Lubpajzoo Lub Tsev Seev Pajhuam

Txoj kev hlub kho siab ua luaj
tsis xav quaj los kua muag los
vim xav txog yav neej thaum ub
lo lus hlub koj tau hais tias
kom khaws cia wb kev sib hlub
tsis txhob pub rau leej twg li
mus ib txhis cia rau nruab siab

Me leej nus koj puas tseem nco
nyob rau hmo wb tham luag ntxhi
saum lub hli muaj koj puag kuv
wb kev hlub twb tsis kho siab
cas hnub tshiab tsis pom koj lawm
kuv thiaj tawm tuaj seev kev hlub
xa puv ntuj seev nrhiav koj xwb

Kev Hlub Kho Siab

Sim neej no txoj me kev hlub
yog ntuj pub wb thiaj sib paub
tsis xav saub los vim nco koj
mov tsis noj vim kho siab heev
kuv thiaj seev kev hlub kho siab
tawm ntuj tshiab seb puas ntsib koj
puas tuaj coj kuv nrog koj mus
me leej nus koj puas tseem nco
nyob rau hmo wb zaum ua ke
kuv lub npe koj seev tsis so
tias kuv no yog tus koj hlub
yuav tsis pub kuv kua muag los
koj yuav nrog kuv nyob mus ib sim no nas...,

Ua cas yuav nco kuv niam ua luaj,
Lub siab quaj lub kua muag poob,
Xav tsis thoob yog vim licas,
Muab xav mas leej niam zoo tshaj,
Pw saum txaj los muaj niam puag,
Muaj suab luag twb vim niam xwb,
Tsis mob hlwb vim muaj niam pab,
Me mos ab yog niam txoj sia,
Hlub tiag tiag yeej tsis cem li,
Hlub hnia ntshis yeej tsis paub dhuav,
Tsis tsw quav tsw zis tsw qaub,
Niam thiaj paub niam me ab zoo,
Lub hauv ncoo yog niam txhais npab,
Niam me ab thiaj pw tsaug zog,
Tsheej tag hmo pw tsim dhuj dheev,
Txiv tsis seev vim twb muaj niam lawm,
Lub hnub tawm niam sawv ua ntej,
Mus nqa dej los ua tshais noj,
Ib pliag zoj twb tag ib xyoos,
Ua neej zoo tsis nco txhawj li,
Ib pliag ntsis lub neej twb laus,
Twb caum tau tej laus lawm,
Cas lub sijhawm yuav nrawm ua luaj li,
Ib pliag ntshis twb yuav tag ib txhis...,

Uacas yuav nco kuv niam ua luaj,
Tsis xav quaj los kua muag nrog,
Lub siab mob vim nco kuv niam,
Vim ntawv tiam wb los ua niamntxhais,
Koj tau hais kom kuv mloog lus,
Coj siab tus rub lub siab dav,
Kom txawj xav thiab hlub txhua leej,
Kom peem tsheej ib leej ntxhais zoo,
Muaj koob moo rau yav tom ntej,
Kuv niam .ee.ee, kuv yeej nco ntsoov,
Yuav tau hloov los kawm lus zoo,
Yuav nug moo kuv niam tsis tseg,
Koj lub npe yuav nrog kuv nyob,
Vim koj yog tus faib txoj sia,
Rau kuv kiag kom kuv ciaj neeg os kuv niad.

Nco Kuv Niam

Kuv niam cas kuv nco koj ua luaj,
Lub ncauj tsis hais los lub siab twb quaj,
Kuv niam cas kuv nco koj heev li os,
Lub ncauj tsis hais los lub kua muag twb nrog,

Kuv niam cas kuv yuav yug los ua ib leej ntxhais,
Hlob los tiav neeg ces yuav tau ncaim koj pais,
Kuv niam cas kuv yuav yug los ua ib leej ntxhais nas,
Hlob los tiav neeg ces yuav tau ncaim koj mus ua nyab,

Kuv niam cas kuv yuav ncaim koj mus nyob kev deb,
Yuav tawm rooj plaws mus ua nyab lawm tseg koj nyob hauv tsev,
Kuv niam cas kuv yuav ncaim koj mus nyob ib sab ntuj,
Yuav tawm rooj plaws mus ua nyab lawm tseg koj lub tsev tsis tuaj tsuj,

Kuv niam cas kuv yuav nco koj ua luaj li tiag os,
Ncaim koj lawm tav li no twb tsis hnov koj ib ntsug xov,
Kuv niam cas kuv yuav nco koj kom tshaj plaws,
Ncaim koj lawm tav li no twb tsis hnov koj ib tsab ntawv,

