ZAJ PUAM FAB: 1.
Khawv txhiaj, plees tsis sib tau, ib tug tuag tso ib tug tseg, mob siab thiab nco tshua tshaj plaws, Hais ua suab Hmoob moos loob,
1, Nim yais!!!! me Hmoob ntxhais nkauj xwb tus uas kuv nco, thaum wb tseem ua nkauj ua nraug nyob es, koj nim zoo nkauj puav tam li lub me paj txiv duaj nyob tuaj mus tawg tshiab, tawm rooj plaws ncig yuj yeev rau koj niam koj txiv lub mus paj tsiab, tham lo me lus txiaj saub kev seev tuaj mus dai siab, es kuv txiv leej tub thiaj li muab niam leej ntxhais li koj nco lub me ntuj tsaug tawm lis plaws rau lub mus ntuj tshiab os me Hmoob ntxhais nkauj xwb om!!!!,
1, Nim yais!!!! me Hmoob ntxhais nkauj xwb tus uas kuv nco, thaum wb tseem ua nkauj ua nraug nyob es, koj nim zoo nkauj puav tam li lub me paj txiv duaj nyob tuaj mus tawg tsis paub zaus, tawm rooj plaws ncig yuj yeev rau koj niam koj txiv lub mus paj tsiab peb caug, tham lo me lus txiaj saub kev seev tuaj mus ntxim siab txaus, es kuv txiv leej tub thiaj li muab niam leej ntxhais li koj nco lub me ntuj tshiab tawm lis plaws rau lub mus ntuj tsaug os me Hmoob ntxhais nkauj xwb om!!!!,
2, Nim yai!!!!!! Me Hmoob ntxhais nkauj xwb tus uas kuv tshua es, thaum wb tseem ua nkauj ua nraug nyob es, wb tau tuav tes ruj rawv tawm rooj li plaws zoo puav tad ntua nkawm me noog liaj noog luv ya tav yuj yees rau cuaj ha los yim lub roob, nim no koj cev ntaj xib ntsug tuag tag nrho yuav muab kuv txiv leej tub nrauj li ncua cia rau leej niam leej txiv lub mus luaj qoob, txiv leej tub nim muaj koj nco nco es tsa ncauj suab seev yuj yees nrog niam kab tus me noog qhoob, Ntuj tom qab no kuv tsis tau koj lawm tiag tiag es kuv ncig yuj yeev tuaj txog wb tej me qub hneev tes coj hneev taw nim nphob lis xuav tsis pom koj es tsuas pom tau tus me hav nroj ntxuag tus me hav xyoob, es txiv leej tub thiaj quaj tus me txiaj ntsim los kua muag poob os me Hmoob ntxhais nkauj xwb os,!!!!!
2, Nim yai!!!!!! Me Hmoob ntxhais nkauj xwb tus uas kuv tshua es, thaum wb tseem ua nkauj ua nraug nyob es, wb tau tuav tes ruj rawv tawm rooj li plaws zoo puav tad ntua nkawm me noog liaj noog luv ya tav yuj yees rau cuaj roob los yim lub tog, nim no koj cev ntaj xib ntsug tuag tag nrho yuav muab kuv txiv leej tub nrauj li ncua cia rau leej niam leej txiv lub mus luaj nrog, es txiv leej tub nim muaj koj nco nco es tsa ncauj suab seev yuj yees nrog niam kab tus me noog nqov os, Ntuj tom qab no kuv tsis tau koj lawm tiag tiag es kuv ncig yuj yeev tuaj txog wb tej me qub hneev tes coj hneev taw nim nphob lis xuav tsis pom koj es tsuas pom tau tus me hav nroj ntxuag tus me hav mog es txiv leej tub thiaj quaj tus me txiaj ntsim los kua muag nrog os me Hmoob ntxhais nkauj xwb os,!!!!!
