOV KOM HUAB CUA PAB XA TUAJ QHIA RAU KOJ
TIAS KUV TSEEM NYOB TOS NTSOOV TXOG HNUB NTSIB KOJ.
[/color][/size]

Tus sau: Tsab Tub
lub 5 hlis 2009

**koojziagkabzaug** 17th March 2010, 12:20 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°5

Re: Yeej Thoj Nam Nab Phoos

koojziagkabzaug 17th March 2010, 12:20 pm

Xwm txheej tshwm sim ua ntej teb chaws Nplog yuav tawg.

Ua ntej lub teb chaws yuav poob, xyoo 1974, muaj ib lub dav hlau Das kus tas poob rau qab tshav dav hlau Looj Ceeb. Tsis ntev tom qab txawm muaj ib tug twm nce mus nyob saum lub dav hlau Das Kus Tas phab tis. Sawv daws yeej tsis paub hais tias yog ua li cas es tus twm ho yuav nce tau mus saum phab tis dav hlau uas siab siab, tsis tsim nyog tus twm yuav nce tau mus txog saud.
Tsis tag li ntawd, ib qho chaw tsis deb tsis ze ntawd, cov xov fais fab ntawm ncauj ke yuav mus Phab Kheb, tom qab tus twm nce lub dav hlau tag ho muaj iib cov noog tsev cia li muab lub caj dab , luj tsaim mus khuam rau txoj xov fais fab, tuag dai viav vias dai daub cia. Tsis ntev tom qab no ces Nyab laj ciz li tuaj rau hauv nroog Looj Ceeb.
Lub sij hawm uas Nyab Laj tuaj rau hauv Looj Ceeb ces cov neeg twb khiav tag feem coob lawm. Lub sij hawm ntawd Hmoob los nyob coob rau Phav Kheb thiab Naxus, lub nroog Looj Ceeb pib nphob, tsev taj laj kaw ib kuag lawm. Cov nom twb tuaj rau Thaib teb ib txhia, neeg tsawg heev lawm. Thaum ntawd cov neeg los nyob rau saum Phab Kheb thiab Naxus coob heev. Vim sawv daws yeej npaj yuav khiav los mus rau Vees Cam, yuav hla mus rau sab Thaib teb. Thaum sawv daws los nyob rau zos Phab Kheb, lub 7 hli 1975, muaj ib hnub nyob ntawm Taj laj Phav Kheb, Suav Lwm Thoj qaum tsev, txoj kev hauv plawv Taj laj cia li muaj ob pab ntsaum nab, ib pab yog cov ntsaum nab dub loj. Ob pab ntsaum no puav leej yog hla pem qaum kev los rau nram qab ke uas yog ncaj ncaj ntawm Suav Lwm Thoj lub qaum tsev los yog lub Lab thaij duab. Ces cov ntsaum txawm los sib tog tog rau nram qab ke, 10 tug ntsaum nab liab me tom ib tug ntsaum nab dub loj, cov ntsaum sib tog li ntawd, ua rau cov ntsaum nab dub mas tuag pawg lug xwb. Thaum ntawd muaj ib tug thawj Hmoob Lauj, hnub nyug thaj tsam 50 xyoo los saib ces nws npau taws, nws cia li muab ob peb pab ntsaum no xuab lwj xuab liam tuag pawg lug thiab hais tias: "Zaum no ces America swb r-og rau nyab laj lawm lauj".
Ua cas tsis muaj pes tsawg hnub ces ib pab tub r-og Koos Paj Cai cia li tuaj nyob tom qab tshav dav hlau Phav Kheb thiab ib pab tuaj nyob tom Cob Moos Ntsuab Toog tsev. Thaum ntawd ces Hmoob cia li ua yuj fab yuj fwj, tus yuav nyob los yuav nyob, tus ho yuav mus los yuav mus. Tej mab tej suav los tib yam li thiab, tsis yog peb haiv Hmoob xwb. Muaj ob peb yim Nplog uas ua fawm noj nyob rau ntawm taj laj Phav Khev, lawv yuav rov qab mus rau lawv qub teb qub chaw Xeev Kham. Hos peb cov Hmoob ces ho muaj ib cov sib yaum mus ua noj rau teb chaws Phuv Laj, Pham Phais. Peb cov yuav khiav tuaj rau Thaib teb ces peb cia li khiav tuaj lawm tsis paub tias cov nyob ua lawv nyob li cas lawm.

