Keeb Kwm Hmoob mus nyob Guyane

**koojziagkabzaug** 11th March 2010, 12:12 pm

koojziagkabzaug: Moderator; Messages : 3529
Date d'inscription : 2010-02-28

Post n°1

Keeb Kwm Hmoob mus nyob Guyane

koojziagkabzaug 11th March 2010, 12:12 pm

KEEB KWM HMOOB MUS NYOB GUYANE

Thaum Hmoob Thoj Nam nyob rau Thaib teb, Txiv Plig Nyiaj Pov paub tias Hmoob yog ib Haiv neeg nquag thiab rau siab khwv rau lub neej. Nws thiaj xav tias teb chaws Guyane, muaj hav zoo ntau, tsis muaj neeg kam mus nyob, nws thiaj los nrog cov Nom Tswv fabkis tham thiab thov kev tso cai rau Hmoob thoj Nam mus nyob rau Guyane. Hmoov kuj zoo heev thiab, thaum ntawd muaj ib tug Président de Conseil Régional yog neeg Tawv Daj thiab Pierre Dupont-Gonin ib tug kws sau ntawv tau siv zog pab kawg thiaj tau Hmoob mus nyob Guyane.

Thaum cov Hmoob nyuam qhuav mus txog Guyane, mas cov tub rog muab pam los ua daj thaiv ua ib txoj kev rau Hmoob mus xwb,tsis pub neeg pom lawv li. Cov pej xeem tid tsis tshua zoo siab txais tos lawv. Cov Hmoob nyob tau 6 xyoo nkaus tom plawv zoov ( zos Hmoob nyob hauv plawv zoov). Cov pej xeem hnov tias Hmoob yog ib cov noj neeg, mas lawv ntshai heev thiab thaum twg lawv yuav tuaj xyuas zos Hmoob mas yuav tsum ua ntawv ntawm Prefecture thiab tub r og kav lawv tuaj xwb...

Thaum lawv tawm mus Cayenne tsuas yog mus yuav tej toob xib tseem ceeb xwb. Lawv mus txog tsis ntev ces lawv pib ua lub qub li tim Nplog teb. Ua nplej, cog qos, cog txiv ntoo, yug qaib yug os, yug npua, yug nyuj, yug twm, plob hav zoo thiab cuab ntses...Uas niaj hnub no lawv tseem cuab thiab plob hav zoo qees...Ua teb nplej ob peb xyoos ces lawv tsis ua lawm. Vim ua nplej khwv heev thiab muag tsis tau nqe ces lawv tig los cog zaub muag...

Thaum xub thawj, TP. Nyiaj pov kuj xaaj ob peb yam kaus tsawb Thaib teb tuaj faib rau Hmoob cog, nws mus nrhiav twm nyob Argentina thiab Australie tuaj rau Hmoob yug, nrig nyuj nyob Brasilia rau Hmoob yug...etc...

Thaum Hmoob mus txog rau Guyane, mus ncig tom khw Cayenne tsis muaj zaub li, muaj qos do, txiv tsawb cub tej dog dig xwb...tsis muaj zaub li...Cov neeg tid lawv noj qos ntau xwb...Yog thoob lub khw Cayenne yuav tau 1kg zaub xam lav xwb, ces lawv muab rau tus laus tshaj noj, yog muab rau yawg Yaj zam Nob. Tej zaub thiab txiv ntoo, qos tej puav leej muab dav hlau thauj pem ob lub pov txwv Guadeloupe thiab Martinique(2 h dav hlau). Lawm coj qos tsw ha tuaj rau Hmoob noj, Hmoob noj ib txhia, muab ib txhias phua cog.

Tsis ntev tom qab no xwb Hmoob pib cog tau txhiam laj txhiam xwm noj, ces ib xyoos tom qab lawv tsa lub tsev Cooperative nqus zaub mus muag. Lawv ua Koom Haum Cooperative, vim muaj ib lub tsheb thauj khoom rau lub zos Cacao tag nrho siv xwb. Tom qab tsis ntev, sau khoom rau Koom Haum mus muag tsis tau siab ces Hmoob thiaj pib coj mus kav kiab Cayenne muag. Tsheb tsis txaus thauj sawv daws thiaj kuj tseem cog tsis tau tau khoom ntau ces lawv muab faib ua ob pab mus, ib pab mus hnub Tuesday, ib pab mus hnub Saturday. Tab sis kuj tsis yog txhua tus mus muag khoom. Ib tug mus ces ob peb tug faj xwb...Vim mus khw ib zaug, tsuas de tau ib los ob pob tawb zaub xwb...

Lawv muag li nov tau ib ntus, ces pib yuav tau tsheb zuj zus, sib pab sib txhawb...Ces tsis ntev tom qab no kiag xwb Taj laj Cayenne muaj zaub nphau nphwv lawm...

* Dab neeg txiv lwm tsib tshwm sim nyob Guyane, muaj ib zaug Txiv Plig Nyiaj Pov mus Thaib teb mus xyuas Hmoob Cacao, ces ob tug Hmoob txawm mus nrog Txiv Plig thiab ib tug nom Fabkis tham, ces Txiv Plig txawm rho tau 4 lub txiv lwm tsib los rau lawv noj, ib leeg ib lub xwb...Ib tug Hmoob noj nws lub txiv tag, nws txawm muab lub noob ntsaws hnab tshos, los txog tsev nws muab cog. Txawm tuaj, muaj hmoo thiab kuj yog tsob niam. Yog tias yog tsob txiv ces yuav tsis txi...Cog tau 3 xyoos ces pib txi, thawj ob peb xyoos mas noj tsawg lub txiv los khaws noob tib si coj mus cog.

Thaum lawv cog txi ntau lawm, lawv coj mus muag tom khw, ib tug poj niam Dub los nug tias yog dab tsi cas tsis tau pom dua, lawv teb tias yog Txiv lwm tsib, cog nyob Guyane. Tus poj niam ntawd cia li tsa tes Hawm Ntuj, thiab dhia ( Dance) tig lees ua Ntuj tsaug, pub cov txiv zoo nkauj npaum ntawd tuaj rau teb chaws Guyane...Zaum no txiv lwm tsib thiab muaj thoob taj laj. Ib xyoos lub caij txiv lwm tsib sia, lawv kuj ua Hmoov Txiv Lwm Tsib, muaj neeg mus coob Fabkis Av Loj mus koom yam nto moo thiab lom zem kawg nkaus.

Dua li ces zaum no nej txhua tus paub txog Hmoob kev huaj vam nyob Nkws Yas lawm...Zaum no lawv muaj txhij muaj txhua, tsheb loj, tsheb me, tsheb caij hauv zos, caij mus teb muaj txhij muaj txhua...Hmoob mus khwv tau noj tau haus ces muaj neeg mus nyob coob coob kawg nkaus lawm. Lawv tsim kho teb chaws Vam meej ib yam nkaus cov nroog loj nyob teb chaws vam meej lawm...

Txiv Plig Neej Vaj mus xyuas Guyane teb rau Hmoob Nyob.

Zos Cacao thaum Hmoob tsis tau mus nyob.

