Kab ke Ntees " Qeej"

Hmoob ntuj qub qab 31st March 2010, 1:16 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°1

Kab ke Ntees

Hmoob ntuj qub qab 31st March 2010, 1:16 am

Zaj Qeej Tu Siav

Tus sau: Yaj Nom Vaj, Los Tsuas teb

Thaum Taw kev ( qhuab ke ) tas mam li tshuab zaj qeej tu siav raws li no:

Thaum ua xub ntaus caug yus hais li no: Leej tub tuag koj tuag tseeb los tuag cuav, tuag daj los tuag tiag sawv sis tsees los mloog qeej.

Yog me nyuad yau no ua xub ua 2 nqes,ntaug ntiv los ntaug 2 zaug xwb.
Yog cov laus no, ua xub ua 6 nqes, ntaug ntiv los ntaug 6 zaug.

I.Zaj taug noob mob.

Leej tub tuag koj tuag tseeb los tuag cuav tuag daj los tuag tiag, leej tub tuag Txawm lawm tub sis nquag mus ntxhua seb tuaj nram dej lug,yuav mus khaws tau niam ib lub kuab ntxoom sij pes thawb tuaj nruab siab os leej tub tuag.
Txawm lawm tub sis nquag mus ntxhua seb tuaj nram dej lug,yuav mus khaws tau niam ib lub tuag ntxoom vwg pes thawb tuaj nruab cev os leej tub tuag.
Nyaj pag leej tub mus nqa qaub, ncig tau tom lom sib pes lug mus muab kuab tuaj nram dej lug leej tub tuag,ua ciav leej tub tuag Txawm lawm tub sis nquag kom yuav qaug txaj qaug lav qaug chaw pw ij suj yua leej tub tuag.
Tshuab puv 2 nqes ces yus mus ntawg li no: koj tuag tseeb los tuag cuav tuag daj los tuag tiag,tuav 3 txoj cawv rau koj haus tso, kuv txiv qeej yuav tshov 33 zaj. qeej rau koj coj mus cuag poj cuag yawg.
(tuav kom puv 1 2 3 txoj cawv).
Tuav puv 3 txoj ces muab txhib ntawg pav rau ntawm ntiv tw, ces hais li no: Hais rau koj txhob ntshai kuv muab dab txhib ntawg coj koj kab koj kev mus nug dab vaj dab tsev, dab vaj dab tsev li tso koj mus cuag poj cuag yawg.

Cov laus yuav tshov kom txaus 6 txwm nkaus los yog 6 nqe mam li xaus ces cais ua tuag luav, ces ua ntiv rag mam li tig ces hais tias: Leej tub tuag koj tsis tim ntshai kuv ua kooj ziag kab pes zaug xi pes law ua koj ntej sawv sis tsee los peb mus nqaum paj ntaus nruas tuaj ntawm ij, ua ntiv rag tig 3 ntxees tom los luab..ij, twg, nuab.
Ces cia li ncaj qha los chaws qab nruag 2-3 lwm tib seem ces cia li xaus kiag ua tuag luav.

II.Zaj tu siav.

Ua tuag luav Ces cia li ua xub mus rau ntawm qhov tu siav,ces txhos caug 6 nqe xub rau ntawv, ces sawv pws ntiv hais li no: leej tub tuag koj tuag tseeb los tuag cuav tuag daj los tuag tiag,koj yuav tuag qas tiag leej tub tuag, koj tu siav tu qhov twg koj tu siav sis nrho tej quav npab, koj tu siav tu qhov twg koj tu siav sis nrho tej quav tes. Leej tub tuag ua ciav dej txias txawm dej txias tej qab zeb os leej tub tuag, nkawm laj lig tub pes yau yuav mus nqa tshob dej txiag yuav los rhaub tshob dej sov, yuav los ntxuav koj leej tub tuag ntsej muag tshiab sis khiv lawm tuag teb ij suj yua.
Tshuab kom puv 6 nqe, nqe tu siav. Tas ces los ua ntiv rag tig 3 ntxees tias: kuv ua kooj ziag kab sis zaug xiv pes law ua koj ntej los peb mus nqaum paj ntaus nruas tuaj ntawm ij,twg,nuab. Ces cia li los chaws qab nruag 3 zaug ib sab,ces los ua tuag luav tiag xub xwb nawj.Tas nqe tu siav thiab ntxuav muag lawm ces mus nug dab vaj dab tsev lawm xwb.

III. Nqe nug dab vaj dab tsev.

Ua ntej tiag xub 6 nqe yog tias:
1. Poj niam no tiag xub ntawm rooj txag, ntaug ntiv ntawv tas ces mus ntawm qhov txos.
2. Txiv neej no tiag xub ntawm rooj txag, ntaug ntiv ntawv tas ces mus ntawm qhov cub.
** Zaj nug hais li no:
Leej tub tuag koj tuag tseeb los tuag cuav tuag daj los tuag tiag, leej tub tuag pw sis ko niam txiv dab rooj txag lub qab rooj txag, niam txiv dab rooj pes txag ua daj lis nti los nrog thaiv ua do li nti los nrog ntis.

Niam txiv dab rooj pes txag tsa ncauj qhub tim lus hais yuav ntim tau txiaj saub zam pes zis mus dab tsi os leej tub tuag, leej tub tuag yuav tsa ncauj qhub tim lus hais niam txiv dab rooj pes txag,vim tau niam mob tuaj nej tsis thaiv niam tuag tuaj nej tsis ntis, leej tub tuag li tu siav pes nrho tuaj ntawm ncauj tu siav pes nrho tuaj ntawm lo,yoj cev sis yeev los nrog qaug hlav tsuj los hlav npuag ij ntaug ij suj os leej tub tuag.
Vim tau ntxwj sib pes nyoog siab tsis zoo tso niaj mob poob li nthav rov los txog, ntxwj sib pes nyoog plawv tsis tus tso niam tuag poob sis nthav rov los ti os leej tub tuag.
Nkawm laj lig tub pes yau yuav mus raws tau 9 tus txiv tshuaj ij rov los poob, yuav mus raws 8 tus txiv neeb rov tuaj txog, 9 tus txiv tshuaj muab tshuaj rau ntawm ncauj tshuaj npau tshuaj tsis vauj, muab tshuaj rau ntawm lo tshuaj npau tshuaj tsis sov.
Ua ciav 9 tus txiv tshuaj kho tsis zoo 8 tus txiv neeb kho tsis sawv leej tub tuag. Ua ciav vim tau leej tub tuag ntoo maj qaug lawm lej ntoov tov qaug lawm ntxov, leej tub tuag koj yuav nrog tau koj tus ntoo maj ntoo sis tov qaug pes yee pes yee tuaj ntawm ij suj yua.

Tas no ces ua tuag luav tas ces ua ntiv rag tig hais li no: Leej tub tuag koj tsis tim ntshai,kooj ziag kab zaug xiv pes law ua koj ntej los peb mus nqaum paj nqaum nruas tuaj ntawm ij,twg,nuab.

a. Yog txiv neej nug dab qhov rooj txag tas,qhov cub,qhov txos,ncej tas,xwm kab,rooj txuas,rooj tag.
b. Yog poj niam nug dab qhov rooj txag tas,qhov txos,qhov cub,ncej tas,xwm kab, rooj txuas,rooj tag.

Nug kom txhua cov dab vaj dab tsev li hais los saum toj no.Tas ntawv ua ntiv rag zais roj zais neev ces los chaws qab nruag xaus qeej.

Yog muaj xyom cuab xyom yuav tsum tsa xyom tas li xa nce ntaiv ntuj.

IV.Zaj xa mus saum ub.

a. Nqe 1 yog nqe pib xa.

