Hmoob Ntuj Tshiab lub tsev PAJ HUAM & kab lis kev cai Hmoob

Txuj ci, kev kawm los pab yus tus kheej rau Fab kev tso plig es yus yog tus mus pab luag nqa nkauj vab

Kawm txog cov lus nug thiab lus teb ntawm qhov rooj, uas yog thaum yus tso plig es yus yog tus txiv qeej thiab tus nqa kauj vab es yus rov los muab plig ntawm qhov rooj.


Tus nraum zoov ua lus suav nug= Tswv zeej ncuab, Nib txaim ncuab, puj txaim ncuab?.

Lus Hmoob= Tswv tsev, Koj puas nyob hauv tsev los tsis nyob os?


Tus hauv tsev ua lus suav teb= Tswv zeej ncuab txaim ncuab los mos.

Lus Hmoob= Tswv tsev nyob hauv los mas,


Tus nraum zoov ua lus suav nug= Nib cim puj cim om?

Lus Hmoob= koj caiv los tsis caiv os?


Tus hauv tsev ua lus suav teb= Aub gu mas los sij cim om.

Lus Hmoob= aub kuv mas tseem tab tom caiv lawm os,


Tus nraum zoov ua lus suav nug= Nib cim no yaam os?

Lus Hmoob= koj caiv dab tsi os?


Tus hauv tsev ua lus suav teb= Gu cim meej mas, Gu xuam tuam zeej tuam kiv laij tshwm meej, mas gu cim meej mas cim hos hos, zeej puj tsee kee laij, kiv puj tsee kee laij,

Lus Hmoob= kuv caiv qhov rooj mas, kuv xa neej dab loj tawm rooj tawm ntsa, mas kuv caiv qhov rooj mas kuv caiv zoo zoo, neej kuj tsis pub los, dab kuj tsis pub los li os,


Tus nraum zoov ua lus suav nug= Nib cim meej mas twb cim hos hos, zeej puj tsee kee laij, kiv puj tsee kee laij, Gu mas chij looj chij muas laij tom tsw li, khai nib yij meej,

Lus Hmoob = koj caiv qhov rooj mas koj twb caiv zoo zoo, neej kuj tsis pub los, dab kuj tsis pub los, kuv mas caij zaj caij ntxhw los txog rau ntawm nov, qhib koj li qhov rooj kuv los tsev,


Tus hauv tsev ho ua lus suav nug = Nib laij tom tsw li, Nib sum no kum os?. Nib taim no yaam laij?.

Lus Hmoob= koj los txog rau ntawm no, koj yog leej twg?, thiab koj coj dab tsi los?,


Tus nraum zoov ua lus suav nug= Gu laij tom tsw li, Gu sum taim hioj ni laij.
Gu taim hioj voj vuab wj nyw, yeej mis ceeb mis, yeej ntxws ceeb ntxws, tuam txhoj tuam khaw, tuam los pa lwm los pa laij, khai nib yij meej gu taim hioj laij kib cuab,

Lus Hmoob = kuv los txog rau ntawm no, kuv yog tub coj plig los, kuv coj tau plig tub plig kiv, plig qoob plig loo, plig nyiaj plig kub, plig niag tsiaj plig niag txhuv, thiab niag tub lag tub luam los, qhib koj lub tsev li qhov rooj, kuv coj plig los rau hauv tsev,


Tus hauv tsev ho ua lus suav nug= aub hom lass hom las, Nib taim hioj voj vuab wj nyw, yeej mis ceeb mis, yeej ntxws ceeb ntxws, tuam txhoj tuam khaw, tuam los pa lwm los laij, teed chi gu khai meej, Nib laij kib cuab, laus,

Lus Hmoob= aub zoo lau zoo lau, Koj coj plig tub plig kiv, plig qoob plig loo, plig nyiaj plig kub, plig niag tsiaj plig niag txhuv, thiab niag tub lag tub luam no, tos pliag kuv qhib qhov rooj, koj coj plig tsev o smog,


Tus nraum zoov ho ua lus suav nug= Nib meej ta, yom noj no yam txum tom nib meej ta?. li yaws xwm fa.

