TEJ LAUS NIAJ TXHIS PIV TXOJ LUS

NIAJ TXHIS PIV TXOJ LUS

CUAJ LUB HNUB QUB ,   TSIS CUAG IB LUB HLI
CUAJ LEEG TUB,   TSIS CUAG IB LEEG TXI

CUAJ LUB HLI,   TSIS CUAG IB LUB HNUB
CUAJ LEEG NTXHAIS,   TSIS CUAG IB LEEG TUB

MUAJ NYIAJ,   TSIS CUAG MUAJ KUB
MUAJ NTXHAIS,   TSIS CUAG MUAJ TUB

CUAJ RAB CHAIS, TSIS CUAG IB RAB RIAM
CUAJ LEEG NTXHAIS , TSIS CUAG IB LEEG NIAM

TUB NTSOJ, TAU ZOO POJ
TUB NTSUAG, TAU NTXHAIS NQUAG

TUB NTSOJ, TSIS PLOJ
TUB NTSUAG, TSIS TUAG

NYUJ TUAG, TSHUAV NYUJ KUB
TXIV TUAG, TSHUAV TXIV TUB

NEEG TXAWJ, LOS NTAWM XIB HWB
NEEG NTSE, LOS NTAWM LUB HLWB

NEEG NTSE, CHIM IB ME CHIM
NEEG RUAM, CHIM TAS IB SIM

NOJ NCEB, YUAV TAUG CAV
YUAV TXIJ NKAWM, YUAV  XAIV NEEJ XAIV TSAV

NOJ TXIV, YUAV SAIB NOOB
YUAV TXIJ NKAWM, YUAV SAIB CAJ HMOOB

NOJ NQAIJ, YUAV SAIB TXHA
YUAV TXIJ NKAWM, YUAV SAIB NEEJ TSA

QOOB TSIS ZOO, TSUAS PLAM IB CIM
TXIJ NKAWM TSIS ZOO, PLAM TAS IB SIM

LUAM ZOO, THAWJ NTSUG
TXIJ NKAWM  ZOO, THAWJ TUG

TAU POJ NIAM NQUAG, UA NEEJ THIAJ XWS LUAG
TAU POJ NIAM ZOO, UA NEEJ THIAJ NTO MOO

TAU POJ NIAM ZOO, TUS TXIV MUAJ ZOO KOOB
TAU POJ NIAM PHEM , TUS TXIV MEEJ MOM POOB

TAU TSIV NYAB, YAM NTES RAUB RIS RAU NRUAB VAB
TAU TSIV SEV, YAM NTES RAUB RIS RAU NRUAB LEV

POB TXHA, MUAJ CHAW TO
NIAM TXIV, MUAJ CHAW NCO

MOB NTSHAJ, YOG MOB HNIAV
CHIM TSHAJ, YOG TXIJ NKAWM KHIAV

TSIS YOG LUAG NOM , LUAG TSIS HAWM
TSIS YOG LUAG KWV TIJ, LUAG TSIS CAWM

POM TSOV, YUAV TUAG
POM NOM, YUAV PLUAG

TXAIS YAM TWG, TXAIS KOM TAU KO
HAIS LOS TWG, HAIS KOM KHOV KHO

TSO ZIS, TUAV NOOV RAWV
HAIS LUS, TOM HNIAV NKAWV

NROG COV LAUS, DAB TSIS HEM
NROG NOM, LUAG TSIS CEM

NEEG RUAM, HAIS LUS MOS
NEEG NTSE, HAIS LUS TUAJ POS

HAIS TXOG KEV LOM ZEM, CES XAV LUAG
HAIS TXOG KEV TXOM NYEM, CES XAV TUAG

TUB NKEEG, NTSIB KEV PLUAG
VUAB TSUAB, NTSIB KEV MOB TUAG

SIAV TU, LUAG TIAS TUAG
NYIAJ DU, LUAG TIAS PLUAG

TSIM TUB NTSOJ, KHAUM KEV PLOJ
TSIM TUB NTSUAG, KHAUM KEV TUAG

TSOV QAV, NYOB NRAS TIAJ
TWM QAV, NYOB NRAS LIAJ

XAV CIAJ, TSIS XAV TUAG
XAV MUAJ, TSIS XAV PLUAG

TSO QUAV, YUAV TSUM THAWJ XUB TSAG
YUAV TXAWJ NTSE, YUAV TSUM THAWJ KWS NRUAG NRAG

XAV NOJ QAB, TSIS XAV NOJ TSUAG
XAV HNAV ZOO, TSIS XAV HNAV NTUAG

KWV TIJ SIB CEG, YOG TIM NCEJ DAB
NIAM TXIV SIB CEG , YOG TIM NCEJ QAB

NPAV TXIAJ, TAU KEV PLUAG
NPAV NTUJ, TAU KEV TUAG

LUS NTXHOV, CUAG POS NTSAJ
PLAUB NTUG NTXHOV, CUAG PLAUB NYAJ

POM QHOV ZOO, HO YUAV TAUM
POM QHOV PHEM, HO YUAV NKAUM

TSAB RUAM, TAU ZOV LUAG TSEV
TSAB NTSE, TAU UA LUAG QHEV