Num kauj txiv sis kua yog rab qeej.
Leej tub tuag koj tuag tseeb los tuag cuav tuag daj los tuag tiag. Num kauj txiv sis kua xa leej tub tuag tshais roj pes nruam tuaj nraum rooj tshais neeb pes nruam tuaj nraum ntsa.
Num kauj txiv sis kua xa leej tub tuag txog tim toj xa leej tub tuag mus cuag tau poj
Num kauj txiv sis kua xa leej tub tuag txog tim dawm xa leej tub tuag mus cuag tau yawm
Num kauj txiv sis kua xa leej tub tuag nce sis hlo ntxwj sib pes nyoog tus ntaiv ntuj

Num kauj txiv sis kua xa leej tub tuag nce sis hlo ntxwj sib pes nyoog tus ntaiv tuag

Num kauj txiv sis kua xa leej tub tuag nce sis hlo ntxwj sib pes nyoog qab thaiv nyuj

Num kauj txiv sis kua xa leej tub tuag nce sis hlo ntxwj sib pes nyoog qab thaiv nees
ij suj yua, ua ntiv ntaug quas ib zaug .

b. Nqe 2 yog nqe muab khau maj rau rau.

Num kauj txiv sis kua xa tau leej tub tuag nce sis hlo
Ntxwj Sib pes nyoog toj zeb tshau
Num kauj txiv sis kua xa tau leej tub tuag nce sis hlo
Ntxwj Sib pes nyoog toj zeb zuag
Num kauj txiv sis kua xa tau leej tub tuag nce sis hlo
Ntxwj Sib pes nyoog toj kab ntsig kev kab nog
toj kab ntsig,toj kab ntsuab dhia sis rhees luaj thav yaj
koj tsis tim ntshai, koj dhia sis rhees tuaj qab ke, dhia sis rhees tuaj qaum kev os leej tub tuag.
Toj kab ntsig toj kab ntsuab dhia sis rhees luaj thav yaj koj tsis tim ntshai koj yuav nkaus koj khau maj khau sis ntuag los nrog ntxig,nkaus koj khau maj khau sis ntuag los nrog rau os leej tub tuag.
Yog muab khau maj khau nyab rau rau lawm no ces cia li tshuab ntxiv mus, yog tias tsis tau muab khau maj rau rau no, kom lawv muab khau maj rau rau.Ua ntiv ntaug Ces quas ib zaug .
c. Nqe 3 yog nqe ntawm tus qaib.

Leej tub tuag, tshav ntuj koj yuav nkaum koj qaib ib, los nag koj yuav nkaus koj qaib tis,koj qaib qua sis laws ua koj ntej os leej tub tuag ij suj yua. Ua ntiv ntaug ces Quas ib zaug.

d. Nqe 4 yog nqe muab khaub hlab liab los khi tes.

Num kauj txiv sis kua xa tau leej tub tuag nce sis hlo ntxwj sib pes nyoog 99 yas kab 98 yas kev os leej tub tuag.
Nkawm tub zov rooj vag hais rau leej tub tuag koj nrog tseb qij los tseb dos, koj hais rau nkawm tub zov rooj vag kuv nyob ntiaj teb kuv tseb muaj los tseb txaus ntiv tes los lo ntshav, kuv tseb tsis tau koj li tau kev mus cuag poj cuag yawg.Ua ntiv ntaug ces quas ib zaug.
Luag kom yus tev qij tev dos yus hais li no thiaj li dhau mus.

e. Nqe 5 nqe leej tub tuag tau khau leej tub tuag mus, Num kauj txiv sis kua tsis tau khau yuav rov qab.

Leej tub tuag koj tuag tseeb los tuag cuav tuag daj los tuag tiag.
Num kauj txiv sis kua xa tau leej tub tuag nce sis hlo ntxwj sib pes nyoog toj kab ntsuab kev kab ntsig.
Num kauj txiv sis kua xa tau leej tub tuag txog sis ntua ntxwj sib pes nyoog tus dej yig tsum ntws nto luaj seb, leej tub tuag koj tau khau koj mus num kauj txiv sis kua tsis tau khau yuav rais roj rais neev feb.
Num kauj txiv sis kua xa tau leej tub tuag txog sis ntua ntxwj sib pes nyoog tus dej yig tsum ntws nto luaj ntshuaj xov,Num kauj txiv sis kua hais rau leej tub tuag koj tau khau koj mus,Num kauj txiv sis kua tsis tau khau yuav rais roj rais neev rov leej tub tuag ij suj yua.
Tas no los ntaus plig:
Koj yog yeeb ceeb neeg koj yuav yeeb kuam, kuv yog yaj ceeb neeg kuv yuav yaj kuam, koj ntaus kuv ib luag plig rov tom qab koj li tau kev mus cuag poj cuag yawg, koj txhob tsoj luag qab nyob tsam koj mag luag ntaj dab, txhob tsoj luag neev nyob tsam koj mag luag ntaj hneev.
Ntaus kuam kom qhib 2 sab li yuav, tsiv tsawv tsiv yaig nrhiav qaib nrhiav qe hu ces tau ...los muab tes haws los rau ntawm ntim txhuv qe.

** Kom ib tug laus pab hu plig kiag ntawm qhov chaw ntawv,hnub kwv mus tsis hu plig lawm.

** Yuav ntim txhuv xwb tsis yuav tus qaib.

f. Nqe 6 nqe ntaus plig tas ces xa nce mus saum ub kiag.
Leej tub tuag koj tuag tseeb los tuag cuav tuag daj los tuag tiag.
leej tub tuag koj qaib qua luag qaib teb tsis yog koj pog koj yawg qhov muag hleb.
Leej tub tuag koj qaib qua luag qaib xa tsis yog koj pog koj yawg qhov muag ntxa.
Leej tub tuag luag qaib qua koj qaib teb li yog koj pog koj yawg qhov muag hleb.
Leej tub tuag luag qaib qua koj qaib xa li yog koj pog koj yawg qhov muag ntxa os leej tub tuag.
Koj pog koj yawg yuav qaws tej nqaws tiab cug li ntua koj yuav dhia li plhawv tej nqaws tiab, dhia li plhawv koj pog koj yawg tej nqaws tsho koj li mus cuag tau koj pog koj yawg ij os leej tub tuag.
Koj zaum pes zaws tej qab cais li ciaj tau ntxwj sib pes nyoog ib leej ntxhais, zaum pes zaws tej qab cub li ciaj tau ntxwj sib pes nyoog ib leej tub ij suj yua leej tub tuag.

g. Nqe zais roj zais neev.

Tas li no ces ua tsaug zais roj zais neev xwb.
Leej tub tuag txoj khob cawv los koj haus txhua,qeej tu siav los tshov txhua ua koj tsaug tuaj ntawm ij, tom los luab tig ib ntxees.
-“- -“- tws, tom los luab tig ib ntxees.

Leej tub tuag txoj khob cawv los haus tas qeej tu siav los haus tas ua koj tsaug tuaj ntawm nuab, tom los luab tig ib ntxees.

** Tas no ces zais roj zais neev:

Leej tub tuag yuav zais qeej pes zws tuaj ntawm ncauj zais nruas pes zws tuaj ntawm tes
Leej tub tuag yuav zais roj pes zws tuaj nruab taub zais neev pes zws tuaj nruab ntiv
Leej tub tuag yuav zais roj pes zws tuaj ntawm rooj zais neev pes zws tuaj ntawm ntsa
Leej tub tuag yuav zais roj pes zws tuaj nraum roob zais neev pes zws tuaj nraum toj
Leej tub tuag yuav zais roj pes zws tuaj qab ntuj dub zais neev pes zws tuaj qab ntuj dag
Leej tub tuag yuav zais roj pes zws tuaj nruab luaj zais neev pes zws tuaj nruab Av

Roj xyaw luaj pes ntxaws neeb xyaw av pes ntsuab, ploj pes ntais nrhiav tsis pom qab, duab pes ntais nrhiav tsis pom lw leej tub tuag tom los luab.
Tas li no ces nkag qab nruag zais roj zais neev hauv qab nruag los xaus qeej.

Hmoob ntuj qub qab 1st April 2010, 1:53 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°2

Qeej tos nees( Qeej nce nees)

Hmoob ntuj qub qab 1st April 2010, 1:53 am

Zaj qeej tos nees

a. nqe 1 tshuab ntawm tus tuag pw.

(Yus tsis ntawg rau tus tuag)

Ua ntiv, tuag luav, ua ntiv rag chaws qab nruag,ua xub
6 nqe yog cov laus ces sawv ntaug ntiv hais li no:
Leej tub tuag koj tuag tseeb los tuag cuav tuag daj los tuag tiag koj tuag qas tiag leej tub tuag.
Koj tsis tim ntshai kooj ziag kab sis zaug yuav coj koj sawv sis tsees los mus tos koj nees pes dab nees pes txaig txauj sis ntwg tej tog vaj, nees pes dab nees pes txaig txauj sis ntwg tej tog tsev leej tub tuag koj tsis tim ntshai sawv sis tsees yuav los mus tos koj nees pes dab nees pes txaig tuaj ntawm ij.