Lus Hmoob = koj lub qhov rooj tag, koj muab dab tsi los ua koj lub qhov rooj tag?, thiaj tau plaub ceg kaum zoo?,


Tus hauv tsev ho ua lus suav teb= gu meej ta, yom noj tom sob looj swm txum tom gu meej ta, li yaws xwm fa.
Lus Hmoob = kuv lub qhov rooj tag, yog muab ntoo txwj ntoo laus pem roob los ua kuv lub qhov rooj tag, thiaj tau plaub ceg kaum xwm fab xwm meem,


Tus nraum zoov ua lus suav nug= Nib meej fwm yom noj no yam txum tom nib meej fwm, li yaws xwm fwm?

Lus Hmoob = koj lub qhov rooj txuas, yog muab dab tsi coj los ua thiab tau koj lub qhov rooj txuas, thiaj muaj plaub ceg kaum xwm meem?,


Tus hauv tsev ho ua lus suav teb= gu meej fwm yom noj tom sob looj swm, txum tom gu meej fwm, li Yaws xwm fwm.

Lus Hmoob = Kuv muab ntoo txwj ntoo laus pem roob los ua kuv lub qhov txuas, thiaj tau plaub ceg kaum,


Ua zaj hais los txhiaj thiab txhais txog lub rooj thiab cov cawv uas lawv muab coj los rau nyob sab qhov rooj sab hauv tsev ntawd tos yus lawm xwb


Tus nraum zoov ua zaj nug= Suav vaig ntxuaj yaig, ntuj hnub kwv li raug, nas nej tswv yeej ncuab es, nej muab dab tsi los tav tau lawm npauj teeg kab lawm li zaj es, npauj teeg thiaj tsis tau kev los tsaws plaj nas, nej muab dab tsi los tav tau lawm tub txawg lw lawm li yee es, tub txawg thiaj tsis tau kev los tsaws ntxhee os nej tswv yeej ncuab es?.

( ces txaum yim ntshis rau lawv )




Tus hauv tsev ho ua zaj teb= Suav vaig ntxuaj yaig, ntuj hnub kwv li raug, os kooj ziag kab zaug, npauj li xi tub xa plig, leej liag tub txawj nkiag, tes lauj tes npab nyiag es, peb muab rooj nrag los tav tau lawm npauj teeg kab lawm li zaj, es npauj teeg thiaj tsis tau kev tsaws plaj nas,

peb ho muab tau lawm rooj nraum los tav tau lawm tub txawg lw lawm lis yee, es tub txawg thiaj tsis tau kev los tsaws ntxhee, os kooj ziag kab zaug, npauj li xi tub xa plig, leej liag tub txawj nkiag, tes lauj tes npab nyiag nes,

( ces koj txaum yim ntshis rau tus nraum zoov thiab )



Tus nraum zoov ua zaj nug= Suav vaig ntxuaj yaig, ntuj hnub kwv li raug, os nej tswv zeej ncuab, es nej muab rooj nrag los tav tau lawm npauj teeg kab lawm li zaj, es npauj teeg thiaj tsis tau kev los tsaws plaj nas, nej muab tau rooj nraum los tav tau lawm tub txawg lw lawm lis yee, es!!! tub txawg thiaj tsis tau kev los tsaws ntxhee os, nej tswv yeej ncuab,

es rooj nrag ces nej ho muab dab tsi cev los ua?, es nws npe ho hu li cas? Es rooj nraum nes nej ho muab dab tsi cev los tws? Es nws npe ho hu li cas? no os nej tswv zeej ncuab, es nej paub no ces nej ho hais los mas nej tswv yeej ncuab nes?.

( koj txaum yim ntshis rau lawv hauv tsev thiab )



Tus hauv tsev ho ua zaj teb= Suav vaig ntxuaj yaig, ntuj hnub kwv li raug, os kooj ziag kab zaug, npauj li xi tub xa plig, leej liag tub txawj nkiag,

Es rooj nrag ces peb txua li zog los ntawm ib daig mus txiag ntooj, ces txum zog los lawm plaub tug ceg txooj, ces nws sawv nres li nrooj, ces zoo rau lawm npauj teeg ua qhov chaw ncooj, ces nws npe thiaj hu ua rooj no,

hos rooj nraum ces peb txua li zog los lawm ib daim mus txiag qhib, txum zog los lawm plaub tug ceg txhi, ces nws thiaj sawv nres li nri, ces rooj nraum npe thiaj hu ua ni, no os kooj ziag kab zaug, npauj li xi tub mus xa plig, leej liag tub txawj nkiag, tes lauj tes npab nyiag nes,

( ces koj txaum yim ntshis rau )



lub rooj ces lawv twv tau rooj nrag thiab rooj nraum npe lawm ces tshuav cov cawv ces koj mam ho rov txhiaj rau lawv txhais dua thiab.



