HOM KAB MOB SIAB A (Hepatits A-infectious hepatitis)

WISCONSIN DIVISION OF PUBLIC HEALTH
Department of Health and Family Services

Hom kab mob siab A zoo li cas?
Kab mob siab A, (lub npe thaud hu ua Kab mob siab sib kis) yog ua mob rau daim nplooj siab
uas yog tus kab mob siab A ua mob tuaj. Tus mob no yeej muaj tsis tseg: ib xyoos twg yeej
muaj txog li ib puas leej tib neeg raug tus mob no nyob hauv lub xeev Wisconsin.

Leej twg thiaj li raug tau hom kab mob siab A no?
Tus kab mob no yuav raug rau leej twg kuj tau. Tab sis, feem ntau raug rau cov me nyuam yaus.

Tus kab mob no sib kis li cas?
Tus kab mob siab A yuav nkag ntawm qhov ncauj mus; thaum mus txog hauv lub cev mas nws
yuav huam vam tuaj, ces yuav tso nrog quav tawm los mus. Thaum nyob hauv cov quav mas
tus kab mob no muaj zog heev. Yog tus neeg mob tsis muab xab npum ntxuav tes kom huv,
mas tus kab mob yuav nyob ntawm nws txhais tes. Txij ntawd mus, thaum tus neeg ntawd mus
kov leej twg, los yog ua noj ua haus mas nws yuav kis tus kab mob no rau lwm leej lwm tus.
Qee zaum yog qhov chaw saib dej ciav, tua cov kab mob no tsis tu noob mas kuj yuav muaj tus
kab mob no nyob hauv cov dej; thaum haus cov dej ces yuav kis tau tus kab mob no thiab. Vim
tias tus kab mob no nyob hauv cov quav, ua li mas, cov me nyuam yaus uas muaj tus kab mob
no uas tseem tsis tau txawj mus plob tom chav plob, kuj yog ib txoj hauv kev yuav ri tus kab
mob no. Tus kab mob no yuav kis tsis tau los ntawm kev sib nphav sib chwv sib kha hauv chaw
kawm ntawv los yog chaw ua hauj lwm.

Cov tsos mob ntawm kab mob siab A zoo li cas?
Cov tsos mob ntawm kab mob siab A kuj muaj li no: nkees heev, tsis qab los, kub cev thiab
ntuav. Tej zaum cov zis yuav muaj ib tsos tsaus tsawv, yuav pom daim tawv nqaij thiab lub
ntsiab muag dawb yuav daj. Tus kab mob no yuav tsis ua neeg tuag taus thiab feem ntau ob
peb lub lis piam tom qab cov neeg rov zoo thiab kuj tsis muaj mob nyhav lwm yam dab tsi. Cov
me nyuam mos thiab cov me nyuam yaus mas yog raug tus mob no los kuj yuav mob sib khuav
thiab kuj tsis pom muaj tsos mob tshwm sim thiab kuj yuav tsis pom tawv nqaij daj xws li cov me
nyuam loj thiab cov neeg laus. Cov neeg uas muaj mob lwm yam rau daim siab xws li ho muaj
hom kab mob siab C, mas yog thaum raug tus kab mob siab A no lawv kuj yuav mob nyhav heev.

Cov tsos mob yuav tshwm sai npaum li cas?
Tej zaum cov tsos mob yuav tshwm sim li ob rau xya lis piam tom qab kis tau tus kab mob no,
tiam sis feem ntau tshwm sim li plaub lub lis piam tom qab kis tau tus kab mob no.
Hov ntev li tus neeg raug tus mob no yuav kis tau rau lwm tus?
Lub sij hawm uas nws kis tau yog 2 lub lis piam ua ntej nws muaj cov tsos mob tshwm sim,
thiab ib lub lis piam tom qab nws tej tawv nqaij pib daj.