** Thaum ua xub yuav mus tos nees pes dab nees pes txaig yus hais li no:
Nees pes dab nees pes txaig txaum sis ntwg yuav txeem vaj, txaum sis ntwg yuav txeem loog.

b. nqe 2 ua xub thiab ua zaj mus tos nees pes dab nees pes txaig ntawm qhov rooj txuas.

1. Ua xub hais li no:

Nees pes dab nees pes txaig txauj sis ntwg lub rooj tag nees pes dab nees pes txaig txauj sis ntwg lub rooj txuas.

2. Thaum ua zaj hais li no:

2.1 Nqe zaj 1:
Nees pes dab nees pes txaig nyob yuav tau zoov nuj nrag pes txeeg tej nrab ntoo, nees pes dab nees pes txaig ntaug sis leev rov los poob.
Nees pes dab nees pes txaig nyob yuav tau zoov nuj pes txeeg tej nrab tog,nees pes dab nees pes txaig ntaug sis leev rov los txog.

Nees pes dab nees pes txaig yuav tis tau txoj hlua ntswj,yuav cug tau qaum lis nroov yuav los ris ntiaj pes teb nrag pes cais leej tub tuag ij tu qauv lwj.
Nees pes dab nees pes txaig yuav tis tau txoj hlua ntuag, yuav cug tau qaum lis nroov yuav los ris tau ntiaj pes teb nrag pes cais leej tub tuag ij tus qauv tuag.
Ntaug ntiv quas ib zaug.

2.2 Nqe zaj 2:
Leej tub tuag sawv sis tsees nees pes dab nees pes txaig yuav ntaug sis leev lub rooj tag, yuav cug tau qaum lis nroov yuav los ris tau leej tub tuag nyob mus pauj dab.
Nees pes dab nees pes txaig yuav ntaug sis leev lub rooj txuas, yuav cug tau qaum lis nroov yuav los ris leej tub tuag nyob mus pauj qhua.

Cov laus ua 6 nqe ntiv ntaug.

3. Nqe ua ntiv rag hais li no:
Nees pes dab nees pes txaig ntaug sis leev lub rooj txuas, ris tau leej tub tuag los pauj qhua.
ntaug sis leev lub rooj tag, ris tau leej tub tuag los pauj dab, tom los luab tig 1 ntxees mus, ho tshuab li qub thiab ces tig 1 ntxees los.
Tas li no ces fiv kiag los pem hauv plag ces tsis ua ntiv ntaug lawm cia li ua ntiv rag xwb.

4. Nqe ua ntiv rag los pem hauv plag hais li no:
Nees pes dab nees pes txaig ntaug sis leev poob sis nthav tuaj nrab plag,cug tau qaum li nroov yuav los ris leej tub tuag nyob mus pauj dab.
Nees pes dab nees pes txaig ntaug sis leev poob sis nthav tuaj nrab tse, cug tau qaum li nroov yuav los ris leej tub tuag nyob mus pauj qhua, tom los luab ces tig 1 ntxees.

5. Nqe tuam tus nees hais li no:
Num kauj txiv sis kua taw qas lum tuam tau nees pes dab nees pes txaig tuaj pem ij tom los luab tig 1 ntxees ib lawg taw rau tus nees.
Num kauj txiv sis kua taw qas lum tuam tau nees pes dab nees pes txaig tuaj pem tws tom los luab tig 1 ntxees ib lawg taw rau tus nees.
Num kauj txiv sis kua taw qas lum tuam tau nees pes dab nees pes txaig tuaj pem nuab tom los luab tig 1 ntxees ib lawg taw rau tus nees.

Tig 3 ntxees 3 lawg taw rau tus nees tas ces yus zam rov qab, mam li kom lawv nqa tus tuag rau saum tus nees.
Tas ces hais li no:
Leej tub tuag nees pes dab nees pes txaig cug qaum li nroov ris leej tub tuag yuav lawv thaj sam mus pauj dab.
Leej tub tuag nees pes dab nees pes txaig cug qaum li nroov ris leej tub tuag yuav lawv thaj sam mus pauj qhua
Tom los luab.

** Tas ces ua 3 zaug tig 3 ntxees, hais li no:

- Txoj khob cawv koj haus txhua,qeej tos nees los tshov txhua ua koj tsaug tuaj ntawm ij tom los luab tig 1 ntxees.
- Txoj khob cawv koj haus tas qeej tos nees los tshov tas ua koj tsaug tuaj ntawm tw tom los luab tig 1 ntxees.
- Txoj khob cawv koj haus txhij qeej tos nees los tshov txhij ua koj tsaug tuaj ntawm nuab tom los luab tig 1 ntxees.
Tas li no ces cia li zais roj zais neev tas ces cia li chaws qab nruag xwb.

Hmoob ntuj qub qab 4th April 2010, 8:17 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°3

Qeej ntaus Suav

Hmoob ntuj qub qab 4th April 2010, 8:17 pm

Zaj qeej ntaus suav

Zaj qeej ntaus suav Peb Hmoob cov tseem coj qub kab lis kev cai nws muaj ib txhia ntaus Suav li no:

a.ua Rog txais yog muaj ob tug txiv qeej ntaus suav ib tug tuaj sab nraum zoov ib tug tuaj sab hauv tsev, thaum txog ntawm qhov rooj tag thiab qhov rooj txuas ob tug txiv qeej txaum yim qeej.
b.Ib txhia muaj ib tug txiv qeej mus sab nraum zoov xwb .
c.Ib txhia lawv tsis muaj ntaus Rog los yog tshuab qeej ntaus suav li

1. Ua ntiv rag chaws qab nruag hais li no:
Tub nqa kom sawv mus txhij,tub nqa kom sawv mus txhua, yuav mus ncig qab ncej ntxheb ncej ntxoos txhua pes zwb pes zis tuaj ntawm ij, twg, nuab.

2. Ua ntiv rag thaum tawm sab nraum zoov mus ncig tsev hais li no:

Peb yuav mus tsuj mab tsuj suav cia.
Peb yuav mus tsuj mab tsuj suav tseg.

Hneev tim toj tes lwb tes laim tuag ua npoj.
Hneev tim dawm tes lwb tes laim tuag ua nkawm.

Ntiv qeej: suj teg nplhuj suj teg nplhuj tom los luab.

3. Ua ntiv rag thaum rov los chaws qab nruag hais li no:
Tub daws kom daws kom txhij, tub daws kom daws kom
txhua.

Last edited by Hmoob ntuj qub qab on 4th April 2010, 8:26 pm; edited 1 time in total

Hmoob ntuj qub qab 4th April 2010, 8:25 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°4

Qeej fiv qauv coj mus zais

Hmoob ntuj qub qab 4th April 2010, 8:25 pm

Zaj qeej fiv qauv coj mus zais(Sam sab)

Ua ntiv tas ua tuag luav ces ua ntiv rag chaws qab nruag tas ces ua xub ntaus caug tas ces sawv pws ntiv li no:
Leej tub tuag sawv sis tseem yuav los mus
Yuav tshais roj pes nrws tuaj nraum rooj
Yuav tshais neev pes nrws tuaj nraum ntsa
yuav tseg kwv tseg tij cia
yuav tseg niam tseg txiv tseg
yuav tseg vaj tseg tsev cia

Qhov ntuj to koj yuav mus txhaws qhov ntuj
Qhov teb to koj yuav mus txhaws qhov teb

koj tsis tim ntshai kooj ziag kab zaug xiv pes law ua koj ntej, sawv sis tsees yuav los mus thawj thiab thawj thw tuaj ntawm ij,tws,nuab.
Tas ces ua tuag luav zais roj zais neev, ces fiv tawm mus pov tseg.

Hmoob ntuj qub qab 4th April 2010, 8:41 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°5

Qeej thov su

Hmoob ntuj qub qab 4th April 2010, 8:41 pm

Qeej taug nyuj neev (thov su)

Thaum yuav taug nyuj neev los xa plig yuav tsum ua 2 nqe
xub hais tias:
Tej kwv tij tej kwv luag los peb mus dhia ua si.

