Home
TXIS TUB NCIG
Hais rau txiv taw kev, txiv cuab tsav, txiv kav xwm, txiv hauv rog, txiv txiag, txiv qeej, txiv tshwj kab, niam ua mov thiab tshaj thawj, siv thawj… (Tas nrho cov tub ncig uas rub los zaum saum rooj)
1/. Txheeb zeej hawm thawv txog nej tsoom thawj qa tub num, thawj lwm tub ncig, vim yog xyoo no, luag tsev xyom cuab txoj koob tsis sawm tswv, luag thiaj tau ua suav cwj ntag ob tog tws, tsev xyom cuab txoj hmoo tsis sawm vam, luag thiaj tau ua suav cwj ntas ob tog plam, yeeb vim nws laus txais tau zaj mob, zaj mob nrog tsis tso, nws thiaj tau txais txoj kev ploj, cuag li tsev xyom cuab yuav tu lawm ib saw, nchuav lawm ib nkog, tam tau tus toj pob laub pes vog, tus ntooj maj kuab txiv suv yuav qaug lis hlo los niam ib tog. Nws laus txais tau zaj nkeeg, zaj nkeeg nrog tsis nquag, nws thiaj tau txais txoj kev tuag, cuag li tsev xyom cuab tu lawm ib ntshua, ntchuav lawm ib nkuag, tam tau toj pob xaub pes xuav, tus ntooj maj kuab txiv suv yuav laub lis hluav los niam ib tsuag.
2/. Nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw, tsev xyom cuab thiaj tau kev quaj kus kev nyiav, kev txhob kus kev txhawj, tam tau muab ntaub maj rov raus nkaj, muab nkaj ntsuab rov raus npuag, tes xis tes npuaj pwg, laj fab tswv yim ntaus tsis tshwm, tes laug tes npuab hau, laj fab tswv yim ntaus tsis tau.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, tuaj nta nws laus lub ntees dab, ntoj nws laus lub ntees ploj, tsev xyom cuab thiaj tau los txheeb neej nyob lis zeej, sam meej hawm thawj txheej, hawm txog nej tsoom thawj qav tub num, thawj lwm tub ncig, xws li koj thawj lwm txiv taw kev, thawj lwm txiv cuab tsav, thawj lwm pes kav xwm, xab lwm thawj txiv txiag, xab lwm thawj txiv qeej, xab lwm thawj txiv thwv, peg xav thawv niam fam txam,( tshaj thawj siv thawj),
4/. Luag hais tias, nej muaj nej caij qav los rawm num, caij qoob los rawm loo los, yuav vam nej tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog tsev xyom cuab ntoj nws laus dab tu nws laus qhua, nej yuav coj hau tuaj ncheb nkawb, coj taw tuaj ncheb tshauv, yuav vam nej ua lub siab ntuj lis ntev, tuaj nrog tsev xyom cuab, tu lawm nws laus lub ntees tuag mus kom txhua, ntoj nws laus lub ntees ploj mus kom nto, kom nws laus tus ncej xai plaub ntug ntxhee lis law puav tam tam ncej txawb, ntseg lis log puav tam li tus ncej txho no lauj, es tsev xyom cuab thov nej sawvdaws os..
KEV COB HAUJ LW (TXIV TAW KEV)
1/. Cob meej kab hawm thawv txog koj txiv taw kev, vim xyoo no, luag tsev xyom cuab txoj koob tsis sawm tswv, luag thiaj tau ua suav cwj ntag ob tog tws, tsev xyom cuab txoj hmoo tsis sawm vam, luag thiaj tau ua suav cwj ntas ob tog plam, yeeb vim nws laus txais tau zaj mob, zaj mob nrog tsis tso, nws laus thiaj tau txais txoj kev ploj, cuag li tsev xyom cuab yuav tu lawm ib saws nchuav lawm ib nkog, tam tau tus toj pob laub pes vog, tus ntooj maj kuab txiv suv yuav qaug lis hlo los niam ib tog. Nws laus txais tau zaj nkeeg, zaj nkeeg nrog tsis nquag, nws laus thiaj tau txais txoj kev tuag, cuag li tsev xyom cuab yuav tu lawm ib ntshua ntchuav lawm ib nkuag, tam tau toj pob xaub pes xuav, tus ntooj maj kuab txiv suv yuav laub pes hluav los niam ib tsuag.
2/. Nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, los xyab lis nciav tuaj saum cwj, pw lis ko tuaj saum chaw, tsev xyom cuab thiaj tau kev quaj kus kev nyiav, txhob kus kev txhawj, tam tau muab ntaub maj rov raus nkaj, muab nkaj ntsuab rov raus npuag, tes xis tes npuaj pwg, laj fab tswv yim ntaus tsis tshwm, tes xis tes npuab hau, laj fab tswv yim ntaus tsis tau.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv taw kev, luag hais tias, koj yuav muaj koj zoo me suab paj lus taum ntsha, luag thiaj yuav vam khom koj tuaj taw nws laus kab. Koj yuav muaj koj me suab paj lus taum ntxhe, luag thiaj yuav vam khom koj tuaj qhia nws laus kev. Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. koj ncig lis yeev tuaj txog xyom cuab tej qab plaj xab, nws laus lub ntees qhua kus ntees dab, ntees mob kus ntees ntsaj, yuav vam koj tuaj nrog nta, yuav vam koj tuaj taw nws laus kab rov mus muab nws me qub tsho tsuj kus tsho maj rau tej qub vag, xa nws laus nce lis hlo nws poj yawm txwv koob nrag, xa nws laus kom mus dhau toj, xa kom nws mus ncuag tau nws poj, kom nws rov mus nrhiav tau nws npoj. Koj ncig qas yeev tuaj txog xyom cuab tej qab plaj tse, nws laus ntees dab ntees qhua, ntees ploj ntees tuag yuav vam koj tuaj nrog tsev xyom cuab leg, yuav vam koj tuaj taw nws laus kev rov mus muab nws me qub tsho tsuj tsho npuag rau tej qub tse, xa nws laus nce lis hlo nws poj yawm txwv koob teb, xa nws laus kom mus dhau daws, xa kom nws mus ncuag tau nws yawm, kom nws rov mus nrhiav tau nws nkawm.
5/. Yog tias tsev xyom cuab txawj ua neej ces, saum rooj yuav npaj kom tau ib tug zoo kab phaj, ib rawg zoo ntsuag los rau koj chob, yuav npaj kom tau ib kab yeeb los rau koj xob, yuav ua koj tsaug ib los tuaj ntawm lo, yog xyom cuab tsis txawj ua neej ces, ntshai saum rooj yuav npaj tsis tau ib tug zoo kab phaj, ib rawg zoo ntsuag los rau koj chob, yuav npaj tsis tau ib kab yeeb los rau koj xob ces, yuav vam koj lub zog do xwb no lauj..