Tus nraum zoov ua zaj nug= Suav vaig ntxuaj yaig, ntuj hnub kwv li raug, os nej tswv yeej ncuab es, ua li nej muab pas liaj los tav tau lawm npauj teeg kab lawm li zaj, es npauj teeg thiaj tsis tau kev tsaws plaj nas,

es nej muab tau lawm pas iav los tav tau lawm tub txawg lw lawm li yee, es tub txawg thiaj tsis tau kev tsaws ntxhee nas,


pas liaj ces ho txawm tau qhov twg tuaj ne!!!?, es pas iav ces ho txawm tau lawm qhov twg los, no os nej tswv yeej ncuab es? yog nej paub no ces nej ho hais los mas nej tswv yeej ncuab nes?.

( ces koj txaum yim ntshis rau lawv )



Tus hauv tsev ho ua zaj teb= Suav vaig ntxuaj yaig, ntuj hnub kwv li raug, os kooj ziag kab zaug, npauj li xi tub xa plig, leej liag tub txawj nkiag, tes lauj tes npab nyiag nes,

pas liaj ces txawm tau lawm teb ntxhab li sab, si lis laws los ntawm toj roob mus hauv sab, ces li puv sis yees los mus txij nthab, thiaj li tav sis yees los tav tau lawm npauj teeg txoj mus hauv kab,


hos pas iav ces txawm tau lawm teb ntxhab li sw, si lis laws los ntawm toj mus roob hlw, ces li puv sis yees los mus txij pwg, thiaj tav sis yees los tav tau lawm tub txawg lw, no os kooj ziag kab zaug, npauj li xi tub xa plig, leej liag tub txawj nkiag, tes lauj tes npab nyiag nas.

( ces koj txaum yim ntshis rau lawv )

us nraum zoov ua zaj qhib qhov rooj= Suav vaig ntxuaj yaig, ntuj hnub kwv li raug, os nej tswv yeej ncuab es, luag tsuas cav tau suav txawj txeeg muaj txuj cia zoo txuj,

tes lauj tes soob, caum tau yaum sij tooj rau lis ntua nej tswv zeej ncuab tus me las xyoob, plam lis plaws nyob nrog poob, ces kooj ziag kab zaug, npauj li xi tub xa plig, leej liag tub txawj nkiag tes lauj tes npab nyiag, wb li tau tshais roj nruam los nrog poob, no os nej tswv zeej ncuab,

luag tsuas cav tau suav txawj txeeg muaj ci cia zoo ci, tes lauj tes mos, caum tau yaum sij hlau rau lis ntua nej tswv zeej ncuab tus me las npos, plam lis plho, ces kooj ziag kab zaug, npauj li xi tub xa plig, leej liag tub txawj nkiag tes lauj tes npab nyiag, wb li tau tshais roj nruam los nrog txog, no os nej tswv zeej ncuab,


Cov cawv los tus nyob hauv tsev lawv twv tau lawm ces koj tsuas los muab plig rau lawv cov hauv tsev lawm xwb, kev muab plig ces yog hais zaj los muab plig lawm xwb, yog luag txawj ces luag kuj hais tau ntau thiab zoo ho koj tsis txawj ces koj tsuas hais li hauv qab no xwb los kuj tau lawm nawb mog.