1.Qeej xub rug:
a. Ij kaj ntug tej cag xyoob xab ij ntuj tej cag ntoo.

b. Tej kwv tij tej kwv luag los peb mus taug yuav tau txiv nyuj dub nyob qhov twg, txiv nyuj dag dua twg lawm tom los lum...
c. Nqe taug los txog ntawm nyuj pw:
Txiv nyuj dub dua twg li, txiv nyuj dag dua twg lawm, txiv nyuj dub pw sis ko tej ntsa nkuaj, txiv nyuj dag pw sis ko tej ntsa thaiv.

2. Nqe ntawm tus nyuj khi,yus yuav tau txhos caug:
txiv nyuj dub dua twg li, txiv nyuj dag dua twg lawm
txiv nyuj dub pw sis ko tej ntsa nkuaj, txiv nyuj dag
pw sis ko tej ntsa thaiv, txiv nyuj dub tej plhu
txiaj tis qas tsi,txiv nyuj dag tej plhu ntsig tis li
cas, txiv nyuj dub tej plhu txiaj tis hlua maj,txiv
nyuj dag tej plhu ntsig tis hlua ntuag, taug tsis tau
los cia ntawm ij tom los lum.
3. Txog qhov no ntaus caug 2 zaug tas ces cia li taug
nyuj mus nram tswg:
a. txiv nyuj dub dua twg li, txiv nyuj dag dua twg lawm, txiv nyuj dub ij tus roj ntshi sis rheb ij nram tiaj, txiv nyuj dag ij tu neev ntshi sis rheb ij nram tu,Quas ib zaug.
b. Txiv nyuj dub ij tu neev ntaug sis leev ij nram tiaj, txiv nyuj dag ij tu roj ntaug sis leev ij nram tu, quas ib zaug.
c. Ij nram tiaj txawm qas tsi, ij nram tu txawm li cas, ij nram tiaj cia ntsia tooj,ij nram tu cia ntsia hlau(yog tus tswg),quas ib zaug.
d. Txiv nyuj dub khi sis nrheev ij nram tiaj,txiv nyuj dag khi sis nrheev ij nram tu, nkawm laj lig tub pes yau tub pes laj nkawm kav txoob tes pes lauj caum yuav tau niam uab pes ntsuab tawg sis nkuav txiv nyuj dub tej nkhib kub, tawg sis nkuav txiv nyuj dag tej nkhib kaus, quas ib zaug.
e. Txiv nyuj dub qaug pes lais tuaj nram tiaj
Txiv nyuj dag qaug pes lais tuaj nram tus
txiv nyuj dub ntshav si pes lais mus xyaw luaj
txiv nyuj dag ntshav si pes lais mus xyaw av

f.Nqe taug mus tom pawg nplooj:
Txiv nyuj dub ntshav si pes lais dua twg li
Txiv nyuj dag ntshav si pes lais dua twg lawm
ntshav si pes lais pawg kob nplooj, si pes lais pawg
kob hlau yuav taug tsis tau tom lom lum.

g.Nqe taug mus ntawm lub yias:
Txiv nyuj dub nqaij lwj pes tsus lub yias tooj
Txiv nyuj dag nqaij lwj pes tsus lub yias hlau

hmob nyob hmob tej tog ntoo ua koj tsaug txiv tshwj
kab, koj qia dub koj qia doog
thov yuav tau tsiaj zeb dub tej hau nqaij
thov yuav tau tsiaj zeb doog tej hau hno
Coj ntawg sis tawb sis toj leej tub tuag tej hauv ncoo
ua koj tsaug txiv tshwj kab.
ces yus tshov qeej txhos caug thov tshwj kab 3 lub raj, yog yus txawj zaj kuj
hais zaj thov tshwj kab.
- tas li no tshwj kab muaj 3 lub raj ntim nqaij,kua,mov
rhais rau yus rab qeej ces yus tshov los xaus qeej
tom ncej nruag.
- Tas ntawv thov kom ib tug sab nrauv uas tsis yog yus
cov txiv qeej pab tshuab qeej su rau.

Hmoob ntuj qub qab 4th April 2010, 8:47 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°6

Qeej xa plig

Hmoob ntuj qub qab 4th April 2010, 8:47 pm

Qeej xa plig ( Tsiaj txhuv li : Nyuj Twm)

Ua ntiv,ua xub rug ntawm ncej nruag,ces mus tom tus tswg yus hais li no:
Tej kwv tij tej kwv luag los peb mus taug yuav tau tsev xyom cuab tus plig tsiaj dua twg li, tus plig txhuv dua twg lawm.
Los peb mus taug yuav tau tsev xyom cuab tus plig tsiaj qaug sis npluav tuaj nruab luaj, tus plig txhuv qaug sis npluav tuaj nruab av.
Ua koj tsaug txiv tshwj kab:
thov yuav tau tsev xyom cuab tej plig tsiaj rov fib qab
thov yuav tau tsev xyom cuab tej plig txhuv rov fib tsev
ua koj tsaug txiv tshwj kab.

Tshov ntawm tus tswg ces txiv tshwj kab mam muab ib qho plaub nyuj rhais rau yus rab qeej,ces yus mam dhia rov qab los rau pem qab nruas, ces los mus pem tsev, lawv ua ntim ntxuag tos.
Hais ib zag cob rau xyom cuab (foom plig), hais tas ces mam muab cov plaub nyuj tso hauv ntim txhuv qe mam nrog lawv noj ntxuag tas ces yus rais qeej rov qab xwb.

Hmoob ntuj qub qab 4th April 2010, 9:05 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°7

Qeej tos Plig

Hmoob ntuj qub qab 4th April 2010, 9:05 pm

Zaj qeej tos plig

thaum yuav tso plig tshuab qeej mus tos plig los daws kauj vab kauj le

1.Ua ntej ua ntiv tuag luav, ua ntiv rag chaws qab nruag tas ua ntiv rag ces ua lawv ntej mus tom kev, txog tom kev ces ua xub ntaus caug hais li no:
nkauj qas plig seev pes yee lawm puag niaj, pw sis ko tus cav qiaj.
Nkauj qas plig seev pes yee lawm puag xyoo, pw sis ko tus cav ntoo.

2. ua xub tas ces sawv pws ntiv hais zaj li no:

Nqe 1:

Nkauj qas plig seev pes yee lawm puag niaj
Nraug qas plig seev pes yee lawm puag xyoo

Tub pes tij tes pes lauj kwv hneev tuaj xwb pwg, txib ntaj tuaj ntawm duav yuav mus tos tau nkauj qas plig tej yas kev, tos tau nraug qas plig tej yas kab.
Tub pes tij tes pes lauj yuav tso tau nas ntsooj nas sis kob mus khawb hleb, tso tau nas ntsooj nas sis kob mus khawb ntxa.
Khawb sis kawb sis ko tej npoo hleb
Khawb sis kawb sis ko tej npoo ntxa ij suj yua

Tas no ces quas ib zaug.

Nqe 2:

Nkauj qas plig tub pes tij tes pes lauj kwv hneev tuaj xwb pwg txib ntaj tuaj ntawm duav,yuav mus tos tau nkauj qas plig tej yas kab,tos tau nraug qas plig tej yam kev.
Tub pes tij tshuv pes zoj tuaj qab ntxa hu pes laws niaj 3 suab
Tub pes tij tshuv pes zoj tuaj qaum ntxa hu pes laws niaj 3 los
Nkauj qas plig yuav tsim sis rheev sawv sis tsees yuav ntxuaj tis ntxuaj tw ya ij suj yua.

Nqe 3:

Tub pes tij kwv hneev tuaj xwb pwg txib ntaj tuaj ntawm duav,yuav mus tos nkauj qas plig tej yas kab los daws nkauj qas plig lub kauj vab.
Tos nraug qas plig tej yas kev los daws nraug qas plig lub kauj le.
Tub pes tij tuav yuav tau ncuav nplej liag pes nplaum tej lub ncab yuav mus tos tau nkauj qas plig los daws
kauj vab
Tub pes tij tuav yuav tau ncuav nplej liag pes nplaum tej lub ntev yuav mus tos tau nkauj qas plig los daws
kauj le

Nkauj qas plig zaum sis tsawv lub kauj vab, nraug qas plig zaum sis tsawv lub kauj le.