Ministre des DOM TOM

Zos Cacao 1976, Ua ntej Hmoob mus nyob.
Ua ntej cov Hmoob yuav mua nyob Guyane, TP. Neej Vaj thiab TP.
Nyiaj Pov mus xyuas teb chaws Nkws Yas nrog tus Ministre des DOM TOM.

Last edited by koojziagkabzaug on 2nd August 2010, 10:41 am; edited 1 time in total

**koojziagkabzaug** 11th March 2010, 12:29 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°2

Re: Keeb Kwm Hmoob mus nyob Guyane

koojziagkabzaug 11th March 2010, 12:29 pm

Lub teb chaws Guyane thaum ub mas kuj txom nyem me ntsis,tab sis yog vim Peb Haiv Hmoob lub peev xwm, thiaj tsa tau lub teb chaws Guyane sawv tsees los nrog ntiaj teb sib fim ntsej fim muag, nyob nto moo lug rau ntiaj teb cav lub moo zoo.

1

2

Ua thawj cov tsev 1978

3

Ua thawj cov tsev 1978

4

Ua thawj cov tsev 1978
Txiv Suav Nus, tsam no kuv pom ib tug leej twg zaum nyob hauv nov...

5

Ua thawj cov tsev 1978

6

Ua thawj cov tsev 1978

7

NRAU KEV TSHEB CACAO
.[/size]

Last edited by koojziagkabzaug on 22nd March 2010, 3:13 pm; edited 2 times in total

**koojziagkabzaug** 11th March 2010, 12:42 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°3

Re: Keeb Kwm Hmoob mus nyob Guyane

koojziagkabzaug 11th March 2010, 12:42 pm

THAWJ PAB HMOOB MUS NYOB RAU GUYANE

Thawj pab Hmoob uas xub tuaj mus txog Guyane teb lub zos Cacao muaj 11 yim:

1/ Ham Tuam tsev neeg 3 leeg
2/ Lauj Pov tsev neeg 3 leeg
3/ Lauj vam foom tsev neeg 4 leeg
4/ Lauj Vam Ntxawg tsev neeg 3 leeg
5/ Thoj Npuag xab tsev neeg 5 leeg
6/ Thoj Num Yig tsev neeg 4 leeg
7/ Vaj Nyiaj lwm tsev neeg 6 leej
8/ Xyooj Ntsuab Ntxhais tsev neeg 4 leeg
9/ Yaj pov Yeeb tsev neeg 2 leeg
10/ Yaj Ntsuab lwm tsev neeg 4 leeg
11/ Yaj Tswv Nkaub tsev neeg 6 leej

Cov yim neeg hais los saum no,tau sawv kev Yeej thoj nam Vib Nais tauj mus rau Bangkok, Hnub Tim 2 lub 9 hlis 1977 lawv sawv kev ntawm lub nroog Bangkok, Thaib teb tuaj mus rau teb chaws guyane. Lawv tuaj so 1 teev rau New Delhi, India teb, mus so 1 teev rau Téhéran, Iran teb, mam lis tuaj nqes rau ntawm lub tshav dav hlau Orly, Qab Paris , Fabkis teb. Ho caij tsheb loj mus rau pem lub tshav dav hlau Qaum Paris Roissy Charles de gaulle uas yuav hloov dav hlau mus rau Guyane. Caij dav hlau ntxiv ntawm Paris Charles de gaulle mus, so ib teev ntawm lub Pov txwv Martinique thiab 1 teev ntxiv ntawm Gouadeloupe , nyob Qab Cubas, thiaj mam mus txog Cayenne, Guyane teb.

Thaum peb nqes dav hlau ntawm Cayenne yog hnub tim 3 lub 9hlis 1977 thaum 19 teev tawm. Tham ntawd twb tsau ntuj lawm, pom hluav taws xob cig ntsa iab qhov txhia chaw xwb. Lawv cia cov tub r og thiab cov Tub Ceev Xwm tuaj tos txais peb ntawm lub tshav dav hlau. Ces lawv muab cov tsheb thauj tub r og thauj peb ntawm tshav dav hlaus taug txoj kev mus rau sab Régina. Txog kev ncaim Cacao thiab Régina ( 70 km) thiaj mam nqes mus nram qab ke, sab lauj lawv twb tsa tau ob lub tsev tsam phooj tos peb nyob ntawd. Lawv yuav ib cov mov ci loj loj thiab ntau yam khoom noj tos peb tuaj noj hmo. Tab sis sawv daws sab heev thiab lig dhau lawm ces tssi muaj neeg saj li. Tuaj Paris rau Guyane noj 3 pluag mov hauv dav hlau, tab sis pluag 1 sawv daws noj, pluas 2 ib nrab noj, pluas 3 ces muaj ib tug noj lam xwb.

Lawv cia cov Tub r og thiab cov Tub Ceev Xwm tuaj tos peb thiab muab peb thauj mus deb ntawm lub nroog, vim ob peb hnub ua ntej uas peb yuav tuaj, ib cov pej xeem huab hm sawv tawm tsam, qw taus kev hauv lub nroog Cayenne, lawv tsis zoo siab kom cov nom tswv coj cov Hmoob tuaj nyob rau teb chaws Guyane.

Tim 4 lub 9 hlis 1977, sawv daws sawv los, ua cas pom hav zoov hav tsuag xwb. Hnov nas noog quaj zom zaws, txawv txawv tsis paub hais tias yog hom noog dab tsi quaj li ntawd. Hnov lwg poob tsig tsuag tsig tsuag xwb.

Sawv daws noj tshais tag, cov Tub Ceev Xwm tuaj tom nroog tuaj tshawb xyuas sawv daws tej khoom tag. Ces sawv daws mam thiaj rov nce tsheb los txog saum txoj kev loj. Ua cas tsis taug kev loj lawm!!!! Cia li taug ib txoj kev me me fab fab, yog mus rau Cacao lawm tiag!

Yawg Los pav kaw ntoo Nera pob kho txoj kev mus rau Cacao. Yawg thiab nws cov tub zog nyuam qhuav luaj thiab kho mus txog ntawm tam sim no cov kwv tij Hmoob Tsab lub tsev haus dej xwb, ib txhia hu ua Roob Xyuam Yaj ( Belle Vue).
Peb twb mus nyob tau ib lis piam, lawv mam kho kev tuaj txog Cacao.

Peb mus txog Cacao zoo li yog ib lub me nyuam qub zog fab fab. Muaj ib lub tshav dav hlau fab fab ntev li 200 los 300 mev, ib lub tsev kho tsheb las tshav lug, peb 6 yim mus nyob rau hauv. Muaj ib lub tsev nyob khaub khaub hlab thiab fab fab ti nkaus ntawm qhov rooj. Muaj 4 tug Fabkis nyob hauv, xyov yog niam txiv los hluas nkauj hluas nraug tuaj ua si hauv. Muaj ob lub tsev me me nyob ntawm ob sab ntug tshav dav hlau, ib lub cia rau ib tug Txiv Plig uas coj peb mus nyob, ib lub cia rau khoom noj khoom haus yuav fais rau sawv daws.

Peb thawj pab mam ua ob lub tsev vov ntaub rau pab ob uas yuav tuaj lub lis piam tom qab nyob. Peb muaj tag nrho 500 leej, muab faib ua 2 hlis tuaj.