6/. Tsev xyom cuab yuav vam khom txog koj yawm txiv taw kev, ua lub siab ntuj lis ntev tuaj nrog nto nws laus dab mus kom kaj, tu lawm nws laus qhua mus kom txua, kom nws laus tus ncej xai plaub ntug ntxhee lis law puav tam tam ncej txawb, ntseg lis log puav tam ncej txho, koj lub txiaj ntsha tsev xyom cuab yuav nqa, yuav nco ntsuj ntsoov ua tuj lis taws mus ib faj, yuav tsis cia ua tshauv ua thee yaj nyiaj niag mus xeeb tshaj, koj tus txiaj ntsim tsev xyom cuab yuav ris yuav nco ntsuj ntsoov ua tuj lis taws mus ib sim, yuav tsis cia ua nag tshauv nag tshia ri, tsev xyom cuab tsuas nrog koj txiv taw kev xem ib lub mag xyom qhuav xwb no lauj..
TXIV CUAB TSAV
1/. 2/. Hais ib yam?.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv cuab tsav, luag hais tias, koj yog nws laus ib leeg txheeb kwv mus paub tab, luag yuav vam khom koj tuaj ntoj nws laus dab, thiaj yuav ntoj tau tshab. Koj yog nws laus ib leeg kwv mus txheeb tshua, luag yuav vam khom koj tuaj ntoj nws laus qhua, koj thiaj yuav ntoj tau txhua. Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. Koj ncig lis yeev tuaj txog xyom cuab lub qab plaj xab, nws laus lub ntees qhua kus ntees dab, ntees mob kus ntees ntsaj, yuav vam koj tuaj nrog nta, hnub no lus yuav vam koj tuaj sav, kuam yuav vam koj tuaj khav, koj yuav tuaj nrog niam dab tuag hais lus ncua, nrog niam dab hais lus ncab, yuav vam koj tuaj rau nws laus qav mus thawm xab, Koj ncig lis yeev tuaj txog xyom cuab lub qab plaj txos, nws laus ntees dab ntees qhua, ntees tuag ntees ploj yuav vam koj tuaj nrog ntoj, ncej xai plaub ntug yuav vam koj tuaj kho, kuam los yuav vam koj tuaj khov, koj yuav tuaj nrog niam dab tuag hais lus ncua, nrog niam dab ploj hais lus rov, yuav vam koj tuaj rau nws laus hno mus thawm hmo.
5/. Hais ib yam, 6/. Hloov lub npe saib yog hais tus tub txib twg ?.
KAV XWM
1/. 2/. Hais ib yam?.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv kav xwm, luag tias, koj yog ib leeg txwj laug mus paub txhua, luag thiaj yuav vam khom koj tuaj tsav nws laus lub ntees tuag. Koj yog ib leeg txwj laug mus paub tab, luag thiaj yuav vam khom koj tuaj tsav nws laus lub ntees dab. Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. koj ncig qas yeev tuaj txog xyom cuab lub qab plaj xab, nws laus lub ntees qhua kus ntees dab, ntees mob kus ntees ntsaj ces, yuav vam koj tuaj nrog nta, muaj xai muaj lus los yuav vam koj tuaj sav, muaj plaub muaj ntug los yuav vam koj tuaj tsav, yuav vam koj tuaj ua lub kaus phav, rau tsev xyom cuab tau mus roos tshav, koj yuav tuaj nrog huj xai kus huj lus, huj plaub kus huj ntug, huj xai kus huj pha, huj pib kus huj kha mus kom kaj, kom haum rau nws laus ib tsoom kev neej kus kev tsav. Koj ncig lis yeev tuaj txog tsev xyom cuab lub qab plaj txuas, nws laus ntees dab ntees qhua, ntees ploj ntees tuag yuav vam koj tuaj nrog tuav, muaj xai muaj lus yuav vam koj tuaj nqua, muaj plaub muaj ntug los yuav vam koj tuaj nthua, yuav vam koj tuaj ua lub kaus npuag rau tsev xyom cuab tau mus roos cua, koj yuav tuaj nrog huj pib kus huj zeej, huj xai kus huj pheej, huj xai kus huj lus, huj plaub huj ntug, mus kom txhua, kom haum rau nws laus ib tsoom kev neej kus kev qhua. Yuav vam koj txiv kav xwm, tuaj ntoj nws laus lub moo ploj mus kom nto, luag ib tsoom kev neej kev tsav, luag tau noj los koj yuav tsis tau noj, luag tau so los koj yuav tsis tau so…
5/. Hais ib yam, 6/. Hloov lub npe saib yog hais tus tub txib twg ?.
TXIV QEEJ
1/. 2/. Hais ib yam
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv qeej, luag hais tias, koj yuav muaj koj suab ntiv qeej zoo, luag thiaj yuav vam khom koj tuaj tshuab nws laus 33 zag qeej hauv ncoo. Koj yuav muaj koj zoo suab ntiv qeej nqo, luag thiaj yuav vam khom koj tuaj tshuab nws laus 33 zag qeej hmo.Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. Koj ncig qas yeev tuaj txog xyom cuab lub qab plaj xab, nws laus lub ntees qhua kus ntees dab, ntees mob kus ntees ntsaj ces, yuav vam koj tuaj nrog nta, tuaj qhia lawm nws laus kab rov lawm nws poj yawm txwv koob nrag, koj yuav tuaj ua nws laus tus paj qeeg kus xyw nruas ncej qeeg txiv huab duag ntxhe ntxheev, doog lis daws mus ntoj toj, xa nws laus cev zeej xeeb huab lis xyw mus zwm txhoj, xa nws tus ntsuj plig mam huab xyw mus cuag poj, kom nws mus nrhiav lawm nws npoj. koj ncig lis yeev tuaj txog xyom cuab lub qab plaj tse, nws laus lub ntees dab kus ntees qhua, ntees ploj kus ntees tuag ces yuav vam koj tuaj nrog leg, tuaj qhia lawm nws laus kev rov lawm nws poj yawm txwv koob teb, koj yuav tuaj ua nws laus tus paj qeeg kus xyw nruas ncej qeeg txiv huab duag ntxhe ntxheev, doog lis daws mus ntoj dawm, xa nws laus cev zeej xeeb huab lis xyw mus zwm chaw, xa nws tus ntsuj plig mam huab xyw mus cuag yawm, kom nws mus nrhiav tau lawm nws nkawm.
5/. Hais ib yam, 6/. Hloov lub npe saib yog hais tus tub txib twg ?.