Nqe 4 yog nqe ntawm lub rooj vag:

Tub pes tij kwv hneev tuaj xwb pwg txib ntaj tuaj ntawm duav,yuav mus tos nkauj qas plig tej yas kab los daws nkauj qas plig lub kauj vab.
Tub pes tij muab yuav tau dev txaij dev sis kuas los quas kab
Tub pes tij muab yuav tau dev txaij dev sis kuas los quas kev

Tub pes tij muab yuav tau lub tsho maj los ntis nkauj qas plig txoj kev txaj
Tub pes tij muab yuav tau lub tsho ntuag los ntis nkauj qas plig txoj kev txaj muag
Nkauj qas plig yuav los daws kauj vab cia, yuav los daws kauj le tseg ij suj yua.

Nqe 5 yog nqe yuav los mus saum lub txaj:

Tub pes tij yuav mus tos nkauj qas plig tej yas kev, nkauj qas plig seev pes yeev yuav los daws kauj le
Tub pes tij yuav mus tos nkauj qas plig tej yas kab, nkauj qas plig seev pes yeev yuav los daws kauj vab

nkauj qas plig yuav los zaum sis tsawv lub txaj txawb, Nraug qas plig yuav los zaum sis tsawv lub txaj txws.
Nkauj qas plig yuav los lees 9 txoj khob cawv los haus tas, 8 txoj khob dej los haus txhua.
Nkauj qas plig kev txwj kev laus yuav los daus quj ij suj yua.
(los daus quj yog cov ua txaj yuav haus 4 khob cawv thiab 4 taig nqaij xwb).

Nqe 6 yog nqe yuav coj los tsev:

Tub pes tij tos nkauj qas plig los daws kauj vab, tos nraug qas plig los daws kauj le.
Nkauj qas plig yuav los txog yuav los xyuas lub vaj xus vaj sis de, lub tsev xu tsev sis das.
Nkauj qas plig yuav los xyuas lub txaj ntxhov sis tsawv xws npua lav, lub chaw ntxhov sis tsawv xws npua zes ij suj tua.
- ua ntaug ntiv tas ces cia li ua ntiv rag los mus tsev
hais li no:
Nkauj qas plig sawv pes tsees koj tsis tim ntshai,kooj
ziag kab zaug xiv pes law ua koj ntej, nkauj qas plig
sawv sis tsees yuav los mus nqaum paj ntaus nruas tuaj
tom ij, tws, nuab.
Tig 3 ntxees ces kom lawv nqa kauj lawv yus qab,ces ua
ntiv rag los mus tsev xwb.
- Txog tsev ncig qab nruas 3 ncig mus 3 ncig los ces cia
li mus ncig qab cub xwb.
- ncig qab cub hais li no:
Nkauj qas plig sawv sis tsees yuav los mus ncig qab
cub qab cais txhua pes zub pes zws tuaj ntawm ij, tws,
nuab.
“ yog poj niam no ncig 7 ncig, 4 ncig mus 3 ncig los”
“ yog txiv neej no ncig 9 ncig 5 ncig 4 ncig los “
ncig puv ces yus txaum yim qeej rau qab cub xwb,ces
yus cia li los chaws qab nruas tas ces ua tuag luav
xwb.

Nqe 7 yog nqe tshov ntawm qab cub:

Ua tuag luav, ntiv rag, ua xub 2 nqes ces sawv ntaug
ntiv nram qab cub hais li no:
Nkauj qas plig seev pes yeev los daws kauj, nraug qas
plig seev pes yeev los daws le.
Nkauj qas plig yuav los zaum sis tsawv tej qab cub
Nraug qas plig yuav los zaum sis tsawv tej qab cais
Zaum sis tsawv tej qab cais yuav los nrog leej kwv leej tig sib twv hais
Zaum sis tsawv tej qab cub yuav los nrog leej kwv leej tig sib twv qhub
ij suj yua, ua 2 nqes ntaug ntiv xwb.

- Yog muaj nkauj ces hu nkauj los hais nkauj qab cub.
Hu nkauj tas ces yus ua ntiv rag hais li no:
Txoj khob cawv los koj haus txhua, qeej qab cub los tshov txhua ua koj tsaug tuaj ntawm ij, tws, nuab.

- tas no ces los zais roj zais neev los chaws qab nruag xwb ces tso tseg.

Nqe 8 yog nqe fiv kauj ntawm qab cub los mus pauj dab pauj qhua pem hauv plag:

Ua tog luav, ua ntiv rag, ua xub ces ntaug ntiv hais li no:
Nkauj qas plig seev pes yee pauj qab cub qab cais txhua pes zwb pes zws tuaj ntawm ij, sawv sis tsees los pauj dab puaj qhua tuaj pem ij suj yua.

- Ntaug ntiv tas ces ua ntiv rag hais li no:
Nkauj qas plig pauj qab cub qab cais txhua pes zwb pes zws tuaj ntawm ij, sawv sis tsees los peb mus pauj dab pauj qhua tuaj pem ij, tws, nuab. Ces txaum yim rau nws tas,txaum yim pem hauv plag, ces cia li fiv los mus pem hauv plag xwb, ces cia li zais roj zais neev hauv qab nruag xwb.

Nqe 9 nqe tshov pem hauv plag uas thaum fiv los mus rau pev lawm:

Chaws qab nruag ua xub 2 nqes hais li no:
Nkauj qas plig seev pes yee yuav pauj dab pauj qhua tuaj pem ij.
Ces sawv ntaug ntiv hais li no:
Nkauj qas plig seev pes yee los daws kauj vab, nraug qas plig seev pes yee los daws kauj le, nkauj qas plig sawv sis tsees zaum sis tsawv lub kauj vab,nraug qas plig sawv sis tsees zaum sis tsawv lub kauj le, sawv sis tsees yuav pauj dab pauj qhua tuaj pem ij, tws, nuab.

- Tas no ces ua ntiv rag hais li no:
Txoj khob cawv los haus tas,qeej pauj dab pauj qhua los tshov tas ua koj tsaug tuaj ntawm ij, tws, nuab.Quas ib zaug tig ib ntxees.
Tas no ces zais roj zais neev tas,ces los chaws qab nruag xwb.

Hmoob ntuj qub qab 4th April 2010, 9:12 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°8

Qeej nyuj dab

Hmoob ntuj qub qab 4th April 2010, 9:12 pm

Qeej Nyuj dab

1. Pib ntiv rag hauv tsev mus ,ntiv rag tsis
ntxuag ntiv npug li, yus tus txiv qeej lawv tus
coj dab qab yus hais li no:

Niam (yawm)pes dab dab pes laus seev pes yees tuaj
nrhiav nyuj, seev pes yees tuaj nrhiav nqi ces quas
ntiv rag,ua ntiv rag mus ncig tshuav tas ces los pws
ntiv thaum tus coj dab los pib laig.

2. Pws ntiv thaum tus coj dab laig hauv tsev laus yus
tshuab li no:
Niam(Yawm) pes dab dab pes laus seev pes yees tuaj
nrhiav nyuj seev pes yees tuaj nrhiav nqi,niam( yawm)
pes dab txiv coj dab rhaub dej rau koj ntxuav muag li
muab hno qhob tshaib rau koj noj ij os niam pes dab dab
pes laus li coj koj mus tsev tshiab li muab nyuj kub
nto ntuj tw suab teb rau koj ij suj yua ces ntaug ntiv.

3. Tom tsev tshiab thaum tus coj dab laig muab nyuj rau
yus hais li no:
Niam pes dab dab pes laus seev pes yees tuaj nrhiav
nyuj seev pes yees tuaj nrhiav nqi, tes pes lauj txais
sis nkaus ij nyuj kub nto ntuj tw suab teb ij os niam
pes dab dab pes laus ij sij yua.

4. Thaum hau nqaij siav yuav pw txoj pw txim yus hais li
no:
Niam pes dab dab pes laus seev pes yee tuaj nrhiav
nyuj seev pes yee tuaj nrhiav nqi, Niam pes dab dab pes
laus yuav pw txoj pw kom txhij yuav pw txim pw kom
txhua ij suj os niam pes dab dab pes laus.

