Home
HU PLIG PEB CAUG
HU PLIG PEB CAUG
1/ Nyob ntawm qhov rooj, qheb qhov rooj:
Teeb ib lub rooj me me rau sab hauv tsev, saum rooj txawb ib taig txhuv, muab qe kom txhua tsev neeg ib leeg ib lub rau saum tais txhuv ( cov neeg neeg txom nyem tsis muaj qe, lawv muab qos yaj ywm los tau) thiab hlawv 3 tswm xyab txhos rau cov txhuv, ib nkawm qaib mos ( taub hau tsis tau loos).Cov txhuv yog yam khoom noj yug txoj sia, cov qe yog cov ntxuag uas cov ntsuj plig nyiam heev, hauv lub qe khoob me ntsis, txhais tias cov plig twb los saj lawm...Khoob loj ces hais tias plig noj ntau, khoob me ces hais tias plig noj tsawg. Qhov ntau yog tus Txiv tsev ua tus hu plig, tab sis yog nws tsis txawj, kom lwm tus hu los tau. Thaum hu plig, tus hu sawv sab hauv tsev, tig ntiag rau nraum zoo. Yog ntau nruas nrog ces muab ob tug qaib khi tso hauv ko taw, yog xuas kuam hu xwb ces tuav ob tug qaib ntawm sab tes lauj, sab tes xis yog txwm kuam ua lub voj voog ces hu plig.
Hu plig:
1/ Hnub no tsuas zoo hnub Hmo no tsuas zoo hmo Hnub no tsuas yog zaj tsov hnub Hmo no yog lawm zaj tsov hmo.
2/ Kuv hu nov, xyoo laus tas xyoo tshiab tuaj Kuv hu no, tsuas coj qaib coj qe, coj nqaij coj hno tos Kuv tsuas hu ib tse neeg nees nkaum leeg no cia li sawv tsees los noj Tsiab Peb Caug.
3/ Ntsuj duab ntsuj hlau, ntsuj niam ntsuj txiv Muaj leej seev yees mus lawm chaw ua noj, los hu kom sawv tsees los noj Tsiab Peb Caug Muaj leej seev yees mus lawm chaw ua hnav, los hu kom sawv tsees los noj Tsiab Peb Caug Rov los tsau, cia li los nrog niam nrog txiv, nrog kwv nrog tij ais. Niam los niam coj txiv, txiv los txiv coj tub, tub los tub coj ki, coj plig qoob plig loog, plig tsiaj plig txhu Hmo no sawv li tsee los noj tsiab peb caug, yuav los tau qaib mus thaiv tes, tau qe mus thaiv taw.
4/ Luv xyoo laus tas, xyoo tshiab tuaj. Hmo no kuv tsuas hu ib tse neeg nees nkaum leej no:
-Muaj leej seev yees nraum rooj, los hu kom los noj tsiab muaj leej seev yees mus nraum hav los hu kom los .
-Muaj leej seev yees mus rau chaw nqa dej nqa taw, los hu kom los muaj leej seev yees mus nram mab nram suav los hu kom los noj tsiab noj txhuv.
5/ Lub xyoo laus tas xyoo tshiab tuaj.Hmo no, kuv tsuas hu lawm ib tse nees nkaum leej no
- Muaj tus tu siab qa zees mus nraum rooj lawm los kuv hu kom los
- Muaj tus tu siab qa zws mus nraum ntsa lawm los kuv hu kom cia li rov los, los noj tsiab noj txhuv. Rov los ais, tawg paj tau los coj ais, txiv txiv tau los noj nis los tawg paj tau ntoo, txi txiv ces tau zoo yuas.
Los noj tsiab tas, tsis txhob seev mus raum rooj, tsis txhob seev mus nraum ntsa, tsis txhob seev mus nram mab, tsis txhob seev mus nram suav.