Kuv zaj dab neeg los xaus li no xwb.

L. Yeej, Lub 7 hli 2009

**koojziagkabzaug** 5th March 2011, 10:53 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°6

Re: Yeej Thoj Nam Nab Phoos

koojziagkabzaug 5th March 2011, 10:53 am

Koj Puas Tseem Nco Tau Lub 5 Hlis xyoo 1975?

Cov phooj ywg sawv daws,

Hais txog lub 5 hlis, 1975 yog ib xyoo uas muaj kev puam tsuaj puas
ntsoog rau peb tsev neeg li liv xwm. Lub week kawg ntawd kuv rov los
tsev rau Looj Ceeb ua ntej. Kuv tus nephew Xou Yang uas kawm nyob
Lycee ho lawv qab rov los tsev thiab mus rau Roob Vaub Kib, Phav Kheb.
Hmo kawg, 5/13, thaum uas peb sawv daws tseem sib txeeb dav hlau tawm
hauv Looj Ceeb mus rau Thaib Teb, txawm muaj ib lub suab hais nrov nrov
hauv plawv dav hlau tuaj tias hmo no yog hmo kawg uas luag yuav thauj
peb cov Hmoob tawm mus Thaib Teb. Kuv tus cousin thiaj hais rau kuv
tias ntshe wb yuav tau rov mus rau Phav Kheb tso mus hais kom kuv tij
laug thiab nws tsev neeg tuaj kom tau. Kuv tus cousin thiaj tsav lub
nyuag tshev JEEP nyib poom thab ham thiab wb mus hu kuv tij laug lawv.
Wb mus hais kiag lawv xwb ces wb txawm thim hlo rov los Looj Ceeb lawm.
Thaum los txog Looj Ceeb tseem tsis tau tsaus ntuj pes tsawg. Peb rov
loo mus zov dav hlau dua. Sib txeeb hmo ntawd ib hmos tsis tau nce dav
hlau. Thaum ze rau ib tag hmo muaj ib lub suab hais rau cov neeg zov
dav hlau coob coob sib tsub sib nias ntawd tias kom sawv daws tawm kom
tag nrho lub tshav dav hlau vim Nplog Liab yuav tsoo Looj Ceeb hmo
ntawd. Peb sib tw khiav tawm hauv tshav dav hlau. Peb thiab ib cov
kwv tij neej tsa Hmoob xuas dub mus pw rau hauv lub tsev kawm ntawv
Long Cheng Neua. Ib hmos ntsiag to tsis hnov suab phom nrov. Kaj
ntoog txoog peb thiaj rov los rau ntawm tshav dav hlau dua. Peb pom
dab tsi? Pom kuv tij laug lawv hnyiav los hnyiav, quaj los quaj. Peb
thiaj nug tias yog ua li cas thiab ib txhia rau twg lawm. Lawv cov uas
tseem muaj txoj sia thiaj hais qhia peb tias nag hmo lawv lawv peb qab
tuaj. Tuaj txog tim dawm tua pob zeb GVP cov tub rog zov kev thiab
tua kuv tij laug lub tsheb ua rau peb tsev neeg tuag kiag 3 leeg lawm:
Xou, Tong and Shua (siblings). Lawv muaj 14 leeg zaum hauv lub tsheb.

