Kwvtxhiaj Hluas Nkauj Tuag Tso Hluas Nraug Cia

Cov phoojywg tsis pom nej leej twg tuaj cia kuv hais ib zaj kwvtxhiaj los deev nej siab kom nej tuaj cuav zos. Kuv zaj kwvtxhiaj no yog kuv hais raws kuv lub neej yav ntuj qub qab xyoo 1982-84 ntawd pub rau nej mloog tias txoj kev ua nkauj nraug nyob hauv lub ntiajteb no muaj kev kho siab, tusiab thiab khib siab npaum licas yog tsis sib tau thiab ib tug ncaim lub ntiajteb los lawm es tso ib tug tseg. Xyoo no kuv rov ncig mus txog kuv tus qub phoojywg wb tej kev nyob yav dhau los uas yog nws tau tso lub ntiajteb tseg tom qab kuv tau ncaim nws li 2 lub xyoo lawm. Cia kuv tuaj nroo rau nej mloog vim nws tsis hnov lawm.

Ntuj ne me Hmoob nkaujxwb tus kuv nco thaum koj thiab kuv wb tseem ua nkauj ua nraug nyob koj nim zoo nkauj puabtam li koj niam thiab koj txiv tsob me paj txiv duaj nyob mus tawg tshiab...kuv me txiv leej tub thiaj li muab koj lub cev ntaj ntsug lub meejmom mus zoo nkauj nco lub me ntuj tsaug tawm lis plaws rau lub mus ntuj tshiab.

Ntuj ne me Hmoob nkaujxwb tus tus kuv nco thaum koj thiab kuv wb tseem ua nkauj ua nraug nyob koj nim zoo nkauj puabtam li koj niam thiab koj txiv tsob me paj txiv duaj tawg tshiab tsis txawj zaus....kuv me txiv leej tub thiaj li muab koj lub cev ntaj sib ntsug lub meejmom mus zoo nkauj nco lub ntuj tshiab tawm lis plaws rau lub me mus ntuj tsaug.

Ntuj ne Hmoob nkaujxwb tus kuv tshua thaum koj thiab kuv wb tseem ua nkauj ua nraug lis yees nyob wb tuav tes rawv tawm rooj plaws nim zoo puabtam li ntua nkawm me noog liaj noog luv ya tav yujyees tej me mus laj roob....nim no koj cev ntaj sib ntsug ploj tuag tag nrho yuav muab kuv me txiv leejtub nrauj li ncua cia tuaj tom qab xyoo li no kuv ncig lis yeev tuaj txog wb tej me qub chaw nyob nim nphob lis xuav tsis pom koj tsuas pom wb tej me chaw nyob twb hlob mus ciaj tag tus me hav pos ntxuag tus me hav xyoob....kuv me txiv leej tub nim nco wb me kev qub plees nkauj nrauj ua luaj li xav tias tsis quaj los tus me txiaj ntsim kua muag sib tw poob.

Ntuj ne Hmoob nkaujxwb tus kuv tshua thaum koj thiab kuv wb tseem ua nkauj ua nraug lis yees nyob wb tawm rooj plaws nim zoo puabtam li ntua nkawm me noog liaj noog luv ya tav yujyees tej me mus laj tog....nim no koj cev ntaj sib ntsug ploj tuag tag nrho yuav muab kuv me txiv leejtub nrauj li ncua cia tuaj tom qab xyoo li no kuv ncig lis yeev tuaj txog wb tej me qub chaw nyob nim nphob lis xuav tsis pom koj tsuas pom wb tej me chaw nyob twb hlob mus ciaj tag tus me hav xyoob ntxuag tus hav pos....kuv me txiv leej tub nim nco wb me kev qub plees nkauj nrauj ua luaj li xav tias tsis quaj los tus me txiaj ntsim kua muag sib tw nrog.

Txiv tub, cas xyoo no luag cav zoj tias kho suav nyuj twm i siab es suav nyuj twm i tsis nraug kiab. Plees nkauj nraum zoo luaj no, daj dees tsis tau leej tub li koj ces cia tuag los yuav tsis nraujj siab.


Txiv tub, cas xyoo no luag cav zoj tias kho suav nyuj twm i siab es suav nyuj twm i tsis nraug khw. Plees nkauj nraum zoo luaj no, daj dees tsis tau leej tub li koj ces cia tuag los yuav tsis nrauj ntsws.

Txiv tub nco tib ntsuj ntsoov tias thaum niam leej ntxhais ua nkauj qas yeev nyob toj lug lim taim lub roob ncaib. Txiv tub nim nyiaj hmo los yoo tshaib, tuaj cuag kom tau kuv niam leej ntxhais.


Txiv tub nco tib ntsuj ntsoov tias thaum niam leej ntxhais ua nkauj qas yeev nyob toj lug lim taim lub roob ntxho. Txiv tub nim nyiaj tshaib los yoo hmo, tuaj cuag kom tau kuv niam leej ntxhais txhua hmo.

Chim laj xeeb xaus xi daim nplooj qhaus, plees nkauj nraum zoo luaj no daj dee tsis tau txov leej tub li koj ces ntshe yuav nco nco mus txog hnub laus.

koj seev kwv txhiaj tu siab ua luaj li Hnub no koj mam paub ces twb lig lig lawm nas me koj txiv