Home
** Kev txi xwm kab ** |
Ib xyoo 12 lub hli puag ncig los txog, sawv daws ua dab peb caug, Lwm sub,Cheb sub, hu plig,txi xwm kab, ntov pob ntoos.
I. Txi xwm kab.
1.Muab Ib tug lau qaib, 1 com ntawv, 5 tswm xyab 1
hwm xav txheej thiab 1 hwj caw los cia rau ntawm
yuav teev xwm kab.
2.Txiav 1 daim xwm kab tshiab, coj los hloov daim
xwm kab qub.
3.Yus tuav tus qaib tig rau pem xwm kab thiab
hlawv 5 tswm xyab, yus txi lus suav li no:
Sib lauj neb xwm kab txhiaj meej auj, neb txaim tej huab ngub laim mas neb thooj ngub laim ka cuab, neb txaim tej nkaim ngub laim mas neb thooj ngub laim xwm kab txhiaj meej.
Xwm kab txhiaj meej auj, teev tiam koob cib yij nyeej tshwj laij mas koob cib yij kum, xav txheej mas yij com,tshaj xyab vws tswm,cawv tshuaj mas xwm pib teev ceem neb xwm kab txhiaj meej laij txum cuab, neb pov nkub yij cuab zeej mas pov tej hos hos, xwm kab txhiaj meej auj.
Neb pov yij pes nyeem puj tseeb sem yim kuj zeem xwm kab txhiaj meej, hos zeem mas haj ngub, thawj saw mas khaij ngub meem,lwm saw mas xoom nkub txheej auj, thawj saw mas khaiv ngub chom, lwm saw mas xoom ngub hom, ngub sum yij tee mas cam yij pas thee, ngub sum yij tam mas cam yij vam auj xwm kab txhiaj meej auj.
Ngub sam pub mas ceem yeej ntxws, ngub suam pub mas ceem ceeb ntxws auj. Ngub tshij puj txos tshav puj txawj, Ngub yeej ntxws ceeb ntxws laij tsuj tseeb thawj, ngub tshij puj txhawj tshav puj txos, ngub yeej ntxws ceeb ntxws laij tuaj pos,xwm kab txhiaj meej auj.
Ngub yas nywj laim tsheej sab, yas muas laim tsheej cim yas cis mas laim mas ceem, yas yuas laim mas sis, xwm kab txhiaj meej auj.
Ngub txum pob kw tib tawm muas vis xwm kab txhiaj meej auj.
Yij nyeej tshwj laij koob cib yij kum xav txheej mas
yij com, tshaj xyab mas vws tswm,cawv tshuaj mas xwm pib teev ceem neb xwm kab txhiaj meej laij txuj cuab, pov ngub yij cuab zeej mas pov tej hos hos, kuv xwm kab txhiaj meej auj.
4.Hais lus suav tas,ho hais lus li no:
Auj! xwm kab txhiaj meej pem xeeb tsawm sis ov, hnub
no zoo hnub zoo nyoog, xyoo laus tas xyoo tshiab tuaj
tsawm sis ov, kuv tuaj 1 tug lau qaib qua qaws tsawm sis
ov, 1 com ntawv 5 tswm xyab, 1 hwm xav txheej, teev tiam
txog kuv xwm kab txhiaj meej pem xeeb los zov vaj zov
tsev tsawm sis ov.
Tus koom tus zoo tus tiam tu sawv xwm kab txhiaj meej
pem xeeb ov. Los zov vaj zov tsev los pov hwm tub pov
hwm kiv, pov hwm niam pov hwm txiv,xwm kab txhiaj meej
pem xeeb ov.
Leej hlob mus laj fab ua kaus tooj roos, leej yau tus
toob fab ua kaus hlau thaiv, xwm kab txhiaj meej pem xeeb
ov.
Neej los rub tes, dab los kwv qws rauj qws hlau ntaus
ntiaj tog qaum pes. Neej los rub zog, dab los kwv qws
rauj qws hlau ntaus ntiaj tog, xwm kab txhiaj meej pem
xeeb ov.
Xyoo laus tas xyoo tshiab tuaj, luag ntxhiav luag ntxhi
kuv koom txi kuv xwm kab txhiaj meej pem xeeb los lees
qaib lees noog, lees xyab lees tsig, lees xyab lees ntawv
lees dej lees cawv,xwm kab txhiaj meej pem xeeb auj.
Luag ntxhiav luag ntxhi los pov kuv ib tse 9 5 16 leej
leej hlob mus laj fab ua kaus tooj thaiv dab txeeg, leej
yau mus toob fab ua kaus hlau ntis dab qus auj.
