Liajntsuab wrote: Tub hmoob wrote:Nyob zoo tij laug Liajntsuab zoo siab tau paub koj og. Cas koj yuav mus deb ua luaj es nej nim mus nyob tau lub teb chaw ywj ywj pheej thiab vam vam meej, tseg peb cov nyob rau ntuj tom qab ua lub neej nro tej me kab me noog nyob txom nyem ntsuav, niaj hnub tsuas yog mus ua liaj ua teb xwb og. Tij laug qhia koj tias kuv nyob rau lub xeev Moos Theeb kav xyuam nkaus og, lub Xeev Moo theeb yog peb lub xeev ntag og ua li koj hao yog xeem hmoob twg nav?.
Nyob zoo tus kwv Tub Hmoob,
Ntuj e!!! ntuj zoo siab paub koj meej zog lawm thiab. Koj txawm yog nyob rau puag ntuj qub qab uas peb tej pog thiab yawg lawv nyob los. Kuv yog xeem Hmoob Vaj os tus kwv ua li koj ne? Nyob rau txheej nimno ces lub Xeem tsuas yog peb lam nug kom sib paub thiab thaum yuav mus nrhiav nyab nrhiav vauv mam li nug Xeem xwb vim tias peb txheej no ntseeg tias tsuav yog Hmoob xwb ces yog ib tsevneeg lawm os nawb. Peb txawm yuav nyob lub tebchaws twg los xij thov peb sib sib hlub txhob coj li lawv txheej laus thaum ub lawm os luag lwm haivneeg thiaj li ntshai thiab hlub peb.
Tus kwv, nej cov poob rau tom qab los ho txhob tu tusiab thiab mog. Qhov tusiab ntawm nej me ntsis ces yog txomnyem kev noj nyob me ntsis xwb hos peb li mas hais txog kev noj nyob ces yeej zoo lawm ntau tsis tau khwv thiab txeev noj txeev haus tsis tshaib tsis nqis thiab tshav tsis kub hos mus txoj kev twg los tsis tau mus taw TIAMSIS txomnyem lub siab ntsws tshaj plawss uas tsis pom qab piav qhia rau nej cov nyob tom qab tau paub os nawb. Twb yog vim txoj kev nyuab siab li hais los txhua lub xyoo peb Hmoob txawv tebchaws thiaj li los nchuav ntws rau sab Nplogteb thiab nej tebchaws mas. Nej ho xav xav tuaj nrog peb nyob hos peb ho xav xav los nrog nej nyob tim ko tiag tus kwv, peb xav ua neej nrog me kab me noog thiab xav hnov lawv tej suav quaj os.
Kuv yuav ib daim video lawv yees nyob rau lub Roob Txiv Nyuj uas yog ciam teb Nplog thiab Cobtsib pom cov tub hluas mus uasi saum lub roob muaj paj ntoo zoo nkauj heev li. Cia yog lwm xyoo los muaj caij no ntshe yuav los ncig saib ib zaug thiab.
Tham ntau lawm ces tso tseg li no mam li sib ntsib dua nawb
KUV CES YEEJ NCO NCO TUS QUB THAUM UB TSHAV NTUJ NRIG LI OS OB TUG NPAWG PHOOJ YWG HMOOB NYOB NTUJ QUB QAB THIAB TUS PHOOJ YWG HMOOB NYOB RAU LUB NTUJ VAM MEEJ AW!!!!!.