Ua ntej cov Hmoob yuav tuaj nyob lub teb chaws Guyane no, ua noj ua haus ywj siab, ywj zog, kuj yog muaj cov Txiv Plig uas tau nrog dua Hmoob nyob los lawm, xws li TP. Nyiaj Pov, TP. Neej Vaj tau ua tib zoo nthuav txog Hmoob lub neej kev ua noj ua haus rau cov nom los Tseem hwv Fabkis kom lawv to taub zoo. Lawv thiaj hais tias yog li lawv yuav 500 leej tuaj mus ua ntej.

Yog li Tseem Hwv fabkis thiaj cia TP. Neej vaj thiab TP. Brix sawv Tseem Hwv chaw mus saib Hmoob. TP. Neej Vaj tau mus ua ntej rau Guyane tos sawv daws. TP. Brix nyob Paris, tos peb thawj pab tuaj txog Paris, nws mam nrog peb ua ke. Nws yog tus yuav tuaj qhia kev ua noj ua haus rau sawv daws.

TP. Brix

Tim 15 lub 9 hlis pib luaj teb mus. Tuaj txog ib lub teb chaws tshiab tshiab, muaj hmob liab ( tuv nas) tom heev. Sawv daws luaj teb ntov nto ib ntsug tag, nyias mus suav nyias hmob liab tom tej nreeg ntoo ( Hmob liab nyiam tom tej kis ti ti xwb, yam li duav siv, qhov tsos, puab tais etc…). Cov liaj teb sawv daws luaj ib nrab, tsheb tuaj nrau ib nrab, thaum tiav tag mam muab faib rau cov yim neeg raws tsev neeg coob los tsawg.

Sawv daws tuaj nyob tau 20 xyoo muaj tsheb yuav luag txhua yim, txiv neej poj niam txawj tsav tsheb txhua tus tag. Muaj tsev dej, tsev plob nyob kiag hauv tsev tag, rov mus xyuas lub zos Hmoob zoo tshaj nyob Nplog teb: Las52 thiab Av Liab twb piv tsis tau kiag.

11 yim uas xub tuaj Cacao no lawv khiav tag rov rau Fabkis Av Loj lawm, tshua Lauj Vam Ntxawg tib yig xwb thiaj tseem nyob Cacao. Yawg kuj zoo neej lawm ntau, xa tau me tub me nyuam mus kawm ntawv rau Fabkis Av Loj, muaj vaj muaj tsev zoo, muaj tsheb loj tsheb me.

Thawj pab neeg hais los saum no, TP. Brix, Lauj pov thiab niam yaj Ntsuab Lwm lawv 3 leeg no khiav mus nyob rau lub teb chaws uas yuav tsis khiav ib zaug ntxiv li lawm. Puav leej yog Cancer coj lawv mus.

Cov khiav tag tau 20 xyoo no, yog leej twg rov qab mus txoj lub zos Cacao yuav ua li tej laus hais dab neeg tias: “ Xa Nkauj Nog mus nrauj zoo, nyob nyob rov qab mus xyuas no yog Suav nras laij nras iav lawm xwb.

Sawv daws tsis teb tsaws chaw yog luag pab xwb thiaj mus taus. Kuv tsev neeg muaj 6 leej, 4 tug me nyuam, luag pab them nqe dav hlau tuaj Bankok rau Guyane teb raug nyiaj $1.584. ( Thaum ntawd ib hlis nyiaj hli nyob Fabkis Av loj yog 500F xwb, $100=500F)

Tus sau: Vaj Nyiaj Lwm
1998

Thaum Hmoob nyuam mus txog Cacao

Last edited by koojziagkabzaug on 2nd August 2010, 10:49 am; edited 1 time in total

**koojziagkabzaug** 22nd March 2010, 3:15 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°4

Re: Keeb Kwm Hmoob mus nyob Guyane

koojziagkabzaug 22nd March 2010, 3:15 pm

CACAO THAUM HMOOB MUS TXOG

Tus sau: Yaj Zoov Ntxheb.
Kas Kaus 1990-91

Thaum Hmoob nyaum qhuav muv txog lub teb chaws Nkws Yas lub zos Kas Kaus.
Zoov nuj txeeg nraj yij liab cuam quaj qog qees.
Nruab hnub noog quaj ntsuag qees, hmo ntuj qav thiab kab ziam quaj nrho nrooj.
Sawv daws kuj ntaus siab me tias puas yuas nyob taus.
Ob peb hil lub zos do tuaj, teb dav mus. Sawv daws paub noj plawv txoob plawv txhiav thiab noj nqaij nas noog. Hmoob lub siab loj tuaj, muaj siab ua vaj ua tsev, ua liaj ua teb.
Sawv daws sib koom ua qoob tau ib xyoos mam li faib qoob thiab liaj teb rau sawv daws. Thaum ntawd, Hmoob mam rav pib ua lub neej zoo li thaum ub nyob qub teb qub chaw.

Dhau lub caij Tseem Fwv tsis pab Hmoob lawd, Hmoob paub thiab pom tau tias muaj kev lag luam cog lwm yam qoob loo los hloov kev ua qoob loo los zoo li no :
Cog qos tsw ha, txiv tsawb, puv luj, txiv xyoob txiv ntoos the…Hmoob pib khwv tau nyiaj txiag los saib dab muag.
Coob leej xav mus raws li lub neej tshiab, ces pib muas nees zab (tsheb kauj vab), muas tsheb
Loj xa toob xib mus nqres rau kiab khw. Sawv daws yim sib zog khwv yim pom txoj kev muaj nyiaj txiag nrog luag siv, muas tsheb los caij, los siv. Thaum no, Hmoob mam paub tias muaj chaw ua tau lub neej kom sov siab. Sawv daws mam xyaum noj luag qav ua luag num, mam paub zuj zus tias yam twg yog yam qab, qhov txg yog qhov zoo.
Thaum uas Hmoob Nyuam qhuav pib ua lun neej, tej poj niam los txiv neej tsis paub Fuaj Kuj ib lo lus, cov paub tsawg leej. Los rau nyem no, tej poj tub se muaj peev xwm ua taus luam, hais tau luag lus, nrhiav muas toob xib hauv tej kiab khw tsis yuav leej twg pab txhais lus lawm

1

Teb 1977

2

Laij thawj cov teb pub rau Hmoob.

3

4

5

Laij thawj cov teb los faib rau cov yim neeg Hmoob 1977

6

7

1978 Txiv Plig Txhiaj Foom ( Père Daniel Taillez)

8

1978

9

Yaj Zoov Ntxheb thiab...Tab tom ntov ntoo,
yog xuas tshuab txiav ntoo ntov xwb tsis yog xuas taus ntov lawm.

10

Yaj Vam Thais tab tom los teb los.

11

Yaj Txoov Yeeb tab tom mus hlawv teb los.