Kuv ib tse 9 5 16 leej kom nyob 10 puag niaj 10 puag
xyoo, tsis muaj txiab xeeb txiab nkeeg, noj qav paug plab
haus dej paug cev,xwm kab txhiaj meej pem xeeb ov,
Luag ntxhiav luag ntxhi los pov hwm niam pov hwm txiv
pov hwm tub pov hwm kiv,pov hwm qoob pov hwm loo,pov hwm
tsiaj pov hwm txhuv ov, xwm kab txhiaj meej pem xeeb ov.
Los lees qaib lees noog, lees tsiaj lees txhuv ov.
5.Muab tus qaib txi xwm kab los tua, dob plaub
qaib tub ntshav los lo xwm kab,ces muab tus qaib
txi xwm kab mus hau.
II.Hau qaib siav rov txi xwm kab dua.
1. Muab tus qaib txi xwm kab hau siav ntawv, los rau 1 lub Phaj, muab ib qho mov tso rau lub phaj, hais ib phiab kua nqaij qaib, 1 lub khob rau cawv, 1 rab diav los txawb rau saum lub rooj hauv qab daim xwm kab.
Muab 1 com ntawv, 1 hwm xav txheej thiab daim xwm kab
qub los tso ib sab ntawm lub rooj.
2.Yus muab 5 tswm xyab hlawv tuav, fij xwm kab li no:
Kuv xwm kab txhiaj meej pem xeeb ov, ua nqaij ua hno
siav, yuav fij txog xwm kab, xwm kab luag ntxhiav los lees txheej, fij txog los yej,los yej luag ntxhi los lees yim.
Xwm kab txhiaj meej pem xeeb tsawm sis ov, xyoo laus
tas xyoo tshiab tuaj ua nqaij ua hno siav, kuv yuav teev
yuav tiam yuav koom yuav txi txog kuv xwm kab txhiaj meej
pem xeeb, luag ntxhiav luag ntxhi los lees nqaij lees hno.
Lees nqaij lees hno tas, yuav lees dej lees cawv, lees
xyab lees ntawv xwm kab txhiaj meej pem xeeb ov. Xyoo
laus tas xyoo tshiab tuaj , kuv koom kuv txi kuv teev
kuv tiam txog kuv xwm kab txhiaj meej, lees txheej lees
yim luag ntxhiav luag ntxhi, ua nqaij ua hno siav luag
ntxhiav luag ntxhi, los lees nqaij lees hno lees nyiaj
lees txiaj, yuav los pov hwm kuv ib tse 9 5 16 leej, leej
tub leej ki leej niam leej txiv rau vaj rau tsev.
Leej hlob mus laj fab ua kaus tooj thaiv, leej yau mus
toob fab ua kaus hlau ntis, neej los rub zog rau nruab
vaj nruab tsev, dab los kwv qws rauj qws hlau ntaus ntiaj
tog qaum pes, neej los rub zog rau nruab nrog, dab los
kwv qws rauj qws hlau ntaus rau ntiaj tog, Kuv xwm kab
txhiaj meej pem xeeb ov.
Hais li no tas, muab cov xyab txhos cia.
3.Fij dej fij cawv fij nqaij fij hno.
- Tuav khob cawv hais li no:
Auj! kuv yuav fij dej fij cawv, xwm kab txhiaj meej pem
xeeb, luag ntxhiav luag ntxhi xyoo laus tas xyoo tshiab
tuaj, kuv teev kuv tiam txog kuv xwm kab txhiaj meej pem
xeeb,luag ntxhiav luag ntxhi los lees dej lees cawv
auj, muab khob cawv nchuav rau ib sab rooj.
- muab rab diav los, de ib qho nqaij qaib, ib qho mov
thiab kua tso rau rab diav, fij li no:
Auj! kuv fij dej fij cawv tas, kuv yuav fij nqaij fij
hno, kuv xwm kab txhiaj meej pem xeeb ov,xyoo laus tas
xyoo tshiab tuaj, kuv teev kuv tiam kuv koom kuv txi txog
kuv xwm kab txhiaj meej pem xeeb, ua nqaij ua hno siav
luag ntxhiav luag ntxhi los lees nqaij lees hno auj, kuv
xwm kab txhiaj meej pem xeeb ov, muab rab diav nchuav rau
ib sab rooj.
- Muab com ntawv, hwm xav txheej thiab daim xwm kab qub
los tso ntawm ib sab rooj hauv pem teb, fij li no:
Auj! kuv fij dej fij cawv, fij nqaij fij hno tas, kuv
xwm kab txhiaj meej pem xeeb ov, xyoo laus tas xyoo tshiab tuaj,kuv teev kuv tiam kuv koom kuv txi txog kuv xwm kab txhhiaj meej pem xeeb, luag ntxhiav luag ntxhi los lees xyab lees ntawv lees nyiaj lees txiaj auj kuv xwm kab txhiaj meej pem xeeb ov.