TSWJ KAB LOS, TXIV THWV
1/. 2/.Hais ib yam?.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv thwv, luag hais tias, koj yuav muaj koj lub zoo zog nquag, luag thiaj yuav vam khom koj tuaj ua nws laus tus tshwj kab tuag. Koj yuav muaj koj lub zoo zog nqo, luag thiaj yuav vam khom koj tuaj ua nws laus tus tshwj kab ploj.Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. koj ncig lis yeev tuaj txog xyom cuab lub qab plaj xab, nws laus lub ntees qhua kus ntees dab, ntees mob kus ntees ntsaj, yuav vam koj tuaj nrog nta, nws laus me yias me tsu yuav vam koj tuaj tsav, rooj noj rooj haus los yuav vam koj tuaj kav, kom txaus rau nws laus tsoom kev neej kus kev tsav. koj ncig lis yeev tuaj txog xyom cuab lub qab plaj txuas, nws laus lub ntees dab kus ntees qhua, ntees ploj kus ntees tuag, yuav vam koj tuaj nrog sua, nws laus me yias me tsu, yuav vam koj tuaj ntxuav, rooj noj rooj haus yuav vam koj tuaj tuav, kom txaus rau nws laus tsoom kev neej kus kev qhua
5/. Hais ib yam, 6/. Hloov lub npe saib yog hais tus tub txib twg ?.
NIAM FAM TXAM
1/. 2/.Hais ib yam?.
3/. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav qaim lis nqo, tsev xyom cuab tsis pom qab thov dag mus thov zog, thiaj yuav vam khom, txog koj txiv taw kev, luag hais tias, koj yuav muaj koj lub zoo zog nquag, luag thiaj yuav vam khom koj tuaj nrog tiam nws laus tsoom kev neej kus kev qhua. Koj yuav muaj koj lub zoo zog nchav, luag thiaj yuav vam khom koj tuaj nrog tiam nws laus tsoom kev neej kus kev tsav.Txawm tias, koj yuav muaj koj caij qav los rawm num, caij qoob los rawm loo los, koj yuav tau tso qav tso nuj tseg, tso qoob tso loo cia, tso laj tso kam tseg, tso poj lag tub se cia, tuaj nrog xyom cuab ntoj nws laus dab tu nws laus qhua.
4/. koj ncig lis yeev tuaj txog xyom cuab lub qab plaj xab, nws laus lub ntees qhua kus ntees dab, ntees mob kus ntees ntsaj ces, yuav vam koj tuaj nrog nta, nws laus me twj taig diav los yuav vam koj tuaj tsav, rooj noj rooj haus los yuav vam koj tuaj kav, kom txaus rau nws laus tsoom kev neej kus kev tsav. koj ncig qas yeev tuaj txog xyom cuab tej nrab txuas, nws laus lub ntees dab kus ntees qhua, ntees ploj kus ntees tuag ces, yuav vam koj tuaj nrog sua, nws laus me twj taig diav los yuav vam koj tuaj ntxuav, rooj noj rooj haus los yuav vam koj tuaj tuav, kom txaus rau nws laus tsoom kev neej kus kev qhua.
5/. Hais ib yam, 6/. Hloov lub npe saib yog hais rau tus tub txib twg ?.
SEM TSHWJ (TXIV TAW KEV)
1/. Khwv lawm saum koj yawg txiv taw kev, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw, thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag mus thov zog, luag thiaj yuav vam khom txog koj yawg txiv taw kev, luag hais tias, koj yuav muaj koj zoo me suab paj lus taum ntsha, luag thiaj yuav vam khom koj tuaj taw nws laus kab, rov mus muab nws me qub tsho tsuj kus tsho maj rau nws tej qub vag, koj yuav muaj koj me suab paj lus taum ntxhe, luag thiaj yuav vam khom koj tuaj qhia nws laus kev, rov mus muab nws qub tsho tsuj kus tsho npuag rau tej qub tse.
2/.Txawg tias, koj muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog tsev xyom cuab ntoj nws laus dab tu nws laus qhua, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw, yuav coj taw tuaj cheb tshau, coj hau tuaj cheb nkhawb, tuaj nyiaj tshaib mus zoo nqhis, nyiaj hno mus nkaug ntsim, nyiaj tshaib sawm toom, nyiaj lees mus sawm tsoom, coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, nws laus lub ntees tuag kus ntees ploj, ntxhee lis laws puav tam ncej txawb, ntseg lis hlo puav tam ncej txhos.
3/. Yog tsev xyom cuab txawj ua neej ces, saum rooj yuav npaj kom tau ib tug zoo kab phaj, ib rawg zoo ntxuag los rau koj khaws, kaum rooj yuav npaj kom muaj ib pib zoo dej pas zoo cawv xaws los rau koj tsaws, yuav rub nyog koj rau saum rooj ces yuav tam tau txooj hmab ib zuag ntoo, tab sis tsev xyom cuab tsis txawj ua neej, saum rooj twb npaj tsis tau ib tug zoo kab phaj, ib rawg zoo ntxuag los rau koj khaws, kaum rooj twb npaj tsis tau ib pib zoo dej pas zoo cawv xaws los rau koj tsaws, twb rub tsis nyog koj rau saum rooj ces yuav tam li txooj hmab ib zuag zoo xwb no lauj..
4/. Yog tias hnub qab nram lub ntsis, sawv daws thooj teb koom chaws txoog, nws laus phooj phaij lis lias rov los saib vag saib tse, los daws kauj vab kauj le, nws rov los yuav kauj dab kauj qhua los, tsev xyom cuab tseem yuav vam khom koj tuaj nrog xyuas..
5/. Yog tias hnub qab nram lub ntsis, sawv daws tsis thooj teb koom chaw txoog, nws laus phooj phaij lis lias rov los saib tse kus saib vag, rov los daws kauj le kus kauj vab, tsev xyom cuab tsaws tsis tau koj ib lub phaj los, koj tus txiaj ntsha, tsev xyom cuab yuav nqa, yuav nco ntsuj ntsoov ua tuj lis taws mus ib faj, yuav tsis cia ua tshauv ua thee yaj nyiaj niag mus xeeb tshaj. Yog nws laus phooj phaij lis lias rov los saib vag kus saib tse, rov los daws kauj vab kus kauj le, xyom cuab tsaws tsis tau koj ib lub ntim los, koj tus txiaj ntsim ces, tsev xyom cuab yuav ris nco ntsuj ntsoov ua tuj lis taws mus ib sim, yuav tsis cia ua nag tshauv nag tshia ri, xyom cuab nrog koj txiv taw kev xem lub mag xyom qhuav xwb no lauj..
TXIV CUAB TSAV
1/. Khwv lawm saum koj yawg txiv cuab tsav, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw, thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag thov zog, luag thiaj yuav vam txog koj yawg txiv cuab tsav, luag hais tias, koj yog nws laus ib leeg txheeb kwv mus paub tab, koj thiaj tuaj ntoj nws laus dab mus tshab. Koj yog nws laus ib leeg kwv mus txheeb tshua, koj thiaj tuaj tu nws laus qhua mus txhua.
