Hmoob Dab Neeg - Lub Noob Neej (*World Creation)

**koojziagkabzaug** 2nd November 2011, 3:26 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°1

Hmoob Dab Neeg - Lub Noob Neej (*World Creation)

koojziagkabzaug 2nd November 2011, 3:26 pm

Hmoob Dab Neeg - Lub Noob Neej (*World Creation)

**koojziagkabzaug** 13th October 2012, 2:04 pm

koojziagkabzaug

koojziagkabzaug: Moderator; Messages : 3529
Date d'inscription : 2010-02-28

Post n°2

Re: Hmoob Dab Neeg - Lub Noob Neej (*World Creation)

koojziagkabzaug 13th October 2012, 2:04 pm

Yawm Tshuas Xaab lug ntsuag noob neej

Yawm Tshuas Xaab thab Yawm Ntsuab, yug nyob Suav Teb Chaws, puab tau coj tej miv tub miv nyuas tawm Suab teb Chaws lug nyob tsua Los Tsuas teb Chaws.

Lug ntsuag noob neej, Yawm Tshuas Xaab

Thaum ub peb muaj, peb tug yawm tsaws le cov qos laug tau has thab ua lug ntsuag pav lug txug naj nub nis nuav. Puab yog peb kwv tij, tug hlub yog Yawm Txij Suab, tug ntsaab yog Yawm Ntsuab, tug yau yog Yawm Tshuas Xaab.

Raws le cov qos laug tau pav thab paub txug naj nub nis nuav, peb cov Yawm yug nyob Suav teb chaws. Puab ua neej nyob lub zog Pheej Huj taj tshaav ntshi, Suav teb chaws, thaum lub sij hawm ntawm Puab ua neej txom txom nyem ntshav noj ntshav haus los tsis koob ncauj, Nam Txiv los tuag taag lawm tsis muaj leej twg coj ua noj ua haus.

Yawm Ntsuab thab Puj Ntsuab tsis hlub Yawm Tshuas Xaab (yog tug kwv ntxawg), Yawm Ntsuab has tsis tau Puj Ntsuab ntsug hlub has thaum twg tes sib tshe xwb, kuam Yawm Tsij paab has los tsis tau. Yawm Ntsuab hlub tug kwv dIhau lawm tsis paub ua zaaj twg. Txhaj ua le has, cia muab coj moog muag tsua Suav, es luas hlub thab tsis hlub los ywg lub qhov muag tsis pum es lub sab txhaj le yuav kheev.

Yawm Ntsuab tsawm coj nws tug kwv (Yawm Tshuas Xaab) moog muag tsua cov Suav ( yis ruas ). Taag le ntawm, sij hawm tsis ntev Yawm Txij tau taag nws sim neej lawm, nyob huv nws lub neej, nws kuj yog ib tug tuam los paav tub ntaus txaj laag kev luam, moov tsis muaj nws tau moog dlaws thaab lawm ( tsaug tub saab tua los yog cia le pluj lawm). Yawm Ntsuab thab cov kwv tij ib txha sib pus sav riv tawm Suav teb chaws lug tsua Lostsuas teb chaws.

Txhaj tso Yawm Qhua Tsev Choj thab Yawm Mog Tsev Ntev tsua zog Pheej Huj Suav teb chaws.

Yawm Ntsuab, puab lug txug tsua Lostsuas teb chaws, lug nyob lub zog Maam toob kev xuv hlau haav ntaus vuag, tom qaab tsis ntev Yawm Ntsuab tug tub es yog Yawm Txawb hlub tuaj, nws tau has tsua nws txiv tas ua caag luas tej zoo le luas kuj muaj kwv tij coob thab ntau, es peb le ua caag kwv tij ho yuav tsawg ua luaj ?

Yawm Ntsuab txhaj le has qha tsua nws tug tub (Yawm Txawb,) peb muaj kwv tij coob thab los mab, taab sis ib txha nyob tsua Suav teb chaws lawm thab koj muaj ib tug Txiv ntxawm hu ua Xaab nua kuas thau tes koj Nam tsi ntsug hlub, has thaum twg kuam ntsug hlub tes sib tshe thaum ntawm le xwb, xaav xaav kuv txhaj muab muag tsua Suav lawm. Yawm Txawb noog nws Txiv, es yog le nua puas tseem nyob los tsis nyob lawm ?

Yawm Ntsuab teb, tseem nyob thab los mab.
Yog le nua kwv tij tsawg hwv kuv yuav moog ntshav saib puas tau, yog tau nua kuv yuav coj lug ntsug peb nyob kuam muaj kwv tij coob, txhaj le tsis nrhaw nrhaw luas tej. Y N: Mej tej miv nyuas muaj peev xwm thab tswv yim zoo los ho tsua moog ntshav coj xwb les kuv tes kuv twb laug laug lawm yuav taag sim neej.