TUB NKEEG, QHIA NPAUM TWG LOS TSIS NQUAG
TUB NQUAG, UA NPAUM TWG LOS TSIS TUAG

TUB NQUAG, KHIAV KHAWV KHUAV
TUB NKEEG, TSIAM MOB DUAV

TUB NQUAG, RAU SIAB NTSO
TUB NKEEG, MUAJ QUAV TSO

CEM NOM, NOM NPLUA
CEM RUAM, RUAM TUA

UA LAG LUAM, YUAV SAIB HMOOV
TSHAM TUA TSIAJ, YUAV TSUM SAIB ZOOV

POM QAUB TSIS LOS QAUB NCAUG,        YOG YUAV MOB TSIS NQUAG
POM CHAW MOS CEV TSIS SOV, YOG YUAV TUAG

NOJ MOV QAB, VIM QAUB NCAUG
MUS KEV ZOO, VIM POB HAUV CAUG

RAUB RIS TUAG, VIM RAUB RIS LUB QHOV
ZAJ TUAG, VIM ZAJ LUB POV

TSIAJ ZOO, VIM YOG PLAUB
NEEG ZOO, VIM YOG KHAUB (KHAUB NCAWS)

SUAB NEEG, NROV TSHAJ SUAB XOB
LUS PHEM, NTSIM TSHAJ KUA TXOB

TUB SAB, NCAUJ NCAB
TUB NKEEG, NCAUJ NREEG

HNOV NCAUJ UA ZOG , TSIS CUAG NTSEJ HNOV
QHOV MUAG POM, TSIS CUAG TES KOV

LAG NTSEG, HNOV LUS NTXHI
DIG MUAG, POM NRUAB QAIG HLI

LUS ZOO, NCO IB CHIM
LUS PHEM, NCO IB SIM

IB KOOG ZOOV, MUAJ TUS NTOO LOJ
IB CUAB KWV TIJ, MUAJ IB TUG COJ

YUAV ZOO, ZOO TUS XUB MUAJ
YUAV NTSIB, NTSIB TUS XUB TUAJ

ZOO NRAUG, THIAJ TAU NKAUJ SUA
SIAB NTEV, THIAJ TAU NOM UA

TUB QAUG NEEJ, YUAV DEJ YUAV CAWV
TUB QAUG DAB, YUAV XYAB YUAV NTAWV

NKAUJ NYOB, SOV ZOS
NKAUJ UA NYAB TAG , TSOV LOS

TSIS SAIB LUB DEJ, LOS SAIB LUB LWG
TSIS SAIB TUS MEEJ, LOS SAIB TUS TSWG

KUA TXOB NTSIM, YUAV NTSEV DAW
POJ NIAM PHEM, YUAV NCAWS TAW

UA LUAG NYAB, THIAJ POM QAB
UA LUAG SEV, THIAJ POM KEV

MUAJ TSAWG, NYUAJ TUS FAIB
MUAJ COOB, NYUAJ TUS SAIB

CEM YUAV TSUM CEM, KOM NROG LUS
HAIS YUAV TSUM HAIS, LO LUS KOM TUS

NCAUJ NTAU, TAU KUA HAUS
UA PHEM, MAG LUAG NTAUS

THAUM MOS LIAB, NTXIM HLUB
THAUM LAUS, NTXIM NTXUB

TUAJ HWJ TXWV, THIAJ MUAJ HWJ CHIM
PLAB LOJ, THIAJ MUAJ TSWV YIM

NEEG LOJ, TSIS CUAG NEEG MUAJ HWJ CHIM
MUAJ ZOG, TSIS CUAG MUAJ TSWV YIM

Txoj kev ua zoo,  ua tsheej xyoo tsis cuag
Txoj kev ua phem, ua ib ntsais muag

Neeg zoo nkauj, muaj lub siab phem
Neeg zoo nraug, muaj lub siab lem

Poj niam zoo, koj cem ces nws quaj
Poj niam phem, koj cem ces tub ceev xwm tuaj

Lus ntxhib, thiaj yog lus qab zib
Lus mos, ces yog lus tuaj pos

Thaum zoo, ces hu honey
Thaum phem, ces hu khaus pim

Thaum zoo, ces hu yawg thaub
Thaum phem, ces hu txiv aub

Thaum zoo, ces hu me koj txiv
Thaum phem, ces hu niag tsov tom om miv

Neeg ruam, luag cem nws npau
Neeg ntse, luag cem nws mob siab rau

Neeg ruam, tau chim mas chim txog hnub tuag
Neeg ntse, tau chim mas chim ib vuag

NTOV NTOO, YUAV TSUM SAIB CEG KHAUB
HAIS LUS, SIAB QIS YUAV TSUM PAUB
NTOV NTOO, YUAV TSUM SAIB CEG QHUAV
HAIS LUS, YUAV TSUM UA ZOO XYUAS

