Hmoob Ntuj Tshiab lub tsev PAJ HUAM & kab lis kev cai Hmoob

3. Kev mus thov mej koob tuaj pab yus mus xaus tshoob kos.

Yuav tsum nqa ib fwj cawv thiab 4 lub khob mus thov tus neeg uas yus cia siab hais tias yuav tuaj pab tau yus, thaum yus mus txog rau ntawm luag lub qhov rooj mas yus yuav tsum nco ntsoov nug saib luag puas caiv tso

yog luag teb hais tias luag tsis caij no yus mam nkag mus rau hauv luag lub tsev ces yuav tsum mus nug luag hais tias yus xav thov luag ib lub rooj coj los siv no ces luag mam muab rooj rau yus siv

ces yus mam ce cawv yog ob lub cawv rau luag ces ob lub cawv rau yus ces yus mam tsa ncauj thov luag li cov lus hauv qab no.

Hnub no niam thiab txiv ________ nkawv tus tub npe hu ua________ tau mus coj tau niam thiab txiv _______ nkawv tus ntxhais npe hu ua _____ los ua poj ua sev lawm mas xav tuaj thov koj pab mus ua txiv tuam mej koob no,

Yog koj tsis muaj chaw caij chaw cim dab tsi thiab tsis muaj dej num khuam tes khuam taw dab tsi no mas xav thov koj pab ua txiv tuam mej koob, tuaj pab coj nkauj nyab nraug vauv mus xaus tshoob xaus kos no laus.

Nyob li ntawm koj tus txiaj ntsha peb yuav nqa, tus txiaj ntsig peb yuav ris, ris raws rau saum lub nraub qaum nyob tsis nrauj los ua ncauj, ncauj li nco nyob tsis tso, kom tsis tag tsis kawg mus ib txhiab ib txhis no lau mog.

Yog luag kam ces thiab luag teb hais tias luag pab tau yus no ces yus sawv pe luag yog luag ho tsis kam no los tsis ua cas yus mam ho mus thov tus tshiab dua xwb, yog luag kam ces yus sawv pe luag xwb kev pe yuav tsum pe ob pes thiab hais cov lus li hauv qab no.

Thov saum koj ua ( ______ ) lau mog koj tus txiaj ntsha peb yuav nqa tus txiaj ntxig peb yuav ris no lau mog.
Pe luag tag ces muab lub cawv kab kiag kom meej ces yus mam li los tsev xwb,

tiam sis kev thov no los nco ntsoov thov txhua txhua tus los hais tib yam nkaus xwb,

yus yuav tsum tig lus kom raug xwb. Txhua tus los koj yeej hais ib yam nkaus xwb nawb vim cov neeg koj thov tuaj pab mus hais tshoob mas muaj npaum li no tus thiaj yuav txhua nawb

1. yog txiv tuam Mej koob
2. yog txiv lwm mej koob
3. yog tub phij laj
4. yog niam txais ntsuab
5. yog niam txiv mus lav tshoob lav kos
6. yog tus tub nrog mus tshoj phaj

Thaum thov tau cov neeg li hais los saum no tuaj txog tsev lawm ces rub ib lub rooj thiab rub lawv los zaum, yog npaj tau ntxuag los npaj li 2 / 3 phaj ntxuag ces ce lawv ib leeg ib khub cawv thiab ib khub cawv rau yus uas yog tus hais lus ces coj lawv haus ib zeeg cawv thiab rov qab txhab kom puv kiag rau ces rov coj lawv cub me ntsis cawv thiab mam pib hais lus li hauv qab no, Xub pib hais rau ob tug me koob ua ntej.

5. Thawj nceeg lus thov kom ob tug mej koob zam txim

Thawj zeeg lus yus los hais thov kom ob tug mej koob zam txim pub rau yus thiab cov ua niam ua txiv hauv tsev.

Lus tshoob lus kos mas yuav hais li no rau neb ob tug ua tij, hnub no peb plaj tshoob ncig los txog, kev kos ncig los poob, yog li yuav vam neb ob tug tuaj nrog ua txiv tuam mej koob, nrog mus laj kos laj tshoob,

Hnub no peb plaj tshoob ncig los poob kev kos ncig los txog, thiaj yuav vam neb ob tug ua tij tuaj nrog ua txiv tuam mej koob kos, nrog mus laj tshoob laj kos,

Yuav vam neb ob tug nrog peb taug lawm liaj lwg txoj qub ke, coj nkauj nyab nraug vauv mus tis ntsuab tis ze, Yuav vam neb ob tug nrog peb taug lawm rhwv mwg txoj kev dav, coj nkauj nyab nraug vauv mus tis neej tis tsav.

Yog li yuav kom yog lub luag raws li txoj kab txoj ke ces peb yuav tsum ntauj lis tawv tuaj poob nqa nyog khob dej caw tuaj thov neb lub dag lub zog khoov, peb yuav tsum ntauj lis tawv tuaj txog nqa khob dej caw tuaj thov lawm neb lub zog,

Tab sis peb tuaj tsis txog neb vaj khiav tsis txog neb tsev, peb tsuas yog xuas lub xov tooj ( looj keeb kav ) hu rau neb los yog ntsib neb cia li txib neb yas kab yas kev yas kab yas ncua xwb los thov neb txhob tu lub siab nawb mog.

Kaj ntug tag kis xab theeb lwm hnub neb tsis muaj tub muab nyab, tsis muaj ntxhais qua los tseg, yog neb ho muaj tub muab nyab muaj ntxhais qua los ntshe neb vam tsis txog peb tsoom kwv tij txiv tub xwb.

Yog neb ho vam txog los peb cov kwv tij txiv tub los yeej yuav tsis tso neb tseg yeej yuav tuaj pab kom tau neb raws li neb txoj kev txib kev khaiv thiab no lau mog” thov saum neb ob tug txiv tuam mej koob lwm mej koob no lau mog !!!!.

hais tag li no ces pe ob tug mej koob ib leeg ob pes, dhau li ntawd lawm ho hais rau phij laj thiab niam txais ntsuab li hauv qab no.

5. Thawj nceej lus thov kom niam txais ntsuab thiab phij laj zam txim.

Lus tshoob lus kos mas yuav hais li no rau koj ua tub thiab, koj ua ntxhais, hnub no peb plaj tshoob ncig los txog, kev kos ncig los poob, yog li thiaj yuav vam neb pab ua phij laj thiab niam txais ntsuab mus nrog saib qhua kos pe qhua tshoob,

Hnub no peb plaj tshoob ncig los poob, kev kos ncig los txog, thiaj yuav vam neb pab ua phij laj thiab niam txais ntsuab, mus nrog saib qhua tshoob pe qhua kos, no laus mog.

Yog li yuav kom yog lub luag raws li txoj kab txoj ke ces peb yuav tsum ntauj lis tawv tuaj poob nqa nyog khob dej caw tuaj thov neb lub zog khoov, yuav tsum ntauj lis tawv tuaj txog nqa khob dej caw tuaj thov lawm neb lub zog,

Tab sis peb tuaj tsis txog neb vaj khiav tsis txog neb tsev, peb tsuas xua lub xov tooj ( looj keeb kav ) hu rau neb los yog txib neb yas kab yas kev yas kab yas ncua xwb los neb txhob tu lub siab nawb mog.

Kaj ntug tag kis xab theeb lwm hnub neb tsis muaj tub muab nyab tsis muaj ntxhais qua los tseg yog neb muaj tub muab nyab muaj ntxhais qua ntshai neb vam tsis txog peb tsoom kwv tij txiv tub xwb

Yog neb ho vam txog los peb yuav tuaj pab kom tau neb raws li zaum no thiab yuav tsis tso neb tseg no lau mog koj tub phij laj thiab koj niam txais ntsuab lau!!! Thov saum neb ob leeg nawb mog.

Hais tag li no ces pe tub phij laj thiab niam txais ntsuab nkawv ib leeg 2 pes tas ces.

