Home
KEV UA TSAUG TSHOOB TOG NRAUG VAUV
Thaum mus ua tshoob, Txawm yog thaum them nqi mis nqi hno mus txog thaum kawg yuav los mus tsev nyias yeej muaj nyias lub caij hais.
Thaum koj them nyiaj tas rau lawv, es lawv los ua tsaug rau yus, yus yuav tau teb rau lawv li no:
1./ Tsis txhob ua tsaug mog, luag tias niam txiv tom ub tuaj tau niam txiv tom no ib tug me ncej neeg, coj mus ua neej yaj los kib txoob tsev plag tsev qawj ntxuav qab yiag to los niam txiv tom ub ua lub neej tuaj qab tsag, ua lub neej tsis xauv nto, nws twb nquam tsis nyog me txiv pwj txho coj tuaj khiab tsis tau niam txiv me kev tu iab tu khwv, me nqe mis nqe hno. Niam txiv tom ub tuaj tau niam txiv tom no ib tug me ncej neeg coj mus ua neej yaj los kib txoob tab cuab mus vij zeej los niam txiv tom ub ua lub neej tuaj qab tsag, ua lub neej tsis nto teej, nws twb nquam tsis nyog me puav pheej coj tuaj ntis tsis tau niam txiv lub koob txheej es tsis txhob ua tsaug mog…
Thaum noj tus luam xim los yog rooj cawv luam xim, es lawv los ua tsaug, yus yuav teb li no:
2./ Tsis txhob ua tsaug mog, luag hais tias niam txiv tom ub ces nws noj tshoob taug tsis tau tshoob qab, haus kos taug tsis tau kos lw, noj tshoob taug tsis tau choj tshoob haus kos taug tsis tau choj kos, noj tshoob yoog tsis tau liaj lwg txuj haus kos yoog tsis tau rwv mwg ci, niam txiv tom ub ua lub neej tuaj qab tsag, ua lub neej tsis tsav yim, nws twb npaj tsis tau ib tug zoo kab phaj ib rawg zoo ntxuag los phim ntim coj tuaj nce niam txiv tom no lub tsum xim, niam txiv tom ub twb tuaj phim tsis tau niam txiv tom no lub txheej yim es tsis txhob ua tsaug mog…
Yog txog lawv rooj ua tos yus es yuas ho yuav mus ua lawv tsaug ua nej yuav noj mov.
(Yuav rau, Laj zeej, tuam mej koob, lwm mej koob, niam, txiv, tub tshaij phaj, thiab tub ce cawv).
3./ Txiv laj zeej cte… es! ua tsaug mog, luag hais tias niam txiv tom no nws noj tshoob taug tau tshoob qab haus kos taug tau kos lw, noj tshoob taug tau choj tshoob haus kos taug tau choj kos, noj tshoob yoog tau liaj lwg txuj haus kos yoog tau rwv mwg ci, niam txiv tom no nws ua lub neej xws luag neej, ua lub neej mus xauv nto, nws yuav npaj dej npaj cawv, npaj nqaij npaj hno los nce niam txiv tom no lub rooj tshoob rooj kos, niam txiv tom ub qhua tshoob qhuav kos yuav tau nrog noj, peb yuav noj nqaij mus ntxuag ntsiab es yuav tseg niam txiv tom no nyab neej nus tij nyob mus tu siab, peb yuav tau noj nqaij mus ntxuag cawv es yuav tseg niam txiv tom no niam hlob txiv ntxawm, kev neej kev tsav nyob mus tu plawv no es ua tsaug mog…
( Ua Aurevoir) Ua niam txiv tsaug thaum yuav rov los mus tsev
Ua tsaug mog, peb tuaj phov phov niam txiv tom no hauj lwm npau lis to, vaj tse ntxhov lis hnyo xws li luj lw qho es peb yuav rov tsis pab niam txiv kho es niam txiv mam ua siab ntev phov no auv...
Vam Meej Yaj