This is how the story went: Tom qab wb mus hu lawv ces lawv txawm npaj
ntug npaj teb pov lawv tej khoom rau hauv tsheb. Lawv sib txiv tau 14
leeg. Twb tsaus ntuj zuag lawm lawv mam sawv kev Phav Kheb tuaj. Tuaj
txog ntua Roob Vaj Foom xwb ces tsaus ntuj lawm. Lawv maub Roob Vaj
Foom nce Nam Pha tuaj nto plaws dawm zov nyas. Thaum lawv tav nqis hav
tsawv ntawm dawm zov nyas mus yuav luas txog tsua pob zeb GVP cov tub
rog txawm qhib phom tua lawv. Tua npaum nkaus lawv yog nyab laj.
Thaum raug lawv tag thiab lub tsheb tuag lawm ces cov tub rog zov kev
thiaj mam tawm los. Tawm plaws los txawm yog kiag Leutenant Vang Neng
(now in France). Vang Neng los ti nkaus thiab rho hlo kuv tij laug rab
yaj phom tawm ntawm nws duav thiab hais tias peb tua yuam kev nej lawm.
Thaum ntawd kuv tij laug tseem puag rawv nws tus tub hlob (Xou) uas
twb tu siav lawm. Cov tub rog ntawd tias tsis paub ua li cas lawm ces
cia lawv thauj kuv tij laug lawv mus cuag GVP saib nws hais li cas.
Mus txog hauv VP tsev thiaj tham rau VP ces yawg tsuas hais tib los
tias tuag tsis tuag los tuag lawm ces cia li coj 3 tug me nyuam mus
faus rau ntawm qab lub tiaj no kiag xwb. Hmo ntawd lawv thiaj muab kuv
2 tug nephews thiab niece coj mus faus rau hauv qab samosone, hauv qab
2 tsob thuv between samosone thiab lub tsev hais plaub. Ob tug nus
tuaj ob sab, thiab tus muam tuaj hauv nruab nrab. GVP hais li cas? VP
hais tias zoo li no lawm ces hais rau cov saib nyob hoom tso tag kis
sawv ntxov, thawj thawj flight, mas cia dedicated rau kuv tij laug lawv
tsev neeg kiag. Lawv ua ib siab khooj thiab hnyiav hmo ntawd ib hmos
hauv VP tsev. Tag kis luag thiaj muab lawv thauj mus pem tshav dav
hlau. Thaum mus txog ped cas tsis yog li. Lawv tseem tau nrog sawv
daws txeeb ib yam thiab ua ua thaum kawg txeeb tsis tau ces kuv tij
laug thiaj ua ib siab ncaj qha mus rau Phav Kheb, dhau plhawv tuaj Nas
Xus thiab tshwm plaws rau Nong Khai, ncaj qha rau Nam Phong li lawm.
Tshuav peb cov nyob tom qab peb mam sab laj tias ua li yuav mus khawb
peb cov tub cov ntxhais los tha los tsis khawb. Thaum kawg ho khawb
tsis tsheej vim kuv tij laug lawv twb dhau tas rau Thaib Teb li lawm.

Peb tsev neeg, especially kuv tij laug li puam tsuaj ti txha nkaus.
Peb yog ib tsev neeg ruam ruam thiab txom txom nyem. Kuv tij laug lam
nrog luag ua tsov ua rog achieved a rank MAJOR thiab txuag tau me ntsis
nyiaj xa nws tus tub Xou mus kawm ntawv nyob Vientiane. Xou ces twb
mus thaum nws tseem me. Lub hom phiaj mas xav tias yog mus taus no ces
kawm kawg hauv Lycee saib puas tau mus kawm ntxiv lawm. 2 tug yau uas
tuag nrog Xou los txawm yog ob tug hlob hlo cov. Txhais tau tias kuv
tij laug 3 tug me nyuam hlob tuag tib si lub tsam thawj ntawd.

1975 yog xyoo piam sij. Txij hnub ntawd los kuv tij laug tsis muaj ib
lub suab yuav zoo siab thiab yuav luag taus nrog luag li lawm vim cov
tub ntxhais me me tseem tsis tau paub tab dab tsi li. Niam qhuav yog
tau 7-8 lub xyoo los no kuv tij laug thiaj niam qhuav rov muaj ntsej
muag luag taus xwb vim nws cov tub cov ntxhais uas thaum Xou tuag tseem
me me so ntswg tav toj ntawd niam qhuav ciaj neeg cuag luag. Cov hlob
tom qab no yog 5 tug tub 2 tug ntxhais thiab lawv kuj tuaj ua tau lub
neej rau kuv tij laug tso siab taus lawm. Lub neej peem peem los ob
theem yam nkaus lub hnub niam qhuav rov tawm tuaj xwb, kuv tij laug
txawm tau ib tug mob thiab nws tau tso peb tseg rau lub 4/23 no lawm.
Peb yuav muab kuv tij laug rho los ua kev cai rau hnub 5/13-15 uas yog
txwm nkaus 31 xyoo rau hnub uas kuv 2 tug nephews thiab tus niece tuag
es ua rau kuv tij laug lub neej piam sij ti txha nkaus.

Nej cov uas kawm nyob Lycee thov nej nco txog kuv tus nephew XOU YANG,
31 xyoo, uas nws tau ncaim peb sawv daws lawm.