Thaum hais li no tag lawm ces txog lub sij hawm yuav tsa mej koob mus hais tshoob ces yuav tau rub rooj thiab rau zaub rau mov sawv daws noj tag ces mam li rub niam txiv tus yuav mus ua niam txiv lav tshoob lav kos,

Txiv tuaj mej koob, lwm mej koob, qhua phij laj thiab niam txais ntsuab, rub lawv sawv daws los zaum kom txhij,
thiab ce ib leeg ib khub cawv kom thoob plaws ces coj sawv daws haus ib lub cawv thiab rov txhab kom puv nkwb nkaus kiag rau, rov coj lawv cub ib lwm cawv thiab ces mam tsa ncauj hais li hauv qab no, rau lawv xwb.

6. Thawj nceeg lus thov zam txim ntawm niam txiv lav tshoob

Lus tshoob lus kos mas yuav tham li no rau koj tus ua niam ua txiv los yog tus mus lav tshoob lav kos, hnub no _______ nkawd tus me tub _______ hlob li yuj los paub tab, ces yuav nrhiav lub neej los nrog tab,

Thiaj tau sawv kev lis yees mus coj nyab, los rau nkawd lub pab plaj xab, tus plaj tshoob ntsig kos thiaj ntxhov li nyho los rau nkawd tej quav npab, nkawd ceeb laj mus nrog leg tshab, thiaj vam khom koj lub dag coj lub zog tuaj nrog pab.

hnub no _______ nkawd tus me tub _______ hlob lis yees mus puv cev, ces yuav nrhiav lub cuab lub yig kom nrog luag muaj vag muaj tsev.

Thiaj tau sawv kev lis yees mus coj sev, los rau nkawd lub pab plaj tsev, tus plaj tshoob ntsig kos thiaj ntxhov li nyho los rau nkawd tej quav tes, nkawd ceeb laj nyob sawv nres, thiaj yuav vam khom koj lub dag coj lub zog mus nrog leg

Yog li no txiv kub thiaj yuav cia rau koj ntoo, txiv tw yuav cia rau koj suab, plaub xo ncej ntug, lus tshoob lus kos yuav cia rau koj muab.

Zaum no txiv tw los yuav cia koj suab, txiv kub los yuav cia koj ntoo, ncej xai plaub lus ntug lus tshoob lus kos yuav cia rau koj mus nrog mloog, no lau mog!!!!

Yuav vam koj mus nrog chawj tshoob chawj kos, chawj niam chawj txiv, Dub los yuav vam koj mus nrog ntxhua, ntuag los yuv vam koj mus nrog ntxiv, yuav vam koj coj koj lub plhu txiaj mus ntaiv hnub plhu ntsig mus ntaiv hli.

Kom peb tau neej tau tsav tau kev ntoj kev thuv, nyob li ntawm koj tus txiaj ntsig peb yuav ris txiaj ntsha peb yuav nqa kom tsis tag tsis kawg mus ib txhiab ib txhis, no lau mog koj tus ua niam ua txiv tus coj tshoob coj kos
“ thov saum koj tus ua niam txiv lav tshoob lav kos no lau mog”

hais tag li no ces pe lawv xwb, yuav tsum nco ntsoov pe ob pes, tag l no ces hais rau ob tug mej koob li hauv qab no xwb.

7. Nceeg lus ob muab lus rau ob tug mej koob

Lus tshoob lus kos mas yuav tham li no rau neb ob tug uas yog txiv tuam mej koob, thiab txiv lwm mej koob, hnub no!!!! yeeb vim yog peb plaj tshoob ncig los poob, kev kos ncig los txog,

Yog li peb tsis pom qab vam khom lub dag coj lub zog, luag tej laus ib txwm piv txoj lug, hais tias lub zej zog kuj txawm tau dav, los leej tib neeg kuj txawm tau nqaim, tus txib tus khaiv los kuj txawm tsis muaj, thiaj yuav vam khom neb lub dag coj lub zog tuaj,

Los vim yog leej tub txawg kuj txawm tsawg, leej tub ruag los kuj txawm tau coob, yog li hnub no peb thiaj nyiam tsum ntshaw raug neb ob tug tuaj pab peb ua liaj lwg rhwv mwg tus txiv tuam mej koob, no lau mog, koj txiv tuam mej koob thiab lwm mej koob

( txaum yim rau) lau!!!

Hnub no yuav vam neb tuaj coj ntses txeej mus tsaws dej kab, coj ntses nias mus tsaws dej ke, yuav vam neb tuaj coj nkauj nyab nraug vauv ncig lis yeev niam txiv neej nus nrab mus plaj tsev,

Yuav vam neb coj nkauj nyab nraug vauv mus tis ntsuab tis ze, no lau mog neb ob tug txiv tuam mej koob thiab lwm mej koob,

( txaum yim rau).

Hnub no yuav vam neb tuaj coj ntses txeej mus tsaws dej kev, coj ntses nias mus tsaws dej kab, tuaj coj nkauj nyab nraug vauv ncig lis yeev niam txiv neej nus nrab mus plaj xab

Hnub no yuav vam nej coj nkauj nyab nraug vauv mus tis neej tis tsav, no lau mog, neb ob tug txiv tuam mej koob thiab lwm mej koob.

( txaum yim rau)

Yuav vam neb coj nkauj nyab nraug vauv mus txuas kev neej, kom tau txoj kev ntoj, txuas kev tsav, kom tau kev thuv,

Yuav vam neb coj neb lub plhu txiaj mus ntaiv hnub, plhu ntsig mus ntaiv hli, yuav vam neb mus nrog chawj nrog thov kom peb tau tshoob tau kos, tau tub tau nyab, no lau mog.

Neb tus txiaj ntsig peb yuav ris txiaj ntsha peb yuav nqa, no lau mog.
“thov saum neb ob tug mej koob no lau mog”.
hais tag li no ces pe nkawv ib lwm dua thaum pe tag ces ho hais rau tub phij laj li hauv qab no xwb.

8. Nceeg lus ob muab lus rau phij laj

Lus tshoob lus kos mas yuav hais li no rau koj tus ua tub phij laj, yeeb vim yog peb tus plaj tshoob ncig los poob kev kos ncig los txog!!! Yog li peb tsis pom qab vam khom lub dag coj lub zog,

Luag tej laus niaj txis piv txoj lus hais tias, lub zej zog kuj txawm tau dav!! Leej tib neeg kuj txawm tau nqaim, tus txib tus khaiv los kuj txawm tsis muaj, thiaj vam khom koj lub dag coj lub zog tuaj,

Los yeeb vim leej tub txawg, yuav txib yuav khaiv los kuj txawm tsawg. Hos leej tub ruag kuj txawm tau coob tshaj, thiaj yuav vam khom koj lub dag coj lus zog tuaj pab ua tub phij laj

Yog li hnub no peb thiaj yuav vam khom koj lub dag coj lub zog tuaj mus pab ua tub phij laj nrog nraug vauv mus pe qhuab tshoob chawj qhua kos raws li liaj lwg thiab rhwv mwg txoj kev tos li tog, no lau mog

( txaum yim rau tub phij laj ,)

hnub no niam txiv neej nus me ntxhais nkauj lag ces hlob li yees mus paub tab, zaum no nraug vauv thiaj nyiam tsum ntshaw raug ces teg lauj nyob mus tooj npab, yog li thiaj yuav vam koj nrog nraug vauv mus laij niam txiv neej nus tom ub ib cim mus yub kab, kom tau niam txiv neej nus me ntxhais nkauj lag los ciaj lawm nraug vauv ib tug mus zoo nyab, no laus mog.

( txaum yim rau tub phij laj )

hnub no niam txiv neej nus ntxhais nkauj lag ces hlob li yuj mus puv cev, zaum no nraug vauv thiaj nyiam tsum los ntshaw raug ces teg lauj nyob tooj npab lauj nag nyob tuav mus tuav tes.

