koojziagkabzaug 15th May 2012, 11:44 am
Nyob zoo tij laug Xyooj Tsab,
Kuv lub npe koojziagkabzaug, thaum kuv nyuam qhuav tuaj cab sab tsis ntev, muaj ib tug phooj ywg hais kom kuv mus register npe hauv lub vas sab Hmongza, kuv tsis paub rau npe li cas, kuv lam muab me kab me kooj los sib dhos tau ib lub npe; thaum kuv pib sau txog Hmoob txuj ci, kuv mam paub tias koojziagkabzaug yog ib tug tub xa moo, ces kuv thiaj tsis hloov kuv lub npe nov li lawm. Kuv tsiv los nyob zos tshiab los kuv cia kuv lub npe nws nyob nws, vim kuv lub hom phiaj nws mus raws li kuv lub npe yam uas kuv twb tsis paub txog.
Tij laug, keeb kwm ces yeej tsis zoo nkauj ntau xwb, tej kev tsis ncaj ncees ces lub teb chaws twg, hais neeg twg los yeej muaj qhov zoo qhov phem. Tab sis luag muaj taus ib lub teb chaws, nyob muaj haiv ces yeeej txhais tau tias luag yuav txawj coj tshaj yus lawm. Txawm yus yuav qhuas yus ntab tshaj los luag ntsia ib muag xwb ces luag yeej paub hais tias yog zoo ces yeej muaj liaj ia teb chaws tuav lawm, tsis thas yuav tham tias yog tus ub tu no phem, yog tim Suav Tuam Tshoj phem es Hmoob thiaj poob teb chaws, ciaj tua tsis yeej Suav los tuag mas tseem niaj hnub ntawg, tshuab qeej hais kom mua muab kom tau liaj ia teb chaws rov. Niaj hnub hais tias Suav phem, Suav khawb Hmoob ntxa txog niaj hnub no, twb tsi xav txog tias tshuab qeej los hais kom tus tuag rov mus tua Suav, tseem Tsa Rog tib si, thaum muab sam sab tseem hlais tej ris tsho, cob kom tus tuag txhob pub Suav txeeb...Tej no yog muab xav zoo zoo mas yuav tau kho Peb Hmoob tus cwj pwm ntau qhov thiaj li yuav coj tau teb chaws, coj tau ib haiv neeg.
Tij laug, ntawm cov qub nom lawv kev coj ces xav kom nws sau, tab sis txhob tso rau public hauv nov, sau cia es lwm hnub muaj caij muaj nyoog yuav muab ua tej phau ntawv cia. Xav kom nws sau cia seb lwm hnub yuav muab ua li cas los thiaj muaj rau ntawd, yog tsis sau ces yuav poob mus xwb. Txhua yam nws paub txog tej kev tswj hwm ntawm Hmoob, kuv xav kom nws sau tseg tib si. Sau tau, mam tuav xam, mam saib seb yuav siv li cas, yuav tshaj tawm li cas. Yog sau tau lawm mas yeej yuav muaj chaw mus xwb, tab sis txhob muab tso rau neeg tuaj nyeem hauv tej vas sab nov, tsis yog kuv ntshai, tab sis ua dab tsi yuav tsum ua kom muaj qab muaj quag, muaj ko txawb muaj tes tuav. Txhob ua kom sem caij nyoog tsis muaj laj thawj.
Yog kawg, nws hais ntau yam yog li nws hais, kuv tsis paub txog tej nom tswv tes dej num, tab sis kuv yeej pom Hmoob tus cwj pwm noj tsis tau, yuav tsis nyog. Pom luag ya yus tsis paub paus paub ntsis, yus cia li khav. Pom luag nce ntuj, yus tsis paub tias luag ua li cas thiaj nce ntuj, yus cia li ya nrog luag yuj, luag muaj chaw tsaws yus lam tau lam txais cua yus tsis muaj chaw tsaws ces yus nyob qhov muag hlaws hlaws, los tseem muaj cuab kav khav thiab.
