koojziagkabzaug 29th August 2016, 2:43 am
Nyob zoo me ntxhais Nkauj Paj Ntshua Nplaim,
Zoo siab uas ntev ntev los nws tseem rov tuaj txog peb lub tsev thiab. Twb xav tias ntshe nws tsis nco qab lw lawm no.
Hais nws tej teeb meem, qhov nyuaj siab tsaus ntuj nti yeej muaj tseeb. Tab sis kuv hais ib lo lus rau nws khaws ua tshuaj. Txhob tu siab mog. Lo lus ua tshuaj tab sis yim ua rau yus lub zog muaj. Ib lo lus nyiaj lus kub yim ua rau yus lub siab tu. Xav tsis raws xav phom cuag plhau mag, xav luaj ntug los xu luaj nyug, xav luaj teb los xu luaj zeb mog. Lub neej tsawg zaus thiaj zoo cuag li cinéma xwb.
Ntawm kuv ces kuv yeej yog koj niam koj txiv lawm. Ntau tsis paub los tsawg yeej tau ntsib tau pom hauv lub neej dhau los, pom luag kev pom kev los pom ntau, paub luag kev tsaus ntuj los paub muaj. Kuv ntsia coob leej ntau tus lub neej, kuv hais tias neeg lub neej qhov zoo qhov phem muaj ob txoj kev taug uas yuav mus taus thiab xam chim daws tej teeb meem txoj kev nyuaj kuv pom li no:
1- yus nyob yus khov kho, tuav lub cuab lub yig rau ntawd, cia nws lwj nws liam nws, ib hnub twg yog nws liam liam txaus nws rov poob rau nws tej kev liam, nws ris siab nws mam rov los ua neeg zoo, nov koj rov tau koj tus txiv; tab sis lub caij nws yuav rov los ua neeg zoo hlub koj mas tsis yog hnub hli los xyoo xwb, tej zaud yuav yog ib nrab tiam neej, uas lub neej twb yuav luag tag, nws zog nthaug nyiaj txiag poob liam tag mas nws mam rov los txo hwj chim ua koj tus txiv rau koj xwb. Qhov nov koj saib seb puas tsim nyog. Muaj tej thaum mas koj tos tos koj twb ho tsis tau qhov uas poob tag txhua yam es rov tau nws lub siab los hlub koj thiab.
2- kuv pom coob nkawm niam txiv tsis sib haum, txiv tham hluas nkauj yuav niam yau. Kuv ntsia los, feem ntau tus txiv dag thiab iab hiam tias yog tim tus poj niam zoo li ub li no nws tsis zoo siab nws thiaj ua. Tej nov yog lam iab hiam kom nws zoo mus ua qhov nws xav ua xwb. Qhov tiag tiag zoo li tus txiv twb tsis tshua phim tus poj niam, tab sis txhiaj khoov tus txiv yuav hwm thiab tsa tus niam cai, qhuas tus niam, tus txiv tseem nias tus niam cai, caij tsuj tus niam, ua phem phem rau tus poj niam. Kuv xav tias thaum NEEG IB TUG TSIS HWM IB TUG, IB TUG TSIS NYIAM IB TUG LAWM TXHOB YUAM% TXHOB TUAV KIAG LI. VIM LUAG TSIS NYIAM TUS NEEG ZOO, TUS NEEG TUAV LUB NEEJ. LUAG NYIAM TUS NYOB LAJ LAUG LUAS KHAV THEEB THIAB PUAB LUAG NTUG ZEJ NTUG ZOS XWB. KOJ YUAV TAU TSO LUAG MUS, LUB NEEJ TSIS TAG, KOJ TXHOB MUAB KOJ LUB NEEJ LOS TXIV RAU IB TUG NEEG UAS LUAG TSIS POM KOJ TEJ KEV ZOO. KOJ YUAV NROG COV UAS LUAG TXHAWB KOJ, KOJ YUAM KEV LAWM LOS LUAG TSEEM YUAV PAB KOJ ES TSIS YOG COV UAS KOJ TWB TSIS TXHAUM LOS TSEEM NRHIAV LUS IAB HIAM KOJ TSUJ KOJ. COV NEEG ZOO LI NO YUAV TSUM CIA NWS UA NWS LUB NEEJ TUAJ QAB TSAG NWS THIAJ LI ZOO SIAB. YOG KOJ TXHAWB KOM NWS TUAJ QAUM TSAG, TAU NROG LUAG ZAUM THAWJ LUB ROOJ MAS NWS TSIS NYIAM KOJ; NWS YUAV HAIS TIAS KOJ SAIB TSIS TAUS NWS KOJ SAIB NWS LI IB TUG ME NYUAM YAUS XWB NO. KOJ YUAV TSUM CIA NWS PEEM NWS ES PEEM PEEM LOS TWB TSIS TXIJ KOJ DAB TAWS MAS NWS THIAJ LI ZOO SIAB.
Yuav tau ua siab tawv qhawv tso luag mus, zoo li rab koob txoj xov, muab tu nrho es nyias yuav mus xaws nyias lub ris nyias yuav lub tsho. Txhob sem sij hawm ntxiv lawm, yus ua ib sim neej xwb yam zoo muaj ntau li ntau twb siv tsis tag ua tsis qeg twb yuav dhau mus; tsis txhob muab lub sij hawm los tu siab los chim siab lawm. Tsis muaj tus tom cai uas tsuav yog txiv neej ces nws txawm yuav tswj ntug kav teb tib si. Lub ntuj khwb sawv daws ua neej, daim av ris sawv daws txoj sia. Ntuj yeej faib sib npaug rau txhua leej, txiv neej tsuas yog lub npe ua tus txiv xwb, nws yeej tawm hauv poj niam lub plab los, tsis yog txiv neej ho yuav poob saum ntuj los es txoj cai yuav loj dua. Me ntxhais, yog koj hais txhij hais txhua luag tsis hloov siab xia plias koj kev piam cuab xwb ces tso luag mus mog. TAB SIS QHOV KOJ TSO LUAG MUS UAS YUAV UA RAU KOJ YEEJ MAS KOJ YUAV TSUM XYAUM UA IB TUG POJ NRAUJ TSIM TXIAJ, txhob nrog luag ua his ua hos rau txhua lub party thiab txhua lub peb caug. koj yuav tau ua ib tug poj nrauj tsim txiaj tuav koj lub cua lub yig, ib sab ua niam ib sab ua txiv khov kho, tus zoo luag yeej yuav muaj qhov ntsej qhov muag tuaj nrhiav tau koj; yog koj tsis txuag koj lub koob lub npe, koj tias nws twb ua rau koj mob mob siab ces koj dim plaws koj yuav ua pauj ces nov yog koj rov caws ntxiab rau koj tus kheej xwb. Ua dab tsi yog tsis cog tob tob mas yeej kawg nkoj cag ib hnub xwb.
Kuv lus ces tsuas hais lus huab lus cua rau koj xwb, yuav pab tsis tau koj ib yam seem ceeb. Koj lub siab noj txhij xav txhua koj mam li txia txim siab koj ib leeg thiaj li yuav tsis yuam kev thiab thiaj li yuav nrhiav tau koj txoj kev kaj siab. Koj nco ntsoov tias tsis muaj phab ej lawm mog, lub sawm fem no mem toj sawv rau poj niam sab lawm, cov phab ej uas naas ej raug kev txom nyem tuaj pab ces tsis muaj lawm, tsuas tshuav cov txiv neej mus yuav poj niam rau ub rau no vim tus poj niam muaj hauj lwm khov kho hos tus txiv neej ncho tes tho xwb.
Home