5. Thaum haws plig yus hais li no:
Niam pes dab dab pes laus seev pes yee tuaj nrhiav
Nyuj seev pes yee tuaj nrhiav nqi, niam pes dab dab pes
laus koj yuav ntaus ij koj kwv koj tij koj tub koj nyab
plig tuaj tom qab koj li tau kev mus ij suj os niam pes
dab dab pes laus.

6. Thaum hlawv com ntawv rau yus hais li no:
Niam pes dab dab pes laus seev pes yee tuaj nrhiav
nyuj seev pes yee tuaj nrhiav nqi,niam pes dab dab pes
laus tes pes lauj txais txiaj ntawv ij suj yua.

7. Thaum ua txoj cawv mus vaj mus tsev yus hais li no:
Niam pes dab dab pes laus seev pes yee tuaj nrhiav
nyuj seev pes yee tuaj nrhiav nqi, ij nyuj kub nto
ntuj tw suab teb los koj tau txhij ij txiaj ntawv
los koj tau txhua,koj yuav mus koj vaj koj tsev ij
suj yua.

8. Tas ntawv ces tus txiv qeej thiab tus nqa tsoos los
mus pem tsev, cov ua nyuj dab npaj dej caw nyob
ntawm qhov rooj tag tos,tus txiv qeej thiab tus nqa
tsoos foom lus zoo raws li kev ua nyuj dab rau luag
cov ua nyuj dab, thaum foom tas tus nqa tsoos li
muab tsoos cev rau cov ua nyuj dab txais.

Hmoob ntuj qub qab 4th April 2010, 9:24 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°9

Zaj qeej Ntxawm mob txia

Hmoob ntuj qub qab 4th April 2010, 9:24 pm

Zaj qeej Ntxawm mob txia

Ij xyoo no ij noog liaj txeeb noog luv zes, (kab) ntxawm mob txia yuav mus txeeb nuj pes txeeg ntawm nuj saub noog pes xij tes
Ij xyoo no ij noog liaj txeeb noog luv zes, (kab) ntxawm mob txia yuav mus txeeb nuj pes txeeg ntawm nuj saub noog pes xij npab
Nkauj hluav ncuav nuj pes txeeg tsis xav yuav
Nkauj hawb pob ncuav nuj pes txeeg tsis xav nyob
Ntxawm mob txia yuav mus ntxias nuj pes txeeg tej yas kab, nuj pes txeeg yuav mus ntxias ntxawm mob txia daig qhov laj kab.
Ntxawm mob txia yuav mus ntxias nuj pes txeeg tej yas kev nuj pes txeeg yuav mus ntxias ntxawm mob txia daig qhov tsev.

Nuj pes saub noog pes xij yuav mus quaj ij ua cas ij xyoo no koj yuav tuag koj tsis hais, nuj pes saub noog pes xij tes pes lauj qhib phav puj, lauj pes nas qhib phav npuag yuav mus muab nyiaj qab nas tsoos qab phas,yuav mus yuav txiv nyuj dub tsuav ntiag hnub,yuav mus yuav txiv nyuj txho tsuav ntiag hmo.

Nuj pes saub noog pes xij yuav mus khi khi nyuj taw dhau nyuj khiab yuav mus nkim nyuj ib txoj sia .
Nuj pes saub noog pes xij yuav mus khi khi nyuj khiab dhau nyuj taw yuav mus nkim nyuj ib txoj yawm.

Nuj pes saub noog pes xij yuav mus quaj yuav mus plhws plhws nyuj tw dhau nyuj kub yuav mus ua nuj pes txeeg txoj kev hlub .
Nuj pes saub noog pes xij yuav mus quaj yuav mus plhws plhws nyuj kub dhau nyuj tw yuav mus ua nuj pes txeeg txoj kev khwv.

Nuj pes saub noog pes xij yuav mus muab nqaij los faib txhij tav los faib txhua tav los txo nruas.

Tej txiv qeej yuav mus muab ij nqaij qeeg khuam sis nkaus tej xub ncig Nuj pes txeeg nyob nuj pes txeeg luag sis ntxhi .
Tej txiv qeej yuav mus muab ij nqaij qeeg khuam sis nkaus tej xub ntsa Nuj pes txeeg nyob nuj pes txeeg luag sis nyav.

Nuj pes txeeg yuav mus cia tav caij qas zus caij noj sus tav nyoog qas nraim nuj pes txeeg yuav taug kab mus yuav mus nrog nuj pes saub noog pes xij rov ncauj los sib qhub ,rov taw los sib twb ,Nuj pes txeeg nyob nuj pes txeeg luag sis ntxub .
Nuj pes txeeg yuav mus cia tav caij qas zus caij noj sus tav nyoog qas nraim nuj pes txeeg yuav taug kab mus yuav mus nrog nuj pes saub noog pes xij rov ncauj los sib ntxhi,rov taw los sib li,Nuj pes txeeg nyob nuj pes txeeg luag sis ntxhi .

Nuj pes txeeg yuav mus cia tav caij qas zus caij kwv qauv tav nyoog qas nraim caij yuav xau,tso kev plau tso kev plau.

**koojziagkabzaug** 5th April 2010, 1:18 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°10

Re: Kab ke Ntees " Qeej"

koojziagkabzaug 5th April 2010, 1:18 pm

Nyob zoo Hmoob Ntujqubqab,

Ua li zaj qeej Ntxawm mob txia nov yog tshuab rau thaum lub caij twg?

Ua tsaug koj lub sij hawm muaj nqes, tuaj sau koj tej txuj rau Peb Hmoob tau saib.

Hmoob ntuj qub qab 5th April 2010, 7:19 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°11

Re: Kab ke Ntees " Qeej"

Hmoob ntuj qub qab 5th April 2010, 7:19 pm

Nyob zoo Koojziagkabzaug

Zaj qeej Ntxawm mob txia nws tshuab lub caij twg los tau os, nws yog qeej lam sab lam hmo xwb, tshuab kom sawv daws cov nyob zov Qauv tsis tsaug zog xwb os.
Ua tsaug nws muab dej nyiag dej kub los txuav huv si.
Zaj taw kev cia nws rau nws ib qho los haj yam zoo xwb.

**koojziagkabzaug** 5th April 2010, 10:04 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°12

Re: Kab ke Ntees " Qeej"

koojziagkabzaug 5th April 2010, 10:04 pm

Nyob zoo Hmoob Ntujqubqab,

Ua li zaj qeej xa plig tsiaj txhuv yog tshuab hauv ntees los?

Koj puas muaj qeej su thiab? Vim kuv muaj ob peb daim duab xav tso dhos.

Hmoob ntuj qub qab 6th April 2010, 1:11 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°13

Qeej su

Hmoob ntuj qub qab 6th April 2010, 1:11 am

Qeej su, qeej tshais,qeej hmo tshuab ib yam tsuas yog pauv Tshais, su thiab hmo xwb.

Zaj qeej su

Pib ua ntiv, ua tuag luav, ua ntiv rag chaws qab nruag 3 lwm mus 3 lwm los ces ua xub ntaus caug 6 nqe yog cov laus, ces sawv los ntaug ntiv hais li no:

Leej tub tuag koj tuag tseeb los tuag cuav tuag daj los tuag tiag koj tuag qas tiag leej tub tuag.
Leej tub tuag txog caij noj su nkawm kav xwm nkawm tshwj kab ua nqaij siav li plho tuaj ntawm tes ua hno siav lis plho tuaj ntawm npab
Yuav coj los cob li nkaus rau txiv coj dab , txiv coj dab tes lauj caum khob cawv tes nag caum hau nqaij mov yuav los ntawg sis tawb sis to koj leej tub tuaq tej npoo ncoo , koj ij noj tsis tau hliv nruab taub haus tsis tau hliv nruab rag, noj tsis taus ua tiag nqa haus tsis tau ua tiag ris yuav coj mus pub pog pub yawg noj, pub pog pub yawg haus ij suj yuam.