2/. Koj yuav muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw, tuaj nrog niam dab tuag hais lus ncua, nrog niam dab hais lus ncab, koj yuav tuaj rau nws laus qav mus thawm xab. koj yuav tuaj nrog niam dab tuag hais lus ncua, nrog niam dab ploj hais lus rov, tuaj rau nws laus hno mus thawm hmo. Yuav coj taw tuaj cheb tshau, coj hau tuaj cheb nkhawb, koj yuav tuaj nyiaj tshaib zoo nqhis, nyiaj hno nkaug ntsim, nyiaj tshaib sawm toom, nyiaj lees mus sawm tsoom, koj yuav coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, koj tuaj nrog tsev xyom cuab, tu nws laus lub ntees tuag, ntoj nws lauslub ntees ploj, ntxhee lis laws puav tam ncej txawb, ntseg lis hlo puav tam ncej txhos.
3/. Yog tsev xyom cuab txawj ua neej ces, saum rooj yuav npaj kom tau ib tug zoo kab phaj, ib rawg zoo ntxuag los rau koj khaws, kaum rooj yuav npaj kom muaj ib pib zoo dej pas zoo cawv xaws los rau koj tsaws, yuav rub nyog koj rau saum rooj ces yuav tam tau li txooj hmab ib zuag ntoo, tab sis tsev xyom cuab tsis txawj ua neej, saum rooj twb npaj tsis tau ib tug zoo kab phaj, ib rawg zoo ntxuag rau koj khaws, kaum rooj twb npaj tsis tau pib zoo dej pas zoo cawv xaws rau koj tsaws, twb rub tsis nyog koj rau saum rooj ces yuav tam li txooj hmab ib zuag zoo xwb no lauj.
4/. Yog tias hnub qab nram lub ntsis, sawv daws thooj teb koom chaws txoog, nws laus phooj phaij lis lias rov los saib vag kus saib tse, los daws kauj vab kus kauj le, tshuav me qub nuj qub nqe los tseem yuav vam koj txiv cuab tsav tuaj nrog leg, nws phooj phaij lis lias rov los saib tsev kus saib vag, los daws kauj qhua kus kauj dab, tshuav me qub num qub qa los tseem yuav vam koj txiv cuab tsav tuaj nrog nta.
5/. Yog tias hnub qab nram lub ntsis, sawv daws tsis thooj teb koom chaw txoog, yog nws laus phooj phaij lis lias rov los saib tse kus saib vag, rov los daws kauj le kus kauj vab, xyom cuab tsaws tsis tau koj ib lub phaj los, koj tus txiaj ntsha, tsev xyom cuab yuav nqa, yuav nco ntsuj ntsoov ua tuj lis taws mus ib faj, yuav tsis cia ua tshauv ua thee yaj nyiaj niag mus xeeb tshaj. Yog nws laus phooj phaij lis lias rov los saib vag kus saib tse, rov los daws kauj vab kus kauj le, xyom cuab tsaws tsis tau koj ib lub ntim los, koj tus txiaj ntsim, tsev xyom cuab yuav ris nco ntsuj ntsoov ua tuj lis taws mus ib sim, yuav tsis cia ua nag tshauv nag tshia ri, xyom cuab nrog koj txiv taw kev xem lub mag xyom qhuav xwb no lauj..
TXIV KAV XWM
1/. Khwv lawm saum koj yawg txiv kav xwm, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws yab lis nciav tuaj saum cwj, pw lis ko tuaj saum chaw. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag mus thov zog, luag thiaj yuav vam txog koj yawg txiv kav xwm, luag hais tias, koj yog ib leeg txwj laug mus paub txhua, luag thiaj yuav vam khom koj tuaj tsav nws laus lub ntees tuag. Koj yog ib leeg txwj laug mua paub tab, thiaj yuav vam khom koj tuaj tsav nws laus lub ntees dab.
2/. Koj yuav muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw. Koj yuav tuaj lub kaus phav rau tsev xyom cuab tau roos tshav, koj yuav tuaj nrog huj xai kus huj lus, huj plaub kus huj ntug, huj xai kus huj pha, huj pib kus huj kha, thiaj haum tas rau nws laus ib tsoom kev neej kus kev tsav. koj yuav tuaj ua lub kaus npuag rau tsev xyom cuab tau roos cua, koj yuav tuaj nrog huj pib kus huj zeej, huj xai kus huj pheej, huj xai kus huj lus, huj plaub huj ntug mus txhua, thiaj haum tas rau nws laus ib tsoom kev neej kus kev qhua. Koj yuav coj taw tuaj cheb tshau, coj hau tuaj cheb nkhawb, koj yuav tuaj nyiaj tshaib zoo nqhis, nyiaj hno nkaug ntsim, nyiaj tshaib sawm toom, nyiaj lees mus sawm tsoom, koj yuav coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, koj tuaj nrog tsev xyom cuab, tu nws laus lub ntees tuag, ntoj nws lauslub ntees ploj, ntxhee lis laws puav tam ncej txawb, ntseg lis hlo puav tam ncej txhos.
3/. 4/. 5/. Hais ib yam tsuas hloov lub npe saib yog hais tus tub txib twg ?.
TXIV QEEJ
1/. Khwv lawm saum koj yawg txiv qeej, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag mus thov zog, luag thiaj yuav vam txog koj yawg txiv qeej, luag hais tias, koj yuav muaj koj suab ntiv qeej zoo, luag thiaj vam khom koj tuaj tshuab nws laus 33 zag qeej hauv ncoo. Koj yuav muaj koj suab ntiv qeej nqo, luag thiaj vam khom koj tuaj tshuab nws laus 33 zag qeej hmo.
2/. Koj yuav muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw. Koj yuav tuaj ua nws laus tus pag tus xau, hnub mus thawm hmo, yuav ua tus paj qeeg kus xyw nruas, ncej qeeg txiv huav duag, doog li daws mus nto toj, xa nws laus mus cuag nws poj, koj yuav tuaj ua nws laus tus pag tus xau, hmo mus thawm hnub, yuav ua tus paj qeeg kus xyw nruas ncej qeeg txiv huab duag, doog lis daws mus nto roob, xa tau nws laus mus cuag nws poj yawm txwv koob. Koj yuav coj taw tuaj cheb tshau, coj hau tuaj cheb nkhawb, koj yuav tuaj nyiaj tshaib zoo nqhis, nyiaj hno nkaug ntsim, nyiaj tshaib sawm toom, nyiaj lees mus sawm tsoom, koj yuav coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, koj tuaj nrog tsev xyom cuab, tu nws laus lub ntees tuag, ntoj nws laus luv ntees ploj, ntxhee lis laws puav tam ncej txawb, ntseg lis hlo puav tam ncej txhos.