Yog li no thiaj yuav vam koj nrog nraug vauv mus laij niam txiv neej nus ib cim mus yub npleg, kom tau niam txiv neej nus me ntxhais nkauj lag los ciaj lawm nraug vauv ib tug mus zoo sev, no laus mog

( txaum yim rau koj tub phij laj. )

Yuav vam koj coj koj lub plhu txiaj mus ntaiv hnub plhu ntsig mus ntaiv hli, mus nrog laj niam laj txi, kom tau neej tau tsav, tau txoj kev ntoj kev thuv,

Koj tus txiaj ntsig ces peb yuav ris tus txiaj ntsha los peb yuav nqa, no lau mog “ thov saum koj tub phij laj nawb mog!! “

Hais tag li no ces pe tub phij laj ob pes, thaum pe tub phij laj tag lawm ces ho hais rau niam txais ntsuab li hauv qab no xwb.

9. Nceeg lus ob muab lus rau niam txais ntsuab

Lus tshoob lus kos mas yuav hais li no rau koj tus ua niam txais ntsuab, yeeb vim yog peb tus plaj tshoob ncig los poob, kev kos ncig los txog, yog li peb tsis pom qab vam khom lub dag coj lub zog,

Luag tej laus niaj txis piv txoj lug hais tias, lub zej zog kuj txawm tau dav, los leej tib neeg los kuj txawm tau nqaim, tus txib tus khaiv los kuj txawm tsis muaj, thiaj li vam khom koj lub dag coj lub zog tuaj.

Los yeeb vim leej me ntxhais txawg yuav txib yuav khaiv los kuj txawm tau tsawg, leej ntxhais ruag lo kuj txawm nyob tsiv cuab, thiaj yuav vam khom koj lub dag coj lub zog tuaj mus pab ua niam txais ntsuab

Yog li hnub no peb thiaj yuav vam khom koj lub dag coj lub zog tuaj mus pab ua niam txais ntsuab, mus ua yaig ua luag, mus soj nkauj nyab qab taug nkauj nyab lw,

Nkauj nyab mus 9 txoj kab los yuav vam koj taug nkauj nyab qab, nkauj nyab mus 8 txoj kev los yuav vam koj taug nkauj nyab lw, no lau moag

( !! Mog koj niam txais ntsuab )

yuav vam koj coj koj lub plhu txiaj mus ntaiv hnub, lub plhu ntsig mus ntaiv hli, mus nrog laj niam laj txi, kom tau neej tau tsav, tau kev ntoj kev thuv.

Koj tus txiaj ntsig ces peb yuav ris, tus txiaj ntsha los peb yuav nqa, no lau mog. “thov saum koj niam txais ntsuab no nawb mog”!!

hais tag li no ces pe niam txais ntsuab 2 pes thiab thaum hais tag li no lawm ces coj sawv daws muab lub cawv kab kiag kom meej,

10. Nceeg lus 3. muab lus rau ob tug mej koob

ces ho rov ce ib leeg ib khub cawv rov qab rau ob tug mej koob ( lwm tus ces tsis ce lawm )

thiab rov coj ob tug mej koob haus Ib khob cawv thiab txhab kom puv nkwb nkaus rau rov coj nkawv cub dua ib lwm cawv tas, ces yuav rov muab cov lus hauv qab no rau ob tug mej koob nkawv dua ntxiv dua.

Lus tshoob lus kos mas yuav rov ntxiv li no rau neb ob tug txiv tuam mej koob thiab lwm mej koob li no thiab, neb xyuam tsis nyog pes tsawg lub laj khwv, no lau mog

( txaum yim rau ob tug mej koob )

Hnub no peb niam txiv poj yawm vam vam neb tsheej tsa tsi, mus nrog laj niam laj txiv, laj tshoob laj kos, los neb txhob tso peb pov tseg, thov neb yeej meem pab peb leg, kom peb tus plaj tshoob ntsig kos nyob mus meej ntsig, no laus mog

( txaum yim rau ob tug mej koob )

nyob li ntawm tus roj tus ntsha ces cia raug saum peb, hos nyob li ntawm tus rauj tus qws ces ntshe yuav raug saum neb, los thov neb ua siab loj siab ntev, taug lawm liaj lwg rhwv mwg txoj mus qub kev, no lau mog,

( txaum yim rau ob tug mej koob )

Nyob li ntawm liaj lwg, rhwv mwg txoj me kab tshoob, ces tso plhuav rau neb pab peb taug kom thoob, no lau mog

( txaum yim rau ob tug mej koob )

Ho nyob li ntawm tus ncauj tus lus, ces tso plhuav rau neb ob tug mej koob yeej meem pheej teb kom tiaj pheej chaw kom tus, no lau mog.

( txaum yim rau ob tug mej koob )

Thov neb yeej meem ua lub siab loj, nyob li ntawm tus roj tus ntshav me txhiaj txheej nyiaj txiag, ces peb cov ua niam ua txiv ua kwv ua tij, peb yuav fab peem kom txhij, kom txhua, kom ntxaum, yuav tsis pub neb tau txog kev txaj muag, no lau mog

( txaum yim rau ob tug mej koob )

Lus ces hais li no rau neb ob tug mej koob , nyob li ntawm tus txhiaj txheej nyiaj txiag ces niam txiv npaj tau $8,000.00 ces yog tus nqi mis nqi hno,

hos nyob li ntawm $ 1,200.00 taj haj no ces npaj rau neb coj mus ho tau siv txuas tis txuas tw, ib tsam niam txiv ho tuaj tsis ncav neb lub caij lub nyoog yuav siv, yog li no thiaj muab cob rau neb ob tug mej koob, no lau mog

( txaum yim rau ob tug mej koob )

Neb yeej meem coj mus siv rau nqis mis nqi hno, nqi paj, nqi txiv, muas kev txhaum txheej, dab tsi los ntsuav yog neb siv rau liaj lwg txoj kab tshoob rhwv mwg txoj me kev kos xwb, no laus mog

( txaum yim rau ob tug mej koob )

hnub no vam neb mus lawm ces yuav vam neb mus nrog chawj nrog thov, nrog ntxiv nrog ntxhua, no laus mog

( txaum yim rau ob tug mej koob )

Nyob li nram ntej, nram ntxov, nram qab, nram ntsis ho muaj lus nkhib lus nkhaus, lus dua lus dim, noj dua nqaij daig dua dab haus dua cawv daig dua nru, ntswj dua khob lov dua xaws, lawm no los neb yeej meem ua siab ntwb ntev pab nrog pheej kev kom tiaj, pheej kab kom du, no laus mog

( txaum yim rau ob tug mej koob )

Dub twg los yuav vam neb mus nrog ntxhua, ntuag twg los yuav vam neb mus nrog ntxiv, kom tau neej tau tsav, tau ntsuab tau ze, tau tub tau nyab, tau txoj kev ntoj kev thuv, no lau mog,

( txaum yim rau neb ob tug mej koob )

Hais tag li no ces muab cov nyiaj coj los cob kiag rau ob tug mej koob thiab ho muab lub kaus thiab txoj siv ceeb coj los tuav rawv yuav muab cob rau mej koob ces hais li hauv qab no xwb.