Yawm Txawb txhaj le moog Suav teb chaws moog ntshav Yawm Tshuas Xaab, moog txug ze tsua Suav kem kiam teb tsawm moog thaam pem thab noog txug Yawm Tshuas Xaab saib tej qos laug kws nyob ze ib ncig ntawm saib puas paub txug, thaam thaam tes tsawm muaj ib tug laug has tsua Yawm Txawb.
Yog koj moog coj kwv tij zoo le koj pav ko nua mas kuv muaj ib co tshuaj haus paab sab, cia kuv muab miv ntsiv tsua koj nqaa coj moog tau siv.
Yawm laug ntawm tsawm muab tau ib qho tshuaj tsua Yawm Txawb.

Yawm Txawb moog txug ntshav tau Yawm Tshuas Xaab, ciav Yawm Tshuas Xaab zoo neej tsis txom nyem le Yawm Txawb puab lawm,Yawm Txawb, tsawm has tsua Yawm Tshuas Xaab, Txiv Xaab kuv tuaj nuav mas yog tuaj has koj thab tog koj rov qaab moog ntsug peb nyob. Yawm Tshuas Xaab,
tsi moog le lauj mej txom nyem hwv kuv tsi moog, moog zoo ua dlaab tsi !

Yawm Txawb, txiv Xaab tsis zoo le yaav ntuj thau lawm huas nis nuav peb zoo neej lawm, peb muaj nyiaj muaj txaj lawm le huas, tam tseeb tog vaaj tog tsev mas qab npua dlwg lawg huas lauv qab saam mas cuag lauv ntsaaj, npua mas pw pawg lug npaum taub twg xwb huas yuav txom nyem zoo le yaav ntuj thau lawm nab, nyuj twm mas kub sis roo dlij dlawj cuag khob ceg tawg le huas. Yawm Tshuas Xaab, tsis leej muaj thab yuav zoo npaum poj !

Yawm Txawb, zoo tag huas txiv Xaab peb mas lub nam rooj faaj tsum txawb nkaus ntawm qhov rooj mas kiv yeeb taag ntsho tas yuav muab teev khaws cia nyiaj tuaj ntaag, kiv nyiaj taag yuav muab teev xom cia yeeb tuaj ntaag kiv tsheej nub tsis tau su le huas. Tes lawv lawv ntxag txag Yawm Tshuas Xaab tau peb nub thab pheej muab cov tshuaj kws yawm laug muab tsua nws nyiag tsau dlej tsua Yawm Tshuas Xaab haus, zoo le Yawm Tshuas Xaab tsawm qaug sab. Yawm Tshuas Xaab, tsawm has tsua Yawm Txawb xub yuav zoo npaum le koj has os Txawb ?

Yawm Txawb, zoo npaum le tag huas Txiv Xaab tej txiv tub es kuv yuav laam pem tsiv koj nab. Yawm Tshuas Xaab, xaav xaav ab yog le nua moog los moog, Yawm Txawb, koj kaam ntsug kuv moog lawm tes cia wb moog ntshav ib lub lauj kaub ua mov noj taug kev tso, wb maam le moog. Ob txiv tub moog ntshav lauj kaub txug yim twg los has tsua ob tug tas tsis muaj, ntshav ntshav tsis tau, Yawm Tshuas Xaab, es koj yeej yuav ntshav kuam tau lauj kaub le nua kuv twb muaj ib lub.

Es yog koj muaj ib lub tes muab koj lub, koj lub ua le caag mab ? Kuv lub tsau miv ntsiv nyuas sim nyiaj huv lawm, Nam thab Txiv Suav muab tau kws u yim nyuas paav laj tsua kuv ua, es kuv ua nyuas laj sib faab xwb, taab sis kuv ua tau npaum twg los kuv muag tsua kuv yuav le xwb es muab tsau coy nyuas nyiaj ntawm lawm, noj haus tej tes noj Nam Txiv Suav, ob tug le xwb.

Yawm Txawb, muab koj lub es wb muab coy nyiaj cia ces wb coj lub lauj kaub xwb, ciav tsis nqaa coy nyiaj yuav tsis muaj teeb meem dlaab tsi, ob txiv tub tsawm muab coy nyiaj thau tuab si tsua sau txaaj. Yawm Tshuas Xaab - es yuav nqaa miv ntsiv nyiaj los tsis nqaa nev Txawb ? Laam nqaa miv ntsiv tsua qhov kuv tuaj tuab leeg muaj ntsis ntshai tub saab kuv yeej tsis nqaa nyiaj le.