Nov ces yog zaj los muab plig los yog foom plig rau tus hauv tsev lawm xwb

Tus tub nqa nkauj hais zaj muab plig los foom plig rau lawv lawm xwb ces hais zaj ces seev suab hais li hauv qab no lawm xwb os nawb, tiam sis koj hais txhua txhua nqe mas koj yuav tsum txaum yim ntshis rau cov hauv tsev thiaj yog koj muab plig nawb

Zaj foom plig no ces seev suab hais kiag xwb


1, Suav vaig ntxuaj yaig, ntuj hnub kwv li raug, nas nej tswv yeej ncuab es, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,


wb tuav niam nkauj teej plog, txiv nraug teej plig, mus txog tim toj ces, niam nkauj teej plog, txiv nraug teej plig ces tig ntsej los qhub thiab tig los hais tias nws lub mus nkauj vab los daws tag, nws lub nkauj lev los daws tso, ces

niam nkauj teej plog, txiv nraug teej plig ces taw tuaj sib li kha, tes tuaj sib li zog, ces niam nkauj teej plog txiv nraug teej plig yuav tuaj tis tuaj tw ya plaws nrog niam kab me noog mus ua ua npoj ces,

zaum no ces niam nkauj teej plog txiv nraug teej plig, ces yuav mus cuag nws yawm kus nws poj, no os nej tswv yeej ncuab es .


1, Suav vaig ntxuaj yaig, ntuj hnub kwv li raug, nas nej tswv yeej ncuab es, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,

wb tuav niam nkauj teej plog, txiv nraug teej plig, mus txog li ntua tua rau tim dawm, niam nkauj teej plog, txiv nraug teej plig ces tig ntsej los qhub tig muag los hais tias nws lub nkauj vab los daws tag, nws lub nkauj lev los nrog daws, niam nkauj teej plog, txiv nraug teej plig ces nws taw tuaj sib li kha, tes tuaj sib li zaws,


niam nkauj teej plog txiv nraug teej plig ces yuav tuaj tis tuaj tw ya li plaws mus nrog niam kab me noog mus ua nkawm nes, zaum no ces niam nkauj teej plog txiv nraug teej plig, yuav mus cuag nws poj kus nws yawm, no os nej tswv yeej ncuab es.

( txaum yim kiag rau lawv cov hauv tsev )



2, Suav vaig ntxuaj yaig, ntuj hnub kwv li raug, nas nej tswv yeej ncuab es, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,


wb xa niam nkauj teej plog txiv nraug teej plig, mus txog li ntua rau suav ntswg liaj, ntswg iav ncab, ces niam nkauj teej plog txiv nraug teej plig, ces teg lauj caum tau lawm hmab cev, ces lauj xib nag ces caum tau lawm hmab cab, nplawm li ntws nej tswv yeej ncuab,

tus me plig nyiaj plig kub, plig qoob plig loo, plig tsiaj plig txhuv, plig tub plig kiv, ces nraug zees los lawm niaj mus ib hnab, ces xab nyeej lwm xyoo, lwm nyeej nqis tav nov ces yuav ntws li lug los lawm tsheej phab, ces nej tswv yeej ncuab,


nej tus me plig qoob plig loo ces yuav ntsu laws los puv rau lawm nej lub mus nruab txhab ho,

nej tus me plig nyiaj plig kub, ces yuav ntsu laws los puv rau lawm nej lub mus nruab hnab nas,

nej tus me plig tsiaj plig txhuv ces yuav vam ntws los puv rau lawm nej lub mus qab vag os,

ho nej tus me plig tub plig kiv ces yuav vam ntws los puv rau lawm nej lub mus nruab lev kus nruab txag, ces nej tswv yeej ncuab, yuav vam ntws xws lawm xub ntab, ces lub neej ces yuav zoo xws lawm neej mab, no os nej tswv yeej ncuab nes,


2, Suav vaig ntxuaj yaig, ntuj hnub kwv li raug, nas nej tswv yeej ncuab es, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,

wb xa niam nkauj teej plog txiv nraug teej plig, mus txog li ntua rau suav ntswg liaj, ntswg iav ntev, ces niam nkauj teej plog txiv nraug teej plig, ces teg lauj caum tau lawm hmab cab, lauj xib pes nag caum tau lawm hmab cev, ces nplawm li ntws nej tswv yeej ncuab,


tus me plig nyiaj plig kub, plig qoob plig loo, plig tsiaj plig txhuv, plig tub plig kiv, ces nraug zees los lawm niaj mus ib rev, ces xab nyeej lwm xyoo, lwm nyeej nqis tav nov ces yuav nraug lis zees los lawm tsheej kev os,