3/. 4/. 5/. Hais ib yam tsuas hloov lub npe saib yog hais tus tub txib twg ?
TXIV THWV
1/. Khwv lawm saum koj yawg txiv thwv, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag mus thov zog, luag thiaj yuav vam txog koj yawg txiv thwv, luag hais tias, koj yuav muaj koj lub zoo zog nquag, luag thiaj yuav vam khom koj tuaj ua nws laus tus tshwj kab tuag. Koj yuav muaj koj lub zoo zog nqo, luag thiaj yuav vam khom koj tuaj ua nws laus tus tshwj kab ploj.
2/. Koj yuav muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw. koj yuav tuaj ua nws laus tus txiv tshwj kab, nws laus pluas noj pluas haus, tso phluav rau koj tuaj nrog tab, koj yuav tuaj ua nws laus tus txiv txos, nws laus rooj noj rooj haus tso phluav rau koj tuaj nrog ntoj. Koj yuav coj taw tuaj cheb tshau, coj hau tuaj cheb nkhawb, koj yuav tuaj nyiaj tshaib zoo nqhis, nyiaj hno nkaug ntsim, tshaj lub phaj phim lub ntim, tuaj nyiaj tshaib mus sawm khaiv, nyiaj lees mus mus sawm thaij, tshaj lub phaj phim lub tais, koj yuav coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, koj tuaj nrog tsev xyom cuab, tu nws laus lub ntees tuag, ntoj nws laus luv ntees ploj, ntxhee lis laws puav tam ncej txawb, ntseg lis hlo puav tam ncej txhos.
3/. 4/. 5/. Hais ib yam tsuas hloov lub npe saib yog hais tus tub txib twg ?.
NIAM FAM TXAM
1/. Khwv lawm saum koj niam fam txam, yeeb vim yog nws laus ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nciav tuaj saum cwj, pw lis ko tuaj saum chaw. Thaum nws laus ua neej nyob ces, lub ntuj lub teb yuav dav lis fo, nws laus qaij qaug lis yeev los txog hmo no, lub zej lub zos yuav nqaim li nqo, tsev xyom cuab tsis pom qab thov dag mus thov zog, luag thiaj yuav vam txog koj niam fam txam, luag hais tias, koj yuav muaj koj lub zoo zog nquag, luag thiaj yuav vam khom koj tuaj nrog tiam, nws laus kev neej kus kev qhua. Koj yuav muaj koj lub zoo zog nchav, luag thiaj yuav vam khom koj tuaj nrog tiam nws laus kev neej kus kev tsav.
2/. Koj yuav muaj koj caij qav los rawm num, caij qoob los rawm loo los, koj yuav xav neej xav tsav, xav txheeb kus ywm txhua, koj yuav tso qav tso nuj tseg, tso qoob tso loo cia, tso laj tso kam tseg, tso poj lag tub se cia, koj yuav tuaj nrog peb tsev xyom cuab, tsav nws laus lub looj thawj, sawv lawm nws laus lub looj vim, tuaj khiav lawm nws laus lub looj thaij, txam lawm nws laus lub looj txw. Nws laus me teej qa tsav num los yog koj tuaj nrog ntoj, nws laus kev neej kev tsav, qhua tshoob qhua kos thiaj tau noj, nws laus me twj taig los yog koj tuaj nrog ntxuav, nws laus kev neej kev tsav, qhua tshoob qhua kos thiaj tau noj txhwb haus txhua. Koj yuav coj taw tuaj cheb tshau, coj hau tuaj cheb nkhawb, koj yuav tuaj nyiaj tshaib mus sawm toom, nyiaj lees mus sawm tsoom, tshaj lub tais phim lub choo, nyiaj lees mus sawm kum, tshaj lub tais phim lub tsu. koj yuav coj lub dag lub zog, tuaj tam nees mus xeeb yaj, tam nyuj mus txheeb tshaj, tam nees mus sawm hlua, tam nyuj mus sawm tsuag, koj tuaj nrog tsev xyom cuab, ntoj nws laus dab tu nws laus qhua, ntxhee lis laws puav tam ncej txawb, ntseg lis hlo puav tam ncej txhos.
3/. 4/. 5/. Hais ib yam tsuas hloov lub npe saib yog hais tus tub txib twg ?
SEM TSHWJ PLIG, Txiv taw kev
1/. Khwv lawm saum koj txiv taw kev, yeeb vim yog 30 hnub cej yag nram ntej ub, yog luag tsev tub tos, lawv toj pob lawm ib ntwv, tu ib saws, qaij lawm ib nkog, qaug lawm ib leeg, luag thiaj vam khom txog koj txiv taw kev, tuaj taw nws laus kab, rov mus muab nws me qub tsho tsuj kus tsho maj rau tej qub vag, vam khom txog koj tuaj taw nws laus kev, rov mus muab nws me qub tsho tsuj tsho npuag rau tej qub tse.
2/. Txawm tias, koj yuav muaj koj caij qav los rawm num, caij qoob los rawm loo los, koj tseem tso qav tso nuj tseg, tso qoob tso loo cia, tso laj tso kam tseg, tso poj lag tub se tuaj rov tom qab, koj yuav tuaj nrog luag tsev tub tos, nta dab nyob mus thawm xab, tu qhua nyob mus thawm ncua, tuaj nyiaj tshaib mus zoo nqhis, nyiaj hno mus nkaug ntsim, nyiaj tshaib sawm toom, nyiaj lees mus sawm tsoos. Nws laus cej cwj yag qas txha thiaj tau mus pw lis ko yeeb tim nroog, tus ntsuj pag mam huab xyws yuav lawm sis loo, nws cev cwj yag qas txha thiaj tau mus pw lis ko yeeb tim tshoj, nws tus ntsuj pag mam huab xyws yuav lawm lis hlo. Nws laus ces, nyob tsis ua caij, tuag yuav ua nyoog, hnub no, nws phooj phaij lis lias yuav rov los saib vag saib tse, rov los daws kauj vab kus kauj le, luj hawm tom qab no, yog luag tsev dab kus tsev qhua, yog li tsev tub tos thiaj yuav vam khom koj rov tuaj nrog luag saib nrog xyuas.