Xyoo laus tas xyoo tshiab tuaj,los pov hwm kuv ib tse
9 5 16 leej, ntsuj niam ntsuj txiv ntsuj tub ntsuj ki,
leej hlob mus laj fab ua kaus tooj thaiv dab txeeg, leej
yau mus toob fab ua kaus hlau ntis dab qus, kom kuv ib
tse nyob 10 puag niaj 10 puag xyoo auj, kuv xwm kab txhiaj meej pem xeeb ov. Muab teeb ntais zes cov ntawv hlawv rau.
4.Muab ib txoj hlua los khi tus qaib txi xwm kab, dai cia
ntawm ib sab xwm kab, tsis pub kom* thiab miv noj.
III. Ntov pob ntoos xiab 1 thiab xiab 3.
Kev ntov pob ntoos, yus tsuas laig txij yus txiv phaj
los xwb.
1. Tag kis xiab 1, muab tej qub nqaij noj tsis tas los
rhaub, muab ib lub phaj tsum los rau 1 taig mov, 1 taig
nqaij 1 taig kua, muab ib co rooj zaum los txawb ncig lub
rooj rau mov ntawv, muab ib co diav los txhos ncig taig
mov, muab 1 hwj cawv thiab 1 lub khob los tso ntawm ib sab phaj tsum, yus laig cawv tas li laig mov, yus laig li no:
- Kuv noj tsiab peb caug xiab 1 no ces, kuv laig dej laig
cawv ces kuv yuav laig txog, 3 txig poj 3 txig yawm sawv
daws los nrog haus dej haus cawv, sawv daws los haus dej
haus cawv ces, sawv daws los nrog ntis mob ntis ntsaj ntis xaiv ntis puv, ntis khawv yaj khawv yws, ntis khawv txiv khawv kum, ntis sub tawg sub ntsha, ntis ceg xyoob ceg ntoo, ntis hmab dawm tes hlua dawm taw, ntis nab ntis qav ntis txiaj muas ntawv tuag, ntis luag ncauj nplaig qauv leg tib si.
Cia twj ywm, kuv ua qoob ua loo, ua laj ua kam, ncig toj ncig pes kuv ua tau noj ces yuav qaij diav, tau haus ces yuav qaij khob rau nej ncauj nej lo no nej hej.Nchuav me me cawv rau ib sab phaj tsum.
- Laig 3 txig poj 3 txig yawm tas ces, los laig yus txiv yus niam phaj ib tug zuj zus los kom tas, ces ho laig yus phaj los rau phaj tub,phaj xeeb ntxwv( nyuag hlob nyuag yau).
Tas ntawv laig dab vaj dab tsev xws li, xwm kab txhiaj
meej pem xeeb, dab roog dab hluas.....
2. Laig cawv tas ho laig mov laig nqaij, laig mov laig nqaij kuj laig ib yam li laig cawv, tsuas yog yus pauv qhov tias kuv laig dej laig cawv mus tias, kuv laig nqaij laig hno no xwb.
Laig kom txhua txhua li laig cawv ib yam, thaum laig ke
laig ke hais mov , ke de nqaij, ke hais kua tso rau saum
phaj tsum, laig tas muab phaj tsum ntsaig cia.
Thaum Laig tas, yus muab 1 rab diav los, muab ib qho
nqaij ib qho mov, ib qho kua tso rau rab diav, yus tawm
mus sab nraum zoo, yus mus laig Txheev txhaij tim pov xwm
fab puaj meem, xeeb teb xeeb chaw,tim tswv teb chaws.....
hais ib yam li thaum laig cawv, laig tas ces muab rab diav ntov cov nqaij,mov,kua pov tseg, laig tas li no.
3. Tag kis xiab 3 .
- muab tus qaib txi xwm kab los txhoov rhaub,kom npau ces
muab rau saum lub phaj tsum ib yam li tag kis xiab 1 .
Yus laig cawv laig mov ib yam, yus laig tias:
Kuv noj peb caug xiab 3 no ces, kuv laig dej laig cawv
(laig nqaij laig hno) no ces kuv yuav laig txog.........
Zaj lus thiab cov phaj laig, laig ib yam li laig tag kis
xiab 1.
- Thaum laig dej laig cawv, laig nqaij laig hno tas los
yog (Muab tu qaib txi xwm kab laig tas).
Muab lub ncuav los laig, yus laig tias , kuv noj peb
caug xiab 3 tu dab moo, zaj lus thiab phaj laig, Yus laig
ib yam li laig tag kis xiab 1.
*** Tag kis xiab 2 tsis laig.