Kuv niam...e...,

Hnub no kuv rovqab muab koj daim duab los saib,
Ua rau kuv nco nco koj thaum koj hu kuv ua menaib,
Hnub no kuv rovqab muab koj daim duab los xyuas,
Ua rau kuv nco nco koj kuv thiaj poob lub kua muag,

Kuv tseem nco tau thaum koj qhia kuv xaws pajntaub,
Ua rau kuv nco nco koj heev li es koj puas paub,
Kuv tseem nco tau thaum koj qhia kuv ua zaub mov,
Ua rau kuv nco koj heev thaum lub caij kuv sawv ntxov,

Kuv tseem nco tau koj tej lus qhuab qhia kom kuv mloog,
Ib hnub twg tsis muaj koj lawm kuv thiaj tau lub neej zoo,
Kuv tseem nco tau koj tej lus qhuab ntuas kom kuv nquag,
Ib hnub twg tsis muaj koj lawm kuv thiaj tsis los kua muag,

Kuv tseem nco tau thaum koj qhia kom kuv mloog lus,
Ib hnub twg tsis muaj koj lawm thiaj muaj neeg xav hlub,
Kuv tseem nco tau thaum koj qhia kom kuv txawj xav,
Ib hnub twg tsis muaj koj lawm kuv thiaj muaj neeg pab,

Kuv tseem nco tau thaum koj cheem tsis pub kuv pw zos,
Vim koj hlub thiab txhawj txog kuv lub neej cev nkauj mog,
Kuv tseem nco tau thaum koj cheem tsis pub kuv khibdwb,
Vim koj hlub thiab txhawj txog kuv lub neej cev nkauj xwb,

Kuv tseem nco tau thaum koj qhia kuv xaws hnav,
Koj kom kuv kawm txhua yam ua ntej kuv mus ua nyab,
Kuv tseem nco tau thaum koj qhia kom kuv fwm tus laus,
Ua zoo coj tej ncauj lus kom tus thiaj tau ibtug zoo vauv,

Nco Kuv Txiv


Cas yuav nco yus txiv ua luaj,
Tias txhob quaj los kua muag los,
Yam tus pos ntsia tsees lub plawv,
Kua muag txhawv thaum xav txog nws,
Tej siab ntsws mob cuag lwj tag,
Npaum dej nag cov kua muag iab,
Ntsim lub siab thaum xav txog kiag,
Tsis zoo qhia rau leej twg paub,
Thiaj tuaj saub seev ua paj huam,
Hais cuam tshuam nrog huab nrog cua,
Xa lus tshua rau kuv txiv mloog,
Seb puas zoo kuv lub siab npau,
Vim nco dhau thiaj muab los sau,
Muab xa rau huab rau cua tshuab,
Rau ntuj ntsuab saum ceeb tsheej ntuj,
Kom pab nug kuv txiv lub moo,
Lubpajzoo yog nws me ntxhais,
Thov los hais los ua npau suav,
Kom tau tuav tau ntsib ib pliag,
Thov los qhia seb nws nyob licas lawm mog.

Leej Ntxhais Zoo

Leej ntxhais zoo nws yeej mloog lus,
Coj siab tus rub lub siab ntev,
Nyob hauv tsev mloog leej niam hais,
Sawv ua tshais, ua su, ua hmo,
Yeej tsis tos leej niam txib li,
Nyob luag ntxhi tsis pub niam txhawj,
Nws yeej txawj hlub txiv thiab niam,
Yeej tsis tshiam niam txiv ib zaug,
Tsis tau npau ua tshej muag dub,
Niam yeej hlub nws tshaj plaws li,
Yeej tsis ntxhi tsis nyiam taug xaiv,
Niam me maiv niam ua siab loj,
Kev ua noj nws yeej tsis txhawj,
Nws yeej txawj tsis tag yuav qhia,
Li no tiag yog ib leej ntxhais zoo,
Lub koob moo thiaj nrov ncha lug,
Tias ibtug ibleej ntxhais zoo,
Yeej tsis nroo tsis xam khib li,
Ua luag ntxhi hais lus mos nyoos,
Yeej tsis nroo rau leej twg hnov,
Lub suab nrov me lus qab zib,
Nws kuj dib tau Hmoob tej tub,
Lub siab hlub vim nws lus mos,
Thiab kuj yog ib leej ntxhais zoo,
Muaj koob moo tias nws yeej nquag,
Txhua tus qhuas nws ib leeg tshaj,
Luag thiaj tham nws lub koob zoo,
Tias muaj hmoo tau ntsib ib leej ntxhais zoo no tiag…, lawv aw.