3/. Nyob li luag tsev tub tos txawj ua neej ces, saum rooj yuav npaj kom tau ib tug zoo kab phaj ib rawg zoo ntxuag los rau koj khaws, kaum rooj yuav npaj kom tau ib pib zoo dej pas zoo cawv xaws los rau koj tsaws, yuav rub nyog koj rau saum rooj ces yuav tam tau txooj hmab ib zuag ntoo, tab sis tsev tub tos tsis txawj ua neej ces, saum rooj twb npaj tsis tau ib tug zoo kab phaj ib rawg zoo ntxuag rau koj khaws, kaum rooj twb npaj tsis tau ib pib zoo dej pas zoo cawv xaws los rau koj tsaws, rub tsis nyog koj rau saum rooj ces ntshai yuav tam li txooj hmab ib zuag zoo xwb no lauj... Koj tus txhiaj ntsha, luag tsev tub foom koob yuav nqa, yuav muab nco ntsoov mus sib faj tsis cia ua tshauv ua thee yaj nyiaj niag mus xeeb tshaj, koj tus txhiaj ntsim, luag tsev tub foom koob yuav ris, yuav muab nco ntsoov mus sib sim tsis cia ua nag tshauv nag tshia ris.
4/. Hnub qab nram lub ntsis, yog koj muaj tus plaj tshoob kev kos los txog koj tej qab plaj xab, yog luag tsev tub foom koob muaj tug paub tab, koj vam tsis txog luag cov txiv tub foom koob los tseg, yog koj vam txog luag, luag yuav tuaj nrog koj nta, yog muag tsis muaj tug thoob tsib mus paub tab, luag tuaj ua tsis tau tus ncej ru los, yuav tuaj ua tus ncej tas, tuaj ntim tsis tau ib pob su los, yuav tuaj nrog koj tshaj lub phaj, yuav tuaj nrog koj cheb tus pluas plav pauj koj tus txiaj ntsha rov tom qab no aus…Es tsev tub foom koob tsuas nrog koj txiv taw kev xem ib lub mag xyom qhuav xwb no lauj...
Txiv cuab tsav
1/. Khwv lawm saum koj txiv cuab tsav, yeeb vim yog 30 hnub cej yag nram ntej ub, yog luag tsev xyom cuab toj pob lawm ib ntwv, yuav tu ib saws, qaij lawm ib nkog, qaug lawm ib leej, yog xyom cuab tsev ploj tsev tuag tsev puas tsev ntsoog, tsis pom qab thov dag, thov zog tuaj nrog nta dab nta qhua, thiaj vam txog koj txiv cuab tsav, koj yog nws laus ib leeg txheeb kwv mus paub tab, koj thiaj tuaj nta nws laus dab mus tshab. Koj yog nws laus ib leeg kwv mus txheeb tshua, koj thiaj tuaj ntoj nws laus qhua mus xhua.
2/. koj muaj koj caij qav los rawm num, caij qoob los rawm loo los, koj tso qav tso nuj tseg, tso qoob tso loo cia, tso laj tso kam tseg, tso poj lag tub se tuaj rov tom qab, koj yuav tuaj nrog tsev xyom cuab nta dab nyob mus thawm xab, tu qhua nyob mus thawm ncua, tuaj nyiaj tshaib mus zoo nqhis, nyiaj hno mu nkaug ntsim, nyiaj tshaib sawm toom, nyiaj lees mus sawm tsoom. Nws laus cej cwj yag qas txha yuav mus pw lis ko yeeb tim nroog, tus ntsuj pag mam huab xyws yuav lawm sis loo, nws laus nyob tsis ua caij tuag yuav ua nyoog, hnub no, nws phooj phaij lis lias rov los saib vag kus saib tse, rov los daws kauj vab kus kauj le, nws laus me qub qa qub num los thiaj vam koj rov nrog tuaj leg, hnub no, nws phooj phaij lis lias rov los saib tse kus saib vag, rov los daws kauj le kus kauj vab, nws laus me qub qa qub num los thiaj vam koj rov nrog tuaj nta.
3/. Nyob li tsev tub tos txawj ua neej ces, saum rooj yuav npaj kom tau ib tug zoo kab phaj ib rawg zoo ntxuag los rau koj khaws, kaum rooj yuav npaj kom tau ib pib zoo dej pas zoo cawv xaws los rau koj tsaws, yuav rub nyog koj rau saum rooj ces yuav tam tau txooj hmab ib zuag ntoo, tab sis tsev tub tos twb tsis txawj ua neej ces, saum rooj twb npaj tsis tau ib tug zoo kab phaj ib rawg zoo ntxuag los rau koj khaws, kaum rooj twb npaj tsis tau ib pib zoo dej pas zoo cawv xaws los rau koj tsaws, rub tsis nyog koj rau saum rooj ces ntshai yuav tam li txooj hmab ib zuag zoo xwb no lauj...
4/. Hnub qab nram lub ntsis, yog koj muaj tus plaj tshoob kev kos los txog koj tej qab plaj xab, yog luag tsev tub foom koob muaj tug paub tab, koj vam tsis txog luag cov txiv tub foom koob los tseg, yog koj vam txog luag, luag yuav tuaj nrog koj nta, yog muag tsis muaj tug thoob tsib mus paub tab, luag tuaj ua tsis tau tus ncej ru los, yuav tuaj ua tus ncej tas, tuaj ntim tsis tau ib pob su los, yuav tuaj nrog koj tshaj lub phaj, yuav tuaj nrog koj cheb tus pluas plav pauj koj tus txiaj ntsha rov tom qab no aus…Es tsev tub foom koob tsuas nrog koj txiv taw kev xem ib lub mag xyom qhuav xwb no lauj...
Txiv kav xwm
1/. Khwv lawm saum koj txiv kav xwm, yeeb vim yog 30 hnub cej yag nram ntej ub, yog luag tsev xyom cuab toj pob lawm ib ntwv, yuav tu ib saws, qaij lawm ib nkog, qaug lawm ib leej, yog xyom cuab tsev ploj tsev tuag tsev puas tsev ntsoog, tsis pom qab thov dag thov zog tuaj nrog nta dab nta qhua, thiaj vam txog koj txiv kav xwm, tuaj ua lub kaus phav, rau tsev xyom cuab tau nroos tsha, koj yuav tuaj huj xai kus huj lus, huj plaub kus huj ntug, huj xai kus huj pha, huj pib kus huj kha mus nrog kaj, thiaj haum rau ib tsoom kev neej kus kev tsav, koj yuav tuaj ua lub kaus npuag, rau tsev xyom cuab tau roos cua, koj yuav tuaj nrog huj pib kus huj zeej, huj xai kus huj pheej, huj xai kus huj lus, huj plaub huj ntug mus nrog txhua, thiaj haum rau ib tsoom kev neej kus kev qhua.
