Home
Kas Cees-Chlamydia
Kab Mob Kas Cees-Chlamydia
(Chlamydia trachomatis)
Chlamydia yog dab tsi?
Chlamydia yog ib yam kab mob kas cees uas kis los ntawm kev sib deev. Tus kab mob hu ua
Chlamydia trachomatis. Nws yog ib tug kab mob uas tshaj tawm muaj ntau tshaj lwm cov kab mob
kas cees (STD) hauv lub xeev no.
Leej twg thiaj yuav raug tus kab mob chlamydia?
Cov neeg yuav raug tau tus kab mob chlamydia no mas yog cov neeg muaj kev plees kev yi, tiam sis
cov uas ntxim yuav raug tshaj mas yog cov neeg li nram no:
• Cov hluas uas muaj kev plees kev yi
• Cov neeg uas tau kuaj pom muaj lwm yam kab mob kas cees
• Cov neeg uas tau nrog ib tug neeg tau raug ib tug kab mob kas cees pw ua niam txiv
• Cov neeg uas deev coob leej ntau tus
• Cov neeg uas deev ib tug neeg nws nyuam qhuav paub tshiab
Chlamydia kis tau li cas?
Feem ntau Chlamydia kis ntawm kev sib deev rau tej chaw mos, tiam sis chlamydia kuj kis tau rau
hauv caj pas, qhov quav thiab qhov muag. Cov me nyuam mos kuj kis tau ntawm leej niam thaum lub
caij daws ces yog leej niam muaj tus kab mob no.
Yuav ua li cas thiaj paub hais tias raug tus kab mob chlamydia?
Feem ntau cov neeg raug tus kab mob no yuav tsis muaj tsos mob dab tsi li. Yog tias muaj tsos mob,
mas feem ntau cov poj niam muaj kua paug hauv qhov chaw mos, mob kub lug thaum tso zis thiab
xav tso zis khawv khuav. Rau cov txiv neej los kuj mob kub lug thaum tso zis thiab.
Cov tsos mob yuav tshwm sai npaum li cas?
Yog yuav chiv mob mas feem ntau li 1-2 lis piam tom qab tau nrog tus neeg muaj tus kab mob sib
deev ua niam txiv tas.
Tus kab mob yuav nyob nrog tus neeg hov ntev?
Yog tsis kho mas tus kab mob Chlamydia yuav nyob ntev ntau lub hlis nrog tus neeg; txawm tias yuav
tsis pom chiv mob dab tsi los tib yam nkaus. Lub sij hawm ntawd mas tus kab mob yuav ua kev puas
tsuaj rau tus poj niam lub tsev me nyuam thiab tus kab mob yuav kis tau mus rau cov neeg uas nws
nrog pw ua niam txiv.
Yog raug tus kab mob chlamydia no ib zaug lawm puas yuav raug dua ntxiv?
Raug xwb, yog rov nrog tus neeg muaj tus kab mob no pw ua niam txiv ces yuav rov kis dua.
Yuav kho tus kab mob chlamydia no li cas?
Feem ntau kws kho mob muab cov tshuaj xws li doxycycline los sis ofloxacin uas siv li 7 hnub. Lwm
cov tshuaj kho mob xws li azithromycin mas yuav ua ib zaug noj ces tas li ntawd.
Yuav ua li cas yog tias kuv muaj mob chlamydia thiab ho tsis nrhiav tshuaj kho?
Yog tsis kho tus mob chlamydia no, thiab yog pheej rov kis dua tsis tseg mas kuj yuav ua tau teeb
meem loj rau cov poj niam, xws li, mob plab mog (pelvic inflammatory disease (PID)), ua kom poj
niam muaj tsis taus me nyuam ntxiv lawm (tshob). Tsis tas li, PID tseem ua tau kom txoj hlab nyhuv
me nyuam (hlab zaus qe) caws pliav thiab xeeb me nyuam rau sab nraum tsev me nyuam, thiab yuav
mob plab mog khuj khuav tas mus li. Rau cov txiv neej mas kuj yuav ua rau ob lub noob qes mob
thiab ua rau txoj hlab noob qes txhaws ces yuav ua rau tus txiv neej muaj tsis taus me nyuam (sterility).
Kuv yuav zam li cas thiaj tsis raug tus kab mob no?
Yog tias koj tsis nrog ib tug neeg nyob nrog nws tib leeg pw ua niam txiv nkaus xwb no mas koj yuav
tsum tau siv cov hnab yas looj koj qhov chaw mos txhua zaus koj nrog ib leej neeg twg pw ua ke ua
niam txiv. Ua li no, kuj yuav pab tiv thaiv kom koj tsis txhob raug tus kab mob no thiab lwm yam kab
mob kas cees.
Kuv yuav ua li cas yog tias kuv xav tias kuv ho raug tus kab mob no?
Ib txoj kev soj ntsuam kuaj tus kab mob chlamydia meej thiab sai mas yeej muaj nyob rau tom koj tus
kws kho mob, tom tej chaw kuaj txog kev npaj cuab thiab cov chaw uas soj ntsuam kuaj cov kab mob
kas cees(STD). Yog paub thiab kho thaum ntxov mas yuav zam tau lwm yam teeb meem thiab yuav
tsis kis rau lwm tus. Yog kuaj pom hais tias koj muaj tus kab mob no mas tag nrho cov neeg uas koj
tau deev 3 lub hlis tas los thiab tus neeg koj deev tam sim no yuav tsum tau mus kuaj tus kab mob
chlamydia thiab nrhiav kev kho, txawm tias lawv tsis muaj tsos mob dab tsi tshwm sim tam sim no.
Cov neeg ua hauj lwm hauv tseem fwv feem saib xyuas pej xeem kev noj qab hauv huv hauv koj lub
zos yuav pab hais rau cov neeg koj tau deev paub txog qhov no. Yog cov neeg uas koj tau deev tsis
kho lawv, mas koj yuav rov kis tus kab mob dua yog koj rov nrog lawv pw ua niam txiv.
Yog kuv raug tus mob chlamydia, kuv puas yuav raug tau lwm cov kab mob kas cees thiab?
Koj yeej raug tau rau ntau tus kab mob kas cees ua ke tib lub sij hawm. Cov kab mob kas cees sib
txawv tab sis lawv tsuas muaj tib txog kev sib kis xwb; yog kis raws kev sib dee ua niam txiv tsis hais
(ntawm qhov ncauj, qhov quav, hauv lub paum los ntawm rab qau). Tsis tas li, yog tsis kho tus mob
chlamydia mas kuj yuav ua tau kom kis tau tus kab mob Ej (HIV infection) yooj yim dua thiab. Tseem
ceeb heev uas koj yuav tau teem sij hawm mus ntsib koj tus kws kho mob los yog tej qhov chaw kuaj
mob, tom chaw kuaj kab mob kas cees sai yog tias koj pom tej yam txawv txav thiab chiv mob; los
yog, koj tau nrog ib tug neeg muaj ib tug kab mob kas cees pw lawm.
DEVELOPED BY THE DIVISION OF PUBLIC HEALTH, BUREAU OF COMMUNICABLE DISEASE
COMMUNICABLE DISEASE EPIDEMIOLOGY SECTION
P-42036H (02/06)
