Tij laug XiongChang thiab nraug liab toj siab.
Nrog neb tham 2 lo tias kev ua liaj ua teb nyob yav ntuj qub qab mas lub caij nyob los tsuas kuv tseem hluas ces kuv tsis tau ua ntau.Kuv nyuam tau luaj 1 cim teb ntov 1 cim ntoo xwb cog nplej tag rau nruab teb xwb ces peb twb sau nra khiav tuaj lawm.Hos hais txog ua liaj mas kuv tsis tau cog 1 zaug liaj li tab sis kuv kuj tau laij liaj ntsis liaj rau tej laus cog xyoo puav lawm.Yav thaum ub peb ua liaj ua teb peb yeej tsis paub txog tias yuav rau chiv li.
Kuv tuaj nyob USA kuv ua laj kam tom company tau 13 xyoos kuj xav tias cia ho pauv kev nrhiav noj nrhiav haus mus ua lwm yam seb zoo li cas.Xyoo 2003 kuv tau mus yuav Av ua liaj ua teb yug tsiaj yug txuv muag.
Yug Qaib.Kuv ua 4 lub tsev yug qaib yog hom nkuaj qaib dav 40' ntev 400'(40'x400') 1 lub nkuaj qaib mas lub caij ntuj sov luag pub 19,300 tug me nyuam qaib.lub caij ntuj no luag pub 19,600 tug me nyuam qaib.Vim lub caij ntuj sov thiab lub caij ntuj no huab cua sib txawv me ntsis thiaj li pub yug qaib sib txawv me ntsis li ntawd.1 xuv qaib twg yog 2 hlis hauv nkuaj xwb luag tuaj ntes mus muag tag lawm.Muag 1 xuv qaib kuj tau nyiaj txog li ntawm $38,000.00 mus rau $40,000.00.tauj 2 lub hlis.1 xyoos twg yug tau 5 xuv qaib yog tej xyoo yus ho ua tau sai li siab xav kuj tau 6 xuv.
Yug Nyuj.Yog tias yuav maum nyum los yug me nyuam mam tu kom loj hlob zoo muag mam muag mas kuj yuav qeeb heev thiab kuj yuav tsis muaj zaub rau noj lub caij zaub nyuj tuag tag ces yuav tau yuav zaub qhuav los rau nyuj noj lub caij zaub nyuj tuag tag ces zoo li kuj muaj ntau yam hauj lwm rau yus ua.Tab sis lub 3 hlis uas zaub nyuj pib hlav ces yus mus yuav cov me nyuam nyuj mos los tso noj zaub hauv yus teb 1 tug me nyuam nyuj mos Yog $300.00 mus rau $450.00 1 xyoos yus yuav li ntawm 30 tawm tus me nyuam nyuj mos los yug noj zaub txog lub 10 hli uas zaub nyuj pib tuag ces muab muag huv si.Lub caij muag ces nyuj twb loj 1 tug yog $800.00 mus rau $1,200 lawm.
Muab xam tias yus yuav 30 tus nyuj mos yog tas li ntawm $12,000.00
Thaum muag tau li ntawm $30,000 Muab xam tias nyuj los noj zaub nyob hauv yus teb li 8 lub hlis kuj tsis tau ntau tab sis nyuj noj zaub xwb tsis tau siv zog dab tsi tu nyuaj ces kuj yog tau lawm thiab.
Yog tias yus muaj teb zaub nyuj ntau yus yuav nyuj ntau ces kuj tau ntau lawm.
YugNtses..Kuv khawb 3 lub pas dej yug ntses cov pas dej me me 40'x55' xwb 1 lub pas dej luag tuaj tso 3,000 tug hmob ntses pub dawb rau yus xwb tsis yuav nqe dab tsi li.Yus tau yuav qhauv ntses los pub thaum ntses tseem me ntses loj lawm yog yus xav pub los kuj pub hos yus tsis pub los nws nrhiav nws noj lawm xwb.
Cov ntses no tsis yog yug los muag rau leej twg li yog yus xav yug ua si tau noj xwb kuj muaj ntses coob heev kwv tij neej tsa leej twg xav noj ces tuaj nuv tau tsawg tus los noj tsawg tus xwb tsis pub leej twg tuaj yawm los yog xuas vas ntaus li.
Lub caij ntawd kuj yeej xav tias ua nyog neej lawm thiab tiag.tab sis yog vim tej nkuaj tsiag nkuaj txu tsw ntxhiab tsw phem dhau kuv cia li ua mob ces kws kho mob tsis pub kuv yug qaib tsis pub kuv nkag hauv tej nkuaj qaib lawm.xyoo 2008 kuv thiaj li tso tseg los nyob noj nyiaj muaj mob ua tsis tau hauj lwm ces lub neej kev khwv noj khwv haus thiaj li los xaus rau lub caij kuv muaj mob no lawm.
Nraug liab toj siab koj muab kuv txoj kev tu tsiaj tu txuv no los xav yog nyiam no yuav av kom ntau yuav noob nyuj los yug muag no kuj yog 1 yam uas tsis tshua khwv kuj tau txaus noj lawm thiab mog.
Home