12

13

14

Liajlwg 3rd July 2010, 10:22 pm

Liajlwg

Liajlwg: Developer; Messages : 186
Date d'inscription : 2010-07-01

Post n°5

Re: Keeb Kwm Hmoob mus nyob Guyane

Liajlwg 3rd July 2010, 10:22 pm

ZOS HMOOB CACAO XYOO 1977

Thawj lub zos Hmoob nyob Cacao, Guyane 1977
Lub tsev 1 ntawm tsob txoob no yog Txiv plig Neej Vaj lub.
Tam sis no lawv kuj ua dua cov tsev tshiab nyob lawm, lawv lub zos kuj muaj txiv hlab txiv ntoo
nyob ncig zos thiab lawv tej tsev kuj zoo tshaj qub lawm.

Yaj Nus, thiab nws thawj lub tsev nyob zos Cacao, teb chaws Guyane Xyoo 1977

Last edited by Liajlwg on 27th July 2010, 6:54 pm; edited 1 time in total

Liajlwg 3rd July 2010, 11:30 pm

Liajlwg

Liajlwg: Developer; Messages : 186
Date d'inscription : 2010-07-01

Post n°6

Re: Keeb Kwm Hmoob mus nyob Guyane

Liajlwg 3rd July 2010, 11:30 pm

HMOOB NYOB CACAO TOM QAB XYOO 2000

KHW HMOOB NYOB ZOS CACAO, GUYANE.

Peb Hmoob yog ib haiv neeg nquag tshaj
txawm peb tsis txawj ntau txawj ntawv li tej mab sua
los peb Hmoob muaj lub laj lim tswv yim zoo ib yam li luag lwm haiv neeg.
Peb Hmoob nyob rau lub teb chaws twg, peb yeej tsis thov luag noj luag haus.

Txawm Hmoob tsis muaj nyiaj puv hnab los Hmoob yeej tsis tshaib plab
txawm Hmoob tsis muaj nyiaj puv tsev los Hmoob yeej tsis ciaj luag qhev.
Txawm Hmoob tsis muaj teb muaj chaw nrog luag nyob los Hmoob yeej tsis ntshaw luag noj
Txawm Hmoob tsis muaj teb muaj chaw nrog luag kav los Hmoob yeej tsis ntshaw luag hnav.
Hmoob yog ib haiv neeg siab dav siab loj, leej twg mus txog Hmoob zos yeej tsis tshaib noj
Hmoob yog ib haiv neeg siab hlub siab dawb, leej twg mus nrog Hmoob nyob yeej tau Hmoob kev thuv kev cawm.

**koojziagkabzaug** 2nd August 2010, 10:54 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°7

Re: Keeb Kwm Hmoob mus nyob Guyane

koojziagkabzaug 2nd August 2010, 10:54 am

Cov Hmoob lub neej khwv tau noj tau haus, yog los qhov twg los. Yog los ntawm tej yam no :
Qos xib qos liab, qos taw dais qos nrhau, dib taub txiv tsawb, tsawb qab zib, tsawb pluas txiv tsawb ntaj, txiv tsawb txho, txiv qaub, txiv mov mes (dibthaib), txiv taub ntoos, txiv puv luj. Zaub qhwv, zaub ntsuab, zaub dawb, zaub ntug hauv paus, zaub nplooj caws (xav lav), qij dos, pum hub, luam laws, taum lag, taum hlab tsho, kua txob, taub hwb taub xwb kuab, tauj dub, qhiav qhaus, lws liab lws ntsuab lws txaij, thc…
Ob lub zos Hmoob Caocao ( lub zos loj , Javouhey lub zos me) cov qoob loo niaj hnub lawv ua thiab xa mus nqes rau lub kiab khw Tuam Ceeb Cayenne thiab Saint Laurent yog cov toob xib li tau hais saum no.
Sawv daws tsoom Hmoob nyob Nkws Yas teb khwv peem tsim tau ob lub zos thiab ua tej qoob loo li uas tau hais los no twb los tau kaum ob xyoo los lawm, xam tias sawv daws tsim tau noob qoob noob tsa txhij lawm, tshuav los tsuas tshuav yam puav xwb!
Xav tias cos Hmoob nyob Nkws Yas teb lub neej kom tau zoo nyob tau zoo noj tsis txhob mus ua liaj ua teb ntshai tseem yuav yog xyoo puav tom ntej.
Vim muaj ob lub zos Hmoob cog cov qoob li hais, mas ua rau cov tub luam muag tshuaj tua kab, muag chiv rau zaub, chiv rau txiv hmab txiv ntoo lawv tau zoo ib txog kev luam muag rau Hmoob kawg.
Lub tsev muag cov noob zaub nws nqus cov noob tuaj tsis txaus Hmoob yuav.
Cov tsev yug qiab, thaum uas lawv muab lawv cov qaib rho tawm muag tas lawv ho yuag muag cov quav qaib, yog kuv xub paub ua ntej mas kuv muas kom txaus kuv tas ces kuv mam zoo siab qhia tus nyob ze kuv. Vim tias cov quav qaib yog ib hom chiv zoo pab zaub kom hlob zoo.
Tos sawv daws ho ua liaj ua teb xwb los vim yog los ntawm lub khw tau kev luam zoo. Cov toob xib puaj yam uas xa mus txog lub khw lawd yeej tsis tshua muaj seem rov mus tsev. Zaum puav seem ib qho ib me ntsis los tsuas yog coj plig qoob plig loo rov ….

Zos Hmoob Kas kaus xyoo 1977-78.

**koojziagkabzaug** 2nd August 2010, 11:13 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°8

Re: Keeb Kwm Hmoob mus nyob Guyane

koojziagkabzaug 2nd August 2010, 11:13 am

Zaum tas no, tau hais tias tos sawv daws ua tub qoob tub loo xwb los yog vim los ntawm lub khw kev muag sawv daws cov toob xib, yeej tsis tshua muaj zeem rov mus tsev. Seem los ib qho ib me ntsis tsuas yog coj plig qoob plig loo rov mus tsev.
Zaum no mas ho yuav tig los hais txog txoj kev txhawb txhim lub cuab lub yig, lub neej kom kav mus ntev niaj ntau xyoo.
Cov coj kev ua noj ua haus rau tas tsoom Hmoob nyob Nkws Yas tau muaj ib lub sim xeeb xav coj sawv daws mu sib txheem ntxiv kom deb zog.
Sawv daws xav tswv yim mas pom tau tias ob lub zos Hmoob yuav nyob txawm hauv cov khw ntawm cov nroog no mus li tsis tau. Vim tias tom ntej mus cov Hmoob yuav coob zuj zuz tuaj, sawv daws yuav ua liaj ua teb ntau ces ntshai co khw hauv cov nroog yuag txais tsis tas ob lub zos cov toob xib.
Li no mas thiaj li yuav npaj kom tau kev xa cov toob xib no kom mus ncua kev deb. Ces tsoom tub qoob tub loo thiaj li yuav tau hauj lwm puv lub sij hawm nyob hauv yus daim teb.
Los txog tav no, cov muaj neeg teg, nrhiav tau tus puav tub zog mas lawv ua tau xwm yeem me ntsis. Hos nyob li cov tsis muaj neeg teg ces lawv kuj tsis muaj caij ua tsis muaj caij muag.
Cov khw, ib lis piam qhib peb hnub. Yus yuav mus muag, yus yuav xub tau npaj yus cov toob xib ib hnub ces tag kis yus thiaj tau muag. Li ntawd thiaj tias tsis muaj cai ua tsis muaj caij muag, yus npaj ib hnub muag ib hnub ces txb yog rau hnub lawv. Tsuas tshuav ib hnub rau yus ua teb nkaus xwb. Li no, mas koj tus ua teb xav ua hauj lwm nyob hauv daim teb tsis tau raws li koj xav.
Yog vim ob peb yam li hais mas sawv daws thiaj pom tau tias txoj kev ua noj haus li hais yuav kav tsis ntev. Thiab nyob li tej tub ki uas lawv tau mus kawm txuj txheej siab rov los ntshai lawv yuav tsis nyiam, cov neeg uas niaj hnub ua teb los ntshai ntev mus lawv nkees txog txoj kev khiav mus los.