nej tus me plig qoob plig loo ces yuav ntsu laws los puv rau lawm nej lub mus nruab tsev,

nej tus me plig nyiaj plig kub, ces yuav ntsu laws los puv rau lawm nej lub mus nruab hnab ntev,

nej tus me plig tsiaj plig txhuv ces yuav vam ntws los puv rau lawm nej lub mus qab tsev nas,

ho nej tus me plig tub plig kiv ces yuav vam ntws los puv rau lawm nej lub mus nruab txaj kus nruab lev, ces nej yuav vam ntws xws lawm xub mes, neej ces zoo xws lawm neej cev, no os nej tswv yeej ncuab,

( txaum yim ntshis rau lawv cov hauv tsev )



3, Suav vaig ntxuaj yaig, ntuj hnub kwv li raug, nas nej tswv yeej ncuab es, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,


Wb xa niam nkauj teej plog txiv nraug teej plig, mus txog ntua rau lawm ntxwj xib lis nyoog cuaj ntsuag kab yim ntsuag kev, ces niam nkauj teej plog txiv nraug teej plig, ces tig ntsej los qhub, tig muag los hais tias, nws lub nkauj vab los daws tag, nws lub nkauj lev los daws tso tseg, nws taw sib li kha, tes tuaj sib li khe,

Ces niam nkauj teej plog txiv nraug teej plig, yuav tuaj tis tuaj tw, ya nrog niam ntab tus mi mes, mus ua lawm tsheej kev, ces zaum no niam nkauj teej plog txiv nraug teej plig, yuav mus cuag poj cuag yawm rau ntuj sua teb tom pes ces,

Niam nkauj teej plog txiv nraug teej plig, yuav tsaug taw lis zoj, nej tswv yeej ncuab lub rooj nom rooj tswv, rooj tshoob kus rooj kos, rooj ntaub kus rooj ntawv, rooj noj kus rooj haus, yuav nraug zees los lawm tsheej kev, ces yuav ntws lug los rau lawm nej tswv yeej ncuab lub mus nrab tsev ces,

Nej nyob tom qab ces muaj hnub ces niaj mab niag suav yuav coj tau npe nom npe tswv tuaj rau lawm nej tab, hos lub rooj nom rooj tswv tuaj rau lawm nej nres,ces nej yuav taug nyog suav nom suav tswv txog mus hauv qub kab, txoj nyog suav nom suav tswv txoj mus hauv kev,

Ces nej yuav sawv li tsees los ua laj mej pej xeem ib tug meej nom meej tswv siab dav, kus mus siab ntev, ces nej yuav tau mus nyob suav nom suav tswv lub tsev vaj lig qhov rooj qhov rai txaij zees xws nas ntab, nraug zees xws taub mes,

ces nej tus me qab vaj ces yuav sawv cuaj txwg mus tub mab, los ua lawm laj kab, ces nej lub me qaum loog ces yuav sawv lawm yim txwg mus tub qhe, los ua lawm laj kem, ces nej tswv yeej ncuab yuav muaj koob meej ncha li ntwg nto lis plaws suav ceeb tsheej teb, no os nej tswv yeej ncuab es.

3, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,

Wb xa niam teej plog txiv nraug teej plig, mus txog ntua rau lawm ntxwj xib lis nyoog cuaj ntsuag kev yim ntsuag kab, niam nkauj teej plog txiv nraug teej plig, tig ntsej los qhub, tig muag los hais tias, nws lub nkauj lev los daws tso tseg, nws lub me nkauj vab los daws tso tag, nws taw sib li khev, tes tuaj sib li khab,

Ces niam nkauj teej plog txiv nraug teej plig, yuav tuaj tis tuaj tw, ya nrog niam mes tus miv ntab, mus lawm ua tsheej pab, ces zaum no niam nkauj teej plog txiv nraug teej plig, yuav mus cuag poj cuag yawm rau ntuj sua teb puag tom qab ces,

Niam nkauj teej plog txiv nraug teej plig, yuav tsaug taw lis zoj nej tswv yeej ncuab lub rooj nom kus rooj tswv, rooj tshoob kus rooj kos, rooj ntaub kus rooj ntawv, rooj noj kus rooj haus, ntaug leev los lawm tsheej phab, yuav ntws lug los rau lawm nej tswv yeej ncuab lub nrab mus plaj xab ces ,