Ob txiv tub tsawm muab tau ib txhais kis nyiaj nqaa tes ob tug lug, lug ib nub tsaus ntuj txug ib lub zog, ob tug tsawm pom ib co lug tsua tug Kiaj Tsaab ntawm lub zog tas kuv tuaj kuv ciav tsis yog tuaj nyiag Suav tuab neeg kuv tuaj coj kuv tuab neeg xwb, yog Suav nrauj nyog tseg qaug Suav tsov qaab Suav nrauj tsis nyog tseg tsis qaug, Suav yuav lawv tuaj yij meem lawv tuaj, tuaj neeg nkaum peb caug leej los tsis xyeej tsawg le muab lug le ntawm tsua tug Kiaj Tsaab ntawm lub zog kuam has le tsua Suav, yog Suav lawm ob tug tuaj.

Txug lub zog tshab tsov pom dlua ib co lug tsua tug Kiaj Tsaab ntawm lub zog tshab kuam has tsua Suav, yog Suav zoo sab lawm los Suav tsov qaab tsis zoo sab le los yij meem tuaj muaj kw taw tuaj tsis muaj kw taw tsov.
Ob tug lug dlau peb plaub lub zog has tuab co qub lug tsua txhua tug Kiaj Tsaab kuam muab lug tsua Suav, yog Suav lawv ob tug tuaj.

Tom qaab ob tug lug dlau lawm nov tas Suav lawv ob tug tuaj tag, taab sis tuaj txug txhua lub zog kws ob tug tau pom lug cia cov Kiaj Tsaab tau muab ob tug cov lug has tawv qhawv tsua Suav le ob tug tau pom tseg. Muaj ib tug Kiaj Tsaab tau noog Suav ua caag mej yuav lawv Hmoob ua luaj es yog vim le caag? Cov Suav tsawm has qha, tuab neeg mas yog puab le, taab sis lug ua peb tuab neeg tau ntau xyoo lawm peb txhaj lawv npaum le dlag.

Tug Kiaj Tsaab tsawm cheem cov Suav ib nyuas lus tas puab nyiag meej tuab neeg los kuj yog puab tuaj coj puab tuab neeg, kuv xaav mas mej cia le tsov qaab yuav zoo dlua tsaam ib ntsiv mej lawv cuag tsis yog tug tuaj ntawm tua me j, huas tseem yog mej tug tuab neeg tsov tig tua mej.
Nws muaj taug lub sab tsiv ntawm mej lawm mas nws yeej yuav muaj taug lub sab tig tua mej, tes Suav txhaj le ua ib sab tsov qaab lawm tsev.

Yawm Txawb thab Yawm Tshuas Xaab, lug txug ciav tsis zoo le Yawm Txawb tau tuaj dlaag Yawm Tshuas Xaab huas qab npua yuav muaj qhov twg, ntawm tog tsev muaj ib nyuas tug puj qab coj miv nyuas quaj cuj civ huas npua tes muaj tuab nyuas tug maum npua ntxaug ntxaug kaw huv nkuaj. Nyuj twm twb tsis pum ib tug le, vaaj tsev dluag dluag khaub khaub hlaab lug naag peg ntuj poob peg teb.
Yawm Tshuas Xaab saib saib taag, tsawm has tsua Yawm Txawb mej txom nyem hwv tsis yog le koj tuaj coj kuv es koj has tsua kuv huas koj laam dlaag kuv kuam kuv ntsug koj lug xwb mas ntshai kuv yuav tsov qaab kuv tsis nyob.

Yawm Txawb tshawj tsis paub yuav ua le caag thab zaaj twg tsawm moog has thov thab tuam yeem tsua txhua tug laug neeg, yog mej paab cheem tau kuv txiv ntxawm ntsug peb nyob nua kuv npaaj ib tsum mov thab kaum ob laag nyiaj tsua mej.
Cov laug, yog Peb cia le hu Xaab tuaj taam sim nuav mas nws yuav has tas koj tuaj thov peb es peb paab koj nua cia koj tsov qaab moog tsev es peb maam tso miv nyuas tuaj hu meb. Mo tom qaab cov laug txhaj tso miv nyuas tuaj hu Yawm Txawb, ob tug moog txug. Cov laug tsawm noog Yawm Tshuas Xaab nov tas koj yuav tsov qaab nua puas muaj ?