Ib yam li kuv pom Peb Hmoob thaum ub tsuas muaj Nais phoo Vaj pov tib leeg thiaj tau Général xwb ua ntej peb tawg teb chaws lawm. Tom qab twb tawg teb chaws tag lawm los nim tsa Nais Phoo coob tsis coob li tom qab, twb tsis paub tias nej twb tawg teb chaws lawm, nej txawm yuav muab nej tsa 1000 ib puas leej Nais Phoo los yeej tsis muaj nqes, tsis yog tiag. Tej yam zoo li no mas zoo li yuav tsum xav tswv yim me ntsis mam ua, vim zoo ua los tsis zoo saib, zoo hais los tsis zoo mloog.
Dua li, zoo li Colnel Suav Yaj cov lus cem Yawg Hlob Vaj Pov, tsis tsim nyog nws yuav cem li ntawd. Txawm hais tias yog nws hais kom Col.Tub Pos sau ntawv mus rau Xab Hab pab Xas xaj nram Bangkok es Hmoob thiaj tau tawm mus lwm teb chaws los twb yog nws nyob hauv Yawg Hlob tus nruab ntxoo es nws sau ntawv luag thiaj nyeem, thiaj saib. Thiab qhov tseem ceeb tshaj, thaum Yawg Hlob yuav sawv kev tuaj mus rau lub teb chaws thib peb, nws yeej hais kiag ntawm peb sawv daws xub ntiag, nyob tom tshav Npas Nab Phoos, nws quaj kiag, nws hais rau Col.Tub Pos tias : "Kuv yuav mus, kuv tso tag nrho kuv hais Hmoob rau koj, koj nrhiav kev coj kom tau lawv tawm hauv lub teb chaws no mus nawb mog. " Tej yam zoo li no, tom qab no tseem khav tias yog tus ub tu no yog tus coj Hmoob tawm, coj Hmoob mus tau zoo....Kuv hais ncaj qha, tag nrho Nplog Hmoob, Kwv Txhoob Lub Hej, Mab Daum, Puab Yib, Co puav leej yog nyob hauv GN.Vaj Pov tus duab ntxoo thiaj tau tuaj taw qhuav tuaj rau lub teb chaw muaj ziv mus thiab mis nyuj ntws lug, noj tsis tag haus tsis nqeg. Cov neeg uas nws tsis siab,; nws xav siab, nws tsis muaj peev xwm siab tau, nws muab luag tiag taw kom siab mas nws yuav tsis siab ib zaug. Txawm nws yuav tsuj luag npaum li cas los qhua taum ob cag yeej pom luag siab, tsis pom nws siab...
Peb Hmoob mas yog yuav kho kom zoo yuav nyog mas ntshe yuav muaj ntau yam heev. Kuv pom Hmoob coob leej pheej tias lawv yog tus txawj, tus luag qhuas, tus luag hwm, tus txawj tshaj, ces kuv cia li ruam tshaj qhov ruam lawm thiab...Hahahah...! Vim kuv xav tias cas coob leej kav ua luaj es yuav muaj pes tsawg leej pej xeem huab fwm los rau lawv kav...Hahahah...!
Tij laug, kav liam Hmoob tej niag yam ntxwv ntawd ces yog nws tham no nws tham thua pais xwb, txhob muab lub ntsiab tawm. Tab sis mas tej thaum tham yog yus tsis tham lub ntsiab mas kuj tsis muaj zaj tham thiab tsis muaj qab hau los tham thiab. Li cas los nws sau tseg, cia seb yuav siv li cas thiaj tau.
Tij laug, yeej yog li cov Nais Thaib hais, tus nom tsis mus kawm es cia cov yau mus kawm, es yuav los tswj teb chaws li cas?
Yog koj tsis ntse, koj tau teb chaws los koj yeej tswj tsis tau. Tsis yog ua nom ces yuav zoo li yav thaum ub es luag niaj hnub tuaj tiam nom, ua tshoob, qua tub qua ntxhais los tseem yuav muaj qhov nyiaj tiam nom tib si, yuav kom luag niaj hnub xyuam phaj tsab yeeb tsab cawv tuaj pe yus, yus hais li cas luag yuav tib si, txawm yog tsis yog los tsuav yog nom hais lawm ces yuav tsum yuav. Tej kev ua nom zoo li yog yog LUB SAWM FEM CAIJ TSUJ 1000 XYOO NRAM NTEJ LAWM. Hmoob tseem coj Hmoob txoj kev tswj fwm li thaum Hmoob poob rog Huab tais Txiv Yawg. Hmoob puas paub tias luag pej kum twb hloov li cas los lawm....