Yog twb raug tus mob no los dua lawm puas yuav raug ntxiv lawm?
Thaum raug tus mob no ib zaug lawm mas yuav tsis raug ib zaug ntxiv tas yus sim neej lawm
thiab yuav tsis muaj tus kab mob nyob hauv lub cev lawm. txuas ntxiv -

Puas muaj kev kho tus mob no?
Tsis muaj ib hom tshuaj tshwj xeeb los sis cov tshuaj tua kab mob los kho tus mob no yog pom
chiv mob lawm. Feem ntau, ces yog pw kom txaus thiab so kom rov muaj zog tuaj xwb.

Yuav tiv thaiv hom kab mob siab A no li cas?
Tib txog kev uas yuav tiv thaiv kom txhob kis tau hom kab mob siab A no ces yog yuav tsum
ntxuav tes kom huv si tom qab mus plob tas, tom qab hloov me nyuam ntaub tiag quav, thiab ua
ntej yuav ua noj ua haus. Ntxuav tes hu si, tu cev du dais txhua lub sij hawm mas tseem ceeb
heev vim tias yog ib tug tib neeg muaj tus mob no, nws twb muaj peev xwm kis tus kab mob no
rau lwm tus ob lub lis piam ua ntej yuav pom nws chiv mob thiab paub hais tias nws mob. Tsis
tas li ntawd, cov neeg mob yuav tsum tsis txhob ua noj ua haus lub sij hawm uas law yuav kis
tau tus kab mob rau lwm tus.
Rau cov neeg uas tsam ho lam nphav tau tus kab mob no lawm no ces muaj ib koob tshuaj
txhaj hu ua immune globulin los pab cheem kom txhob ua mob. Yuav txhaj koob tshuaj rau lub
caij nyoog 14 hnub thaum tau nphav tau tus kab mob no. Tus neeg raug tus mob no tsev neeg,
cov neeg tom qhov chaw zov me nyuam, los yog tej neeg tau nyob ze nrog nws yuav tsum tau
hu mus rau lawv tus kws kho mob los yog tom qhov chaw saib xyuas pej xeem kev noj qab
haus huv saib lawv puas yuav tsum tau mus txhaj koob tshuaj immune globulin. Cov neeg tom
chaw ua hauj lwm thiab tom tsev kawm ntawv no ces tsis tas yuav txhaj koob tshuaj no los tau.
Muaj koob tshuaj tiv thaiv tus kab mob siab A, tiam sis yuav tsum tau txhaj plaub lub lis piam ua
ntej npaj tsam ho lam kis tau tus kab mob. Vim li no, cov tshuaj no thiaj li siv los txhaj rau cov
neeg uas tej zaum yuav raug tau tus kab mob no, xws li, cov neeg mus tsham tej lub teb chaws
uas muaj tus mob no ntau. Xav paub ntxiv txog kev txhaj tshuaj mus tsham teb chaws no ces
ntaus hauv tshuab hlwb hlau (computer) mus saib hauv CDC lub website:

http:// www.cdc.gov/travel/index.htm).
Lwm pawg neeg uas tsim nyog txhaj koob tshuaj no:
• cov neeg uas muaj mob hauv daim nplooj siab (yam li muaj tus kab mob siab C)
• cov neeg uas muaj mob hauv cov ntshav (blood clotting-factor disorders)
• cov txiv neej uas deev txiv neej
• cov neeg ua hauj lwm los sis nyob hauv cov tsev tu cov neeg loj hlob tsis zoo
• cov neeg uas siv yeeb tshuaj tsis raws kev raws cai (illegal drugs)
• cov neeg uas nyob hauv tej lub zos uas muaj neeg raug hom kab mob siab A coob thiab
ib sij raug ib zaug.
Cov tshuaj no muaj ob koob, txhaj sib nrug li 6-12 lub hlis.
Thawj thawj koob yuav tiv thaiv tus kab mob siab A tau mas yuav yog plaub lub lis piam tom
qab txhaj tas thiab yuav kav li ib xyoos. Koob tom qab yuav tiv thaiv ntau xyoo lawm yav tom
ntej los puas tseem yuav tiv thaiv tas yus sim neej.
DEVELOPED BY THE DIVISION OF PUBLIC HEALTH, BUREAU OF COMMUNICABLE DISEASE
COMMUNICABLE DISEASE EPIDEMIOLOGY SECTION
PPH 42054H (02/06)