Tsev neeg raug dej kuav tag lub neej txoj sia ntshe yuav muaj kwv yees li ntawm 7-8 tsev neeg nyob thoob plaws hauv Nplog teb. Tsev neeg dej nyab liaj mas muaj coob tshaj li ntawm 30 tawm yim neeg.
Cov choj hlau uas ib txwm muaj nyob khov kho rau sab xeev Xieng Khuang raug puas tsuaj tag nrho, tus twg yog choj hlau ces yuav tsum tau dam thiab puas tsuaj mus xwb xwb li, tus twg yog choj ntoo ces thiaj li nyob xwb.
Lub pas dej Tauv (ua taws xob)uas tsoom fwv Nplog tauv nyob rau Phoonsavanh los kuj tawg mus nyab laj mej pej xeem tej liaj yam puas tsuaj tag nrho.
Nyob rau sab xeev Xab Nyab Npus Lis uas yog lub Kuj Cuab Hooj Xaj, muaj 3 niam txiv tub mus pw zov lawv daim liaj thiab lawv lub pas ntses, hmo ntawv kuj los ib kob nag loj tas zaj tas zog li, thaum txog ib tag hmo dej daj rhuv raws tus kwj ha qhuav ntawd los mus, cov dej no muaj peev xwm kuav cov cav luaj kas tham thiab luaj phawv nrog rau nyuag tog khaub tog tsuag puv nkaus lub kwj ha ntawv los mus thiaj li los kuav kiag Huaj Vam Xyooj lawv 3 niam txiv tub lawm du lug, leej niam ces lawv nrhiav 3-4 hnub thiaj li mam nrhiav tau, hos Huaj Vam thiab Huaj Vam tus tub nkawv ces yeej nrhiav tsis pom los txog niaj hnub niam no li. Huaj vam nkawv kuj tseg nkawv 2 tug ntxhais yuav luag tiav hluas nkauj thiab tseg nkawv 2 tug tub tseem yau yau cia ua ntsuag rov tuaj tom qab.
Hmo dej kuav Huaj Vam lawv cov niam txiv tub ntawd, dej kuj Kuav ib tug me nyuam Nplog nrog Huaj Vam lawv mus lawm thiab, tus me nyuam Nplog los kuj nrhiav tsis tau li thiab. Hmoob thiab Nplog cov liaj uas nyob raws tus kwj ha ntawv ces yeej tsis seem ib daig kiag li, puav leej puas tsuaj lawm tag nrho huv tib si. lub sij hawm ntawd kuj muaj 3 niam txiv tub Hmoob pw zov lawv daim liaj nyob rau sab nram hav tsis deb ntawm Huaj Vam lawv thiab tab sis hmo ntawv xyov lawv dab tsev pab lawv los xyov yog ua li cas li, thaum yuav tsaus ntuj ces 2 niam txiv ntawv tus me nyuam txawm pib quaj tsis ntsiag li, tus me nyuam yeej quaj qhov yuav los mus tsev xwb xwb li, 2 niam txiv ntawv txawm muab tus me nyuam ntaus npaum li cas los tus me nyuam yeej tsis ntsiag li, ua mus ua los 2 niam txiv ntawv kuj cia li swb nkawv tus me nyuam ces 2 niam txiv laus thiaj li tau coj tus me nyuam los tsev nyob rau hmo ntawv lawm, ib tsam tsaus ntuj ces dej thiaj li los kuav Huaj Vam Xyooj lawv cov niam txiv tub lawm, tag kis 2 niam txiv uas coj tus me nyuam ntawv mus tsev lawm rov qab tuaj, thaum tuaj tshwm plaws tim ntug liaj ua cas tsis pom nkawv lub tsev liaj lawm, thiab ntsia na has uas cas caj hmab ceg ntoo puv liaj tag , Huaj Vam lub tsev los pluav tag mus rau hauv av lawm, nkawv lub los dej muab tshoob mus khuam tib lub niag khaub hlab tag, 2 niam txiv no thiaj li los raws cov tom zos mus nrhiav Huaj Vam lawv.
Nej ua siab ntev twm txog zaj no hais tias yog vim li cas hmo ntawv zaj thiaj li los kuav Huaj Vam thiab tus me nyuam nplog lawv mus lawm.