Lub sim xeeb npaj yog li no:
- Ua kom tau cov qoob tawm mus ncua kev deb dua nov ntxiv.
- Ua kom cov qoob loo nov zoo siv, zoo noj tam sid.
- Yam zoo ua siav, ua kom siav, yam zoo noj nyoos cia noj nyoos.
- Npaj kom muaj cov tsev tsim cov toob sib nyob ntawm chaw.

Thaum ua tau li hais nov lawm mas pom tau tias nyob hauv lub teb chaws luag tseem yuav tuaj muas ib npaug ntxiv thiab yus tseem yuav tau tau kev xa mus ncua kev deb. Cov hluas los kuj thiaj muaj hauj lwm ua, cov tsis xav ua teb los tau hauj lwm. Cov laus los thiaj yuav tau kev mus ua teb ntxiv, cov ho xav ua teb los thiaj tau kev ua teb dav li yus lub siab xav ua.

Tus nws ho mus muag nyob hauv lub khw los nws thiaj muag tas tsis tshua khoom seem rov. Tus nws ho ua hauj lwm nyob hauv daim teb los nws thiaj tau kev ua puv lub caij mas koj thiaj li yuav ua tau tsam (Bénéfice) tus xam phaj 2/3 ntxiv mas yuav zoo dua. Thiab cov tub ntxhais hluas uas zoo siab ua liaj ua teb los lawv thiaj li yuav muaj lub meej mom phim li lawv txoj kev tau mus kawm txuj ci hauv cov Tuam Tsev Qhia Txuj.

Sab kev tsim ua noj haus xyoo 1991 no, muaj ib cov kev cog kom tau lag luam zoo dua qub ntxiv mus.
Cog puv luj, thiab coj tsawb:
Yam muaj ib lub koom haum lag luam txiv puv luj.
Lub 5hlis 1991 tau muaj ob leeg pib cog txiv puv luj raws li lawv tau sib khom tseg, yam li Yaj Vam Thaiv thiab Niam Lis Txos.
Lub Koom Haum tseem xa ib cov tsawb tuaj rau lub zos Hmoob Kas Kaus cog, yog hom tsawb uas nyob Fab Kis teb luag nyiam noj tshaj.

Lwm yam zaub:
Tseem muaj dual wm lub Koom Haum kev lag luam tuaj nrog Hmoob sib khom ntxiv. Tej yam lawv xav yuav yog:
- Taum hlab tshos.
- Qos xib( qos tsw ha)
- Qos tsw ha.
- - Dib iab, dos.

Hnub tim 15 lub 9hlis 1977.
Cov Hmoob thawj pab muaj 100 leej xub mus txog lub zos Kas Kaus.
Lawv pub mus luaj teb thawj hnub.
Lis Tswv Txos yog tus ntoo lub kaus mom,
tig nraub qaum lub tsho npab luv.
Nws yog tus coj pab Hmoob Kas Kaus lub sij hawm ntawd.
Nws tab tom piav txoj kev luaj teb rau sawv daws.

Ib hom twg lawv yuav txog 1.000kg hauv xya hnub los pua ib lis piam. Luag tsuas yuav txig lub 11 hlis mus txog lub 3hlis xwb. Vim lub caij ntawd yog lub caij los te, los daus xib daus npug
luag cog tsis tau nyob luag teb chaws. Peb sawv daws thiaj tau nrog luag khom li nov mus zuj zus. Yog cov toob xib zoo mas kev lag luam kuj mus zoo thiab. Xav tau tias xyoo puav tom ntej no mus muaj kev lag luam loj ces cov neeg ua liaj ua teb thiaj yuav tau ua teb raws lawv lub siab xav.

Kev yug Cws:

Lub caij no cov cws must sis zoo heev lawm. Vim muaj tus teeb meem ntawm cov khw thiab cov neeg muas noj. Luag tsis noj li tsoom neeg nyob As Xias.
Nyob ntawm sab ntuj nov, luag yug cov cws ntawd kom loj heev ces luag muag kim dua cov tuaj Thaib teb tuaj. Thiab tsoom neeg Tawv Dawb luag noj tsis tau ntxhib, luag noj yav qab xwb tsis noj yav taub hau. Muab hais los ma sib tug tsiaj li nov tau noj 2 feem 3 xwb.
Li nov ntawm kev yug cws thiaj tau muab nres cia. Cia maj mam seb tom ntej puas yuav yug ntxiv.

Ua pas ntses:
Peb tab tom thov lus Kheev tso cai tso yuav muab cov pas cws no hloov los ua pas ntses. Hom ntses peb xav yug yog cov ntses dawb ua lus Nplog hu ua “Pas Nais”, vim yogi b hom ntses noj zaub. Peb yogi b co neeg ua liaj ua teb, peb muaj toob xib ntau hauv peb tej liaj teb, peb de peb tej zaub pub ntses xwb mas thiaj yuav tsis nyuaj.

Tag ib puas tsav yam, xav tau kuj zoo, ua tau kuj zoo.
Yaj li Ntuj Niam Teb Txiv kuj foom Hmoov zoo rau Hmoob.
Luag tej nom tej tswv kuj siab zoo heev thiab.
Tab sis muaj ib qho nyuaj tshaj mas yog Hmoob rov kav Hmoob mas nyuaj tshaj lwm haiv neeg kav.

1

TP. Nyiaj Pov yuav tau yub tsawb thiab yub ntoo tuaj faib rau Hmoob coj mus cog.

2

Hmoob tej teb zoo li nov feem ntau.
Teb nplej los yeej muaj ntsis zoo ib yam li nov.
Nyob Nkws Yas teb zoo nplej heev, cog ib cim yog xav tseg mas hlais tau ob cim.
Thaum hlais thawj phaum tag kiag ces muab cov hauv paus quav nyab tsuj kiag kom lov los vau ntawm hauv paus. Ces rov tuaj dua cov kaus tshiab, kuj txhawv tau nplaj los hlais thiab. Tab sis tsis tshua muaj hnab npaum thawj phaum lawm xwb. Zaum no ces Hmoob mus txog lub teb chaws ua Saub hais tseg tias: Yog lub teb chaws uas tau zoo, ua ib cim noj ob cim lawm tiag lauj.

3

1980,Tshaus niam Yaj Zoov Ntxheb tab tom los teb los

4

1977

5

6

Yaj Zoov Ntxheb yug cws 1980

7

Yaj Zoov Ntxheb cov niam tub, 1977

8

TP. Txhiaj Foom lawv mus cuab tau ntses choo ntau heev.