Muaj tag tsua qhov puab txom nyem hwv nyob tsis taug, zoo le yaav taag lug kuv ntsug Nam Txiv Suav nyob mas yaam tsis muaj le, noj ib pluag twb yuav muaj txug plaub tsib yaam zaub, mas kuv xaav tas puab txom nyem hwv ntshai tsawm le caag los kuv yuav tsov qaab.
Cov laug yog le nua meb lug meb puas nqaa Suav nyiaj los tsis nqaa ?

Wb nqaa miv ntsiv, ib nyuas txhais kiv.
Yog le mas tsis tau nawv koj tsov qaab moog Suav yeej yuav tua koj xwb.
Nyiaj tsis tua Nam Txiv Suav hlub hlub kuv le.
Tsis paub le nawv ua dlej txag paug luas sab lawm luas tsis tua los yeej tsis hlub koj npaum le qhov qub lawm, meb twb nqaa tau ib txhais kiv nyiaj lug tes muab yim laag coj moog ntshav ib tug nyuas qos puj lug ntsug koj taab puab yig huas tseg yim laag chiv peev ua neej yog yuav nplua nuj tes nplua les, tseem yuav has tas tsov qaab moog thawj Suav. Ywg caaj ywg ceg, ywg keeb ywg kwm ywg yog Hmoob es nyob twb ywv tsis txhob xaav ntau ntau, tej nuav txhaj yog ywg kwv ywg tij tag tag,
peb cov laug tsis pum zoo tsua koj tsov qaab moog.
Yawm Tshuas Xaab, xaav xaav has tsis dlau cov laug quaj ib pluag tes ua ib sab nyob.

Txhaj thov kuam Puj thab Yawm Txaj Pob Kws Ci paab moog noog tug nam puj ntsuag tim lub zog Haav Ntoo, ob tug tsawm coj Yawm Tshuas Xaab moog yuav ces ciav tau lug tag, lug ua neej nub tsis ntev mo tsis ntau zoo le kuj muaj moo Puj thab Yawm Tshuas Xaab muaj ib tug tub, muab hu ua Tuam ( yog Yawm Xauv Tuam ), ho muaj tug tub thib ob muab hu ua Lwm ( yog Yawm Npla Lwm ), tsis ntev muaj tug thib peb muab hu ua Pov ( yog Yawm Chaav Pov ).

Puj thab Yawm Tshuas Xaab, puab kuj ua neej ntsag twb qos tu zoo le luas tej, caag lub naj lub xyoo tsis ntev Xauv Tuam, Npla Lwm thab Chaav Pov hlub tuaj, Xauv Tuam has lug los kuj txawj has ntsim luas nyiam, nws tsawm ua laag ua luam ib lub tam lees huas moog nce toj nqeg taug tsua txhua qhov chaw, has lug los luas kuj saib tsau nqe thab txawj thaam pem kawg, txug qhov twg los tsuas nov luas caav has tas Xauv Tuam tseem yog ib tug hluas taab sis ua luam mas txawj npaum ib tug tuam los paav laug lawm.

Tsis muaj pig tsawg xyoo Yawm Xauv Tuam, puab muaj nyiaj nplua nuj tag loj lub nam rooj faab tsum txawb ntawm taw rooj kiv nyiaj taag ntsho yeeb tuaj kiv yeeb taag ntsho nyiaj tuaj, muaj dlaag muaj zug tsua luas tej tuaj ua. Tes cov kwv tij thab tej neej tsaa kws txom nyem tsuas has moog lawv Yawm Tshuas Xaab cov txiv tub xwb.

Luas tej coj cov nyiaj kws qub qub thab siv tsis tau lawm tuaj pauv, ob peb lub pauv ib lub, plaub tsib lub pauv ob lub tej los muaj mas Yawm Tshuas Xaab cov txiv tub tau zoo luam kawg thab cov txiv tub nquag tsis nquag mas ua teb yeeb tsis muaj leej twg yuav ua tau npaum. Cov txiv tub ua tau peb xyoos ces cov ncuav luaj lug ua cov tswj fwm, ncuav tuaj pum puab cov teb yeeb tes ncuav muab luaj taag ntsho tsiv tsis pub ua, cov txiv tub chim heev yog le ua los tsis tau thab tsis pub ua tes txav sab ua teb paag txhaj muab teb yeeb tso tseg.