Chim laj xeeb laj luam cua khuam nkaus tuaj rau tim toj, es daj tsis soj, es deev tuaj tsis tau koj, ces ntshe yuav chim siab loj lug los mus txog hnub ploj, es mam li mus teem caij li nroos rau ntxwj xib nyoog hav paj mus zaub nroj, es mam li txia lij ntshis ua suav txiv nyuj twm es ho nqov quj qaws nyob mus nrhiav koj!!!, tiag os me Hmoob!!!!!om,
------------------------------------------------------------------------------------------------------------------------------
ZAJ PUAM FAB: 2.
khawv txhiaj plees, daj deev tsis sib tau, es nco thiab tshua tshaj plaws: Hais ua suab Hmoo moos Pham.
1, Hom ntuj os me Hmoob niam leej ntxhais lawm nkauj xwb es!!!! Tos xyoo no nim kho siab lawm luaj no los vim yog tseem nco nco thaum ib cim paj tsiab peb caug tawm tas tej niag sib plhawv, es wb nim hais ntxuaj ntxog puag xub pwg npawv, es tuav tes lawm tas tej mus sib rawv, ncig yuj yees lub ntuj tshiab tawm li plaws lub mus ntuj ntsawv, es tham ntxuaj ntxog txiaj saub kev mus dai plawv, es daj tsis yuad deev tsis tau los vim yog koj niam koj txiv nim ntshaw tas nraj lum Hmoob zeeg teev me nyiaj txiag los qhwv sov tas tej mus sib tsawv, thiaj muab niam leej ntxhais li koj quas li plhuav rau nraj lum Hmoob zeej lub rooj deg los lawm rooj cawv, es thiaj mob luag leej tub siab ncus tas lawm tej mus sib thawv, nim tam ntua plaj teb es plam li plaws tsis tau tuaj nrog luag hlawv, os Koj!!!!!ne!!!!! puas yuav nco kuv!! lawm ntsuj ntsoov nim mus txog ntua hnub es koj ho laus laus lawm qaj nkoos tawm rooj li plaws nrig cwj lis tawv, nim zaum de tes tas tej mus sib nrhawv, Ho ntshe kuv ces yuav seev nruj nraim wb me khaub plees nkauj nraum I tej mus chaw sawv, tus me txiaj ntsim kua muag nim ntxhee li hawv, los nim yog tseem nco nco kuv niam leej ntxhais li koj tus me paj plhu kab lia lawm los tom txig nkawv, es ntshe yuav muab koj seev nruj nraim nim mus txog ntua hnub cev txiaj zam qaug yeev mus pw li ko rau ntiaj nrag lub nruab thawv, los tseem tshuav ntsuj plig mam es mam li mus tos ntua koj rau lawm ntxwj xib nyoog lub mus rooj vag nyob tuaj mus vuam ntawv, os me Hmoob niam leej ntxhais es!!! Om!!,
1, Hom ntuj os me Hmoob niam leej ntxhais lawm nkauj xwb es!!!! Tos xyoo no nim kho siab lawm luaj no los vim yog tseem nco nco thaum ib cim paj tsiab peb caug tawm tas tej niag sib plo, es wb nim hais ntxuaj ntxog puag xub pwg npo, es tuav tes lawm tas tej mus sib hlo, ncig yuj yees lub ntuj tshiab tawm li plaws lub mus ntuj so, es tham ntxuaj ntxog txiaj saub kev mus sib nco, es daj tsis yuad deev tsis tau los vim yog koj niam koj txiv nim ntshaw tas nraj lum Hmoob zeeg teev me nyiaj txiag los qhwv sov tas tej mus swb so, thiaj muab niam leej ntxhais li koj quas li plhuav rau nraj lum Hmoob zeej lub rooj tshoob los lawm rooj kos, es thiaj mob luag leej tub siab ncus tas lawm tej mus sib tho, nim tam