By: Kimpov
Tojsiab.com
Posted 22 June 2011 - 12:53 AM
Hmoob Lub Neej Ntu Tsov Rog Nyablaj
Txij ntua thaum........Fabkis swb rog
uas nws yog............1-9-4-5
Fabkis pib.............sau nra rov qab
mus rau sab............ntxeev ntuj nraum ub
ces lawv lub...........me txim ua rog
Hmoob thiaj yog........tus ris tag nrho
Fabkis tso.............lawv lub me nra
rau Hmoob nqa..........Hmoob ris Hmoob ev
lawv mus tsev..........lawv tso lub txim
Hmoob raug tsim.........vim pab Fabkis
Hmoob tau ris..........lub txim tag nrho
Nplog liab rho.........sawv tooj sawv hlau
maj mam thau...........pav tug zuj zus
pav txhua tus..........cov pab Fabkis
lawv mag ris...........fab kis lub txim
Nplog liab tsim........tsis ntshai tub qaug
Hmoob thiaj raug.......ntes coj mus kaw
mag xauv taw...........xauv tes txhua tus
mag coj mus............tu hmab kav theej
ces lub neej...........thiaj li tau xaus
lub hauv paus..........yog vim li ntawv
peb Hmoob lawv.........thiaj li khiav nkaum
rau puag saum..........tej toj roob siab
pos huab niab..........thiaj yuav dim siav
Hmoob thiaj khiav......rau ub rau no
tos Hmoob nco..........Meskas twb tuaj
thiaj rov muaj.........txoj kev tsov rog
ntawv txawm yog........Meskas tuaj pauv
Fabkis hauv............teb chaws Lostsuas
kev sib tuas...........thiaj rov sawv dua
thiaj rov ua...........rau peb haiv Hmoob
kua muag poob..........dua ib zaug ntxiv
Meskas siv.............Hmoob ua yawm sij
coj mus tsij...........rau tom tshav rog
ntawv txawm yog........Meskas tau thov
hlob Vaj pov...........los ua tus pab
Meskas thab............Nyablaj qaum teb
thiaj kom peb..........Hmoob nrog mus tua
Meskas ua..............tus sawv tom qab
es mam pab.............riam phom mos txwv
Meskas twv.............tua nrog Nplogliab
Nyablaj thiab..........Nplogliab koom tes
hos Hmoob ces..........tawg ua ob pab
muaj ib nrab...........mus koom Nyablaj
Lauj Faiv Ntaj.........Npliaj Yob tsev neeg
thiaj mus ntseeg.......mus pab Nplogliab
tshuav coob thiab......tab sis tsis tham
zoo hwj tsam...........mam piav kom txhua
kev sib tua............thiaj tau tshwm sim
muaj qee chim..........Hmoob rov sib tuas
yog muab xyuas.........mas tsis tsim nyog
kev ua rog.............tsuas loj zuj zus
tsis muaj tus..........yuav los daws tau
ces thiaj dhau.........ua ntsug rog loj
sib tua zoj............tau ib nyuag ntus
Nplog liab mus.........thov Nyablaj pab
ces nyob sab...........Noomhej kub ntxhov
hlob Vaj pov...........thiaj tau rhais chaw
mus cuab taw...........nyob rau Looj ceeb
thiaj tau teeb.........ua lub nroog loj
Meskas coj.............dav hlau tuaj pab
nyob rau sab...........Looj ceeb xas thoos
thiaj yog moos.........yog chaw cuab zog
kev ua rog.............thiaj rov sawv dua
thiaj sib tua..........loj dua yav tas
toj roob nras..........uas nyob Xeev khuam
ib sij huam............yog chaw sib tua
muaj ntau pua..........tus tub rog Hmoob
tau nyob thoob.........toj roob hauv pes
qhov ntawv ces.........lawv hu ua khaib
Hmoob raug faib.......mus kawm dav hlau
kuj muaj ntau..........tus tub hluas Hmoob
uas nyob coob..........rau sab looj ceeb
tau lub keeb...........tshaj lij dav hlau
lawv kuj tau...........kawm tsav nyab hoom
tau lus foom...........ua tub tshaj lij
thauj ntau fij.........me npoos mus yuj
coj mus tsuj...........rau Nyablaj liab
tuag sis niab..........puv toj puv pes
Xeev khuam ces.........qhov npoos liab vog
npaum nkaus nplog......laij liag cog nplej
yam li tej.............teb uas yus hlawv
nplaim taws sawv.......txij ib nta ntuj
dav hlau yuj...........tas hnub tsis so
pa taws ncho...........cuag Hmoob hlawv teb
tiaj rhawv zeb.........muaj neeg tuag coob
tsis hais Hmoob........los yog Nyablaj
tuag coob tshaj........mas yog Nplog liab
muaj ntau txhiab.......tus me peeb zeej
tag sim neej...........rau tiaj rhawv zeb
sab qaum teb...........ntawm xeev xeev khuam