THOV XAUS LUS LI NO!!!

csy

**koojziagkabzaug** 5th March 2011, 10:56 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°7

Re: Yeej Thoj Nam Nab Phoos

koojziagkabzaug 5th March 2011, 10:56 am

Tawm Nplog teb rau Nab Phoos Tim 15 lub 5hlis 1975

Lub caij ntawd kuv kawm ntawv nyob Vees Cam. Peb tsev neeg ib txhia nyob pem Looj Ceeb thiab Moos Cab, ib txhia nyob Vees Cam, ces hnub tim 11 lub 5hlis, kuv ib tug nus nqes pem Looj Ceeb los hais kuv tus txiv laus nyob Vees Cam kom coj peb khiav sab rad mus rau Thaib teb, nws mam coj cov ped khia ntawm Looj Ceeb mus...Thaum ntawd neeg tsis tau khiav li...Cov Tiam Lis teb chaws tseem puav leej nyob zoo zoo li qub...

Ces tim 14/5/ Yaj Tsab uas yog ib tug Khana Latthamountri Bep Pasom ( 33 leeg) Tseem Hwv Nplog cog kev phooj ywg tshiab nrog Suav Tuam Tshoj, ces lawv cov Ministres coalition thiaj tau mus ncig xyuas Xaus Viej tag ces mus Suav... Yaj Tsab los txog ntua tsev xwb...Nws ntau xov tooj rau kuv tsev neeg tias nws nce mus xyuas Yawg Hlob Vaj Pov lawm, kom peb npaj tos, nws los seb li cas...Ces nws mus kiag, 17h Pm xwb nws twb rov los txog...Thaum nws tseem mus pem Looj Ceeb lawd, lawv twb tso neeg tuaj tos kuv tom tsev kawm ntawv...Tus tuaj tos kuv hais tias kom kuv nrog nws mus, lawv yuav hla dej hmo ntawd...Kuv tsis ntseeg tus tuaj tos kuv pes tsawg...Vim kuv yog ib tug ntxhais hluas...nws yog ib tug txiv neej hluas...Thiab tsis tau muaj neeg khiav kiag li...

Tsuas paub tias teb chaws Nplog yuav hloov...Yuav los sib koom Tswj Hwm ua ke xwb...Tab sis thaum so ntawv lub 4 hlis yuav luag tas ntawd, ib tug phooj ywg mus pem Looj Ceeb, nws rov tuaj. Nws hais rau peb tias kom peb ceev faj, Asmeskas hais rau Yawg Hlob tias:

" Lub hnub lub hli yuav los qes qes, yuav kub kub, tej toj roob hauv pes yuav kub nyhiab, tsuav tej ntsaws hav xwb, cov nyob khuab roob khuab ha thiaj yuav dim"

Ces peb yeej nyaj tau tias ntshai lawm...Peb cov me nyuam Hmoob pheej muaj ntsis ua ke tham thaum yuav tsaus ntuj uas peb mus noj mov hauv cantine los...Ces peb txawm sib hais tias ntshe peb yuav txhob ua ke heev tsam cov Nplooj tsawb nyaj tau...

Ces tus tuaj tos kuv ntawd hais rau kuv tias yog kuv tsis ntseeg nws los kav liam...nws tsis yuam kuv tab sis nws tsis rov tuaj ntxiv lawm...Ces kuv thiaj teb tias mus los mus...Tab sis nws tsis muaj npe thiab duab ua tus tos kuv...Tus thawj saib peb cov ntxhais thiaj tsis kam rau nws sau yuas ( signer) nws thiaj tau rov los tsev, coj tus uas muaj npe tos kuv ntawd sau yuas ces peb thiaj los rau tom Vees Cam. Thaum ntawd, kuv tsis muaj cuab kav hais ib los rau kuv cov phooj ywg li...kuv hais lawv tias kuv los ib hmos xwb...Tab sis kuv ntim tag nrho kuv cov khoom, tshuav cov pam vov tej xwb...kuv ntsia lawv ob peb muag...Kuv xav ua tsis tau li cas li...kuv thiaj muab kiag ib lub phaj me me uas yog cov phaj nrag duab ua décoration lo tso kiag rau hauv kuv tus phooj ywg Nplog txhais xib tej...Kuv ntxhi nws pob ntseg tias:

"Thong! Yog kuv tsis los lawm, koj khaws kuv qhov nov saib dab muag nawb!"