Tshuab ntaug ntiv tas 6 nqe lawm ces los ua xub ntaus caug 6 nqe zaum 2 , ces mam li sawv ntaug ntiv zaum 2 ntaug ntiv 6 nqe hais zaj ib yam li zaum 1 xws li:

Leej tub tuag koj tuag tseeb los tuag cuav tuag daj los tuag tiag koj tuag qas tiag leej tub tuag.
Leej tub tuag txog caij noj su nkawm kav xwm nkawm tshwj kab ua nqaij siav li plho tuaj ntawm tes ua hno siav lis plho tuaj ntawm npab
Yuav coj los cob li nkaus rau txiv coj dab , txiv coj dab tes lauj caum khob cawv tes nag caum hau nqaij mov yuav los ntawg sis tawb sis to koj leej tub tuaq tej npoo ncoo , koj ij noj tsis tau hliv nruab taub haus tsis tau hliv nruab rag, noj tsis taus ua tiag nqa haus tsis tau ua tiag ris yuav coj mus pub pog pub yawg noj, pub pog pub yawg haus ij suj yuam.

Tshuab puv ntaug ntiv 6 nqe lawm ces los ua ntiv rag 3 zaug tig 3 ntxees, hais li no:
- Txoj khob cawv koj haus txhua,qeej su los tshov txhua ua koj tsaug tuaj ntawm ij tom los luab tig 1 ntxees.
- Txoj khob cawv koj haus tas qeej su los tshov tas ua koj tsaug tuaj ntawm tw tom los luab tig 1 ntxees.
- Txoj khob cawv koj haus txhij qeej su los tshov txhij ua koj tsaug tuaj ntawm nuab tom los luab tig 1 ntxees.

Cia li ua ntiv rag los chaws qab nruas 3 lwm mus 3 lwm los zais roj zais neev tas ces los ua ntiv ua tuag luav xaus qeej xwb.

Hmoob ntuj qub qab 6th April 2010, 1:20 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°14

Re: Kab ke Ntees " Qeej"

Hmoob ntuj qub qab 6th April 2010, 1:20 am

Nyob zoo Hmoob Ntujqubqab,

Ua li zaj qeej xa plig tsiaj txhuv yog tshuab hauv ntees los?

Koj puas muaj qeej su thiab? Vim kuv muaj ob peb daim duab xav tso dhos.

Nyob zoo Koojziagkabzaug

Zaj qeej xa plig tsiaj txhuv yog tshuab hnub tawm nras ( Hnub tshwm tshav ) tej zaum cov nyob ntuj qub qab thiaj ua xwb cov nyob teb chaws vam meej yuav tsis ua lawm.
Qeej dab tsi los muaj, ua ib tug txiv qeej yuav tsum paub kom txhij thiaj yog txiv qeej hos, muaj ib txhia lam paub qeej tab sis paub tsis txhua kom mus ua kom tiav ib lub ntees ua tsis tau kuj muaj ...hehehe

Hmoob ntuj qub qab 6th April 2010, 2:06 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°15

Zaj qeej Siv yig

Hmoob ntuj qub qab 6th April 2010, 2:06 am

Zaj qeej siv yig (qeej lam sab lam hmo)

Ntiaj pes teb tuag thawm niaj siv pes yig los kho ciaj
Ntiaj pes teb tuag thawm xyoo siv pes yig los kho zoo

Siv pes yig yuav ntxooj neeb nce qaum ntuj yuav ntxoom yaig ij nce qaum teb pom yuav tau txawm nkias siab tsis tiaj pom yuav tau txawm nkias plawv tsis tus

Tua sis nrawv siv pes yig leej tub pes ntxawg hauv yias tooj npau sis vooj
Tua sis nrawv siv pes yig leej tub pes ntxawg hauv yias hlau npau sis auj

Siv pes yig xav zaj twg los tsis tau tsav twg los tsis cuag, siv pes yig muab choj pes neeb nkaug sis nkuav ntiaj pes teb qab tsuas mos ntiaj pes teb khaws tau coj .
Siv pes yig xav zaj twg los tsis tau tsav twg los tsis cuag, siv pes yig muab choj pes yaig nkaug sis nkuav ntiaj pes nrag qab tsuas maj ntiaj pes nrag khaws tau tshee.

Zaj qeej Siv yig li no qhia tias Hmoob ntiaj teb paub ua neeb

Last edited by Hmoob ntuj qub qab on 6th April 2010, 2:24 am; edited 1 time in total

Hmoob ntuj qub qab 6th April 2010, 2:18 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°16

Zaj qeej xa xov

Hmoob ntuj qub qab 6th April 2010, 2:18 am

Zaj qeej xa xov qeej lam sab lam hmo

Dab qas tsi sawv coj xov ij niam kab niam ntsaum sawv coj xov, coj xov pes nraim rau nkauj nog neej puas nyob txhij .
Dab qas tsi sawv coj xov ij niam kab niam ntsaum sawv coj xov, coj xov pes nraim rau nkauj nog tsav puas nyob txhua.

Nkauj nog neej ij nrog hnov txhij
Nkauj nog tsav ij nrog hnov txhua

Nkauj nog neej yuav yaum sis dwb sis daw tuaj yuav poob ij nyiav pes law nkauj nog neej ij plab txias plab pes law tsis nco noj .
Nkauj nog neej yuav yaum sis dwb sis daw tuaj yuav txog ij nyiav pes law nkauj nog neej ij plab txias plab pes law tsis nco tshaib.

Nkauj nog neej nyiav pes law plhw sis hlo ntiv me tes
Nkauj nog neej nyiav pes law plhw sis hlo ntiv me taw

Zaj qeej no qhia tias tus uas tsis muaj neej muaj tsav ces tu siab

**koojziagkabzaug** 6th April 2010, 1:56 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°17

Re: Kab ke Ntees " Qeej"

koojziagkabzaug 6th April 2010, 1:56 pm

Hmoob Ntuj qub qab,

Kuv hais zaj qeej tshais, qeej su uas lawv hais nkauj qeeg quas.
Zoo li lawv hais txog thaum nws tseem ua neej nyob, kev khwv, kev ua noj ua haus ib ntus zuj zus mus txog ntua thaum tus qauv mus lub teb chaws tshav ntuj rig.

Hmoob ntuj qub qab 7th April 2010, 3:23 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°18

Re: Kab ke Ntees " Qeej"

Hmoob ntuj qub qab 7th April 2010, 3:23 am

Hmoob Ntuj qub qab,

Kuv hais zaj qeej tshais, qeej su uas lawv hais nkauj qeeg quas.
Zoo li lawv hais txog thaum nws tseem ua neej nyob, kev khwv, kev ua noj ua haus ib ntus zuj zus mus txog ntua thaum tus qauv mus lub teb chaws tshav ntuj rig.

Nyob zoo Koojziagkabzaug

Zaj qeej tshais, su, hmo tsuas tshuab li hais ntawv xwb, thaum yus tshuab los yog quas qeej tiav los txog nqe ntawm hu txiv Nkauj los hu zaj nkauj tshais, su, hmo ntawv tus txiv Nkauj hu nkauj li nws hais ,txiv nkauj nws hu ib txwm los ob txwm nws xaus....ij suj yua no ces tus txiv qeej mam li tshuab raws qab nraim li tus txiv Nkauj hu ntawv ntag.
yog cov txiv qeej keej ntiv mos tshuab tau zoo thiaj tshuab raws tau txiv Nkauj os, yog cov tsis keej raws tsis tau txiv nkauj ces tsuas tshuab hais tias:
Ua koj tsaug koj txiv nkauj ij yuav yog li koj hais ij suj yuam... hais li no xwb ces quas ntiv ntaug ntiv lawm.
Hmoob ntuj qub qab tshuab raws tau txiv Nkauj qab txiv nkauj txog twg yeej txog twg li hos...Hehehe

Hmoob ntuj qub qab 7th April 2010, 3:25 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°19

Zaj qeej xa xov

Hmoob ntuj qub qab 7th April 2010, 3:25 am

Zaj qeej xa xov

Dab qas tsi sawv coj xov ij niam kab niam ntsaum sawv coj xov, coj xov pes nraim rau nkauj nog neej tsav puas nyob txhij.
Dab qas tsi sawv coj xov ij niam kab niam ntsaum sawv coj xov, coj xov pes nraim rau nkauj nog tsav puas nyob txhua.