9

1980, Niam Zoov Ntxheb thiab nws cov me nyuam.

10

Yaj Zoo Ntxheb lub tsev, 1977

11

12

Lis Txhaij 1980

13

14

15

**koojziagkabzaug** 2nd August 2010, 11:15 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°9

Re: Keeb Kwm Hmoob mus nyob Guyane

koojziagkabzaug 2nd August 2010, 11:15 am

Yog yuav tham txog kev cog qoob loo nyob Guyane mas yeej muaj ntau zaj tab sis hnub no kuv tsuas muab ib co txiv ntoo uas nej yeej paub lawm los tham laug lub sij hawm. Cov txiv no kuv xav tias yeej muaj nyob tas qhov txhia chaw.
Cov txiv no muaj nyob tas qhov txhia chaw ua cas kuv ho muab los tham ?
Vim lub teb chaws Guyane yeej tsis muaj neeg yuav muaj peev xwm cog tau cov txiv no kom txi tau noj los yog coj mus muag rau nruab kiab nruab khw li, tab yog ib tug neeg Fab Kis uas nyob Fab Kis teb twb cog dua cov txiv no lawm los nws yeej tsis muaj peev xwm yuav cog kom tau cov txiv no coj mus muag thiab.

Yog tias siv cov txuj uas kawm tawm hauv tsev qhia cog txiv xwb mas tsuas cog tau saib xwb yeej tsis tau muag, li ntawd Hmoob thiaj siv Hmoob lub peev xwm thiab lub zog los ntxiv kev kawm ces thaum kawg Hmoob thiaj tau txais txiaj ntsim. Hmoob lub peev xwm thiab lub zog no mas qhia tsis tau. Yog koj tuaj nyob Guyane lawm mas Hmoob thiaj kam qhia rau koj.

Caw koj saib ob peb daim duab no:

Tsob Hwb Nkias Teeb Yaj

Cov phooj ywg yog nej leej twg muaj sij hawm no thov pab tais Tooj muab kuv cov duab no kho kom loj los me, kuv tsis paub li kuv yeej kho tsis tau kom loj los me. Ua tsaug.
Lwm lub lis piam kuv yuav tham txog "txiv lwm tsib"

Y.Suav Nus

Last edited by koojziagkabzaug on 2nd August 2010, 11:19 am; edited 2 times in total

**koojziagkabzaug** 2nd August 2010, 11:16 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°10

Re: Keeb Kwm Hmoob mus nyob Guyane

koojziagkabzaug 2nd August 2010, 11:16 am

Ntxiv no mus kuv piav me ntsis: cov txiv no thaum Hmoob tuaj txog Guyane mas yeej tsis muaj li. Cov txiv no yog Hmoob nqa kiag tus yub puag tim thaib teb tuaj, tus nqa tsob yub no yog Yaj Txooj Txhim; peb cov ua ntej tuaj mas peb pom tias tshuav ntau yam teb chaws Guyane muaj tsis txhua ces thiaj li tau hais kom cov lawv qab nrhiav nqa tuaj (txoj cai mas luag tsis pub nqa tab sis Hmoob ua cov tsis paub cai cia li nyiag nqa, hmoov zoo Hmoob cov nra mas luag tsis tshawb vim luag paub tias Hmoob tsiv teb tsaws chaw). Tau 5 xyoos tom qab tsob txiv thiaj txi, zaum no tau noob lawm vam tias yuav tau faib rau sawv daws cog, muab cov noob rau sawv daws cog yam zoo siab hlo thiab tu zoo kawg... 5 xyoos tom qab ntxiv ces cov txiv txi... Txawv tiag tiag vim cov txiv tsis yog hom txiv ntawm tus yub qa tim thaib los lawm, txia ua ntau yam...Xam thaum los thaib teb los twb yog 10 xyoo lawm. Zaum no yuav tau nrhiav lwm lub tswv yim, yam li txuas ceg thiab qhwv ceg... Txuas ceg mas 5 xyoos thiaj txi, qhwv ceg 3 xyoos xwb txi lawm. Txawm tau zoo li no lawm los tseem tshuav teeb meem yam li: txi tsis zoo (txi tsis ncw) muaj ntau yam kab mob ua rau kom tsob txiv ruam los yog tuag, tsis tag li ntawd xwb tsob txiv nyob tsis muaj pes tsawg xyoo ces twb tuag lawm, tsis tsim nyog qhov tu tu tau ntau xyoo. Hais txog cov txiv no mas tswv yim yuav luag kawg.... Hmoob txhob txwm mus thaib teb kom tau mus kawm thaib kev cov txiv ntoo. Zaum no Hmoob kawm tau thaib cov txuj, Fab Kis cov txuj thiab Hmoob cov tswv yim saib hnub xam nyoog nrog rau lub peev xwm, txoj kev nquag... Txog qhov kawg mas thiaj tau raws li lub siab xav (raws li nej pom cov duab saum toj no). Li ntawd thiab hais tias yog koj tuaj nyob Guyane mas Hmoob thiaj kam qhia koj cog cov txiv no rau qhov Hmoob kam siv 20 xyoo los tshawb nrhiav thiaj tau zaj tswv yim cog cov txiv no.

Nybo Guyane mas tsuas yog Hmoob xwb thiaj cog tau cov txiv no.

Hnub no kuv tsuas piav ua tab ua tauv li no xwb yog koj tus nyeem kuv zaj no tsis to taub qhov twg mas koj nug kuv kuj tau. Sis Ntsib dua lwm zaus.

Y.Suav Nus

**koojziagkabzaug** 2nd August 2010, 11:19 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°11

Re: Keeb Kwm Hmoob mus nyob Guyane

koojziagkabzaug 2nd August 2010, 11:19 am

TXIV KAB NTXWV NYOB CACAO, GUYANE, FRANCE.

Cov txiv kab ntxwv no mas xam thaum ua tus yub
mus txog thau txi yuav siv sij hawm 5 xyoos.
Thaum pib txi mus txog rau thaum tuag yog 10 xyoo.
Thaum pib ua yub mus txog rau thaum tuag mas yog 15 xyoos.
Nyob hauv 1 xyoos mas cov txiv no txi 2 phaum yam li:
lub 2 hlis thiab 3 hlis siav ib phaum thiab lub 9 hli thiab 10 hli siav ib phaum.
Lub teb chaws Guyane txhib qoob loo zoo kawg.
Cov txiv no yog tias ua twb zoo tu kom zoo mas yuav qab zib heev,
tus neeg uas tuaj yuav mas yog nws tau saj lawm ces nws tsis nco khuv xim nyiaj
thiab hla tsis dhau li, nws yuav tsum yuav xwb xwb ntag !

Yaj Suav Nus

**koojziagkabzaug** 2nd August 2010, 11:22 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°12

Re: Keeb Kwm Hmoob mus nyob Guyane

koojziagkabzaug 2nd August 2010, 11:22 am

Nyob zoo cov phooj ywg,
Hnub no kuv tham txog txiv lwm tsib (Ramboutan), vam tias tej lub caij nej tsis muaj dab tsi ua nej yuav nyeem kuv zaj no kom lub hnub txhob ntev ntev, yog tias qhov twg kuv ho tham tau tsis haum siab los kuv xub thov nej zam lub txim nawb ! Kuv tham tas nej leej twg xav muab ua dab neeg hais los tau.