Ces kuv tawm plaws nkag rau tsheb, mus me ntsis mam lem tsheb rov los...Kuv ntsia ntawm qhov rais, Kung Thong twb hais rau lawv tias ntshe kus yuav tssi los lawm...Lawv sawv ntawm qhov rais yoj tej nto rau kuv...kuv lem tsheb kiag sab tsev tod lawm...kuv pom cov ntoo txiv mov poj, kuv pom kuv lub teb chaws zoo nkauj tshaj uas kuv tsis tau pom dua txij thaum kuv yug los...Kuv lub siab xav zoj tias: Kuv lub teb chaws zoo nkauj! zaum no kuv yuav tsis pom koj ntxiv lawm...Ces txij hnub ntawd los, kuv tsis rov ntsib kuv cov phooj ywg li lawm...

Ces kuv mus txog tsev, Yaj Tsab rov los txog ntua, nws hu kiag rau kuv txiv laus ces kuv txiv laus mus nrog nws tham tag, hais tias Yawg Hlob yuav ya Nyoob hoom taig kis...Kom peb hla hmo ntawd...Ces peb cov nyob ua ke ntawd muaj txog li 10 yim neeg thiab ib cov tub hluas tuaj kawm ntawv thiab...Ces thiaj hu cov tub hluas los sab laj thiab hais rau lawv tias kom nyias rov mus nyias tsev...Yog leej twg ho xav raws peb los peb coj, leej twg tsis xav raws los kom mus tsev...Vim cov Thuj yuav kaw qhov rooj ces peb yuav tsis kam nyob lub Nplog teb lawm...

Ces ib cov kam mus, ib cov tsis kam...Peb sib lob sib lob ces lig lawm lauj...Yaj Tsab lawv tuaj mus...peb tsis tau tiav...Kuv nyob tom qhov rooj loj, Yaj Tsab hais rau kuv tias: Peb mus tam sim no, kuv teb tias peb tsis tau tiav. Ces Yaj tsab thiaj tias lawv ua ntej lawm kom peb mam lawv qab...Ces Yaj tsab lawv mus sab Sixiengmay, lawv tau ncaj qha mus rau Nam Phong hnub ntawd. Vim Nais Phoo hais tias pem Looj Ceeb lawv thauj tsis yeej ces kom cov Hmoob hla ntawm Sixiengmay es nws xang Thaib tos Hmoob nyob ntawd xa ncaj qha mus rau Nam Phong.

Tab sis peb tuaj ces muaj Tas Luaj zov kev ntawd lawm, peb tsis tau tes, peb thiaj mus hla ram Chinamo. Peb mus txog nrad yog ze 6hAm xwb, twb muaj ib cov salavath thahanh zov kev nrad, coob kawg li...lawv kuaj peb tab sis peb tias peb mus ua teb tom Tha Deua xwb...Ces lawm tso peb mus...Nyuam qhuav mus ze 300 m tom ntej lawv taub hau ploj xwb peb twb nqes tsheb tod...Peb mus caij nkoj, tus nqe tseem yog tus nqes niaj hnub hla xwb...Ces peb mus txog sab tim Nong Khais, cas Tas Luaj Thaib nyob tid tos peb...Lawv twb muaj tsheb bus tos peb tid...Lawv coj peb mus nyob Wat Samakhee. Peb yog thawj pab hmoob hla dej sab nrad, peb txog ib nyuam chim, 10h30am, mam pom Nkaj Zeb Vaj uas Nais Phoo tus kwv tij lawv tsev neeg tuaj...Hnub ntawd peb nyob ib hnub ...Cas hnub ntev ua luaj li lauj...! Ntev tiag tiag li...zoo li twb yog ib tiam neeg los lawm...Tab sis mas nyuam qhuav yog tuaj taig kis no xwb...twb tsis tau hla ib hmos...Ces kuv sau tau ib tsab ntawv rau ib tug Txiv Plig xa hauv Poste rov rau Nplog teb...

Tsaus ntuj ces Thaib tuaj tos peb mus pw ib cov Hotel me me...zoo zoo kawg...Lawv nqa ib cov zaub, mov ntim ua tej tais zoo zoo...sov sov tuaj faib rau peb noj...taig kis kag ntug ces lawv muab bus tos peb mus tom tshav dav hlau, caij dav hlau mus rau Nam Phong lawm...

