NQA KAUJ VAB TSO PLIG.
Kev tso plig es yus yog tus nqa nkauj vab es yus los muab plig ntawm qhov rooj tag thiab cov lus los nrog sib txhiaj txhais nrog tus nyob hauv tsev uas yog tus tos plig.Tus nraum zoov nug=Tswv yeej ncuab, nyi txaim cuab puj txaim cuab?.
Tus nraum zoov nug=aub tswv yeej ncuab txaim cuab laud.
Tus nraum zoov nug=Tswv yeej ncuab, nyi cim cuab puj cim om?
Tus hauv tsev teb =Aub gu mas twb los sij cim cuab om.
Tus nraum zoo nug=tswv yeej ncuab, nyi cim cuab mas twb cim no yam zeej?
Tus hauv tsev teb=gu mas twb xoom tuam zeej tuam ki laij tshwm meej mas gu cim meej mas twb cim hos hos, zeej puj tsee kee laij, ki puj tsee kee laij au.
Tus nraum zoov nug=Tswv yeej ncuab, nyi cim meej mas twb cim hos hos, zeej puj tsee kee laij, ki puj tsee kee laij, gu mas twb los sij chij looj chij muas, laij tom tsi ni khais tom li nyi yij meej, gu laij txum cuab, mas tswv yeej ncuab.
Tus nraum zoov nug=Tswv yeej ncuab, nyi meej tab mas yom no yam txum tom li nyij meej tab, mas li yaws xwm fa?.
Tus hauv tsev teb=gu meej tab mas twb yom tom sob looj swm txum tom li gu meej tab, mas li yaws xwm fa.
Tus nraum zoov nug=Tswv yeej ncuab, nyij meej xwm yom no yam txum tom li nyi meej xwm, mas li yaws xwm fwm?
Tus hauv tsev teb=gu meej xwm yom tom sob looj swm txum tom li gu meej xwm, mas li yaws xwm fwm.
Ua zaj hais los txhiaj thiab txhais txog lub rooj thiab cov cawv uas lawv muab coj los rau nyob sab qhov rooj sab hauv tsev ntawd tos yus lawm xwb,
Tus nraum zoov ua zaj nug=Suav vaig ntxuaj yaig, ntuj hnub kwv li raug, nej tswv yeej ncuab, nej muab dab tsi los tav tau lawm npauj teeg kab li zaj, es npauj teeg tsis tau kev tsaws plaj,
es nej muab dab tsi los tav tau lawm tub txawg lw li yee, es tub txawg tsis tau kev tsaws ntxhee os nej tswv yeej ncuab?.
Tus hauv tsev ho ua zaj teb=Suav vaig ntxuaj yaig, ntuj hnub kwv li raug, os kooj ziag kab zaug, teej lag lim neb tub xa plig, leej liag tub txawj nkiag, tes lauj tes npab nyiag, peb muab rooj nrag los tav tau lawm npauj teeg kab li zaj, es npauj teeg tsis tau kev tsaws plaj,
hos peb muab rooj nraum los tav tau lawm tub txawg lw lis yee, es tub txawg tsis tau kev tsaws ntxhee, os kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag nes,
Tus nraum zoov ua zaj nug=Suav vaig ntxuaj yaig, ntuj hnub kwv li raug, li nej tswv yeej ncuab, nej muab rooj nrag los tav tau npauj teeg kab lawm li zaj, es npauj teeg tsis tau kev tsaws plaj,
es nej muab rooj nraum los tav tau tub txawg lw li yee, es tub txawg tsis tau kev tsaws ntxhee,
es rooj nrag npe ho hu li cas? Rooj nraum npe ho hu li cas no os tswv yeej ncuab, es nej paub no thov nej hais no os tswv yeej ncuab?.