Cia Yawm Npla Lwm ua teb paag, Yawm Chaav Pov ua teb pob kws thab teb npleg huas Yawm Xauv Tuam paub ua luam tes cia nws ua nws luam le qub. Yawm Xauv Tuam ua luam mas yog nws tau moog ntsug ib tug tub luam kom nqe lawm mas tsis pub lwm tug los paav lug has le, yuav cia Yawm Xauv Tuam has taag tso tsis le mas yog txhaav Yawm Xauv Tuam luam lawm. Huas yog Yawm Xauv Tuam yuav tau tug raj lawm mas, lwm tug los paav xaav yuav tug raj yuav tsum ntsug Yawm Xauv Tuam kom dlua nqe. Ib tug txiv nyuj mas muag tshaaj peb plaub txaj nyiaj, ib tug laag npua kws muaj tsib tsau taus mas muag tshaaj ob peb txaj nyiaj. Yawm Xauv Tuam tu npua muag mas sawv ntxuv ntxuv lug pub npua ua ntej kws cov los paav yuav tuaj ntshav luam, kaaj ntug cov tub luam tuaj txug saib Yawm Xauv Tuam cov raj, has tsua Yawm Xauv Tuam, koj cov npua koj pub lawm pob caag zoo le khws yuav tsau ua luaj !

Yawm Chaav Pov tsov qaab moog lawv cov nam puj suav taab sis coj tsis tau vim puab ntawv tuaj nyob taag sij hawm lawm tes puab yuav tsov moog tsev, ho tsis moog ntshav neeb ntshav yaig ua saib le thab.
Tom qaab tsis ntev tsawm muaj ib tug ntxhai nyob tsua lub zog Haav dlaus ntu tuag tsis muaj tuab neeg, neej tsaa nyob qhov twg le tes tsawm tuaj hu Yawm Xauv Tuam, Npla Lwm thab Chaav Pov moog ua nam txiv dlaab ntaus nyuj, tug ntxhai tuag ntawm yog Puj Tshuas Xaab tug ntxhai kws tseg tsua huv cov qub kwv tij. Puab moog paam tuag taag lug txug tsev tes Yawm Npla Lwm tsawm mob pig kiag tuag lawm, (nyob huv Yawm Npla Lwm lub neej tub ki muaj Lauj Kiam tuab leeg xwb ).

Puj Tshuas Xaab taag sim neej cov tub thab cov kwv tij tua kaum ob tug nyuj, taab sis moov tsis muaj Yawm Chaav Pov tseem mob mob ntsum sav qos ntsug twb sawv tsis taug ntsug cov kwv tij paam Puj. Nub coj Puj moog zais, Puj Chaav Pov has tsua Yawm Chaav Pov. Chaav, koj tsis tsaa qhov muag saib es puab muab nam kwv nce ntawm tog tsev ntawm moog tsua tim caaj roob lawm, ces Yawm Chaav Pov tsaa tsaa tau taub hau saib ib nyuas muag has tau tuab nyuas lus.

Eb nam aw caag koj thab kuv yuav tsis muaj moo ua luaj es kuv xaa tsis taug kuv nam nce hauv toj, nkim nam lub zug khwv tu peb hwv loj, saib saib cov kwv tij coj Puj dlau tim ntug zog tsov qhau taub hau, cia le tuag twb ywv. Suav dlawg coj Puj moog zais taag lug txug tsev tes Yawm Chaav Pov twb tuag lawm. ( nyob huv Yawm Chaav Pov lub neej tub ki muaj Suav Siv Yig )

Yawm Npla Lwm thab Yawm Chaav Pov tuag taag tes Yawm Xauv Tuam tsis muaj sab ua luam thab ua los tsis tau le yaav taag lawm thab zoo le tsis muaj moo le thaum puab peb kwv tij tseem nyob, cia le tso kev luam tseg tsis ua, ( Yawm Xauv Tuam, nyob huv nws lub neej tub ki luaj ntxhais xwb tsis muaj tub) Lub neej kws puab peb kwv tij tseem ua neej nyob es puab khwv tau cov nyiaj, Yawm Xauv Tuam mas txawj ua luam nws muaj nyiaj dlua ob tug kwv taab sis nws tsis muaj tub, tes cov nyiaj txag muab faib sib npaug zog.

Puj Npla Lwm thab Puj Chaav Pov moog ua neej tshab tej nyiaj txag kws muab faib tsua ob tug, ob tug yeej nqaa moog ua neej tshab lawm tsua tshuav Yawm Xauv Tuam cov xwb. Puj Npla Lwm thab Puj Chaav Pov tseg ob tug, ob tug tub ntsug Yawm Xauv Tuam nyob, moov tsis muaj tsis muaj pig tsawg xyoo Yawm Xauv Tuam tau taag nws sim neej lawm thab tes nov Hmoob thaam pem tom tej, yog leej twg yuav tau Puj Xauv Tuam cai mas, muab ku hlau pheeb nkaus muab kw taw dlai nkaus peg suab nyob noj peb xyoos twb noj tsis taag.