yawg Kais xuam.........thawj coj Nplog liab
thiab ntau txhiab......tus me tub rog
uas lawv nrog..........Kaisxuam ib phaum
tau khiav nkaum........rau hauv qhov tsua
lawv teeb ua...........lub yeej tub rog
mas nws yog............nyob rau Vias xais
thaj chaw hais.........no nyob Xas niam
nyob puas ciam.........rov sab Nyablaj
hlob Pov vaj...........uas nyob looj ceeb
thiaj tau teeb.........ib lub yeej rog
uas nws yog............nyob rau pham thij
tsoom kwv tij..........nyaj nej yuav nco
lub roob no............yog roob zeb tsuas
kev sib tuas...........yeej tsis tau xaus
Hmoob cov laus.........cov hluas txhua tus
thiaj tau mus..........ua tub rog tag
hais tsis dag..........kuv txiv tus kheej
los twb yeej...........tau ua tub rog
tau mus nrog...........Nplogliab sib tua
thiaj tau ua...........rau nws xiam hlwb
vim mos txwv...........ya ntob pob kub
ntuj kuj rub...........tsis pub txiv tuag
txiv thiaj vuag........tau nws txiaj siav
yog yuav piav..........mas yeej yuav ntev
ces lam tev............me me li no
vim kuv ho.............yug tau tom qab
ces laj fab............tswv yim tsis txaus
raws cov laus..........thiab raws keeb kwm
uas tau zwm............sau tseg cia mas
Mes lis kas............tau kom Vaj pov
thiab peb cov..........me tub rog Hmoob
uas nyob coob..........rau sab looj ceeb
sib zog txeeb..........kom tau xeev khuam
tua Kais xuam..........txeeb yuav Xas niam
hos me riam............me phom mos txwv
mas tsoom fwv..........Mes kas mam pab
txawm raug sab.........los ua siab loj
yog tias txoj..........hmoo ho lam zoo
ho txeeb loo...........tau ob lub xeev
uas kuv teev...........npe saum toj no
yuav mauj hlo..........los ua Hmoob li
tsaus ntuj nti.........rau Hmoob lub neej
vim tias pheej.........sib tua tsis so
tos Hmoob nco..........twb tuag coob heev
ob lub xeev............Xias khuam Xas niam
muaj poj niam..........coob tus ua ntsuag
poob kua muag..........vim tias txiv xiam
tsuas tshuav niam......tu cov me nyuam
kev kob huam...........thiaj li raws cuag
vim txiv tuag..........rau tom tshav rog
ces tsuas yog..........hnov lub moo tuag
lub ntsej muag.........ces yeej tsis pom
vim nyob tom...........tshav rog kub ntxhov
muaj qee cov...........muab tau los tha
rau neej tsa...........kwv tij tau pam
rov qab tham...........txog kev sib tua
nyob txhua txhua.......lub me ncov roob
tub rog Hmoob..........yeej nyob txhua nrho
nyob puv nto...........tej me kaum hav
ua rog nyhav...........yog xyoo 6-8
Mes kas tsim...........riam phom mos txwv
xa nrov fwv............tuaj rau looj ceeb
Vaj pov teeb...........muaj ntau lub khaib
sib tua haib...........mas yog peb Hmoob
nyob saum roob.........muaj tshav dav hlau
yeej tsaws tau.........txhua lub sij hawm
Vaj pov tawm...........los tshaj lub xo
tua zaum no............kom txhob txuag siav
tej laus piav..........saum ib nta ntuj
dav hlau yuj...........tas hnub tas hmo
Mes kas tso............li 2 lab tonnes
ntau tshaj mas.........yog cov npoo npib
pov sib tib............puag nram qab teb
ti rhawv zeb...........xeev khuam xas niam
tuag coo diam..........nyob rau xyoo no
zoo li ho..............tsis muaj tsawg xyoo
los txog loo...........xyoo xya caum tsib
Meskas pib.............swb cai ua rog
nws tsis yog...........swb kev sib tua
UN ua..................tus tuaj txiav txim
Mes kas thim...........thiaj tsis ua rog
yeeb vim yog...........lawv swb txoj cai
Mes kas ntshai.........ces tso tes plau
thiaj ua rau...........peb haiv me Hmoob
kua muag poob..........tawm los ntws sis
lub 5 hlis.............1-9-7-5
Vaj pov pib............khiav tawm teb chaws
Hmoob sawv daws........thiaj tawg sab sua
khiav puv ntua hauv qab ntuj no lawm xwb tiag Hmoob!
Tsuas yog lam sau rau sawv daws tau nyeem ua si xwb, yog tias lo twg tsis zoo mloog los sis tsis raug no thov neb 2 tug ua tij ho pab kho rau thiab, yuav muaj lus ua neb tsaug.