Ua ntej li 2 hnub ntawd, muaj ib yim Mab Daum ua ib thaj teb ze ze rau ntawm tus ntug kwj ha uas puab txoj kev tsheb mus rau Mueng Park Bang ntawd, lub sij hawm ntawd los yim Mab Daum no kuj mus pw teb thiab, muaj ib tag kis ua cas txawm muaj ib tug ntses choo nyob ntawm tus Mab Daum ntawd lub tsev teb, tus Mab Daum ntawd tus ntxhais los kuj zoo zoo nkauj thiab tiav hluas nkauj hlo lawm, tus ntxhais ntawd txawm muab tus ntses choo no qa mus pov rau puag nram kwj ha lawm, tag kis tom qab lawv sawv los los tus ntse choo nws kuj rov los nyob qhov qub thiab, tus ntxhais kuj rov qab muab tus ntse choo nqa mus pov rau nram kwj ha dua thiab, tag kis thib 3 lawv sawv los, los tus ntse choo nws kuj rov los nyob nws qhov qub thiab, yim mab daum ntawv tus ntxhais txawm xav mus xav los ces tus ntxhais ntawv txawm nqa tus ntse choo ntawv mus muag rau ib yim Nplog nyob rau nram nroog vim ntse choo muaj nqis heev li, tus ntxhais mab daum no kuj kuj coj tus ntse choo mus muag tau 1,000,000 Kip. Thaum muag tus ntse choo tag tus ntxhais no kuj rov qab los mus pw pem teb dua thiab, hmo tom qab kiag ces txawm pib los nag thaum tsaus ntuj, ib tsam ces thiaj li pib los nag loj zuj zus txog qhov los kuav Huaj Vam lawv 3 niam txiv tub thiab ib tug me nyuam Nplog mus lawm. Tsis paub hais li kob nag ntawv loj thiab tsis loj los Zaj muaj peev xwm ua toj pob peg nphau raws txoj kev tsheb ntawv los mus yuav luag ti rau lub nroog uas coj tus ntse choo ntawv los muag, sab qaum kev tsheb toj yeej pob liab pes vog los mus li lawm. Thaum zoo li no tag lawm zaj thiaj li los ua npau suav rau lawv hais tias kom lawv txhob tu siab rau Huaj Vam lawv vim muaj neeg nyiag lawv tus tub coj mus muag lawm es lawv raws lawv tus tub los mus xwb thiaj li raug rau Huaj Vam lawv lawm. Hos tus ntxhais Mab Daum no ces tau 2 tag kis kiag xwb cia li mob nthawv nthav tuag kiag mus lawm thiab. hais txog zaj no mas tseem tshauv ntau heev li.
Qhe 2: hnub tim 17/9/2011 no muaj 4 niam txiv tub mus pw xaj nam haib, zov teb nyob ze rau ntawm lub Meung Xieng Ngueng, xeev Luang Pra Bang. lawv kuj mus ua lawv lub tsev rau ntawm tus ntug dej Hoy Kong, hmo 17 tsaus ntuj ntawd los ib kob nag loj tshaj plaws uas nyob rau hauv keeb kwm yeej tsis pom dua li, kob nag no mas loj thiab tsis loj los kawg rau qhov tias yeej tsis yog los nag lawm, zoo nkaus li cia li muab thoob ncuav saum ntuj los xwb, hmo ntawv dej thiaj li los ntaus lawv lub tsev thiab kuav lawv cov niam txiv tub lawm tag nrho, leej niam muaj ib plab me nyuam tseem tab tom yuav so, 2 tug me nyuam tub, ib tug muaj 9 xyoos, ib tug 7 xyoo, tsis paub xyov yog vim li cas dej muab lawv kuav mus deb li 1 half mile, 2 tug me nyuam tub ntawv kuj plam mus rau tim ntug lawm, ib leeg poob ib qho, koj tsis paub kuv, kuv tsis paub koj li, 2 tug me nyuam no dej muab nkawv tsoo pob zeb pob ntoos ua rau nkawv ib ce doog ntsuab xiab npaum nkaus li xuas nkaj raus. Leej niam nrog rau tus me nyuam hauv plab los tau tag lub neej txoj sia lawm, tus txiv los kuj tau tag lub neej txoj sia lawm thiab.