11. Nceeg lus – 4 . muab lus rau ob tug mej koob

Lus tshoob lus kos mas yuav ntxiv li no rau neb thiab hnub no peb vam vam neb ob tug mej koob coj nkauj nyab nraug vauv mus tis neej tis tsav, rau txoj kev dav, tis ntsuab tis ze, rau txoj mus kev deb, los thov neb ob tug mej koob zam lub txheej rau peb cov niam, cov txiv, cov kwv, cov tij, uas yog niam txiv poj yawm thiab, no laus mog

( txaus yim rau ob tug mej koob )

Nyob li peb cov niam, cov txiv, kwv cov tij yog ho tsib ces peb yuav tawg me me paj rau neb tiam sis yeeb vim peb los kuj tsis tsib thiab ces peb txawm txi txiv ua nriav xwb los thov neb tsis txhob tu siab nawb mog, peb ob tug txiv tuam mej koob thiab lwm mej koob, no nawb mog

( txaum yim rau ob tug mej koob )

Yog li ntawm no yog niam nkauj kaus, yuav muab cob lis nkaus rau neb tej me quav npab es neb ho tau niam nkauj kaus roos nkauj nyab nraug vauv mus ntoj kab, thaiv dab txeej dab qus tsis pub kom pom nkauj nyab nraug vauv qab, no laus mog

( txaum yim rau ob tug mej koob )

Yuav muab niaj nkauj kaus cob lis nkaus rau neb tej mus quav tes es neb ho tau niam nkauj kaus roos nkauj nyab nraug vauv mus ntoj ke, thaiv dab txeej dab qus tsis pub kom nkauj nyab nraug vauv kev, no laus mog

( txaus yim rau ob tug mej koob )

Zaum no neb txais lis nkaus niam nkauj kaus ces neb yuav zoo xws li liaj lwg rhwv tus me txiv tuam mej koob, yuav vam neb coj nkauj nyab nraug vauv mus ntoj tshoob, lawm hnub tuaj rais li lees rov los hnub poob, no laus mog

( txaus yim rau ob tug mej koob )

Zaum no neb txais lis nkaus niam nkauj kaus ces neb yuav zoo xws li liaj lwg rhwv tus me txiv tuam mej zeeg, yuav vam neb coj nkauj nyab nraug vauv mus ntoj tshoob lawm hnub tuaj rais lis lees rov los rau hnub ntxee, no nawb mog neb ob tug txiv tuam mej koob thiab lwm mej koob, no laus mog.

( txaus yim rau ob tug mej koob )

Hais tag li no ces muab lub kaus thiab txoj siv ceeb cev rau ob tug mej koob, tiam sis thaum koj cev yuav tsum tig tusk o kaus rau tom lub hauv paus rooj, thaum nkawv txais tau lawm ces nkawv mam khi, txawm khi tau li cas los yog nkawv khi lawm ces yog ho raug nplua cawv los nkawv thiaj tsis tu siab rau yus nawb.

Tom qab thaum muab lub kaus thiab txoj siv ceeb cob tag rau ob tug mej koob lawm ces ho rov qab hais ob peb lo lus li no ntxiv rau nkawv thiab.

12. Nceeg l us – 5. muab lus rau ob tug mej koob

Lus ces meej li no rau neb ob tug mej koob, thaum neb mus txog neb yeej meem mus ua raws li neb txoj kev txawj uas neb ib txwm ua los mus, tsis tag li neb muab $200.00 coj los zas niam txiv lub xeeb nawb mog

( txaus yim rau ob tug mej koob )

txawm tias tej tub tej ntxhais ho ua siab niam siab txiv, txawj deev tsis txawj coj los kom niam txiv ho tig ntsej tig muag los nrog peb txum tshoob txum kos peb yuav nco niam nco txiv tus txiaj tus ntsig no lau mog.

( txaus yim rau ob tug mej koob )

Tsis tag li yog niam txiv ho tsis nug txog ntawm peb caj peb ces, tus coj noj coj ua coj tshoob coj kos no los kuj tsis ua li cas.

Ho yog niam txiv ho nug txog peb caj peb ces no los thov neb qhia rau niam txiv tias peb yog pab hmoob ( _____________________ ) los sab teb chaws ( ______________________ ) los no nawb mog

( txaus yim rau ob tug mej koob )

hos peb tus coj noj, coj ua, coj tshoob, coj kos, nyob rau tam sis no nws npe hu ua ( __________________ ) no nawb. Tsis tag li no hais rau tias neb ob tug mej koob tiam neb ua ntej mus lawm los peb cov niam cov txiv yeej yuav lawv neb qab tuaj thiab, no nawb mog

( txaus yim rau ob tug mej koob )

Hais tag li no lawm ces thaum mej koob nkawv txais tau lub kaus thiab txov siv ceeb lawm ces nkawv khi kaus tag nkawv yuav tsum ce cawv rau ob tug muab lus los yog ob tug coj tshoob coj kos thiab yuav hais li hauv qab no lawm xwb.

13. Nceeg lus ntawm ob tug mej koob muab rau niam txiv hauv tsev

Lus mas yuav tham li no rau nej cov ua niam ua txiv thiab cov coj noj, Zaum no nej tus plaj tshoob ncig los poob, kev kos ncig los txog, zoo puam tam li rev paj tawg lis zees tuaj rau nruab roob, dauv li zawv tuaj rau tim toj, nej thiaj yuav vam wb ob tug mej koob mus nrog ntoj.

Zaum no nej kev kos ncig los txog, nej tus plaj tshoob ncig los poob, zoo puas tam li rev paj tawg lis zees tuaj rau nruab roob, dauv lis niab tuaj rau nruab deg, nej thiaj yuav vam wb ob tug mej koob mus pab nej leg.

Tab sis wb los yeej tsis txawj tsuas yog mus raws li nej txoj kev txib kev hu, kev txib kev khaiv xwb, yog li nej cov niam, cov txiv, thiaj tua txiv pwj qaib rau wb noj, nej thiaj tso li plhuav liaj lwg, rhwv mwg, txoj me kab tshoob kev kos rau wb coj,

nej cov niam cov txiv thiaj txo dej txo caw los rau wb yoog, nej tso plhuav liaj lwg, rhwv mwg, txoj me kab tshoob, kev kos, rau wb mloog,

Zaum no wb noj sib ce haus sib tshab, ces nej thiaj tsaws li zus nej niam nkauj nkaus thiab txoj kab tshoob kev kos rau wb tej mus quav npab, ces wb yuav coj nkauj nyab nraug vauv mus tis neej tis tsav, rau txoj kev dav.

Zaum no wb noj sib tshab haus sib ce, ces nej thiaj tsaws li zus nej niam nkauj nkaus thiab txoj kab tshoob kev kos rau wb tej mus quav tes ces wb yuav coj nkauj nraug cauv mus tis ntsuab tis ze, rau txoj kev deb,

zaum no wb mus ces yog wb txawj yawb los txawj hais ces nyaj wb yuav hais tau nej ib roog mus zoo tshoob, yog wb tsis txawj yawb tsis txawj hais ces ntshe yuav nkim tag nej ib tsus mus zoo qoob no lau mog.

( txaus yim rau ob tug mej koob )

Zaum no wb mus yog wb txawj yawb nqis txawj hais ces nyaj wb yuav hais tau nej ib roog mus zoo kos, yog wb tsis txawj yawb tsis txawj hais ces ntshe yuav nkis tag nej ib tsus mus zoo hno no lau mog.

( txaus yim rau ob tug mej koob )

Zaum no wb mus ces yuav coj nkauj nyab nraug vauv ncig lis yeev niam txiv neej nus lub tsev vaj lig vov vuas nyab, yog wb mus hais tsis tsheej tshoob tsheej kos los tseg, yog wb mus hais tsheej tshoob tsheej kos ces wb yuav vam nej cov niam cov txiv nrog ris dej ris cawv tuaj pab, no lau mog.

( txaus yim rau ob tug mej koob )

Zaum no wb mus ces yuav coj nkauj nyab nraug vauv ncig lis yeev niam txiv neej nus lub tsev vaj lig vov vuas luaj, yog wb mus hais tsis tsheej tshoob tsheej kos los tseg, yog wb mus hais tsheej tshoob tsheej kos ces wb yuav vam nej cov niam cov txiv nrog ris dej ris cawv tuaj, no lau mog.

( txaus yim rau ob tug mej koob )

Thaum hais tag li no lawm ces coj sawv daws kab lub cawv, ces yus muab lub kaus coj los khi law xwb, thaum khi kaus tau lawm ces tos lub cawv tsa mej zeeg los dhau plaws yus ob tug mej koob ces yus sawv tsees los coj nraug vauv thiab phij laj nkawv pe ua ntej, yuav sawv kev nco ntsoov kom nraug vauv thiab phij laj hle khau mam li pe thiab kom nraug vauv thiab phij laj tig lawm sab pem hauv plag es mam li pe thiaj tsis txhaum nawb.