Yaj Tsheej uas yog Hmoob thoj nam nyob lub yeej thoj nam Soptuang Thaib teb, tuaj rau teb chaws Guyane lub zos Cacao xyoo 1977.

Xyoo 1982 yaj Tsheej nqa ib co txiv lwm tsib mus pub rau txiv plig Neej Vaj saj nws hais rau txiv plig Neej Vaj tias:

"txiv plig koj saj saib puas qab."

- Tam sis ntawd txiv plig saj thiab hais tias qab kawg koj muab cov txiv no qhov twg los ?
- puas yog koj nqa noob tim thaib tuaj cog ?
- Yaj Tsheej thiaj teb tias tsis yog li koj xav, cia kuv mam piav rau koj mloog:
"3 xyoos dhau los kuv tau tuaj kom koj pab kuv ua ntawv thaum ntawd yog tav su, kuv tuaj txog mas nej tam tom noj su tas thiab nej tseem mus tham dua lwm chav lawm kuv pom lub rooj nej noj mov tsis tau ntsaig ces muaj ib co plhaub txiv lwm tsib thiab ib co noob uas nej noj tas nej muaj tso rau saum rooj. Thaum ntawd tsis muab neeg nyob hauv chav noj mov li kuv thiaj nyiag tau 5 lub noob ntsaws rau hauv hnab ris, kuv thiaj coj 5 lub noob ntawd los ua yub... Muaj 3 lub noob tuaj tau 3 tug yub hos tshuav 2 lub tsis tuaj, kuv muab hlib xyuas no yog lwj lawm. Kuv coj 3 tug yub mus cog rau 3 qho chaw: ib tug coj mus cog rau hauv daim teb zaub, ib tug coj mus cog rau thaj teb uas yuav npaj cog txiv ntoo, tshuav ib tug ces kuv muab cog rau ntawm tog tsev. Tus yub cog rau hauv daim teb zaub ces kuv poj niam tsis paub thaum nws mus luaj nroj nws muab luaj raug thiab tuag lawm, tus yub kuv cog ntawm tog tsev ces kuv xav kom hlob zoo kuv rau me ntsis chiv thiab niaj hnub ywg dej rau ces nws cia li tuag lawm thiab; tshuav tus yub uas coj mus cog rau thaj teb yuav npaj cog txiv ntoo...kuv mus xov vaj ncig kom poj niam me nyuam txhoj txhob raug thiab kuv mus dob cov nroj tuaj ncig lub hauv paus; kuv tsis siv chiv thiab tshuaj tua nroj tsis ywg dej li vim kuv ntshai tsam kuv tsob txiv tuag... Kuv tu li ntawd los tau 3 xyoo mas xyoo no txi tau cov txiv no yog thawj phaum... Zaum no siav lawm kuv thiaj nqa ob peb lub tuaj rau koj saj..."

Thaum Yaj Tsheej piav tag...Txiv Plig Neej Vaj tsiag ntev loo... thiab mam teb tias kuv nco tau lawm...Yog ib tug tsav dav hlau (pilote) nws mus thaib teb los thiab nws nqa tau ib co txiv lwm tsib...Nws tau xyuas kuv ces nws nqa tuaj rau peb noj, thaum ntawd nws hais tias yog nqa tim thaib los...Zoo kawg ! Nej yuav muaj txiv lwm tsib nyob Cacao vim yog muaj koj thiab nej cov Hmoob yog leej twg xav cog mas koj yuav faib rau kom sawv daws muaj.

Txij no mus Hmoob paub tias teb chaws Guyane cog tau txiv lwm tsib ces sawv daws xav cog, tab sis tsob txiv lwm tsib no tsis tau loj thiab yog txi thawj phaum xwb ces txi tsis ncw pes tsawg... faib tsis txhua rau cov uas xav cog. Li ntawd cov Hmoob uas muaj neeg txheeb nyob rau Fab Kis av loj thiaj li hais rau cov txheeb yog muaj neeg dhau kom pab yuav faj rau lawv nqa tuaj, tej tus kuj yog tuaj mus xyuas tej neeg txheeb rau Fab Kis av loj thaum rov los ces txhob txwm mus nrhiav yuav nqa los ua noob.

Keeb kwm tsiv lwm tsib ces yog li kuv tau tham los saum toj no, kuv tsis tau muab kho ua ib zaj dab neeg, vam tias yav pem suab yuav muaj tus muab sau ua dab neeg.

Yaj Nkias Teeb

Tsob txiv loj nyob hauv av ncav tsis cuag lawm yuav tau nce mus txiav
rab txiab no txiav tau cov ceg luaj ntiv tes

Muab lub tsheb qub mus thauj tom teb coj los theej rau lus tshiab thauj mus rau hauv nroog

Hmoob lub rooj muag txiv lwm tsib

Nyob Guyane muaj 2 lub zos Hmoob loj dua cov yam li Cacao thiab Javouhey, cov txiv lwm tsib nyob Cacao qab dua cov nyob Javouhey. Ntshai koj xav nug tias yog vim li cas cov txiv lwm tsib nyob Cacao ho qab dua cov nyob Javouhey ?
Lo lus teb: nyob Cacao teb chaws ua toj roob, thiab tseem yog teb chaws toj siab me ntsis, huab cua txias dua Javouhey, av daj, av liab, toj roob av yog av quav tshis.
Nyob Javouhey teb tiag, teb chaws chaw qis huab cua sov cov teb tiag feem ntau yog av xuav ntau (yam li av suab puam) tej toj roob kuj yog av daj thiab.

Txiv lwm tsib taum cog mus txog thaum tuag yuav yog pes tsawg xyoo ne ?
Los lus teb: Raws li Hmoob tau mus nrhiav paub nyob rau thaib teb yog txawj tu mas yuav nyob mus txog 90 xyoo (koj yog tus cog yuav kav tam ib sim neej).
Nyob Cacao mas txhua txhua xyoo Hmoob muab ib hnub hauv lub caij txiv lwm tsib siav los ua lub HMOOV txiv lwm tsib (fête du Ramboutan).
Kuv twb thaij tau ib co dua thaum ua hmoov txiv lwm tsib, cov phooj ywg ! yog nej muaj tus xav kom kuv tham thiab tso daim puav duab rau nej saib no 2 hnub tom ntej no ntxiv kuv mam tuaj tham rau nej mloog.
Hnub no kuv nrog nej tham li no xwb peb mam sis ntsib dua lwm hnub.

