koojziagkabzaug 3rd February 2015, 1:25 pm
Kwv Liaj Ntsuab,
Ua tsaug ntau uas nws muab qhov xov xwm nov tuaj rau peb pom.
Ntawm kuv tus kheej mas thaum lub hauv paus, cov Hmoob Liab yuav los haum xeeb nrog Thaib, los tuav tes nrog Thaib tsim kev thaj yeeb rau lub teb chaws Thaib; twb yog Vaj Ntxwv Thaib ua tus xub mus nrog Hmoob nyob, nrog Hmoob tham, nrog Hmoob noj mov pem Hmoob tej zej zog yam twb tsis hais ua ntej kom Hmoob ho npaj txais tos, ho tau ua zaub ua mov kom tsimù nyog txais Huab Tais Thaib. Nws cia li mus, Hmoob ua tau li cas nrog Hmoob noj li ntawd; mus nrog tej me nyuam hmoob ntiv yaas ua si, yuav tsaus ntuj mam rov los tsev. Thaum nws yuav rov los tsev, nws nug rau Hmoob tias nej xav tau dab tsi? Ces Hmoob teb tias: "Peb xav kom peb tau npav Thaib." Ces rov los txog ntua xwb Huab tais Thaib tso lus kiag mus rau cov Tswv Nroog kom ua noav pab cas tuas rau Hmoob. Nais Am pheu thiaj tuaj hais rau Hmoob tias cas nej tseem tsis hais kuv xwb es tseem yuav hais rau Vaj Ntxwv hais tuaj rau kuv thiab? Hmoob teb tias: peb kom koj ua, koj twb tsis ua ces Vaj Ntxwv nug peb peb kuj hais rau vaj ntxwv! Txij thaum Huab Tais Thaib nquag mus xyuas Hmoob ntawd ces Nws thiaj li faib liaj ia rau Hmoob, ua vaj ua tsev rau, muab twj taig, pam vov chaw pua, lauj kaub tais diav rau Hmoob ces Hmoob thiaj li tseg tsis ua koom tshas trau Thaib lawm. Thiab tsis tag li ntawd, Poj Vaj Thaib twb ua ib lub tsev muag Hmoob cov paj ntaub; kom cov poj niam hmoob txom nyem nyob yaj sab ua paj ntaub tuaj rau nws muag, mam them nyiaj rau lawv. Tsis tag li ntawd tseem tshuav lwm yam kev pab cuam ntxiv.
Li no, tsis yog tias Peb haiv Hmoob yog ib haiv neeg nyob pos nti es Huab Tais Thaib tsis tau paub txog. Huab tais yeej lees paub Haiv Hmoob nyob hauv nws lub teb chaws lawm, li no tej xwm txheej no kuv xav tias yuav tsis txhob nrhiav kev kub ntxhov dab tsi, yuav tau hu sib koom ntoo xyom dawb mus taug kev ntawm Huab tais qhov rooj xwb cia Huab tais mam daws teeb meem mas thiaj li yuav poob sai. Huab Tais hais ib los xwb ces yeej tau lawm, vim luag xav txuag luag lub teb chaws, tsis xav kom poob rau kev tsov rog ntxiv.