14. Nceeg lus ntawm ob tug mej koob yuav sawv kev mus hais tshoob

Mej koob kom nraug vauv thiab phij laj los sawv nram qab rooj ces los pom niam, pom txiv, pom niam hlob txiv hlob, pom niam ntxawm txiv ntxawm, Pom muam phauj yawg laus, pom niam dab laug txiv dab laug, pom niam tais yawm txiv, ib tsoom niam tij thiab tij laug, ib tsoom muam yawm yij sawv daws.

Kev pe ces hais li cov lus nyob rau hauv qab no mus xwb ces yog lawm os,

1. Pe- txiv = hnub no yuav mus xaus tshoob xaus kos nyob hauv tsev ua siab ntev tos no lau mog.
2. Pe – niam = hnub no yuav mus xaus tshoob xaus kos nyob hauv tsev ua siab ntev tos no lau mog.
3. Pe - poj koob yawg koob = hnub no yuav mus xaus tshoob xaus kos nyob hauv tsev ua siab ntev tos no lau mog.
4. Pe - niam hlob txiv hlob = hnub no yuav mus xaus tshoob xaus kos nyob hauv tsev ua siab ntev tos no lau mog.
5. Pe - niam ntxawm txiv ntxawm = hnub no yuav mus xaus tshoob xaus kos nyob hauv tsev ua siab ntev tos no lau mog.

6. Pe - ib tsoom niam tij thiab tij laug = hnub no yuav mus xaus tshoob xaus kos nyob hauv tsev ua siab ntev tos no lau mog.

7. Pe - niam txiv tus coj tshoob coj kos = hnub no yuav mus xaus tshoob xaus kos nyob hauv tsev ua siab ntev tos no lau mog.

8. Pe - ncej dab ncej qhua = Hnub no yuav mus xaus tshoob xaus kos nrog mus pov hwm pov yawm thiab nrog mus ntis ncauj xai ncauj lus, ncauj plaub ncauj ntug, kom peb mus ua tshoob ua kos mas kom peb tsis ntsib plaub tsis ntsib ntug, tsis ntsib xaiv, tsis ntsib lus nag, no laus mog.

Pe tag li no ces ho kom nraug vauv thiab phij laj tig xub ntiag law nram qhov rooj tag ces ho pe xeeb teb xeeb chaw, cov lus hais li hauv qab no xwb.

9. Pe Koj niag xeeb teb xeeb chaw, ( ___________) li teb chaws = hnub no peb yuav mus xaus tshoob xaus kos, yog li nrog pov fwm pov yawm kom peb mus kaj mus huv mus dawb mus zoo , mus kom tsis ntsib plaub, tsis ntsib ntug tsis ntsib xaiv, tsis ntsib lus, no laus mog

Thaum pe tag li no lawm ces xyuas seb niam txiv ntim su los yog tej nyuag khoom siv puas txhij lawm ces sawv kev mus lawm xwb.

Kev ntim su ntawd yuav tau ntim li hauv qab no, thiab yuav yog ntim sum ua tshoob ua kos nawb.

Ntim = 1. pob mov nrog 1. tug qaib thiab ib lam fwj cawv coj mus npws poj,

Ntim = 2. ntim ib fwj roj, ib fwj ntsev, ib hnab me ntsis ntxhuv, 2 los yog 4 rab diav, ib rab riam dab, ib pob mov ob tug qaib coj mus noj sus, 2 tug qaib qhe tsiaj, cov khoom hais los saum no yuav tsum ntim rau hauv ib lub kawm rau tus phij laj ris,

Ntim = 3. npaj ib pob pam rau tus nraug vauv ris, yog thaum npaj tau li no lawm ces mus lawm xwb.
Kev mus ntawd, txiv tuam mej koob nqa lub kaus ua ntej, lwm mej koob , phijlaj , nraug vauv, nkauj nyab, niam txais ntsuab.

kev noj sus ntawd yus yog mej koob yus yuav tau los muab ob tug qaib dam ob lub tob hauv qaib 4 txhais ko taw cia tsis txhob muab noj.

dua 4 tug ncej puab rau nraug vauv, phij laj, nkauj nyab thiab niam txais ntsuab lawv ib leeg ib tug ncej puab.
thaum yuav noj mov yus ob tug mej koob yuav tau laig dab me ntsis, yus mam noj.

Kev laig dab ntawd de ib qho nqaij thiab ib qho mov ib me nyuag khob cawv thiab hais li hauv qab no xwb.

Niam txiv poj yawm txwv txoob, hnub no peb yuav tuaj mus xaus tshoob xaus kos peb noj sus hu nej los nrog peb noj sus, noj pov fwm haus pov yawm peb txhua leej txhua tus kom peb mus hais tshoob hais kos kom mus hais dawb hais huv hais kaj hais zoo kom tsis ntsib plaub tsis ntsib ntug, tsis ntsib xaiv tsis ntsib lus, no lau mog.

( ces muab diav mov ntov pog tseg xwb )

Muab dua ib qho nqaij thiab ib qhov mov ib khob cawv thiab ho laig xeeb teb xeeb chaw, hais ib yam nkaus li xwb

Niam txiv xeeb txwg xeeb laug, xeeb teb xeeb chaw, Teb chaws ntawm no xws li ( _________________ ) hnub no peb yuav tuaj mus xaus tshoob xaus kos peb noj sus hu nej los nrog peb noj sus, noj pov fwm haus pov yawm peb txhua leej txhua tus kom peb mus hais tshoob hais kos kom mus hais dawb hais huv hais kaj hais zoo kom tsis ntsib plaub tsis ntsib ntug, tsis ntsib xaiv tsis ntsib lus, no lau mog.

Thaum laig dab tag lawm ces noj mov lawm xwb, noj tag ces nco ntsoov muab 2 lub tob hau qaib thiab 4 txhais ko taw qhwv nrog cov nej noj tsis tag coj mus ua puav pheej,

thaum nej mus txog tom niam tais yawm txiv tsev lawm ua ntej nej yuav nkag mus hauv tsev yuav tsum mus kom raws li hais los saum no.

1. txiv tuam mej koob ua ntej.
2. lwm mej koob.
3. tub phijlaj.
4. nraug vauv.
5. nkauj nyab.
6. niam txais ntsuab.

Yog nej mus tsis raws li hais los saum no niam txiv muaj cai nplua 12 lag nyiaj los yog raug li $ 200.00. thaum nej mus txog ntawm qhov rooj lawm nco ntsoov nug seb niam txiv yuav kom nej nkag lub qhov rooj twg, tsis tag li ntawd nco ntsoov nug seb lawv puas caiv tso, nej mam li nkag mus hauv niam txiv lub tsev nawb.

Thaum nkag txog hauv tsev lawm ces kom nraug vauv thiab tub phij laj nkawv txo nra thiab los sawv rau ntawm plag tsev, ces yus yog mej koob yus yuav tau coj nkawv pe niam pe txiv pe poj koob yawm koob, pe niam hlob txiv hlob, pe niam ntxawm txiv ntxawm, pe muam phauj yawg laus,pe niam dab laug txiv dab laug, pe nus tij nus kwv, pe niam txiv tus tsawb tshoob tsawb kos, pe niam txiv ncej dab ncej qhua. Ces lus pe ces hais li hauv qab no xwb.