2/. 3/. 4/. Hais ib yam, tab yog hloob lub npe nyob ntawm txwm 4 kom raws li tug neeg ntawd…
Txiv qeej
1/. Khwv lawm saum koj txiv qeej, yeeb vim yog 30 hnub cej yag nram ntej ub, yog luag tsev xyom cuab toj pob lawm ib ntwv, yuav tu ib saws, qaij lawm ib nkog, qaug lawm ib leej, yog xyom cuab tsev ploj tsev tuag tsev puas tsev ntsoog, tsis pom qab thov dag thov zog tuaj nrog nta dab nta qhua, thiaj vam txog koj txiv qeej, luag hais tias, koj yuav muaj koj suab ntiv qeej zoo, luag thiaj yuav vam khom koj tuaj tshuab nws laus 33 zag qeej hauv ncoo. Koj yuav muaj koj zoo suab ntiv qeej nqo, luag thiaj yuav vam khom koj tuaj tshuab nws laus 33 zag qeej hmo.
2/. 3/. 4/. Hais ib yam, tab yog hloob lub npe nyob ntawm txwm 4 kom raws li tug neeg ntawd…
Txiv thwv
1/. Khwv lawm saum koj txiv thwv, yeeb vim yog 30 hnub cej yag nram ntej ub, yog luag tsev xyom cuab toj pob lawm ib ntwv, yuav tu ib saws, qaij lawm ib nkog, qaug lawm ib leej, yog xyom cuab tsev ploj tsev tuag tsev puas tsev ntsoog, tsis pom qab thov dag thov zog tuaj nrog nta dab nta qhua, thiaj vam txog koj txiv thwv, koj yuav muaj koj lub zoo zog nquag, luag thiaj yuav vam khom koj tuaj ua nws laus tus tshwj kab tuag. Koj yuav muaj koj lub zoo zog nqo, luag thiaj yuav vam khom koj tuaj ua nws laus tus tshwj kab ploj.
2/. 3/. 4/. Hais ib yam, tab yog hloob lub npe nyob ntawm txwm 4 kom raws li tug neeg ntawd…
Niam fam txam
1/. Khwv lawm saum koj niam fam txam, yeeb vim yog 30 hnub cej yag nram ntej ub, yog luag tsev xyom cuab toj pob lawm ib ntwv, yuav tu ib saws, qaij lawm ib nkog, qaug lawm ib leej, yog xyom cuab tsev ploj tsev tuag tsev puas tsev ntsoog, tsis pom qab thov dag thov zog tuaj nrog nta dab nta qhua, thiaj vam txog koj niam fam txam,
Luag hais tias, koj yuav muaj koj lub zoo zog loj kus zog nquag, luag thiaj yuav vam khom koj tuaj nrog tiam, nws laus tsoom kev neej kus kev qhua. Koj yuav muaj koj lub zoo zog loj kus zog nchav, luag thiaj yuav vam khom koj tuaj nrog tiam nws laus tsoom kev neej kus kev tsav.
2/. 3/. 4/. Hais ib yam, tab yog hloob lub npe nyob ntawm txwm 4 kom raws li tug neeg ntawd…
KEV UA TSAUG TSHAV NTUJ Ua tsaug nyiaj, tus txais nyiaj hais
-Ua tsaug mog, yeeb vim yog luag tsev xyom cuab luag (txiv, niam) ces, ntuj txiv tsis pab nqus tes, ntuj txiv yuav nqus taw, nws laus txoj pa txoj sia yuav plam lis plaws, xyab lis nriav rau saum cwj pw lis ko tuaj saum chaw.
-Luag tsev xyom cuab yuav plam lawm ib taws, tu lawm ib saws, yuav qaij lawm ib nkog, tu lawm ib tsos.
-Koj yuav xav ntsuab xav ze, xav neej xav tsav, xav kwv xav tij, koj yuav toom txheej toom lis, coj tus txiaj ntsha txiaj ntsig, nyiaj txiag qas ntos, (dej caw qas log, xyab ntaw qas ntsos), tuaj pab tsev xyom cuab nta nws laus dab, ntoj nws laus lub moo ploj kom ntxhee lis lawm tam lawm ncej txawb, ntseg lis log tam lawm ncej txhos.
-koj tus txiaj ntsa, tsev xyom cuab yuav nqa mus ib faj, tsis cia ua tshauv ua thee yaj, nyiaj niag mus xeb tshaj.
-Koj tus txiaj ntsim tsev xyom cuab yuav ris mus ib sim, yuav tsis cia ua nag tshauv nag tshia ris, ua koj tsaug no auv..
Tus muab tshaj ntuj teb
-Tsis txhob ua tsaug mog, yeeb vim luag tsev xyom cuab tau plam lawm ib taws, tu lawm ib saws, yuav qaij lawm ib nkog, tu lawm ib tsos. Luag thiaj tau kev txhob kus kev txhawj kev quaj kus kev nyiaj.
-Nyob li kuv ua neej ua tsav, ua kwv ua tij, ua lub neej mus tsav yim ces, kuv yuav toom txheej toom lim, coj tus txiaj ntsha txiaj ntsim, coj nyiaj txiag nqas nto, tuaj pab tsev xyom cuab nta dab nta qhua, kom ntxhee lis laws tam ncej txawb, ntseg lis hlos tam lawm ncej txhos.
-Tab sis kuv ua kwv ua tij, ua neej ua tsav, ua lub neej tuaj qab tsag, tsis xws li luag, kuv twb coj tsis tau ib dia qav, ib rawg ntxuag tuaj pab tsev xyom cuab nta nws laus dab tu nws la us qhua, twb tuaj tauv tsis tau tsev xyom cuab lub kua muag es tsis txhob ua tsaug mog..
KEV UA TSAUG TSHAV NTUJ HAUV QHUA
Ua tsaug hauv qhua, kav xwm los cuab tsav hais
-Ua tsaug mog koj txiv cuab tsav, yeeb vim luag tsev xyom cuab tau plam lawm ib taws, tu lawm ib saws, yuav qaij lawm ib nkog, tu lawm ib tsos, luag thiaj tau kev txhob kus kev txhawj kev quaj kus kev nyiaj.
-Vim xyoo no, koj (tij laug-niam tij) ces, txais tau zaj mob, zaj mob nrog tsis kaj, nws thiaj tau txais txoj kev ncaim neej ncaim tsav, koj txiv cuab tsav, koj xav kwv xav tij, xav txheeb kus ywm tag, koj li toom txheej toom lis, coj txiaj ntsha txiaj ntsim, coj nyiaj txiag qas ntos, dej caw qas log, xyab ntaw qas ntsos, cab yag cab ncos tuaj ntawm npab, tuaj pab tsev xyom cuab tu nws laus qhua, nta nws laus dab.