Ces tsis ntev Hmoob dlawb tuaj yuav Puj Xauv Tuam, tseg Yawm Lauj Kiam thab Yawm Suav Siv Yig cia tsua Yawm Xyu Pov thab Yawm Txaj Kus puab cov kwv tij nyob. Tsis muaj Nam muaj Txiv qhuab qha, tes Yawm Lauj Kiam thab Suav Siv Yig hlub ciaj hlaub tav ceg, Yawm Lauj Kiam mas nto nplawg hluas tsuas has qhov kev ua si xwb, dIa nce toj nqeg haav moog thaam hluas nkauj tsua txhua qhov chaw, ib nub lug tsuab ib cov nyiaj moog siv ua si pub hluas nkauj.

Moog ua si txug tom tej chaw noj mov haus dlej Yawm Lauj Kiam yuav mov yuav dlej tsua suav dlawg noj haus, siv tau peb xyoos le ntawm tes, nws muab nws Txiv cov nyiaj kws nws Txiv khwv tau tseg cia, siv taag.
Yawm Lauj Kiam txhaj ntshav tau ib tug qos puj zoo zoo nkauj lug ntsug nws ua neej, tsis ntev muaj ib tug tub muab hu ua Tseeg ( yog Yawm Soob Tseeg ). Moov tsis muaj Yawm Lauj Kiam tsawm tau taag nws sim neej, tes ua neej txom nyem thab txhaj le muab tsis tsua tug kwv Siv Yig, ( puj Suav Siv Yig yog puj Lauj Kiam ).

Puj thab Yawm Suav Siv Yig ho xeeb ib plaab tub tsis tau yug, tseem muaj xyaa lub hlis tsua huv plaab xwb, Yawm Suav Siv Yig cia le taag nws sim neej lawm, maam ho yug tau lug kuj yog ib tug tub muab hu ua Lwv ( yog Yawm Tsaav Lwv ).

Tshuav Puj nyob tes Yawm Tsuj Yob HAAM has tas Puj zoo nkauj hwv yuav tuaj yuav. Txhaj le tuaj yuav Puj Lauj Kiam, tes txhaj has tas yog yuav tuaj yuav nws tug nam ntxawm nua cia tso nam nyug txiv nyug xob tuaj lawv tsaam nws ob tug nyuas kwv ntxawg poob plig, sov leej twg tsawm siv moog nkawg xaiv tsua Yawm Xyu.
Yawm Xyu, qos Yawm Tsuj Yob yuav tuaj yuav Nam nua saib yog tsis muaj tuab neeg txig tes npaaj rooj dlej rooj caw tsua es kuv tuaj moog nyob saab rooj peg txig saib, ( mas Yawm Xyu kuj yog ib tug txoov kaav pej xeem, lub sij hawm ntawm ). Puj Lauj Kiam cheem Yawm Xyu, xob has es cia kuv tiv kuv yog kuv yeej nua los kuv nyob ua mej nam huas yog kuv swb los kuv ntsug puab moog txhaj tsis muaj lug ua kev nyuaj sab tsua mej cov tub.

Yawm Tsuj Yob HAAM, puab tuaj yuav Puj, tuaj txug tes Puj tsis kaam yuav Puj tsawm coj nws tug tub Lwv, ob nam tub tsawm tsiv lawm. Suav dlawg ntshav tsis tau tsis pum nyob qhov twg le, tes Yawm Tsuj Yob txhaj lawv qaab moog ntshav, taug taug neev taw lawv lawv txug tim cov qub teb npleg muaj lub nyuas kwj haa nqhes dlej, dle nplooj ntaus dlej haus taag ciav pum tso tawb zig ntub qos ntsuav, paub tas Puj nyob tsis dleb tsawm seev ab dlua twg lawm nev, Tseeg nam dlua twg lawm es tseem tso zig ntub qos ntsuav nuav, cia txhu hlo qau tso zig tsua ntawm Puj tawb zig, tsawm has hum chim hum chim. Tes Puj tsiv ntsaim nyob peg sau qaum kev lub pob ntoos,
Puj tsawm teb nkaus nam tsuv tum muaj plus, luas twb tsiv tsiv ib nub taav nuav qaug qos nuag los tseem lawv qaab tuaj tshu qau tso zig hum chim hum chim nua ntawm ko nam ntsej muag.

Yawm Tsuj Yob, yuab kuv xaav tas ntshai koj tsua twg lawm nua koj tseem nyob ko tsov qaab ntsug kuv moog tsev, es yog koj zoo sab yuav kuv los yuav huas yog koj tsis kaam yuav los kuv paub tu has tas koj tsis kaam nua tes kuv moog kuv. Moog, wb moog tsev tsis txhob poob sab, ntuj e koj nim tsiv tsiv ib nub qaug tshaib qos nuag ua dlaab tsi, tug dlaav yaa peg suab luas twb pum es koj tsawm tsiv txug qhov twg los kuv yeej yuav ntshav tau.