Pe Txiv ov!!! Coj tau niam neb tus ntxhais lawm tau ob niag peb hnub no, tsawg neb ib sab tes no lau mog,
Pe Niam ov = Coj tau niam neb tus ntxhais lawm tau ob niag peb hnub no, tsawg neb ib sab tes no lau mog,
Pe- Poj koob yawm koob = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Niam hlob txiv hlob = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Niam ntxawm txiv ntxawm = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Muam phauj yawg laus = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Niam dab laug txiv dab laug = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Niam tais yawm txiv = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Nus tij nus kwv = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

Pe- Niam txiv ncej dab ncej qhua = Coj tau niam thiab txiv nkawd tus ntxhais lawm tau ob niag peb hnub no, tsawg niam txiv ib sab tes no lau mog,

txawm pe leej twg los hais ib yam tsuas yog tig lus kom haum tus neeg ntawd xwb, yuav tsum nco ntsoov hais kom zoo nkauj rau liaj lwg txoj kab tshoob rhwv mwg txoj kev kos xwb mog.

dhau li ntawd lawm, thaum pe tag lawm ces muab lub kaus coj mus khuam tseg ( Hmoob dawb no ces coj mus khuam tseg ) hos yog ( Hmoob lees no yus muab ib tseg xwb nawb) tsis pub muab khuam thiaj yuav tsis txhaum niam txiv tom ub nawb.

Dhau li ntawd lawm ces yus yuav tsum los tho pob luam yeeb tsab rau cov niam cov txiv qhua tshoob qhua kos kom txhua txhua tus uas yog txiv neej.

Lus tsab luam yeeb ces tsum tau hais li hais li no thiaj yuav tsis txhaum niam txhaum txiv os nawb mog.
Txais ib kab me luam yeeb saib yuam

Txawm leej twg los hais ib yam nkaus xwb vim hais tsis tas yuav tuav luag npe li los yeej tau os nawb.

thaum tsab yeeb txhua lawm ces xyuas seb leej twg ntxim yog tus coj tshoob coj kos no ces yus ho los tsab luam yeeb rau nws raws li hauv qab no.

ib kab rau txiv, ib kab rau niam, ib kab rau niam hlob txiv hlob, ib kab rau niam txiv ntxawm, ib kab rau poj koob yawg koob, ib kab rau muam phauj yawg laus, ib kab rau niam dab laug txiv dab laug, ib kab rau nus tij nws kwv, ib kab rau niam txiv tus tsawb tshoob ntsawb kos, ib kab rau niam txiv ncej dab ncej qhua dhau li ntawd lawm ces rov tsab ib kab rau nws thiab nug nws l hauv qab no.

Yuav nug koj ua niam, ua txiv hnub no niam txiv tom ub tuaj suab tau niam txiv tom no ib tug ncej neeg coj mus cheb qab plag tse qawj, ntxuav qab yiag du ua neej yaj los kib txoob nqaj nto ntuj ploog nto ntsis,

Yog li hnub no niam txiv tom ub kuj txib tau wb coj nkauj nyab nraug vauv tuaj nrog niam txiv neej nus ntsuas dej ntsuas nej ntsuas txhuv no, yog li niam txiv neej nus puas tau npaj tau ob tug tub cev lus thiab?

Yog niam txiv ho npaj tau lawm no los haj yam zoo, yog niam txiv ho tsis tau npaj no los seb niam txiv ho nyiam tsum ntsaw raug leej twg no los?.

kom niam txiv ho qhia rau wb es wb ho mus nrog niam nrog txiv thov no laus mog.

Thaum koj nug niam txiv li no lawm ces seb niam txiv yuav teb koj li cas xwb, tiam sis txawm yog leej twg los yog tshoob coj xwb ces nyias yeej nrhiav nyias ob tug mej koob lawm tsuas yog lam nug kom zoo nkauj xwb.

Thaum niam txiv los qhia seb ob tug mej koob yog leej twg lawm ces yus ob tug mej koob mam li mus tsab luam yeeb rau ob tug mej koob ntawd, Thiab mus tuav nkawv tes ces hais li no rau nkawv.

Txais ib kab luab yeeb seb kwv luag !!!!! lus mas yuav hais li no rau neb ob tug kwv luag!!!!! Zoo siab niam txiv tom no kuj vam vam neb, niam txiv tom ub los kuj vam vam wb, yog li no hnub no zoo siab tau ntsib neb, yog muaj tej yam wb ho tsis paub los cia siab tias neb yuav qhia rau wb no nawb.

Cim xwm = mej koob tog ntxhais - ( Yog Txum Mej ) – ( txum meej ).

Cim xwm = me koob tog tub - (Yog Plhov Mej ) - ( tshaj meej ).

Thaum hais li no tag rov los zaum zoj ib pliag ces rov mus tsab kiag ib leeg ib kab luam yeeb rau ob tug mej koob thiab rov nug li no,

lus mas yuav nug neb ob tug kwv luag li no, yuav vam neb nrog ntxig nug niam txiv ib los lus seb ua li niam txiv tej kwv tej tig, xws li niam hlob txiv hlob, niam ntxawm txiv ntxawm, nus tij nus kwv, tej txheeb tej ze puas tau tuaj txhij yog ho tuaj txhij lawm no los muaj lus dab tsi nraug vauv xav nrog niam txiv tham no lau, ob tug kwv luag.

Thaum nug li no lawm ces ob tug mej koob hauv tsev mam mus nug niam txiv hauv tsev yog tej neeg txheeb neeg ze tuaj txhij lawm los niam txiv yeej yuav qhia rau ob tub mej koob hauv tsev.

Hos yog tsis tau tuaj los niam txiv yeej yuav qhia rau nkawv ces nkawv mam ho los ce ib leeg ib khub cawv rau yus ob tug mej koob thiab qhia rau yus paub.

Thaum qhia rau yus tag lawm ces yog neeg tuaj txhij lawm los niam txiv yeej yuav rau ib pluag hmov noj tag mas thiaj yuav pib rau.

Thaum noj hmo meej thiab muab rooj mov ntsaig meej lawm ces yus ob tug mej koob rov mus tsab ib leeg ib kab luam yeeb rau ob tug mej koob hauv tsev thiab ces tsa ncauj thov niam txiv ib lub rooj.

Tsab kiag kab luam yeeb rau ces hais li no,

Ob tug kwv luag ov!!!!!! Lus tshoob lus kos mas yuav hais li no rau neb, luag tej laus hais tias maj ces yuav tsis tuaj, tuaj lawm ces yuav tsis maj, tab sis tuaj los yuav yuav caij, rov los yuav yuav nyoog,

tav no niam txiv tom ub tom no kev neej kev tsav puav leej noj hmo txhij lawm yog li xav nrog niam txiv thov lub me rooj es muaj lus dab tsi los xav nrog niam txiv tham no lau!! Ob tug kwv luag?.

Thaum thov li no tag lawm ces ob tug mej koob mam mus nug niam nug txiv seb niam txiv muab lub rooj twg los rau yus siv ces ob tug mej koob mam coj los cob rau yus thaum thov tau lub rooj lawm ces yus ob tug mej koob mam los mus rub rooj rau thiab rub ob tug mej koob hauv tsev zaum sab pem toj.

Hos yus ob tug zaum rau sab nrad ces ce ib leeg ib khub cawv cev rau ob tug mej koob hauv tsev ces ob tug mej koob hauv tsev mam li rov ib leeg ib lub rau yus ob tug mej koob ces yus ob tug mej koob mam coj nkawv cub ib pas cawv thiab hais li hauv qab no xwb.

44. Nqe: lus 1. ob tug tshaj meej thiab ob tug txum meej sib txis

Ob tug kwv luag!!! Cub ib pas cawv seb yuad,

cub cawv meej kiag ces tsa ncauj hais li no.

Ob tug kwv luag!!! Niam txiv txooj xeem ( ________ ) tuaj suab tau niam txiv!! txooj xeem ( _____ ) ib tug ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj, ploog nto ntsis,

yog li no niam txiv tom ub vam vam wb, niam txiv tom no, vam vam neb, hnub no peb 4 tug tuaj tis neej tis tsav, tis ntsuab tis ze,

Yog li ntawm neb thiab wb ob tug mas kev txheeb kev ze, kev neej kev tsav, tej zaum peb kuj yog yawm yij, yawm dab, los yog phooj los ywg.

