Zoo Siab Tau Tuaj Nej Lub Zos Hmoob Tshav Ntuj

Nyob zoo Liaj Ntsuab,

Ntev ntev nws tsis xyeej tuaj cua zos
Los nws me muam twj cuab tseem nyob tos
Ntau hnub nws tsis khoom tuaj tsham
Los nws me muam twm zeej tsis maj

Nws nim txawj hais me kwv txhiaj lus taum
Doog diaj lub siab ti nkaus lub raum
Nws txawj hais paj lug txhawb siab
Nim zoo cuag hnub ci rau ntiaj teb nrog tsuag ciaj

Nws me muam twm zeej los twb tshuav nws tuaj xyuas
Es twb tsis nco ntshai mab dub suav ruas
Nws me muam twj cuab los tseem muaj nws tuaj saib
Twb tsis nco ntshai niam mab dawb lawm suav dub ncaig

Nws mus tsev nco ntsoov txog nws me muam twj cuab
Xyeej tes thaum twg nco ntsoov tuaj xyuas
Tsam nws me muam lam tsaug zog tog kev
Tsis muaj neeg pom ov miv lam cev tes de...

Liaj Ntsuab, tau 10 hnub los nov, Txiaj Looj rov ua nws ib tug ntxhais yuav Hmoob Lis Tshoob. Lawv hu neeg coob thiab ua tau zoo kawg li.
Lub week end tag los nov, Txiaj Looj tus muam tus tub yuav nyab thiaj nws txau txais nws daim Diplôme Master, peb kuj tau mus nrog lawv ua kev zoo siab thiab. Peb kuj thaij duab ua ke lom zem...Peb sawv daws zoo siab tau sib ntsib.

Liajntsu wrote:Nyob zoo koojziagkabzaug,

Ntev lawm tsis tau khoom tuaj cuav zos thiab ua koj luag yog li hnub no kuv rov tuaj cuav zos saib koj, kuv tuaj pom koj muab ntau yam coj los teeb twb zoo saib kawg lawm os. Cia kuv tuaj qw ib zaj kwvtxhiaj ua koj luag thiab ua kom sov koj thiaj li tau luag nawb.

Ntuj ne me Koojziagkabzaug tshav ntuj me luavnyug qw los nag me nluagnyug nkaum........tav ntuj li no koj me nraug nus ntoj tawg tuaj txog nej rab niag teb tuam rooj ntug no nim tuaj pom tag luag ntiaj tag qaum pes sib yaum npoj ntws mus uasi es tshuav tag kuv me nkaujmuam Hmoob li koj hajtseem rau siab ntsuj ntso mus nrhiav tag peb Hmoob li txuj kom tsimnuj es tus mov los koj tsis tau noj lub caij los tsis tau nrog luag zaum.


Los nag me luavnyug nkaum tshav ntuj me luavnyug qw.......tav ntuj li no koj me nraug nus ntoj tawg tuaj txog nej rab niag teb tuam rooj ntug no nim tuaj pom tag luag ntiaj tag qaum pes niam ua qajqaug nyog tej mus npoo lav es tshuav tag kuv me nkaujmuam Hmoob li koj hajtseem rau siab ntsuj ntso mus nrhiav tag peb Hmoob li txuj kom tsimnuj es tus mov los koj tsis tau noj lub caij los tsis tau nrog luag pw.

Ntuj ne me Koojziagkagzaug yeeb vim yog niag Niaj Suavliab thiab Nyablaj Cobtsib siab tsis zoo nim muab peb Hmoob li Huabtais tua tuag li nthi coj mus log li nkaus cev nqaij cev tawv lwj mus tiv av..... nimno peb Hmoob li zoo tam ntua me noog Qejqawg poob qab nras, leej hlob los tau kev quaj leej yau los tau ntshai thiaj li quaj quaj peb qhovmuag nyob mus tawm nthav mus thoob rau 8 meem av.

Ntuj ne me Koojziagkagzaug yeeb vim yog niag Niaj Suavliab thiab Nyablaj Cobtsib siab tsis zoo nim muab peb Hmoob li Huabtais tua tuag li nthi coj mus log li nkaus cev nqaij cev tawv lwj mus tiv hleb.....nimno peb Hmoob li zoo tam ntua me noog Qejqawg poob qab zeb, leej hlob los tau kev quaj leej yau los tau ntshai thiaj li quaj quaj peb kuamuag ntxaum lis ntseb mus thoob rau 8 meem teb.

Ntuj ne me koojziagkabzaug chim lub lajxeeb npaum luaj twg los tseem tsis tau xav tuag cwj txoj me siav tos lis ntsoov seb peb me kwvtij thiab nkaujmuam Hmoob puas rov tau los sib cuag.

Liajntsu wrote:Nyob zoo Koojziagkabzaug thiab Maypaj,

Hnub no kuv tuaj saib neb. Kuv tuaj pom neb lub tsev tseem tshiab heev li zoo li tsis tau muaj kwvtij neejtsa nkag los saib neb, xam tias cia kuv yog neb thawj tug qhua tuaj hauv no. Kuv ntseeg tias tus Neeg hais lus qab zib txhua tus yeej xav tuaj ntsib, tus neeg hais lus zoo txhua leej txhua tus yeej xav hnov lub moo.

Yog li kuv tuaj xyuas neb hnub no pom qab lawm ces yuav niajhnub tuaj saib neb os nawb.

Nyob zoo neb mam li rov sib ntsib dua