**koojziagkabzaug** 5th March 2011, 10:57 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°8

Re: Yeej Thoj Nam Nab Phoos

koojziagkabzaug 5th March 2011, 10:57 am

Lub 5 Hlis 1975 nyob rau Mong Cab tej tubntxhais hauv College Samthong
tabtom npajsiab yauv sibtw zaumkawg hauv lub xyoo uantej yuav mus rau
qibzog ntxiv. Kuv hnov tias hmo ntawd yuav muaj li 40 lub luv thanks
tuaj txog rau Nasxus (Ban Sorn) ces kuv thiab kuv tus phoojywg wb ciali
nce tsheb taxi los mus tsev lawm.

Tsis ntev tomqab ntawd kuv txiv tau coj peb sawvkev ntawm Nasxus
taugkev mus rau Veescas. Peb ev txhuv thiab tejyam uas uas peb needs
nrog peb nkaus xwb. Peb taug kev tau 2 hnub tawm mamli mus txog rau
ntawm tus taw choj Hinh Heup.

Thauj yus mus txog rau saum tej lub ncov roob, tig rov saib rau tomqab
mas pom Hmoob sibcab twzws mus li tsheej miles kev hos ho tig rau
tomntej los koj ntsia mus pom deb npaumlicas los koj pom Hmoob sibcab
twniab mus plojntais.

Koj pom tus mosmos ab uas risrawv rau saum lub nraubqaum mus tinkaus
tus lauslaus uas nrig pas tujtauv. Tsis tag li tseem ntsib tej nomtswv
tshwjxeeb li Lee Teng thiab Touby Lyfoung niajhnub caijtsheb taugkev
tuaj cheem sawvdaws.

Tagkis uas cov tubrog qhibphom tua cov pejxeem uas hla tus choj Hinh
Heup, peb tseem pw deb li 1 quarter mile deb, tabsis lub sijhwm phom
nrov, peb sibtw khiav mus tinkaus rau ntawm tus taw choj thiab pom tej
neeg tuaj lossis raug mob ua ntshav liab pes vog tig rovqab.

Lub sijhawm no koj nyob qhovtwg?

kuamemiab
1 May 2006 12:07:11 -0700

**koojziagkabzaug** 27th July 2011, 11:59 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°9

Re: Yeej Thoj Nam Nab Phoos

koojziagkabzaug 27th July 2011, 11:59 am

Cov Nom Thab Ham Noj Av tim Yeej Nab Phoos

By: Yaj Tshaj Koob
Soc.Culture
12.03.2011 - 19:07

Major Nom Ying Vaj Director Lao Family tham hais rau kuv tias thaum
GVP mus dhau rau America lawm, ces GVP cov xov nom thab ham tuaj poob
rau yeej nab phoos tag nrho ua ke, ces txawm muaj ib tus Hmoob sawv
SIV YIS hais ntuj lus tias, txiv tswv ntuj tau coj nws mus saib Hmoob
cov nom tswv thab ham hauv Looj Ceeb, mas tus tswv ntuj ntawd txawm
taw qhia yawg hais tias, koj ntsia seb cov nom Hmoob no mas coj tsi
ncaj ncees, muaj kev khaum loj, noj teb noj chaw, noj lwm tus neeg
txom nyem li nyiaj ntau heev, tsi ntev no mas cov nom thab ham no mas
yuav tuag tib si mus hais plaub txog txoj kev tsi ncaj ncees noj lwm
tus nyiaj. Ces yawg ntsia dhev ua ciav pom, Yawg Col Nyiaj Lwm Vaj,
Col Soua Yaj, Col Tub Pos Lis, Col Tou Long Yaj, Col Nyaj Xub Yaj, Col
Haam Choj, Col Ntsuab Vaj Lis, Col Vaj Thaiv, Col Vang Yee, Col Vaj
neeb, Col Ntxoov Tswb Yaj, Col Tou Lwj Moua, Col Song Leej Xiong, Col
Ntsuab Pov Xyooj, Col Vaj Kuam, Col Cher Pao Moua, Col Vaj Lwm Dub,
Col Ntshuab Rwg Vaaj, Col Vaaj Ntxuam, Major Her Chai, Major Moua
Houa, Major Nao Bee Yang, Major Her Lwv, Major Npliaj Xab Vaj, Major
Cher Cha Vaj, Major Npliaj Kao Vaj, Major Vaj Soua, Major Yang Fue,
thiab tag nrog cov nom thab ham me
uas tau noj lwm tus li nyiaj mas
yuav tuag tag nrho rau lub qab xyoo 1975 txuas rau 1976 mas yuav tuag
suaj kaum tiag li, yuav kom sawv daws dim mas kom mus ua ib lub qhov
li qhov tso mas rauv taws rau hauv mas muab lub yias tsa rau saum, ces
muab cov xyab thiab ntawv yaj khaum ceeb khaum hlawv rau hauv lub yias
ntawd, ncho pa mus rau saum lub ntuj, mas thaum hlawv txog tus twg cov
yaj khaum ceeb khaum mas kom tus ntawd yuav tsum pes hawm "KAWS AV",
mas thiaj muaj yeej tus vij noj nyiaj ntawd, yawm Hmoob ntawd piav tag
rau lawv tsis ntseeg, lawv tsi quav ntsej ua li yawg Hmoob hais.