Tab sis hnub no yuav thov neb es muab txoj kev txheeb kev ze, kev neej, kev tsav, khuam tseg, hmo no wb yuav hu neb ua kwv
luag, no nawb kaj ntug tag kis niam txiv tus me plaj tshoob peb ntos thoob,

kev kos peb ntos nto, peb mam rov muab peb txoj kev neej kev tsav, kev txheeb kev ze, rov qab los hu li qub no lau mog!!! Ob tug kwv luag!!!

Hais meej li no ces muab lub cawv kab kiag thiab rov ce dua thiab cev rov rau ob tug mej koob rov coj nkawv cub dua ib pas cawv dua thiab rov muab dua ib txheej lus li hauv qab no.

45. Nqe lus 2. ob tug Tshaj meej thiab ob tug txum meej sib txis

Ob tug kwv luag!!! Lus tshoob lus kos mas yuav tham li no rau neb thiab hnub no niam txiv txooj xeem ( _________ ) tuaj suab tau niam txiv txooj xeem ( ________ ) ib tug me ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

Luag tej laus niaj txhis piv txoj lug hais tias qhua tuaj qhua hlob, tab sis hnub no wb tuaj los wb tsis paub dab tsi li tsuas yog tsis muaj neeg txib lawm ces wb tsuas tuaj raws kev txib kev khaiv, kev txib kev vam dag zog xwb,

Wb yuav vam neb txhob tso wb pov tseg, neb nyob hauv tsev ces yuav vam neb yog txiv, wb tuaj nraud tuaj ces wb yog niam nawb, muaj dab tsi los yuav vam neb ua twb zoo qhia rau wb thiab lau mog.

Yog ho muaj tej lo lus wb hais tsis meej los yuav vam neb coj mus hais kom meej rau niam rau txiv nawb, ntawm neb tus txiaj ntsig wb yuav ris txiaj ntsha wb yuav nqa,

xab theeb lwm hnub kaj ntug tag kis plaj tshoob ntsig kos foob koob ncig yeej hlav sib sua, wb ho nyob hauv tsev neb tuaj nraud tuaj los wb yuav zam txoj kev dav rau neb thiab no laus mog, Thov neb ob tug kwv luag nawb mog.

Hais meej li no ces yus ob tug mej koob ( plhov mej ) los yog ( tshaj meej ) tuaj tom niam txiv poj yawm tog,
yuav tau sawv mus pe ob tug mej koob hauv tsev ( Txum mej ) los yog ( txum meej ) yog niam txiv neej nus ob tug ib leeg ib pes nawb.

Kev pe ob tug mej koob hauv tsev yog thov kom nkawv txhob ua nyuab nyuab rau yus ob tug mej koob sab nraud xwb, muaj dab tsi los nkawv thiaj li pab yus ob tug mej koob sib phi mus rau qhov zoo xwb nawb.

( Ob tug txum meej ) los yog niam neej nus ob nyob tsev teb thiab txais yim hais tias!

46. Nqe lus ob tug tshaj meej sawv pe ob tug txum meej

Ob tug kwv luag sawv txhob pe lau mog, peb ces ua cwj dhau dej ua luag luag dhau zoov xwb muaj dab tsi los peb mam li sib pab no lau mog!!!!.

Thaum pe nkawv meej lawm ces coj nkawv muab lub cawv kab kiag mam rov ce dua tshiab mam hais dua lwm qhe lus, nco ntsoov tias ua ntej yuav hais ib nqe lus twg yuav tau cub cawv ua ntej mam hais, thaum hais nqe lus meej lawm nco ntsoov kab lub cawv kom meej.

47. 3. ob tug tshaj meej pib lus tshoob kos tham rau ob tug txum meej

Lus tshoob lus kos mas yuav tham li no ntxiv rau neb ob tug kwv luag thiab hnub no niam txiv txooj xeem ( __________ ) tuaj suab tau niam txiv txooj xeem ( ________ ) ib tug ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

Yog li no hnub no niam txiv tom ub yuav tuaj nrog niam txiv tom no ntsuas dej ntsuas txhuv, niam txiv tom no tsev qeeb tsis yog chaw sim taws, tsev vuas tsis yog chaw sim zeb, zaum no niam txiv tom ub tsis yog tuaj ua suav sim niam txiv tom no, no lau!! Mog!!

Hnub no niam txiv tom ub ces yuav tuaj nrog niam txiv tom no cog paj, tsis yog tuaj cog pos, niam txiv tom ub yuav tuaj chawj tuaj thov tuaj ntxiv tuaj ntxhua, yog li niam txiv kuj muab tau 2 me nplooj txhiaj txheej ( $200.00 ) rau wb coj tuaj zas niam txiv lub xeeb, kom niam txiv ho tig ntsej tig muag los nrog nraug vauv txum tshoob txum kos, no nawb mog

Neb pab coj lus nraim rau niam rau txiv thiab nyab neej nus hais tias tsis yog muab los muas kev txhaum txheej 120 txoj cai, tsuas yog coj los zas niam txiv lub xeeb xwb, ib tsam tej tub tej ntxhais, ho tau tuaj ua siab niam siab txiv, txawj deev los tsis txawj coj,

Yog li no es kom niam txiv txhob tu lub siab, thov niam txiv ho tig ntsej tig muag los nrog nraug vauv txum tshoob txum kos thiab, nyob li ntawm niam txiv tus txiaj ntsig ces yuav ris, niam txiv tus txiaj ntsha ces yuav nqa, no laus mog, Ob tug kwv luag.

Hais tas li saum no ces ( txaum yim rau ob txum meej ) thaum hais meej li no lawm ces ce ib leeg ib khub cawv rau ob tug ( txum meej ) thiab cev qhov $ 200.00 nyiaj rau ob tug txum meej, Thaum ob tug ( plhov mej ) los yog ( tshaj meej ) cev rau ob tug ( txum meej ) ces muab txais tso rau saum qaum rooj, thiab hais li no rau ob tug ( plhov mej ) los yog ( tshaj meej ) hais li hauv qab no.

48. Nqe lus 1. ob tug txum meej teb ob tug tshaj meej.

Txais neb tes nawb. Tiam sis muab tso rau saum rooj no ib pliag tsim nyog khaws los nyaj niam txiv yuav khaws xwb, neb ob tug kwv luag ua siab ntev tos wb mus nrog niam txiv tham seb niam txiv ho hais li cas nawb, Ua Siab ntev Tos nawb.

Ces ob tug ( plhov mej ) los yog ( tshaj meej ) ho teb hais tias

Laj khiav nawb ob tug kwv luag.

Thaum hais meej li ntawd lawm ces ob tug ( txum mej ) los yog ( txum meej ) los ntsib niam txiv, ces ho yuav hais li no rau niam txiv hauv tsev.

49. Nqe lus ob tug txum meej muab rau niam txiv nyab neej nus

Lus mas yuav li no rau nej cov ua niam ua txiv paub tias, ob tug mej koob tom ub thiab wb kuj sib txis thiab pib me ntsis lawm,

Yog li niam txiv tom ub kuj muab tau $200.00 rau ob tug mej koob coj tuaj zas niam txiv neej nus lub xeeb, kom niam txiv ho tig ntsej tig muag los nrog nraug vauv txum tshoob txum kos,

Tsam tej tub tej ntxhais ho tuaj ua siab niam siab txiv, txawj deev los tsam ho tsis txawj coj,

Yog li es niam txiv tom ub thiaj ntshai ib tsam ho muaj li ntawd no es kom nej cov ua niam ua txiv, ho txhob xav txoj kev tu siab thiab no.

Dhau li lawm!! Nkawd ob tug mej koob kuj hais tias tsis yog yuav coj los muas niam txiv kev txhaum txheej 120 txoj cai, tsuas yog zas niam txiv lub xeeb nkaus xwb, wb kuj muab txais tso rau saum rooj lawm, ua li nej cov ua niam ua txiv yuav hais li cas?.

( txaum yim rau niam txiv xwb ) thaum muab lus li no rau niam txiv lawm ces ( niam txiv txais yim ) thiab teb hais tias.

