koojziagkabzaug 22nd April 2014, 12:06 pm
Nyob zoo tij laug Xyooj Tsab thiab kwv Liaj Ntsuab,
Thaj Mom Yaj Thaiv, yog ib tug neeg muaj txiaj ntsim ntau rau Peb Tsoom Hmoob txhua leej uas nyob yav teb chaws Xeev Khuam. Nws tau cawm Peb Hmoob txoj sia, thaiv sawv daws tej kua muag iab kua muag daws ua ntu zus los mus. Nws yog ib tug neeg ntse thiab thoob tsib tog nrog ncaj ncees heev. Yav ntuj qub qab, kuv hnov nws lub moo tab sis kuv tsis paub nws; los rau hauv yeej thoj nam Nab Phoos, lub 5 hlis 1975, kuv thiaj li paub nws txog 1976, lub 6 hli ces kuv ncaim lawv tuaj rau Fab Kis lawm. Kuv tseem nco tau tej txiaj ntsim uas thaum peb cov nus muag tseem yau, tsis muaj niam muaj txi tiv thaiv peb; nws kom peb sib hlub, sib pab thiab mus qhov twg kom mus ua ke, tsis txhob sib tso. Tus hlob coj tus yau, thiaj li yuav zoo. Kuv tseem nco ntsoov nws tej lus hais rau peb rooj mov sib ncaim nyob Vib Nais.
Nais Mom Thaiv lub neej yav ntuj qub qab yog ib lub neej zoo tsim nyog qhuas uas txhua leej txhua tus ntshaw thiab xwv. Tab sis hmoov tsis muaj, ua neej tsis pom hmoov, paub hnub zoo tsis paub hnub phem, ua neej pom tom ntej tsis pom tom qab; yav neej dhau los zoo heev tab sis ntu kawg kuj poob lawm ntau. Thaum yus zoo ces sawv daws sib txeeb hlub, thaum yus poob tsag ces sawv daws sib tw ntxub. Yug tau tub ki los hnub sau laus nyob ntiag nti, yug tau me nyuam los txog hnub siav tu tsis muaj tus tuaj xyuas. Zoo li yuav coj nws lub cev mus ua kev cau rau ntawm ob tug kwv, Cai thiab Phooj nkawd uas nyob rau Fresno no sub.