Leej Ntxhais Zoo

Leej ntxhais zoo nws yeej txawj xav,
Nws tsis xyav nws lub koob npe,
Tu vaj tse tsis tag luag qhia,
Nws tsis cia nws niam ua noj,
Tej nus hlob nws fwm txhua tus,
Kev hais lus nws kuj xyuam xim,
Tsis lam chim rau tus ub tus no,
Caij ua hmo nws paub ntuj tsaus,
Hlub tej laus tsis cia luag ntxub,
Hmoob tej tub nyiam nws txhua tug,
Tsis xav nrug xav tuaj nyob ze,
Lub koob npe ntawm ib leej ntxhais zoo,
Luag yeej nroo nws lub npe nrov,
Tias tus nov yog ib leej ntxhais zoo no tiag,

Leej Ntxhais Zoo

Leej ntxhais zoo nws mloog niam lus
Tsis lam mus rau ub rau no
Caij ua hmo nws yeej paub lawm
Tsis tas kawm nws yeej paub ua
Tsev muaj qhua nws yeej paub tab
Nws tej nyab nws yeej tsis cav
Ua zoo xav thaum nrog luag tham
Nws yeej kam thaum luag txib nws
Caij mus pw nws tsis tos lig
Tej nus tij nws yeej fwm txhua
Tsis cav luag vim nws yog ntxhais
Nws mloog hais coj lub siab zoo
Nws tsis nroo thaum nws mob lawm
Tsis lam tsawm thaum nws tshaib plab
Li no ntag ib leej ntxhais zoo na

Nyob zoo Lubpajzoo,

Wow...! Nws cov paj huam nov zoo kawg nkaus.
Yog ib cov lus nyiaj lus kub, lus qhuab qhia ras xeev,
Zoo kawg li, li nov thiaj yog txuj ci...
Nws lub tsev nov yuav huaj vam thiab tsim nuj, vim nws muaj zoo txuj.
Yuav yog ib qho chaw tseem ceeb ntawm Peb Haiv Hmoob,
Yuav ua lub hauv paus rau txhua leej tuaj nrhiav Hmoob Txuj.

Zoo siab rau nws lub laj lim nawb mog...Zoo kawg li.

Me vivncaus tus neeg tshajlij
tej lus nplij kuv yuav khaws cia
vim nws qhia kuv ua lub neej
kom peem tsheej li luag lwm tus
nws tej lus kuv yuav nco ntsoov
yog kuv hmoov koj thiaj li qhia
mam cim cia koj tej lus ntuas
lub neej hluas ces twb yuav dhau
lub neej laus twb caum cuag lawm
yuav tau kawm koj tej lus qhuab
kom tsheej cuab tsheej yim nawv mog
vim koj yog kuv me niam laus
koj paub txaus koj thiaj li qhia
yuav khaws cia mus tag ib txhis
yuav tsis chis rau koj mus li
nyog luag ntxhi nrog koj mus mog
kuv yuav nco koj mus tag ib sim os

Lubpajzoo kuv me viv ncaus,

Txhua hnub hauv lub neej dhau mus
Yam tsim nuj peb yuav khaw cia
Qhov tsim txiaj yuav ceev tseg
Ua ntsaum kwv pleb ib hnub ib zaj
Kaum hnub ib phab tib pliag nws muaj txhab
Ces nws huaj vam lawm tiag me viv ncaus...!


Ntsaum kwv pleb tsim muaj tsev
Ntsaum xwv av, nyob ciaj vaj

Ib Leej Niam Zoo



Ib leej niam zoo tsis suav nqe zog
Pw tsaug zog tsis khuvxim dabntub
Tej me tub me ntxhais nws tsis cem
Tsis lam hem kom lawv tu lub siab
Ntxias kom kiab thiab nyob luag ntxhi
Qhia ua si kom muaj kev lom zem
Nws tsis cem tsis ntxub leej twg li
Hais lus luag ntxhi rau txhua leej
Qhia ua neej kom muaj kev kajsiab
Kawm ntawv siab yog leej niam txhawb
Nplooj siab dawb hlub ti nkaus txha
Leej niam ntag yog tus zoo tshaj plaws

Ib leej niam zoo nws yeej nquag tshaj
Nws yeej npaj rau txhua tug li
Tham luag ntxhi tsis cem tsis ntxub
Nws yeej hlub txhua leej txhua tug
Yeej tsis nrug nws tej me nyuam
Tsis lam thuam kom me nyuam quaj
Coj siab ruaj rub lub siab ntev
Nws tsis tshev thaum menyuam quaj
Yuav tsis tuaj ib leej twg tog
Nws tsis nyhos thaum lawv raug mob
Nws nqee hlo rub kiag los puag
Teev kua muag muab so tu kiag
Nyob xub ntiag cia leej niam hlub
Tsis hais tub los yog ntxhais li
Hlub luag ntxhi hnia ntshis tsis dhuav
Yeej tsis suav nws tej nqe zog
Lub fws nrog los vim kev hlub
Tsuav tej tub tej ntxhais tau noj
Zoo siab hlo ces yog qhov zoo lawm