6/ Lub xyoo laus tas xyoo tshiab tuaj. Hmo no, kuv tsuas hu lawm ib tse nees nkaum leej no
- Muaj leej qaug li yees nraum rooj lawm los kuv hu kom sawv lis tsees los
-Muaj tus qaug li yees rau nraum zoov nraum tsuag lawm los kuv hu kom sawv lis tsees los noj tsiab noj txhu, yuav cia li sawv li tsees los tsau. Niam los niam coj txiv, txiv los txiv coj tub, tub los tub coj nyab , Nyab los nyab coj Ntxhais txiv los txiv coj plig qoob plig loo, plig tsiaj plig txhu plig maj plig ntuag Nplej liag txhuv qib ntsuas los Niam los niam coj plig nyiaj plig kub plig tuv mus plig kiv los . Sawv daws tsis seev nraum rooj, tsis seev nraum ntsa, tsis seev nram mab, tsis seev nram suav cia li sawv tsees los auj...
7/ Lub xyoo laus tas xyoo tshiab tuaj. Hmo no, kuv tsuas hu lawm ib tse nees nkaum leej no Ntsuj duab, ntsuj hlauv, ntsuj tub ntsuj ki,
-Muaj leej qaug li yees rau nraum rooj, los kuv hu kom sawv li tsee los Muaj leej qaug nraum zoov nraum ntsa los kuv hu kom sawv tsees los noj tsiab yuas. Plig qoob plig loo tsis seev luag nkuaj tsis seev luag txhab.
8/ Hmo no, yog hmo Peb caug, kuv tsuas hu lawm kuv ib tsev nees nkaum leej no Ntsuj tub, ntsuj ki, ntsuj tub ntsuj nyab, hu kom los Ntsuj tub ntsuj ntxhais, ntsuj qoob ntsuj loo, ntsuj tsiaj ntsuj txhu Sawv daws cia li sawv los noj peb caug, los nyob txhiab tsis muaj mob pua tsis muaj nkees.
9/ Kuv hu, kuv muab nkauj pa xyab nraug paj hmoov, nkauj qaib nraug noog. Kuv hu tsis txhua, muaj leej seev yees nraum rooj nraum tsuag Kuv muab nkauj pa xyab nraug paj hmoov, nkauj qaib nraug noog hu kom txhua cia li los tsau, los noj tsiab noj txhuv.
Los tau viv tau ncaus, los tau qaib mus tau hno Qaib qe hu ua ntej ais mam ua nqaij ua hno hu tom qab, cia li rov los.
10/ Los txog nraum rooj, tsis sawv txoj nraum ntsa, tsis seev txog nraum rooj, tsis zaum
txoj raum zoov , tsis seev Los rau hauv vaj hauv loog los tau qaib mus tau qe los tau nqaij mus tau hno auj…!
Thaum ntau ncej puab rooj
11/ Luv xyoo laus tas, xyoo tshiab tuaj es Niam txiv qheb rooj vaj rooj loog tos Ib tse nees nkaum leej no Ntsuj duab ntsuj hlau sawv daws Los rau hauv vaj rau hauv loog Niam txiv Xwm Kab txhiaj meej pem xeeb Dab roog dab hluas Dab vaj mus dab tse qhib rooj qas lug tos niam mus tos txiv, tos tub mus tos ki, tos xeeb leej xeeb ntxwv cia li sawv tsees los auj…!
Thaum ntau kuam
12/ Kuv ntau Yaj Kuam khiab lis fo rov hlo los Lub xyoo laus tas, xyoo tshiab tuaj es
Plig tub mus plig txiv, plig qoob plig loo Tsis seev raum rooj Tsis seev nraum ntsa.
13/ Yaj Kuam thiab li fo Sawv daws los rau hauv vaj mus rau hauv loog Los hauv vaj mus rau hauv tsev Tsis tu siab nraum rooj Tsis saub mus nraum ntsa .
14/ Yeeb Kuam pov nkaus, Yaj Kuam thiab li fo Noj Yaj Ceeb qav Haus yaj Ceeb dej
Los tau tsiaj mus thaiv tes tau txhuv mus thaiv taw.
15/ Yaj Kuam pov nkaus rau hauv vaj mus hauv loog Los nyob txheeb nyeej vam sawm
Dawb hau mus nres caug Qas txhiab tsis muaj mob pua tsis muaj nkees.