Nej nyob tom qab ces muaj hnub niaj mab niag suav yuav coj rooj nom rooj tswv tuaj rau nej nres, lub npe nom npe tswv tuaj rau lawm nej tab, ces nej yuav ntoj nyog suav nom suav tswv txoj mus qub kev, taug nyog suav nom suav tswv txoj mus qub kab,


Ces nej yuav sawv li tsees los ua laj mej pej xeem ib tug meej nom meej tswv siab ntev, mus siab loj mus siab daj, ces yuav tau mus nyob suav nom suav tswv lub tsev vaj lig qhov rooj qhov rai txaij zees xws taub mes, nraug zees xws lawm nas ntab,

ces nej lub me qab vaj ces yuav sawv lawm cuaj txwg mus tub qhe, los ua laj kem, nej lub me qaum loog ces yuav sawv lawm yim txwg mus tub mab, los ua lawm laj kab, ces nej tswv yeej ncuab yuav muaj koob meej ncha li ntwg nto lis plaws suav ceeb tsheej sab, no os nej tswv yeej ncuab.

( xaus li no - Koj txaum yim ntshis rau lawv cov hauv tsev xwb )


Koj cev cov khob cawv rau cov hauv tsev hauv thiab koj ho hais lus nriav rau lawv li hauv qab no thiab, Cev cov khob cawv rau lawv, cov hauv tsev ces koj ho hais cov lus nriav li hauv qab no rau lawv lawm xwb ces li no.

Cov lus nov yog hais ua lus nriav xwb

Hnub no Txiv nraug teej plig, muab plig tub plig kiv, plig nyiaj plig kub, plig qoob plig loo, plig niag tsiaj plig niag txhuv thiab tuam los pav rau nej lawm,

Nej lub rooj nom rooj tswv, rooj ntaub rooj ntawv, rooj noj rooj haus, rooj tshoob rooj kos thiab meej nom meej tswv los rau nej lawm ces nej yuav tsum,

Sib pab coj mus nrog luag soj, thiaj tau hnav los tau noj, tau ua tus kav los tus coj no laus mog,



li no lawm xwb tas ces koj ho rov thov kom lawm muab dua phaj los ce plaub khob cawv dua ces koj ho rov hais zaj hauv qab no thov kom lawv ho pab rub koj tes ntawm qhov rooj es koj mam nkag mus hauv tsev lawm xwb,


Zaj nov yog thov kom lawv rub neb tes ntawm qhov rooj nkag mus hauv tsev nawb


1, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,

Yuav khom vam tau lawm nej tswv yeej ncuab tes lauj caum tau rab pluaj toog mus peb ntxus hniav fab, quas ntho niam nkauj teej plog txiv nraug teej plig txoj mus qub kab, ces nej tswv yeej ncuab ho tooj teg los lawm tooj npab,

Ces rub li rhe kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag, wb tej mus quav npab, ces wb ho rais lees los lawm neej sab, no nas nej tswv yeej ncuab,

1, Suav vaig ntxuaj yaig, ntuj hnub kwv li raug, nas nej tswv yeej ncuab, kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag,

Yuav khom vam tau lawm nej tswv yeej ncuab tes lauj caum tau rab pluaj toog mus peb ntxus hniav ntev, quas ntho niam nkauj teej plog txiv nraug teej plig txoj mus qub kev, ces nej tswv yeej ncuab ho tooj npab los lawm tooj teg,

Ces rub li rhe kooj ziag kab zaug, teej lag lim tub xa plig, leej liag tub txawj nkiag, tes lauj tes npab nyiag, wb tej mus quav tes, ces wb ho rais lees los lawm neej teb, no nas nej tswv yeej ncuab,


Tas li no ces cev cov khob cawv rau lawv cov hauv tsev haus tas ces thov lawv rub yus tes ces yus ho nkag mus rau hauv tsev lawm xwb.

Tag li no lawm xwb hais txog txoj kev koj mus nrog luag nqa nkauj vab tso plig nas es hais rau peb txhua tus tias yog koj txawj tsis txaus no thov tsis txhob mus nrog luag nqa nkauj vab nawb.


[/size]