Leej Txiv Zoo

Leej txiv zoo nws tsis tsa hwjchim
Lub tswvyim nws muaj xauv npo
Tej ris tsho nws hnav du lug
Hlub txhua tug tsis hais leejtwg
Zoo phoojywg nws muaj ntau leej
Zoo txiv neej nws muaj fwjchim
Lub lajlim nws tsis pluag li
Ua leej txiv rau lub cuab yig
Hlub kwvtij tus hlob rau tus yau
Yeej tsis npau thaum mag luag cem
Yeej tsis lem thaum mag luag ntxias
Plawv tsis dhia thaum mag luag haub
Nws yeej paub thaum raug luag ntxub
Lub siab hlub nws muaj xauv npo
Lub neej no nws yeej pom txhij
Zoo kwvtij hlub nws kawg siab
Lub ntuj tshiab mov noj tsis tag
Lub ntuj nag muaj tsev zoo nyob
Siab tsis txob vim nws txoj hmoo
Ua neej zoo vim nws lub siab
Zoo tiag tiag yog ib leej txiv
Yuav tsis piv tsis khav rau luag pom
Lub meejmom nws tuav ruaj ruaj
Tsis lam quaj rau leej twg pom
Lus cov nyom nws txheem tag nrho
Lub neej no nws yeej tsis txhawj
Vim li ntawd nws thiaj nto moo
Ua lub neej zoo uas yog ib leej txiv

LEEJ TXIV ZOO

Leej txiv zoo yog neeg to tsib
thaum nws pib yog xyaum tham lus
coj kom tus yeej tsis plhom moj
nws kev coj hais li muaj tseeb
neeg txawm txheev nws los ua coj
thaum muaj noj lawv thiaj hu nws
lub caij twg yog muaj plaub ntug
neeg yeej nug nws leej ua txiv
kom mus chiv thiab pab sab laj
mas hais ncaj leej txiv yeej zoo
nyob ntau xyoo thiaj li raug xaiv
coj los thaiv ib cuab kwv tij
nws tshaj lij thiaj raug xaiv tau
nws thiaj dhau mus ua tus coj
thaum muaj noj nws hu txhua tus
tsis zais lus tham rau txhua leej
nws lub neej qhia kom dawb paug
txhua txhua zaug muaj plaub muaj ntug
tshem du lug tsis pub npog cia
leej txiv qhia kom neeg ua zoo
tus muaj hmoo tau txiv siab loj
tau tus coj ces nyob kaj siab
nco ib txhiab tuag fab lwm tiag ...xwb tiag!!!!

Sau los ntawm, "Ntsuj Plig"

Leej Tub Zoo

Leej tub zoo nws yeej mloog lus,
Coj siab tus hais lus tshaj lij,
Haum kwv tij nkauj muam txhua leej,
Zoo txiv neej nws yeej fwm luag,
Hais lus qhuas tsis cem tsis thuam,
Tej nkauj muam nws hlub txhua tug,
Tsis lam ntxub ib leej tus twg,
Kev phoojywg nws muaj coob heev,
Yeej tsis seev tej lus kho siab,
Lub siab kiab hais lus luag ntxhi,
Yeej tsis chis rau tus hlob tus yau,
Nws yeej paub hauj lwm hauv tsev,
Coj siab ntev los pab ua noj,
Niam tsis txhob txiv los tsis txhawj,
Nws yeej txawj los pab tej muam,
Nws tsis thuam nws hais lus zoo,
Yeej tsis nroo thaum nyob ib leeg,
Nws tus kheej yeej tsis sawv lig,
Lub hnub ci nws paub ntuj kaj,
Sawv los npaj nrhiav hauj lwm ua,
Nws yeej nquag ib txwm thaum yau,
Yeej coj tau haum niam haum txiv,
Yeej tsis khib kawm tau txhua yam,
Yog muab tham ces tham tsis tag,
Vim nws ntag yog ib leej tub zoo…,

Leej Tub Zoo

Leej tub zoo yog neej paub tab
txawj nrhiav nyab los pab niam pog
tsis lam yog cov neeg quav txiaj
nws nqa nyiaj mus ua khib khub
nws paub hlub niam tais yawm txiv
nws txawj siv tus cwj pwm zoo
nyob nto moo rau zej zog hwm
pom nws tshwm luag zoo siab hlo
tias aib no yog neeg paub tab
txawj txhua fab thiab hwm tej laus
nws zoo nraug thiab muaj hwj chim
tsis yooj yim txhob lam mus thab
neeg tsheej pab tsuas nyob tos hawm
thaum nws tawm luag npaj txais tos
caij nws los luag hawm nws zoo
leej tub zoo ces li no tiag.....

Sau los ntawm, "NtsujPlig"