Puj xaav xaav yuav yog le thab tag tes ua ib sab ntsug Yawm Tsuj Yob lug tsev, lug miv ntsiv moov tsis muaj naag tsawm lug, Yawm Tsuj Yob xaav tau tswv yim tsawm has tsua Puj, Tseeg nam naag lug kev nplua nplua le muab koj tsaab rag tsua kuv paab koj nqaa, Puj muab rag tsua Yawm Tsuj Yob nqaa, lug ib nyuas plag tsov has saab koj hwv lawm muab miv nyuas tsua kuv paab koj tsig thab, tes muab miv nyuas thab qos tsag tuab si tsua Yawm Tsuj Yob.

Ob tug lug tsev, lug txug ntawm zog, tawm plawg tim ntug zog xwb Yawm Tsuj Yob qw qos luab mej kev tsij kev laug tawm tuaj saib uad nam yeej yeem lug taag le lawm miv nyuas los muab tsua kuv tsis, huas nws has tas nqaa rag yuav tua kuv nua los muab tuab si tsua kuv lawm, wb twb has hum tom kev wb maam lug nam yeej yeem yuav kuv lawm. Tes Puj ua tsis tau le caag, has zaaj twg los swb cia tsaa suab quaj, ces kev tsij qos laug los kuj has tas yog Puj ua le ntawm mas Puj swb cai, nti tsis dlau ua ib sab yuav Yawm Tsuj Yob HAAM, suav dlawg cia tua ib tug nyuas npua ua noj, muab ob tug txis ua nam txiv.

Puj Lauj Kiam moog yuav Yawm Tsuj Yob HAAM los kuj tsis muaj moo tsis ntev Yawm Tsuj Yob taag sim neej lawm thab, tes Puj ho moog yuav Yawm Nkiag Mob, tom qaab nov tas Puj yug tau ib tug tub hu ua Paaj Txus. Puj Lauj Kiam lub neej lug xaus tsua huv Yawm Nkiag Mob tsev tuab neeg thab Puj lug taag sim neej tsua lub zog Phuaj Khoos teb chaws Lostsuas.

Thaum Yawm Soob Tseeg thab Yawm Tsaav Lwv, ob tug hlub tav txiv Puj Xauv Tuam tau tsov lug ntsug ob tug nyob tsua qhov tas nws laug laug lawm tsis muaj tub ki hlub.
Puj Xauv Tuam mas Yawm Xauv Tuam tuag taag tes, nws moog ua neej tsua huv cov Hmoob Xyooj. Tsis ntev Yawm Soob Tseeg yuav tau Puj Soob Tseeg, taab sis Puj Soob Tseeg lug yuav tau ib nyuas ntu twb tsis tau muaj tub ki ( has le ntshai lug yuav tau ib ob hlis xwb ), tes Puj Soob Tseeg tsis kaam ntsug Yawm Soob Tseeg nyob, tsua qhov Yawm Soob Tseeg txom nyem hwv, tes Puj cia le tsiv ua nkauj faa moog nyob nyob ua ua hluas nkauj twb muaj ib plaab miv nyuas twb pum pum lawm.

Puj Soob Tseeg tug puj nyaaj tuaj pum txhaj tshev tshev, koj cia le tsov moog yuav vauv Tseeg, vauv Tseeg twb tsis tshev tsis ntaus koj le. puab ua neej txom nyem es koj tsis nyiam koj cia le tsiv xwb, koj sim xaav saib lug nyob es ntswb ntswb tau tej nam plaab nyuas zaig qos zig le ko, es koj yuav moog yug miv nyuas qhov twg, yeej tsis muaj chaw tsua koj nyob thab yug miv nyuas le huas,
Koj cia le tsov qaab moog xwb.

Ib ntsiv koj tej hluas ntsaug kws saib tsis taug koj, luas tsis has tas koj tej nug nce koj nua xwb, tshev tshev Puj Soob Tseeg. Tes Puj teb yog le Tseeg twb tsis tuaj tog kuv tsis zoo tsov qaab moog thab plaab luj luj lawm txaaj muag tsov qaab.
Txhob has tej ko le, vauv Tseeg txom txom nyem le cia tsov moog es moog tu vaaj tu tsev dlu qos dlav tsauv tawg kuam tsev suv twb qos so, tes nyiaj vauv Tseeg yuav yuav koj.