-Vim xyoo no, koj (tij laug-niam tij) ces, txais tau zaj nkeeg, zaj nkeeg nrog tsis nquag, nws thiaj tau txais txoj kev ncaim npoj yaig kwv luag, koj txiv cuab tsav, koj xav kwv xav tij, xav txheeb kus ywm txhua, koj li toom txheej toom lis, coj txiaj ntsha txiaj ntsim, coj nyiaj txiag qas ntos, dej caw qas log, xyab ntaw qas ntsos, cab yag cab ncos tuaj ntawm dua, tuaj nrog tsev xyom cuab nta nws laus dab, tu nws laus qhua. Nws laus lub ntees tuag kus ntees ploj thiaj ntxhee lis laws puav tam lawm ncej txawb, ntseg lis log puav tam lawm ncej txhos.
-Koj txiv cuab tsav, tus txiaj ntsha tsev xyom cuab yuav nqa, yuav nco ntsuj ntsoov ua tuj lis taws mus ib faj, tsis cia ua tshauv ua thee yaj, nyiaj niag mus xeb tshaj.
-Koj txiv cuab tsav, tus txiaj ntsim tsev xyom cuab yuav ris, yuav nco ntsuj ntsoov ua tuj lis taws mus ib sim, yuav tsis cia ua nag tshauv nag tshia ris, tsev xyom cuab tsuas nrog koj xem ib lub mag xyom qhuav xwb no auv..
Tus kis ua hauv qhua tuaj teb
-Tsis txhob ua tsaug mog, yeeb vim xyoo no, luag tsev xyom cuab txoj koob tsis sawm vam, luag thiaj tau ua suav cwj ntas ob tog plam, txoj moo tsis sawm tswv thiaj tau ua suav cwj ntas ob tog tws.
-Vim yog kuv(tij laug, niam tij) ces, nws txais tau zaj mob, zaj mob nrog tsis kaj, nws thiaj tau txais txoj kev ncaim neej ncaim tsav.
-Vim yog kuv(tij laug, niam tij) ces, txais tau zaj nkeeg, zaj nkeeg nrog tsis nquag, nws thiaj tau txoj kevncaim npoj yaig kwv luag.
-Kuv ua nws kwv, yog kuv ua lub neej mus tsav yim, kuv yuav toom txheej toom lim, coj txiaj ntsha txiaj ntsim, coj nyiaj txiag qas ntos, dej caw qas log, xyab ntaw qas ntsos, cab yag cab ncos tuaj nrog tsev xyom cuab tu nws laus lub ntees tuag, ntoj nws laus lub ntees ploj, kom ntxhee lis laws puav tam lawm ncej txaw, ntseg lis log puav tam lawm ncej txhos.
-Tab sis kuv ua lub neej tuaj qab tsag, tsis xws li luag, kuv twb coj tsis tau ib dia qav, nqa tsis tau ib rawg ntxuag tuaj pab tsev xyom cuab nta nws laus dab, tu nws laus qhua, twb tuaj tauv tsis tau tsev xyom cuab lub kua muag es tsis txhob ua tsaug mog..
THAUM MUAS LUB QHUAV NTXA
Raws li hmoob kev faus tuag, thaum coj tus tuag mus txog tom qhov ntxa, yuav tau hlawv ib ntshuas ntawv los yog 4-5 npooj xav txheej muas lub qhov av ntawd los log tus tuag, thiab thov kom xeeb teb xeeb chaw lees txhais paub nws los nrog nws nyob ua ke, kom xeeb teb chaws tsis txhob looj koov nws. Txij no mus yuav tau ntxiv ib los rau xws li hais tias,
-Niam sawv toj txiv sawv av, tswv luaj tswv av, hnub no koj yuav los txais, yawg? Nws cev nqaij cev txhav, me roj me ntshav kom yaj lis ntshis tuaj nruab av, kom nws tus me ntsuj plig mam ya lis lag rov lawm ntuj tuam ceeb tsheej nrag,
-Thov txog koj niam nkauj kab yeeb tus tsim lub neej, muab txoj sia txoj pa rau leej tib neeg tshwj sim los ua neeg nyob rau ntiaj teb, rov los txais yawg? Tus ntuj plig rov lawm ntuj tuam ceeb tsheej, nws rov mus hloob ntaub hloov ntawv tshwj sim rov los txoos ua dua neeg rov lawm lwm txeej..
COV LUS UA TSAUG NYOB TOM TOJ NTXAS
-Tsoom kwv tij phooj ywg, kev neej kev tsav, txhiaj niaj txhia xyoo, yuav zoo nws laus niaj phem luag xyoo, nws laus yuav pom tus toj pob, pob lawm luag dawg, xyoo no yuav pem nws laus niaj zoo luag xyoo, tus toj pob yuav zawj lis zog tuaj txog nws laus taw.
-Txhiaj niaj txhia xyoo, yuav zoo nws laus xyoo phem luag niaj, nws laus yuav pom toj pob lawm luag teb, xyoo no yuav pem nws laus xyoo zoo luag niaj, tus toj pob yuav zawj lis zog tuaj txog nws laus tes.
-Vim yog hnub no nws laus tau txoj kev mus ncaim npoj, nej sawv daws thiaj tau tuaj pab peb xa nws laus mus dhau toj.
-Vim yog hnub no nws laus tau txoj kev mus ncaim txij ncaim nkawm, nej sawv daws thiaj tau tuaj pab peb xa nws laus mus dhau daw.
b
-Hnub no yog txog nws laus lub cawv xeeb cawv lav, nej sawv daws thiaj tau tuaj pab peb xa nws laus tuaj txog nws xab.
-Hnub no yog txog nws laus lub ntees dej ntees cawv, nej thiaj tau tuaj pab peb xa nws laus tuaj txog nws chaw.
-Nej tsoom phooj ywg tus nyob deb nyob ze, thov kom nej rov mus vaj mus tsev, mus dawb mus huv, mus tkom txog vaj rov kom txog tsev, tsis tseev kom hmab dawm taw hlua dawm tes, es ua t nej sawv dws tsaug ntau²²
UA TSAUG THAUM NOJ MOV
-Tsoom kwv tij phooj ywg, kev neej kev tsav, yeeb vim yog hnub no tus dej sab siv, ntas lis ntua tuaj txog peb tej qab vag tsib taug, nej thiaj tau tuaj nrog peb ziab peb nplej caug.
-Yeeb vim yog hnub no tus dej sab siv ntas lis ntua tuaj txog peb tej qab vag tsib peg, nej sawv daws thiaj tau tuaj nrog peb ziab peb nplej teg.
-Lub nra hnyav los yog nej sawv daws tuaj pab peb nqa, nej tus txiaj ntsha peb yuav muab nco mus ib faj, tsis nrauj pha.
-Lub nra sib los yog nej sawv daws tuaj pab peb ris, nej tus txiaj ntsim peb yuav ris mus ib sim, tsis nrauj thi.
-Thov ua nej tsoom kwv tij neej tsa dawv daws ib los tsaug qhuav xwb nawb..
Vam Meej Yaj.