Tus hauv tsev ho ua zaj teb=Suav vaig ntxuaj yaig, ntuj hnub kwv li raug, os teej lag lim neb nkawm tub mus xa plig, peb muab rooj nrag los tav tau lawm npauj teeg kab lawm li zaj, npauj teeg thiaj tsis tau kev tsaws plaj,
peb muab rooj nraum los tav tau lawm tub txawg lw li yee, es tub txawg thiaj tsis tau kev tsaws ntxhee,
rooj nram txua li zog los lawm ib daim mus txiag ntooj, txum zog los lawm plaub tug ceg txooj, nws npe hu ua rooj,
hos rooj nraum ces txua li zog los lawm ib daim mus txiag ci, txum zog los lawm plaub tug ceg txhi, nws npe hu ua ni, no os teej lag lim neb nkawm tub mus xa plig.
Tus nraum zoov ua zaj nug=Suav vaig ntxuaj yaig, ntuj hnub kwv li raug, li nej tswv yeej ncuab, ua li nej muab pas liaj los tav tau lawm npauj teeg kab lawm li zaj, npauj teeg tsis tau kev tsaws plaj,
es nej muab pas iav los tav tau lawm tub txawg lw li yee, es tub txawg tsis tau kev tsaws ntxhee,
no es pas liaj ho txawm qhov twg tuaj ne?, pas iav ho txawm qhov twg los no os nej tswv yeej ncuab?.
Tus hauv tsev ho ua zaj teb=Suav vaig ntxuaj yaig, ntuj hnub kwv li raug, os phooj ywg kwv luag kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag, peb muab pas liaj los tav tau lawm npauj teeg kab li zaj, npauj teeg thiaj tsis tau kev tsaws plaj,
hos peb muab pas iav los tav tau lawm tub txawg lw li yee, es tub txawg thiaj tsis tau kev tsaws ntxhee,
pas liaj ces txawm tau lawm teb ntxhab li sab, si laws los ntawm toj roob mus hauv sab, li puv sis yees los mus txij nthab, los tav tau lawm npauj teeg kab,
hos pas iav ces txawm tau lawm teb ntxhab li sw, si laws los ntawm toj roob mus hauv hlw, li puv sis yees los mus txij pwg, los tav tau lawm tub txawg lw, no os phooj ywg kwv yaig kwv luag, kooj ziag kab zaug, teej lag lim neb nkawm tub mus xa plig.
Nov ces yog cov zaj los muab plig los yog foom plig rau tus hauv tsev xwb.Tus tub nqa nkauj hais zaj muab plig los foom plig rau lawv lawm xwb ces hais zaj ces seev suab hais li hauv qab no lawm xwb os nawb=1, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
wb tuav niam nkauj teej plog, txiv nraug teej plig, mus txog tim toj, niam nkauj teej plog, txiv nraug teej plig ces nkauj vab los daws tag, nkauj lev los daws tso,
niam nkauj teej plog, txiv nraug teej plig ces taw tuaj sib li kha, tes tuaj sib li zog, niam nkauj teej plog txiv nraug teej plig ces yuav tuaj tis tuaj tw ya plaws nrog niam kab me noog mus ua ua npoj,
zaum no ces niam nkauj teej plog txiv nraug teej plig, yuav mus cuag nws yawm kus nws poj, no os nej tswv yeej ncuab.
1, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
wb tuav niam nkauj teej plog, txiv nraug teej plig, mus txog tim dawm, niam nkauj teej plog, txiv nraug teej plig ces nkauj vab los daws tag, nkauj lev los nrog daws, niam nkauj teej plog, txiv nraug teej plig ces taw tuaj sib li kha, tes tuaj sib li zaws,
niam nkauj teej plog txiv nraug teej plig ces yuav tuaj tis tuaj tw ya li plaws nrog niam kab me noog mus ua nkawm,
zaum no ces niam nkauj teej plog txiv nraug teej plig, yuav mus cuag nws poj kus nws yawm, no os nej tswv yeej ncuab.
2, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
wb xa niam nkauj teej plog txiv nraug teej plig, mus txog ntswg liaj, ntswg iav ncab, niam nkauj teej plog txiv nraug teej plig, ces teg lauj caum hmab cev, lauj nag caum hmab cab, nplawm li ntws nej tswv yeej ncuab,
tus me plig nyiaj plig kub, plig qoob plig loo, plig tsiaj plig txhuv, plig tub plig kiv, ces nraug zees los lawm niaj mus ib hnab, ces xab nyeej lwm xyoo, lwm nyeej nqis tav nov ces yuav ntws lug los puv rau lawm tsheej phab,
tus me plig qoob plig loo ces yuav ntsu laws los puv rau lawm nej lub mus nruab txhab,
tus me plig nyiaj plig kub, ces yuav nraug zees los puv rau lawm nej lub mus nruab hnab,
tus me plig tsiaj plig txhuv ces yuav vam ntws los puv rau lawm nej lub mus qab vag,
tus me plig tub plig kiv ces yuav vam ntws los puv rau lawm nej lub mus nruab txaj, ces nej yuav vam ntws xws lawm xub ntab, no os nej tswv yeej ncuab,
2, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
wb xa niam nkauj teej plog txiv nraug teej plig, mus txog ntswg liaj, ntswg iav ntev, niam nkauj teej plog txiv nraug teej plig, ces teg lauj caum hmab cab, lauj nag caum hmab cev, nplawm li ntws nej tswv yeej ncuab,
tus me plig nyiaj plig kub, plig qoob plig loo, plig tsiaj plig txhuv, plig tub plig kiv, ces nraug zees los lawm niaj mus ib rev, ces xab nyeej lwm xyoo, lwm nyeej nqis tav nov ces yuav ntws lug los puv rau lawm tsheej kev,
tus me plig qoob plig loo ces yuav ntsu laws los puv rau lawm nej lub mus nruab tsev,
tus me plig nyiaj plig kub, ces yuav nraug zees los puv rau lawm nej lub mus nruab hnab ntev,
tus me plig tsiaj plig txhuv ces yuav vam ntws los puv rau lawm nej lub mus qab tsev,
tus me plig tub plig kiv ces yuav vam ntws los puv rau lawm nej lub mus nruab lev, ces nej yuav vam ntws xws lawm xub mes, no os nej tswv yeej ncuab,
3, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
Wb xa mus txog ntua rau ntxwj xib nyoog cuaj ntsuag kab yim ntsuag kev, niam nkauj teej plog txiv nraug teej plig, tig ntsej los qhub, tig muag los hais tias, tus nkauj vab los daws tag, me nkauj lev los daws tso tseg, nws taw sib li kha, tes tuaj sib li khe,
Ces niam nkauj teej plog txiv nraug teej plig, yuav tuaj tis tuaj tw, ya nrog niam ntab tus mi mes, mus lawm ua tsheej kev, zaum no niam nkauj teej plog txiv nraug teej plig, yuav mus cuag poj cuag yawm rau ntuj sua teb tom pes,
Niam nkauj teej plog txiv nraug teej plig, yuav tsaug taw tus me yeej mis ceeb mis yeej ntxws, rooj nom rooj tswv, nraug zees los lawm tsheej kev, yuav ntws lug los rau lawm nej lub mus nrab tsev,
Nej nyob tom qab ces muaj hnub niaj mab niag suav yuav coj npe nom npe tswv tuaj rau lawm nej nres, ces nej yuav taug nyog suav nom suav tswv txog mus hauv kev,
Ces nej yuav sawv li tsees los ua laj mej pej xeem ib tug meej nom meej tsev siab loj mus siab ntev, ces yuav tau mus nyob suav nom suav tswv lub tsev vaj lig qhov rooj qhov rai txaij zees xws taub mes,
ces nej tus me qab vaj ces yuav sawv cuaj txwg mus tub mab los ua laj kab, ces nej lub me qaum loog ces yuav sawv lawm yim txwg mus tub qhe, los ua laj kem, ces nej tswv yeej ncuab yuav muaj koob moo ncha li ntwg mus nto lis plaws suav ceeb tsheej teb no os nej tswv yeej ncuab.
3, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
Wb xa mus txog ntua rau ntxwj xib nyoog cuaj ntsuag kev yim ntsuag kab, niam nkauj teej plog txiv nraug teej plig, tig ntsej los qhub, tig muag los hais tias, tus nkauj lev los daws tseg, me nkauj vab los daws tso tag, nws taw sib li khev, tes tuaj sib li khab,
Ces niam nkauj teej plog txiv nraug teej plig, yuav tuaj tis tuaj tw, ya nrog niam mes mus miv ntab, mus lawm ua tsheej pab, ces zaum no niam nkauj teej plog txiv nraug teej plig, yuav mus cuag poj cuag yawm rau ntuj sua teb tom qab,
Niam nkauj teej plog txiv nraug teej plig, yuav tsaug taw tus me yeej mis ceeb mis yeej ntxws, rooj nom rooj tswv, nraug zees los lawm tsheej phab, yuav ntws lug los rau lawm nej lub nrab mus plaj xab,
Nej nyob tom qab ces muaj hnub niaj mab niag suav yuav coj npe nom npe tswv tuaj rau lawm nej tab, ces nej yuav taug nyog suav nom suav tswv txog mus hauv kab,
Ces nej yuav sawv li tsees los ua laj mej pej xeem ib tug meej nom meej tswv siab loj mus siab daj, ces yuav tau mus nyob suav nom suav tswv lub tsev vaj lig qhov rooj qhov rai txaij zees xws nas ntab,
ces nej tus me qab vaj ces yuav sawv cuaj txwg mus tub qhe los ua laj kem, ces nej lub me qaum loog ces yuav sawv lawm yim txwg mus tub mab, los ua laj kab, ces nej tswv yeej ncuab yuav muaj koob moo ncha li ntwg mus nto lis plaws suav ceeb tsheej sab no os nej tswv yeej ncuab.
( foom plig ces xaus li no )
Ces ce cawv rau lawv cov hauv tsev haus lawm xwb tas ces koj ho rov thov kom lawm muab dua phaj los ces koj ho rov hais zaj hauv qab no thov kom lawv ho pab rub koj tes ntawm qhov rooj es koj mam nkag mus hauv tsev lawm xwb,4, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
Yuav khom vam tau lawm nej tswv yeej ncuab tes lauj caum tau rab pluaj toog mus peb ntxus hniav fab, quas ntho niam nkauj teej plog txiv nraug teej plig txoj mus qub kab, ces nej tswv yeej ncuab ho tooj teg los lawm tooj npab,
Ces rub li rhe kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag, wb tej mus quav npab, ces wb ho rais lees los lawm neej sab, no nas nej tswv yeej ncuab,
4, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,
Yuav khom vam tau lawm nej tswv yeej ncuab tes lauj caum tau rab pluaj toog mus peb ntxus hniav ntev, quas ntho niam nkauj teej plog txiv nraug teej plig txoj mus qub kev, ces nej tswv yeej ncuab ho tooj npab los lawm tooj teg,
Ces rub li rhe kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag, wb tej mus quav tes, ces wb ho rais lees los lawm neej teb, no nas nej tswv yeej ncuab,
Tas li no ces cev cov khob cawv rau lawv cov hauv tsev haus tas ces thov lawv rub yus tes ces yus ho nkag mus rau hauv tsev lawm xwb.
Tag li no lawm xwb hais txog txoj kev koj mus nrog luag nqa nkauj vab tso plig nas es hais rau peb txhua tus tias yog koj txawj tsis txaus no thov tsis txhob mus nrog luag nqa nkauj vab nawb.
Text copyright © by Dee Vang in jun 04 / 2011.
All rights reserved by Hmoob ntuj tshiab kev sau txuj ci.
Please call or writing to Hmoob ntuj tshiab kev sau txuj ci.
for permission of any reproduction. Att: Hmoob ntuj tshiab- kev sau txuj ci,
1167 Thorndale St Green Bay, WI 54304