LOS AU!!! SAWV DAWS LOS AU!!!
Thaum Ncwm cov qaib
16/ Yug neb ua kwv ua tij Yug neb ua nkauj qaib nraug noog Txawm sis yug neb los thaiv tes, yug neb los thaiv taw, yuav raug neb dag neb zog. Lub xyoo laus tas, xyoo tshiab tuaj Hmo no, neb yuav mus raws kuv ib tse nees nkaum leej no Ntsuj tub ntsuj ki Ntsuj niam ntsuj txiv Neb tsoj qab taug lw Mus ntxuaj tis rhawv, ncaws li nkawv Mus ntxuaj tis tho ncaws li nko Muaj tus qaug li yees rau nraum rooj Neb mus rheeb li fo nws ntsuj duab ntsuj hlau rov los hauv vaj Neb mus ris nws me ntsuj duab ntsuj hlau rov los tsev auj…!
Neb ob tug nkauj qaib nraug lau no mas kom neb ob lub qhov muag mas rua pliav , taub hau mas kom kaj liag Nplaig nkhaus nkoo xws kub twg, txhav to plaub txub plaub sib txwg Nplaig nkhaus nkoo li kaus txuas, txhav to plaub txub plaub sib luag.
taw mas kom nyem nkaus nawj neb ob tug me nkauj qaib nrau lua ov…
Ces muab ob tug qaib tua, muab vom kom siav vog, muab cov qe hau siav. Muab ib qho mov siav tso saum lub phaj rau ob tug qaib nrog cov qe thiab 3 tswm xyab hlawv los txhos rau. Coj los txawb rau saum lub rooj, ntawm qhov rooj ces rov hu plig dua zaum 2
HU PLIG XYOO TSHIAB ZAUM 2
17/ Hnub no, ces tsuas zoo hnub tos Hmo no, ces tsuas zoo nyug Hnub no , ces yog hnub rais Hmo no, ces yog hmo rov. Kuv ua nqaij ua hno siav li plos puav tam txiv plauj txiv lis nra kuv Hu no, kuv tsis hu dab mus hu tsov, tsis hu nab mus hu qav, tsis hu dab mus hu npog.
18/ Xyoo laus tas, xyoo tshiab tuaj Kuv hu no, ces kuv tsuas hu lawm ib tse nees nkaum leej no Muaj tus qaug li yees nruab vaj mus nruab tsev lawm los kuv hu kom rais rov lis fo los. Muaj tus qaug li yees rau taw rooj taw ntsa lawm los kuv hu kom rais rov li fo los.
Rov hlo los tsau Rov hlo los Sawv tsee los.
19/ Xyoo laus tas xyoo tshiab tuaj Kuv hu no, ces kuv tsuas hu lawm ib tse nees nkaum leej no Muaj tus seev lis yees kev mus nqa dej nqa taws lawm los hu kom rais rod li fo lod Muaj tug seev lis yees kev mus ua qoob ua loo lawm los kuv hu kom rais rov lis fo los. Muaj tus seev lis yees kev mus xyuas kwv xyuas tij, xyuas neej xyuas tsav lawm los kuv hu kom rais rov lis fo los . Ros hlo los tsau Ros hlo los Sawv tsee los.
20/ Xyoo laus tas xyoo tshiab tuaj Kuv hu no, ces kuv tsuas hu lawm ib tse nees nkaum leej no rov hlo los, los kib vaj mus kib tsev, los kib vaj mus kib loog, los nrog ncej cub ua kwv tij os, nrog ncej txag ua kwv luag, los huas luag txwj nyob, los huas luag laus ua.
Ros hlo los tsau, Rov hlo los, Sawv tsees los.