Y.Suav Nus

**koojziagkabzaug** 2nd August 2010, 11:24 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°13

Re: Keeb Kwm Hmoob mus nyob Guyane

koojziagkabzaug 2nd August 2010, 11:24 am

Nyob zoo cov phooj ywg sawv daws,
Hnub no kuv rov tuaj nrog nej tham txog lub hmoov txiv lwm tsib (Fête du Rambutan), caw nej saib cov duab nram no:

Daim phiaj no qhia tias: de txiv lwm tsib hauv thawj daim teb cog txiv lwm tsib nyob guyane
1 daim teb 10 ha. hos lwm diam yog 15 ha.deb 1 km. mus 5 fiab (caij tsheb);
1 tus neeg 1 lub hnab loj (lub hnab ntim tau 10 kg.) tus nqe yog 7 euros
(cov me nyuam yaus tsis tau muaj 13 xyoos 1 leeg ib lub hnab pub dawb)

Lub tsheb no tab tom thauj ib co neeg yuav mus de txiv lwm tsib tom teb.

Tham me ntsis kev thauj neeg mus de txiv, (thov txim kuv tsis sau tus tswv lub npe) tus tswv no siv 4 lub tsheb thauj neeg mus thiab los. thaum thauj cov neeg mus txog tom teb ces muab lawv tso yos hauv teb ywj siab hos tus tsav tsheb rov los thauj dua lwm pab, cov neeg mus de txiv ntawd mas tus tswv yeej tso cai rau lawv noj txiv ywj siab, tsis tag li ntawd tus tswv kuj muaj ib pab neeg nyob hauv daim teb pab saib xyuas tsam ho muaj tej tus txhoj mus nce txiv thiab tsis muaj hmoo ho poob, los puas ntog. Leej twg xav mus nyob ntev li cas hauv daim teb los tau, cov uas ho xav rov los ces thaum lub tsheb thauj ib co tuaj txog thiab lub tsheb yuav rov qab los thauj dua lwm pab ces lawv cia li nrog lub tsheb ntawd rov los.

Kuv nug rau cov tswv muag khoom ib tug zuj zuj tias: nej cov khoom yeej muaj npau li no xwb los ?
Lawv txhua tus puav leej teb li no: cov khoom no tsuas yog muab me ntsis los cuab kom luag pom xwb...

Hmoob muag paj ntaub thiab khaub ncaws ntau kawg, kus lam thaij li no kom nej paub.

Cov qhua ntoj ncig

Lubb Hmoov txiv lwm tsib no cov qhua ntoj ncig muaj kwv yees li 2 000 leej, lawv cov tsheb nres puv tas tej chaw nres tsheb hauv zos Cacao thiab tseem nres puv ob sab kev hauv zos txhua txhua nrho.
Tag nrho cov zej zog hauv lub teb chaws Guyane mas lub zos Cacao yog lub zos muaj qhua ntoj ncig ntau tshaj.
Cov phooj ywg hnub no kuv nrog nej tham li no xwb, nej leej twg muaj lus xav nug los txhob ua siab deb kav tsij nug ntag !
Sib ntsib dua lwm zaus.

Y.Suav Nus

**koojziagkabzaug** 2nd August 2010, 11:44 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°14

Re: Keeb Kwm Hmoob mus nyob Guyane

koojziagkabzaug 2nd August 2010, 11:44 am

Lub neej zoo yog Hmoob nyob rau Nkws Yas
Lub neej hom khaj yog nyob zos Kas Kaus
Lub neej hauv paus yog Hmoob lub keeb
Lub neej thaj yeeb yog Hmoob kev nquag
Lub neej xws luag yog Hmoob txoj kev khwv
Lub neej luag hwm yog Hmoob keb tsab xeeb
Lub neej nyab xeeb yog Hmoob kev koom tes
Lub neej nto npe yog Hmoob lub siab nkiag
Lub neej rau nyiam yog Hmoob tus cwj pwm zoo
Ua neej huam koob ces yog Peb Hmoob mus txoos rau teb chaws Nkws Yas.

**koojziagkabzaug** 2nd August 2010, 11:46 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°15

Re: Keeb Kwm Hmoob mus nyob Guyane

koojziagkabzaug 2nd August 2010, 11:46 am

Tus txiv neej no lub npe hu ua Lauj Zoov Tsheej (Cacao)
Kuv nug nws tias:
koj cov txiv no npe hu li cas ? Cas tsis cia kom laus tso mas de ? Koj cov txiv no muaj npaum li no xwb los tseem tshuav thiab ?
Nws teb kuv li no:
_Cov txiv no Nplog hu ua Maj Phaub npe Hmoob kuv tsis paub, hnov ib txhia hu ua txiv Plaws Ploom vim yus muab nws co mas cov kua nrov "pliv ploov"
_Yog cia kom laus ces cov kua tsis qab lawm; cov kua qab li cas ne ? Tsis paub qhia ces muab ib lub rau koj saj koj mam paub !
Hwm !! muaj qhov qab zib me ntsis nrog rau tus ntxhiab Maj Phaub... qab laj siab kawg, haus tas ib lub xwb twb tsau plab lawm.
(lub me muaj 2 hkob, lub loj muaj 3 khob kua)
_Cov txiv Maj Phaub no muab ob peb lub los cuab xwb tseem tshuav ntau nyob nraum kub nraub qaum no !

Tus niam no yog niam Thoj Xeev Lauj (Cacao)
cov txiv no npe hu ua txiv "Paripous" (tsis muaj npe Hmoo), txi ua tej ntwg ib yam li nyob teb chaws Nplog txiv "kuj yem";
Ib ntwg txiv Paripous mas muaj cov "liab" thiab "ntsuab", cov liab yog txiv "niam" hos cov ntsuab yog txiv "txiv"; cov niam muaj noob cov txiv tsis muaj noob.
Txiv kuj yem mas rhaub dej kub los hlab rau me ntsis ntsev thiab muab ib lub hau khwb cia ib chim xwb ces muag lawm,
hos cov txiv Paripous no mas yuav tau muab hau rau me ntsis ntsev kwv yees li 20 los 30 fiab thiaj siav; nws qab rog nrog rau tus ntxhiab tsw qab ntxiag,
muaj ntsis yuav qab li txiv ntseej (ntshai muab txiv ntseej los piv tsis tau thiab)

Yaj Suav Nus

**koojziagkabzaug** 2nd August 2010, 11:53 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°16

Re: Keeb Kwm Hmoob mus nyob Guyane

koojziagkabzaug 2nd August 2010, 11:53 am

Pom lub neej Hmoob nyob Guyane
rov nco txog lub neej nyob ntuj qub qab
nyob yaj sab ua neej muaj kev kaj siab
nrog me liab cuam nyob ua neej
nyob ywj pheej tsis tshaib tsis nqhis
Hmoob Fab Kis nyob rau Guyane
lub neej mas thiaj li tsim nyog
vim muaj nroj tsuag hav zoov nuj xiab
me cuam liab quaj cau zom zaws
Hmoob siab ntshaw ces yog tej no.

**koojziagkabzaug** 2nd August 2010, 11:59 am

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°17

Re: Keeb Kwm Hmoob mus nyob Guyane

koojziagkabzaug 2nd August 2010, 11:59 am

Paj Huam 60 TP. Neej Vaj nrog Hmoob nyob

HMOOB TSAV NTUJ

Search

Hmoob Catholique Forum

Latest topics

Top posters

Tsev seev PajHuam

Hmong beauty nature

Compteur visitor

Keeb Kwm Hmoob mus nyob Guyane

Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Re: Keeb Kwm Hmoob mus nyob Guyane

Search Query

Display results as : Posts Topics
Advanced Search