Hmo los kob nag ntawv cov nyob nram zos yeej tsis paub li, thaum dej muab lawv kuav mus ces 2 tug me nyuam tub dim, tus muaj 9 xyoos thiaj li peem thiab nkag nkag los txog ntawm kev, muaj ib tug Mab Daum mus teb los thiaj li los pom tus me nyuam ntawd, tus Mab Daum no thiaj li coj tus me nyuam no los cuag cov nyob nram zos, ces cov nyob nram zos mam li mus nriav, thiaj li mus nrhiav tau tus me nyuam tub thib 2 sab heev li, thiab nrhiav tau tus niam tuag thiab khuam deb li 4 miles sab nram hav, hos leej txiv ces yeej nrhiav tsis tau los txog rau niaj hnub niam no li thiab.
Raws li cov neeg nyob hauv Nplog teb thiab Hauj Sam hais rau peb mas lawv hais li no: xyoo 2011 no tau muaj ib tug neeg tseem ceeb tau tag lub neej txoj sia mus lawm. tus neeg no thaum ua neej nyob los nws yeej tsis yooj yim. Lawv cia siab lawm tias tej zaum tus neeg no yeej rov mus txog Nplog teb lawm tiag, vim lub 4-5 hlis ntuj xyoo no kuj muaj zaj tawm khiav rau ub rau no thiab muaj dej nag loj khuav liaj kuav teb thiab txawv tshaj plaws li 2-3 tiam los lawm. Thiab lawv ntseeg tau lawm tias tej zaum yeej yuav tsum muaj kev hloov dua tshiab xwb xwb li, ib qho ntxiv tos lawv xav tias yuav tsum muaj ib yam dab tsi tshwm sim xwb xwb li mas vim tias 2 pog 3 yawg los mus tsuas hnov luag piav txog zaj xwb cas zoo li xyoo no cia li tau pom zaj ziam zuag ntawm qhov muag lawm tiag. Ua ntej ntawv lawv twb ua npau suav pom tus neeg tseem ceeb ntawv rov los txog Nplog teb lawm ua cas tau ib lub hlis tom qab xwb txawm cia li hnov tias nws tau tag lub neej txoj sia mus lawm. Thiab lawv tseem hais mus txiv tias tus neeg tseem ceeb no mas lawv hnov tias nws yog Zaj Txwg Zaj Laug tso los cawm Hmoob xwb, tam sim no nws nyob rau ib ntxeev ntuj lawm nws ua tsis tau li cas Zaj Txwg Zaj Laug thiaj li yuav tau tuaj coj nws rov qab los hauv Nplog teb no es mam tshwm sim dua raws li lawv hais, vim zaj twb pib ua rog nyob rau xyoo no lawm es dej nag thiaj li loj, thiab zaj thiaj li tawm khiav.
Yog li no hnub no kuv thiaj li siv lub sij hawm no los xa tsab xov no mus hlub tshua txog rau peb tsev neeg Hmoob uas raug kev txom nyem zaum no. Cov me nyuam tub ntsoj ntxhais ntuag, tij laug hnov thiab pom tej yam zoo li no, tij laug hlub nej kawg kiag li, tij laug lub kua muag poob thiab nrog vim hlub nej heev li. leej niam leej txi nrog yus nyob hais lus luag ntxhwb ntxhi ua cas pw ib hmos rov tuaj tag kis xwb vaj tse khaub hlab tag, cia li tsis pom niam thiab txiv los lawm, tsaus ntuj zus tsuas hnov kab noog quaj lawm xwb, niam thiab txiv lub suab hu yus cia li ntsiag to mus lawm, xav tias kheev lam yog dab ntub los npau suav es cia tsim dheev los los cas tsis zoo li lub siab xav. Txawm li ntawv los tij laug thov Faj Tim Huab Tais Ntuj pab tsom kwm nej cov me nyuam ntsuag thiab nawv mog...
Tus sau: Moos Vam Vaj USA(tojsiab.com)