21/ Xyoo laus tas, xyoo tshiab tuaj Kuv hu no, ces kuv tsuas hu lawm ib tse nees nkaum leej no Muaj tug quaj li yees qab thaiv nyuj, qab thaiv nees lawm los kuv hu kom zais rov li fo los. Muaj tus qaug li yees rooj nkuaj nyuj rooj nkuaj nees lawm los hu kom rais rov lis fo los . Muaj tus qaug lis yees rooj nkuaj qaib rooj nkuaj npuas los hu kom rais rov li fo los. Muaj tug qaug lis yees Ntxwj Nyug lub hleb nrag lawm los hu kom rais rov lis fo los. Muaj tug qaug lis yees Ntxwj Ntyug lub hleb rhaws lawm los hu kom rais rov lis fo los. Rov los tsau Rov hlo los Sawv tsees los.
22/ Tsis saub kev ploj Tsis seev kev tuag Tsis saub kev mus tu siab Tsis seev kev mus tu sau Tsis saub kev mus nrhia niam Tsis seev kev mus nrhiav txiv Nruab vaj yog chaw nyob Nruab loog yog chaw txoos Tsiaj txhu tsuas ncawg nkuaj no Tib neeg tsuas ncawg tsev Sawv tsees los. Tau txaj mus tau chaw tau vaj mus tau tsev tau niam mus tau txiv
tau kwv mus tau tij tau viv mus tau ncaus Rov hlo los tsau, Rov hlo los Sawv tsees los.
23/ Xyoo laus tas xyoo tshiab tuaj Kuv hu no, ces kuv tsuas hu lawm ib tse nees nkaum leej no: Muaj tug seev lis yees Ntxwj Nyug kev mus thov ntaub mus thov ntawv lawm los kuv hu kom rais rov lis fo los. Muaj tug seev lis yees Ntxwj Nyug kev mus nqa dej mus nqa taws lawm los hu kom rais rov lis fo los. Muaj tug seev lis yees Ntxwj Nyug kev mus ua qoob ua loo lawm los hu kom rais rov lis fo los. Muaj tug seev lis yees Ntxwj Nyug qab thaiv nyuj qab thaiv nees lawm los hu kom rais rov lis fo los. Muaj tug seev lis yees Ntxwj Nyug rooj nkuaj yuj, rooj nkuaj nees lawm los hu kom rais rov lis fo los . Muaj tug seev lis yees Ntxwj Nyug lub chaw fab seeb lawm los hu kom rais rov los
Muaj tug seev lis yees Ntxwj Nyug lub chaw fab sim lawm los hu kom rais rov los
Rov hlo los tsau Rov hlo los Sawv tsees los.
24/Tsis saub kev ploj Tsis seev kev tuag Tsis saub kev mus tu siab Tsis seev kev mus tu sau Tsis saub kev mus nrhia niam Tsis seev kev mus nrhiav txiv Nruab vaj yog chaw nyob Nruab loog yog chaw txoos Tsiaj txhu tsuas ncawg nkuaj no Tib neeg tsuas ncawg tsev Sawv tsees los tau qaib mus thaiv tes, tau qe mus thaiv taw ces los huas luag laus ua, los nyob ib txhiab tsis muaj mob, ib puas tsis muaj nkees Los nyob txheeb nyeem vam sawm dawb hau rov nres caug. Rov los tsau Ros hlo los Sawv tseem los.
25/ Kuv hu rov hlo, niam los niam coj txiv txiv los txiv coj tub tub los tub coj ki txiv los txiv coj Plig tsiaj plig txhu plig maj plig ntuag coj plig qoob plig loo, nplej liag txhuv qib ntsuas los . Niam los niam coj plig nyiaj plig kub los auj .
THAUM NTAUS KUAM
26/ Xyoo laus tas xyoo tshiab tuaj Ces rov hlo los, los huas luag txwj nyob los huas luag laus ua los nyob ib txhiab tsis muaj mob ib puas tsis muaj nkees los nrog ncej cub ua kwv tij tos nrog ncej taws ua kwv luag. Nrog ncej cub sib puag ntub ncej txag sib puag pw kuv ib tse nees nkaum leej los nyob ua txwj los zaum ua laus los nyob txheeb nyeej vam sawm plaub hau dawb paug nres caug los nyob dawb li dej los zaum ntsuab li zoo auj
LOS AUV!!!LOS AUV!!!