ntua plaj tshuab ceg ntos es ntos li zus tsis nto nqog, os Koj!!!!!ne!!!!! puas yuav nco kuv!! lawm ntsuj ntsoov nim mus txog ntua hnub es koj ho laus laus lawm qaj nkoos tawm rooj li plaws nrig cwj lis qho, nim zaum de tes tas tej mus sib nrho, Ho ntshe kuv ces yuav seev nruj nraim wb me khaub plees nkauj nraum I tej mus chaw so, tus me txiaj ntsim kua muag nim ntxhee li ho, los nim yog tseem nco nco kuv niam leej ntxhais li koj tus me paj plhu kab lia lawm los tom txig nko, es ntshe yuav muab koj seev nruj nraim nim mus txog ntua hnub cev txiaj zam qaug yeev mus pw li ko rau ntiaj nrag lub nruab qho, los tseem tshuav ntsuj plig mam es mam li mus tos ntua koj rau lawm ntxwj xib nyoog lub mus rooj vag nyob tuaj mus vuam ntawv, os me Hmoob niam leej ntxhais es!!! Om!!,
2, Hom ntuj os niam leej ntxhais Hmoob lawm nkauj xwb es!!!!!! Tos xyoo no os kho siab lawm luaj no los vim yog qaug niam kab zog ces niam kab nyob tuaj tsis txo nroj, qaug luag leej tub zog lawm luj luas tsis xav mus ua noj, los vim yog nco nco koj, es ntshe yuav muab koj nco lawm ntsuj ntsoov mus txog ntua hnub nim laus laus qam nkoos twb yuav ploj, tiag os koj!!!!!! Ne!!!!! puas yuav nco kuv lawm ntsuj ntsoov mus txog ntua hnub uas koj ho laus laus lawm qaj nkoos niam nkauj hnub qaij li zus yuav dua toj, es me av luaj nim nphob li tsus nyob mus tuaj nroj, los koj puas nco li ntsoov txia lawm li ntshis ua niam dab tsoj tsuam sawv los coj, seb wb me khaub plees nkauj nraum puas yuav zoo puav tam ntua suav nrig nraj vaum me nyuj twm nim ho nqov lawm quj qaws nyob tuaj mus cuag npoj, os me leej ntxhais lawm nkauj xwb!!! Om,
2, Hom ntuj os niam leej ntxhais Hmoob lawm nkauj xwb es!!!!!! Tos xyoo no os kho siab lawm luaj no los vim yog qaug niam kab zog ces niam kab nyob tuaj tsis txo tsuag, qaug luag leej tub zog lawm luj luas tsis xav mus ua qhua, los vim yog muab lawm koj tshua, es ntshe yuav muab koj tshua nruj nraim mus txog ntua hnub nim laus laus qam nkoos twb yuav tuag, tiag os koj!!!!!! Ne!!!!! puas yuav nco kuv lawm ntsuj ntsoov mus txog ntua hnub uas koj ho laus laus lawm qaj nkoos niam nkauj hnub qaij li zus nqis yuav dua ncua, es me av luaj nim nphob li tsus nyob mus tuaj tsuag, los koj puas nco li ntsoov txia lawm li ntshis ua niam dab tsoj tsuam ho sawv los dua, seb wb me khaub plees nkauj nraum puas zoo puav yuav zoo tam ntua suav nrig nraj vaum me nyuj twm nim ho nqov lawm quj qaws nyob tuaj mus cuag dua, os me leej ntxhais lawm nkauj xwb!!! Om,
Nim chim laj xeeb laj luam cua, khuam nkaus tuaj rau lub ntsis tsuag, daj tsis tau puag, deev tuaj tsis tau yuad, ces chim siab loj lug lawm los mus txog hnub tuag, mam li mus teem caij nroos rau ntxwj xib nyoog lub hav mus vaj zaub quag, mam li mus txia lij ntshis ua suav txiv nyuj twm es ho nqov lawm quj qaws nrhiav koj nyob mus nrau dua os me Hmoob es!!!! Om,
Home