Puj Soob Tseeg cia le lug tuab leeg, lug txug Yawm Soob Tseeg thab Yawm Tsaav Lwv moog ua teb lawm tsis tau lug. Puj Soob Tseeg cia lug tu vaaj tu tsev tsauv tawg tsev suv qos so le tug puj nyaaj has qha nws thab ua mov tuab si tog.

Yawm Soob Tseeg thab Yawm Tsaav Lwv ua teb tsaus ntuj lug txug, ciav saib tsev suav tawg cig nchu suv so huas tsev cheb dlu qos dlav tseem poob sab has tas muaj tug sim zeej dlaab tsi. Puj Soob Tseeg hu qos loo, Tseeg meb twb moog teb lug lawm lov. Yawm Soob Tseeg, xaav tas muaj tug sim zeej dlaab tsi caag es yog koj, koj tuaj lov . Puj Soob Tseeg, tsi yog tuaj, kuv tsov lug yuav koj. Yawm Soob Tseeg, xaav xaav txom nyem hwv tes ua ib sab yuav tsawm tsis has dlaab tsi, ua neej kuj zoo le muaj moo thab ho yug tau ib tug tub (yog Yawm Nchaiv Yig) tes Puj thab Yawm Soob Tseeg cia sib sib hlub ua neej.

Yawm Soob Tseeg has tsua Yawm Tsaav Lwv, Lwv txom nyem hwv tes yog koj kaam nua, wb moog yuav Xwm Txaj Lab tsua koj.
Ob kwv tij tsawm moog yuav Xwm Txaj Lab tsua Yawm Tsaav Lwv, Puj thab Yawm Tsaav Lwv muaj tuab tug tub xwb ( yog Yawm Nyiaj Pov ) tsawm tsis muaj miv nyuas ntsiv le tes Yawm Tsaav Lwv tuaj ntsug Yawm Soob Tseeg ntuv ntoo pheej seev tas qos puj tsis muaj tub ntsiv le ntshai yuav moog yuav nam yau. Ob kwv tij txhaj moog yuav Puj Tsaav Lwv yau, maam le ho muaj cov tub ki tom qaab.

Puj thab Yawm Soob Tseeg ob tug tes muaj ob tug tub xwb (yog Yawm Nchaiv Yig thab Yawm Txooj Fuas ), tsis muaj moo Puj Soob Tseeg tsawm taag nws sim neej lawm. Yawm Soob Tseeg ntsug cov kwv tij coj Puj moog zais, thaum yuav muab puj zais Yawm Soob Tseeg moog cem lub hleb ciav lub npoo txag hleb dlaug dlaug kaab,
txhaj has tsua Puj tas Yig nam koj tau phem tsev hwv tes koj paab ob tug miv nyuas qos tag tsua es kuam peb lub neej sis le luas, kuv yuav ntsug ob tug miv nyuas ua nyuj dlaab tsua koj es koj xaj le tau kev moog thawj thab sai.

Tsis ntev Yawm Nchaiv Yig thab Yawm Txooj Fuas tav txiv, Yawm Soob Tseeg twb ua nyuj dlaab tsua Puj taag, Yawm Xyu kuam moog yuav nam puj Ntsum Puam, nws tsim txaj, txhaj le moog yuav Puj Ntsum Puam lug tsua Yawm Soob Tseeg maam le muaj cov tub ki tom qaab (yog Yawm Laj Pov, Yawm Txaj Tsaab, Yawm Zaam Puam thab ho saws ib tug ntxhais hu ua Xaab nua coj lug tsua huv peb tsev Hmoob LIS.

Peb cov Puj, Yawm, puab tej neej kws tsij le paub thab muaj lug tau xyaa tam,
tes lug ntsuag xaus nuav.

Taam sim nuav tej miv tub miv nyuas fuam vaam nyob tsua ntau lub teb chaws, sis le As mes lis kas, Faab kis, Thaib, Los tsuas, Guyane Faab kis, cov kwv tij kws Yawm Qhua Tsev Choj thab Yawm Mog Tsev ntev nyob tsua suav tuam tshoj paub tsi txug lawm.

Sau nub tim 18-12-2001
Tug pav cov lug ntsuag : LIS Xauv Tsheej
Tug sau cov lug ntsuag : LIS Ntsuab Vaaj

HMOOB TSAV NTUJ

Search

Hmoob Catholique Forum

Latest topics

Top posters

Tsev seev PajHuam

Hmong beauty nature

Compteur visitor

Hmoob Dab Neeg - Lub Noob Neej (*World Creation)

Hmoob Dab Neeg - Lub Noob Neej (*World Creation)

Re: Hmoob Dab Neeg - Lub Noob Neej (*World Creation)

Similar topics

Similar topics

Search Query

Display results as : Posts Topics
Advanced Search