Nkauj nog neej ij nrog hnov txhij
Nkauj nog tsav ij nrog hnov txhua

Nkauj nog neej yuav yaum sis dwb sis daw tuaj yuav poob ij nyiav pes law nkauj nog neej ij plab txias plab pes law tsis nco tshaib
Nkauj nog neej yuav yaum sis dwb sis daw tuaj yuav txog ij nyiav pes law nkauj nog neej ij plab txias plab pes law tsis nco noj

Nkauj nog neej nyiav pes law plhw sis hlo nkauj nog ntiv me tes
Nkauj nog tsav nyiav pes law plhw sis hlo nkauj nog ntiv me taw.

Hmoob ntuj qub qab 7th April 2010, 3:26 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°20

Zaj qeej noj tshuaj

Hmoob ntuj qub qab 7th April 2010, 3:26 am

Zaj qeej noj tshuaj

Niam dab tsi sawv qhia tshuaj yog niam dab tshaus sawv qhia
shuaj.

Leej pes twg sawv qhia kuab yog niam dab saus sawv qhia kuab

Tshuaj pes iab nyob tshuaj pes iab tuaj nraum toj de sis nrho ntsaws ntso tuaj ntawm ncauj nrog tau tshuaj pes iab sib pus nrauj

Tshuaj pes iab nyob tshuaj pes iab tuaj nraum dawm de sis nrho ntsaws ntso tuaj ntawm lo nrog tau tshuaj pes iab sib pus so

Tuag sis nthi yuav tseg tus ncej tshuab nphob sis tsus tuaj nrab tse
Tuag sis nthi yuav tseg tau leej viv leej ncaus leej kwv leej tig.

Hmoob ntuj qub qab 7th April 2010, 3:27 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°21

Zaj qeej txua t.xiag

Hmoob ntuj qub qab 7th April 2010, 3:27 am

Zaj qeej txua t.xiag

Nkawm sis ij yuav mus nrhiav hlau tuaj nram mab

Nkawm sis ij yuav mus nrhiav hlau tuaj nram suav

rov los txog yuav ntaus tau niam rab piab ij hniav zuag lis plaim peb plhu ncauj
rov los txog yuav ntaus tau niam rab piab ij hniav zuag lis plaim peb plhu hniav

Nraug sis ij yuav mus nrhiav tau ij tus ntoo ciab nyob toj zeb

Nraug sis ij yuav mus nrhiav tau ij tus ntoo thuv) nyob toj
tsuas

Yuav ntov qaug lis yeev los tav toj yuav txwm sis nrawv ij leej tub tuag ib lub vaj
Yuav ntov qaug lis yeev los tav roob yuav txwm sis nrawv ij leej tub tuag ib lub loog.

Nkawm sis ij txawj ntov txawj tws kwv ya sis lwb sis lag
Nkawm sis ij tsis txawj ntov tsis txawj tws kwv tsis taus

Hmoob ntuj qub qab 7th April 2010, 3:29 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°22

Zaj qeej qaib qua

Hmoob ntuj qub qab 7th April 2010, 3:29 am

Zaj qeej qaib qua

Ij ntuj tsim qas tsi tsim Puj qas niam tus lau qaib tsim sis dheev yuav ncoj txoob los nchos tw qua pes law hu nkauj hnub tim li cas nkauj pes hnub tsis tawm tuaj

Ij ntuj tsim qas tsi tsim Puj qas niam tus lau qaib tsim sis dheev yuav ncoj txoob los nchos tw qua pes law hu nkauj hli tim li cas nkauj pes hnub tsis tawm los

Nkauj pes hnub tawm sis plaws tej npoo ntuj deg sis daw puj qas niam tus lau qaib tej hlab tsuj
Nkauj pes hnub tawm sis plaws tej npoo teb deg sis daw puj qas niam tus lau qaib tej hlab siab

Puj qas niam tus lau qaib tsim sis dheev qua sis law hu kaj ntug tuaj nraum rooj

Puj qas niam tus lau qaib tsim sis dheev qua sis law hu kaj ntug tuaj nraum ntsa

Ij nkauj pes hnub yuav muab tau tus puj qaib ntoo tus puj qaib tsis txawj ntoo ntoo tuaj ntawm ncauj
Ij nkauj pes hnub yuav muab tau tus puj qaib ntoo tus puj qaib tsis txawj ntoo ntoo tuaj saum hau

Ces yuav tig qab twb ntuj tig hniav twb hau.
Nkauj pes hnub tawm sis plaws ziab yuav tau tej qauv lwj…

Hmoob ntuj qub qab 7th April 2010, 3:30 am

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°23

Zaj qeej teem caij

Hmoob ntuj qub qab 7th April 2010, 3:30 am

Zaj qeej teem caij

Leej pes twg sawv ua nkauj Nkauj pes ntsuab sawv ua Nkauj
Leej pes twg sawv ua Nraug nraug sis nab sawv ua Nraug

Leej pes twg sawv teem caij Nkauj pes Ntsuab sawv teem caij
Leej pes twg sawv teem nyoog Nraug sis nab sawv teem nyoog

Nkauj pes Ntsuab yuav teem Nraug sis nab tej yas kev
Nraug sis nab yuav teem Nkauj pes Ntsaub tej yas kab

Nkauj pes Ntsuab Nraug sis nab tuav tes ua ywb yawv mus kav kiab
Nkauj pes Ntsuab Nraug sis nab tuav tes ua ywb yawv mus kav khw

Nkauj pes Ntsuab Nraug sis nab luag li nyav mus nqaum paj
Nkauj pes Ntsuab Nraug sis nab luag li ntxhi mus ua si mus ua si…

**koojziagkabzaug** 7th April 2010, 11:15 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°24

Re: Kab ke Ntees " Qeej"

koojziagkabzaug 7th April 2010, 11:15 am

Nyob zoo Hmoob Ntujqubqab,

Cov Qeej teem caij, qeej qaib qua hauv qab nov yog qeej ua si los yog qeej dab tsi?

Yog tsis yog Qeej ntees thiab kab ke no nws muab cais es peb thiaj paub. Vim peb yeej tsis paub qhov twg yog qhov twg li. Hahahah...!

Hmoob ntuj qub qab 7th April 2010, 7:41 pm

Hmoob ntuj qub qab

Hmoob ntuj qub qab: Sponsor; Messages : 687
Date d'inscription : 2010-03-30

Post n°25

Kab ke ntees "Qeej"

Hmoob ntuj qub qab 7th April 2010, 7:41 pm

Nyob zoo Hmoob Ntujqubqab,

Cov Qeej teem caij, qeej qaib qua hauv qab nov yog qeej ua si los yog qeej dab tsi?

Yog tsis yog Qeej ntees thiab kab ke no nws muab cais es peb thiaj paub. Vim peb yeej tsis paub qhov twg yog qhov twg li. Hahahah...!

Nyob zoo Koojziagkabzaug

Cov Qeej teem caij, qeej qaib qua ...hauv qab nov yog qeej tshuab ua si lam sab lam hmo xwb, xav tias qeej ces muab tso ua ke xwb txhob tshem lawm os

Sponsored content

HMOOB TSAV NTUJ

Search

Hmoob Catholique Forum

Latest topics

Top posters

Tsev seev PajHuam

Hmong beauty nature

Compteur visitor

Kab ke Ntees " Qeej"

Kab ke Ntees

Qeej tos nees( Qeej nce nees)

Qeej ntaus Suav

Qeej fiv qauv coj mus zais

Qeej thov su

Qeej xa plig

Qeej tos Plig

Qeej nyuj dab

Zaj qeej Ntxawm mob txia

Re: Kab ke Ntees " Qeej"

Re: Kab ke Ntees " Qeej"

Re: Kab ke Ntees " Qeej"

Qeej su

Re: Kab ke Ntees " Qeej"

Zaj qeej Siv yig

Zaj qeej xa xov

Re: Kab ke Ntees " Qeej"

Re: Kab ke Ntees " Qeej"

Zaj qeej xa xov

Zaj qeej noj tshuaj

Zaj qeej txua t.xiag

Zaj qeej qaib qua

Zaj qeej teem caij

Re: Kab ke Ntees " Qeej"

Kab ke ntees "Qeej"

Re: Kab ke Ntees " Qeej"

Similar topics

Similar topics

Search Query

Display results as : Posts Topics
Advanced Search