NOJ QAV, YUAV TSUM RAU NTSEV
UA NEEG, YUAV TSUM SIAB NTEV
NOJ QAV, YUAV TSUM RAU ROJ
UA NEEG, YUAV TSUM SIAB LOJ



QHIAV LAUS, QHIAV NTSIM
TXUS LAUS, TXUS MUAJ TSWV YIM
QHIAV LAUS, QHIAV DAW
TXUS LAUS, TXUS NTSHAW

NTSUAG YIM LAUS, YIM IAB
NIAM TXIV YIM LAUS, YIM MOB SIAB
NTSUAG YIM LAUS, YIM DAW
NIAM TXIV YIM LAUS, YIM MOB PLAW

NYUJ NTSUAG TSIS TUAG, NYUJ NTSUAG HLOB TIAV PWJ
TUB NTSUAG TSIS TUAG, TUB NTSUAB HLOB CIAJ XEEV TXWJ
QAIB NTSUAG TSIS TUAG, QAIB NTSUAG HLOB TIAV LAU
TUB NTSUAG TSIS TUAG, TUB NTSUAG HLOB CIAJ HAU

DEV COOB, DEV TOM YAJ
NKAUJ COOB, NRAUG HOM KHAJ
DEV COOB, DEV TOM MIV
NRAUG COOB, NKAUJ PLEES NTSHIS

MUAJ NTUJ, THIAJ MUAJ TEB
MUAJ NEJ, THIAJ MUAJ PEB
MUAJ TEB, THIAJ XEEB TSUAG
MUAJ NIAM MUAJ TXIV, THIAJ XEEB NYUAG

NOJ NQAIJ, YUAV RAWG TAIS
UA NEEJ NYOB, YUAV MLOOG LUAG HAIS
NOJ NQAIJ, YUAV DIAV MUAB
UA NEEJ NYOB, YUAV MLOOG LUAG QHUAB


TSOV TXAIJ, NRAUM DAIM TAWV
NEEG TXAIJ, HAUV NRUAB PLAWV
NTSES TXAIJ, NTAWM DAIM XIAB
NEEG TXAIJ, HAUV NRUAB SIAB

UA TAU TSEV, MAM POM ZOO NTOO
YUAV TAU POJ, MAM POM NKAUJ ZOO
PHUA TAU NTOO, MAM POM ZOO TSUAS
YUAV TAU TXIV, MAM POM ZOO HLUAS

DEV TSEM, DEV TSIS TOM
LUAG YUAV TUA, LUAG TSIS HOM
DEV TSEM, DEV TSIS NPAWV
LUAG YUAV TUA, LUAG TSIS HAWV


HLAIS NQAIJ, NTSHAW ZOO RIAM
UA NEEJ NYOB, NTSHAW ZOO POJ NIAM
TSUAV NQAIJ, NTSHAW ZOO LAUG CAM TIV
UA NEEJ NYOB, NTSHAW ZOO TXIV

TXAWJ QEEG, TAW LO TSHAUV
ZOO NKAUJ, TAU PHEM VAUV
QUAV YEEB, TES LO ROJ
ZOO NRAUG, TAU PHEM POJ

HLA DEJ, YUAV HLE KHAU
TSIV TEB TSAWS CHAW, YUAV HLE HAU
CHAWS KHAUB, YUAV HLE MOM
TSIV TEB TSAWS CHAW, YUAV HLE NOM

NPLOOJ TSIS HLAV, ZOOV TSIS NTSUAB
TSIS YUAV TXIJ NKAWM, TSIS TSHEEJ IB CUAB
KAV TSIS QHUAV, NPLOOJ TSIS NKIG
TSIS YUAV TXIJ NKAWM, TSIS TSHEEJ IB YIG

NEEG NTSE, NTSE NRUAB THIAB
NEEG MUAJ, MUAJ NRUAB KIAB
NEEG NTSE, NTSE NRUAB THW
NEEG MUAJ, MUAJ NRUAB KHW

TXIV NEEJ, NTSE NTSUAV
TUAG POJ NIAM, LUB QHOV QUAV
TXIV NEEJ, NTSE RHIB
TUAG POJ NIAM, LUB TOM XIB

PLAUB HAU NTXHOV, YUAV ZUAG LOS NTSIS
PLAUB NTUG NTXHOV , YUAV LAUS NEEG LOS LIS
PLAUB HAU NTXHOV, YUAV ZUAG LOS HAIS
PLAUB NTUG NTXHOV, YUAV LAUS NEEG LOS NTAIS

IB TUG DEV, MUAJ PEB TUG MUB
IB TUG NKAUJ, MUAJ PEB TUG HLUB
IB RE NPLEJ, MUAJ PEB LUB NPLUAG
IB TUG NKAUJ, MUAJ PEB TUG HLUAS