50. Nqe lus niam txiv nyab neej nus teb ob tug txum meej

Zoo lus kawg os ob tug mej koob es neb ua siab ntev peb ho mus saj laj me ntsis tso, yog ho muaj dab tsi los peb mam hais rau neb nawb mog.

Dhau li ntawd lawm ces lawv mam ho sab laj thiab tsim nyog hais li cas los lawv mam muab lus rov rau yus ob tug mej koob nawb.

Yus ho yog niam txiv yuav los muab lus rau niam txiv ob tug mej koob kom coj los rau niam txiv qhua vaum ob tug mej koob ces ho yuav los hais li hauv qab no.

51. Nqe lus niam txiv nyab neej nus muab rau ob tug txum meej

Lus mas yuav hais li no rau neb ob tug mej koob, vam vam neb lub dag coj lub zog, tsheej tsa tsi tuaj nrog yawb tshoob yawb kos, xab theeb lwm hnub kaj ntug tag kis, peb tsoom kwv tij txiv tub noj txiv nyuj nphoo ntsev txiv twm nphoo roj, los tej zaum peb twb hu tsis txog neb los kuj muaj,

Tab sis neb txhob tso peb pov tseg mog, neb yeej meem pab peb laj tshoob laj kos, puav leej tib kom peb tau ntxhais tau vauv, tau kev ntoj kev thuv, neb tus txiaj ntsig peb yuav ris, txiaj ntsha peb yuav nqa, no lau mog.

Nqe me lus no neb coj lus nraim rau niam txiv tom ub ob tug mej koob, hais txog ntawm ob me nplooj txhiaj txheej ntawd!! Ib pliag tsim nyog peb yuav los mam ho yuav, yog tsis tsim nyog yuav no los mam li tham rau neb mog,

Tab sis neb coj lus nraim rau ob tug mej koob tom ub kom coj lus nraim rau niam txiv tom ub hnub no niam txiv yuav tuaj ntsuas dej ntsuas txhuv no ua li niam txiv qhov rooj tag puas qhib? qhov rooj txuas puas qhib?

Tsam yog tus tub ho tuaj dhau qab vag tsib taug, tus ntxhais pom tus tub zoo nraug, es tus ntxhais ho raws tus tub xwb, niam txiv tsis tuaj los ho yog neej yog tsav, niam txiv lam tuaj kom raws txoj kev dav, tsis tuaj los yog txoj kev txoj cai, lam tuaj kom raws txoj kev tsis txhob ntshai, xwb no los?

Hnub no coj tub coj ntxhais rov tuaj txog vaj txog tsev lawm ces kom niam txiv tom ub txawj tuaj los txawj rov xwb, niam txiv neej nus los yuav tsis ntaus nqi dab tsi rau niam txiv tom ub no lau mog!!

( txaum yim rau ) Ob tug txum meej txais yim thiab teb hais tias

Yog li nej cov ua niam ua txiv ua siab ntev tos wb nawb mog”

Thaum yus ob tug mej koob rov qab los txog ntawm lub rooj tshoob lawm, ua ntej yus yuav zaum yuav tau ( txaum yim ) thiab hais rau ob tug ( plhov mej ) los yog ( tshaj meej ) hais tias “

Ob tug kwv luag neb laj tos no lau mog

ob tug kwv luag ( nplov mej ) los yog ( tshaj meej ) txais yim thiab teb hais tias

Neb laj khiav no laus mog, ob tug kwv luag

Thaum yus ob tug( txum meej ) los zaum tus zog lawm, ces coj ob tug ( plhov meej ) cub ib pas cawv thiab muab cov lus uas niam txiv teb los hais rau ob tug nplov meej li hauv qab no xwb.

52. Nqe lus ob tug txum meej muab rau ob tug tshaj meej

Ob tug kwv luag!!! Lus tshoob lus kos mas yuav hais li rau neb thiab neb vam vam wb mus laj niam laj txiv los cuag li tsis tau niam txiv ib lo zoo lus nawb,

Nyob li ntawm niam txiv kuj hais li no!! ob tug kwv luag, neb coj lus nraim rau niam txiv tom ub hais tias hnub no niam txiv tom ub yuav tuaj nrog niam txiv neej nus ntsuas dej ntsuas txhuv no, ua li niam txiv tom ub qhov rooj tag puas qhib? Qhov rooj txuas puas qhib?

Tsam yog tus tub tuaj dhau qab vag tsib taug. tus ntxhais ho pom tus tub zoo nraug, es tus ntxhais ho raws tus tub xwb, niam txiv tsis tuaj los ho yog neej yog tsav, niam txiv tsuas yog lam tuaj kom raws li txoj kev dav,
niam txiv tsis tuaj los yog txoj kev txoj cai, niam txiv lam tuaj kom raws txoj kev tsis txhob ntxhai xwb, no los

Hnub no niam txiv tom ub twb coj tau niam txiv tom no tus me ntxhais tuaj txog vaj txog tsev lawm ces kom niam txiv tom ub txawj tuaj los txawj rov, xwb ho nyob li ntawm niam txiv neej nus los yuav tsis ntaus nqi dab tsi rau niam txiv tom ub no lau mog

“ ( txaum yim rau xwb tas ces ) “ ob tug plhov meej sawv ( txais yim thiab teb hais li hauv qab no) ob tug plhov meej yaum ob tug txum meej hais tias

yog li peb muab lub cawv no kab kiag seb yuad, ob kwv luag.

Kab lub cawv meej ces ob tug plhov mej rov ce ib leeg ib khub cawv rau ob tug txum meej ces ob tug txum meej ho rov ib leeg ib khob rov rau ob tug plhov meej. Ces ob tug plhov mej ( tshaj meej ) yaum hais tias,

Ob tug kwv luag !! peb cub ib pas cawv seb yuad!!

Thaum cub cawv meej lawm ces ho tsa ncauj hais li hauv qab no tias

53. Nqe lus ob tug tshaj meej muab rau ob tug txum meej

Ob tug kwv luag, zoo lus kawg, 100 las nyiaj muas tsis tau niam txiv lo lus nyiaj lus kub, tab sis neb xyuam tsis nyog pes tsawg lub laj khwv no lau mog!!

Hnub no wb yog niam txiv neeg ces wb yuav hais niam txiv lus, wb nyob niam txiv tawb. ces wb yuav quaj xws niam txiv noog, wb yuav vam neb rov coj lus mus hais rau niam rau txiv tias luag tej laus niaj txhis piv txoj lug hais tias noj nceb ces yuav taug cav, yuav poj yuav sev, ces yuav xaiv neej xaiv tsav,

Hnub no niam txiv txooj xeem ( ________ ) rooj tag los yeej qhib rooj txuas los yeej qhib, niam txiv thiaj taug kev tawv tuaj coj niam txiv tus tub tus ntxhais, yog li kom niam txiv yeej meem mees lub xeeb,

Thov niam txiv neej nus ho tig ntsej tig muag los nrog nraug vauv txum tshoob txum kos,

Hnub no niam txiv tuaj lawm ces dub los yuav tuaj ntxhua, ntuag los yuav tuaj ntxiv, yuav tuaj chawj tuaj thov no laus moog!!. Ob tug kwv luag.

Nco qab ntsoov tias thaum yus hais ib nqe lus meej lawm yus yuav tsum sawv ntsug thiab txaum yim lias rau ob tug txum meej, ob tug txum meej sawv tsees txais yim, rov zaum ntua thiab yaum ob tug plhov meej hais tias
ob tug kwv luag kab lub cawv seb yuam !!!

Thaum kab lub cawv meej ces ob tug txum meej txaum yim thiab hais rau ob tug plhov meej hais tias
Yog li ces neb ua siab ntev tos nawb ob tug kwv luag ob tug plhov meej sawv tsees txais yim thiab teb hais tias

Laj khiav no lau mog ”.

Thaum ob tug txum meej rov mus cuag cov niam txiv ob tug txum meej yuav hais li hauv qab no.