Ua cas tau tsi ntev xwb yawg Col Nyiaj Lwm Vaj uas yog Col Vaj Yig tij
laug cia li mob nthawv nthav tsi tau pes tsawg hnub xwb cia li tuag
kiag lawm tiag lauj, ces cov nom tas tus ntshais laus, lawv sab laj
zom zaws mus ua qhov uas yawg Hmoob hais cov lus ntawd, ces thaum lawv
sab laj tiav tag ces lawv tag nrho cov nom thab ham muaj npe saum
txawm nyiag kev tawm qhov laj kab mus ua rau sab nraum lub yeej nab
phoos, mas lawv txhua tus tau hu ntuj thov rau lub ntuj daim av tias
lawv tau noj teb noj chaws lawm los thov tseg lawv txoj sia, ces txhua
tus tau kaws av tag nrho, tsuas tshuav Major Vaj Yeeb thiaj tsi tau
kaws av vim tias Vaj yeeb tsi tau noj leej twg li nyiaj. Dua li ces
mag noj av tib si tim yeej nab phoos, raws li Vaj Yeeb piav rau kuv
mloog. Yog leej twg tsi ntseeg los hu mus nug tau rau Major Vang Ying
pem Sain Paul, MN nawb.

ytk

**koojziagkabzaug** 27th July 2011, 12:11 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°10

Re: Yeej Thoj Nam Nab Phoos

koojziagkabzaug 27th July 2011, 12:11 pm

Qhov nov mas yeej muaj tseeb,ib hnub ua ntej Col.Nyiaj Lwm yuav tuag, nws tseem tuaj kuaj ntshav nrhiav kab npawd nyob hauv Nab Phoos. Kuv yog ib tug Ntxhais kho mob, hno ntshav hnub ntawd. Kuv pom Col.Nyiaj Lwm los nrog Tub kho Mob Ntaj Xyooj (nco tsis tshua zoo lawm, xyov puas yog hu ua Ntaj?) tham, nws hais tias nws mob mob taub hau ces Nais Mom Ntaj thiaj muab tau ob peb lub tshuaj rau Col.Nyiaj Lwm thiab hais kom nws hno ntshav, tsam yog kab npawd ua rau nws mob taub hau...Tab sis twb yog nws hlab ntsha pib tawg saum taub hau lawm...Col.Nyiaj Lwm tuaj tag nrho ces Nais Koo Lis Txiaj Vaj cia li tuag nruab dab ntub thiab ces lawv thiaj li ntshai heev...Thaum lawv sib yaum mus "Kaws av" los kuv twb pom thiab. Thaum mus mas lawv sib yaum tij ywm xwb, tsis hais dab tsi li, tab sis yeej pom tias muaj tej yam dab tsi txawv txawv...Lawv mus ib chim lawv los ces kuv pom lawv luag luag thiab hais lus txaj muag tsawv...

Sponsored content

HMOOB TSAV NTUJ

Search

Hmoob Catholique Forum

Latest topics

Top posters

Tsev seev PajHuam

Hmong beauty nature

Compteur visitor

Yeej Thoj Nam Nab Phoos

Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Re: Yeej Thoj Nam Nab Phoos

Similar topics

Similar topics

Search Query

Display results as : Posts Topics
Advanced Search