kuv ces kuv tsuas tham txoj kev nco tus qub thaum ub xwb os ob tug npawg aw!! vim tias pheej npau Hmoob mus pom nws tas li xwb nas ob tug npawg, thiab kuv yuav piav me ntsis txog kuv txoj kev ua npau Hmoob rau neb mloog thiab nyeem me ntsis nawb es neb ho thov tsis txhob toog pob ntseg thiab nawb mog
Nkauj Hmoob xeem muas zaj paj huam
Nkauj Hmoob muas----------yav neej thaum ub
Txoj kev hlub------------------uas tau muaj tseeb
Nws tau xeeb----------------hais zoo tshaj plaws
Tau tham ntxaws-------------txoj kev ntxim siab
Thaum xyoo tshiab-------------caij noj peb caug
Yav ntuj tsaug----------------nyob tshav pov pob
Tuav tes nyob-------------------tham kev dai siab
Huab zig niab----------------lwg nrog zom zaws
Wb sib raws--------------------hais seev yuj yees
Txoj kev plees-----------------tseem tsis tau yuav
Teb chaws nchuav------------tsov rog ntxov niab
Me nplooj siab-----------------wb thiaj sib ncaim
Mus nyob nraim-----------------rau leeg rooj teb
Ncaim mus deb----------------nyob leeg sab ntuj
Nplooj siab yuj--------------nyob kho siab khuav
Tsis tau yuav---------------------nco tag ib txhiab
Ua mob iab--------------------tham tsis tau tawm
Kev txij nkawm-------------------thiaj tsis tau pib
Nplooj siab ib---------------nws thiaj plam lawm
Lub keej khawm-----------------wb txoj kev hlub
Ntuj thaum ub---------------nyob nroog looj ceeb
Neej chiv keeb-----------------nyob koom zej zos
Niaj hmo yos--------------------tuaj nyob sib zov
Sib xa xov---------------------txog txoj kev plees
Hais seev yees--------------------tsis xav tso tseg
Mob tej teg--------------------ua plawv yuav nres
Yam tus ntses------------------tau pas dej ntshiab
Nyob kaj siab-----------------mus lawm tag hnub
Tsov rog dub-------------------txiav kev sib yuav
Cuag ntuj nchuav-----------------lub ntiaj teb tig
Av thiaj nkig--------------------dej nyob li nphau
Sib ncaim tau----------------peb caug tawm xyoo
Nws lub moo----------------------twb ploj zuj zus
Wb tej lus---------------------------uas tau cog cia
Twb mob ntxhia-----------------yuav rov qab zoo
Tseg tsis nroo----------------------ua siab tsis nco
Cas nag hmo----------------------ho rov npau suav
Pom nws tuav-----------------------kuv ib sab npab
Zaum ib sab---------------------tham txog kev nco
Sim neej no--------------------------cas nco ua luaj
Pom nws quaj-------------------kua muag ntws sis
Kuv khoov ntshis-------------muab kuv ntiag tsho
Coj los so------------------------nws cov kua muag
Nws khawm puag ---------------kuv rau xub ntiag
Ib me pliag-------------------------nws kua muag tu
Hnov nws hu----------------------kuv npe thaum ub
Nkauj hnub qub---------------------yog tiag los dag
Zaum no ntag---------------------xav kom yog tiag
Kuv tig kiag-----------------------los tuav nws plhu
Tsa ncauj hu---------------------tias nraug xab yeeb
Yeej yog tseeb-------------------tsis yog npau suav
Wb tham dhuav--------------------ces wb mus tsev
Taug tej kev---------------------------nce toj qis hav
Ntoo siv lav---------------------tawg paj dawb vog
Noog poog pog---------------ntxais paj zom zaws
Paj zeeg tshaws-----------------------rau ub rau no
Wb tig hlo-----------------------saib rov pem roob
Pom hav xyoob------------------hav ntoo kaj nrig
Hnov nraj yig-----------------quaj suab xiv nqiab
Nyaj cuam liab---------------suav kau zom zaws
Me paj raws----------------tawg txhij tawg txhua
Hnov cuab npua----------------puag pem peb zos
Suab kab nqos-----------------quaj kho siab tshaj
Txiv nqos ntsaj------------------siav kawg kiag li
Wb luag ntxhi----------------------mus de los noj
Kuv saib zoj------------------------nws zoo li qub
Tseem ntxim hlub----------------li ntuj yav dhau
Kuv tseem yau----------nyuam qhuav tiav nkauj
Wb tham lauj-------------------tsis muaj tsawg lo
Ces nws ho-------------------tuav rawv kuv npab
Hnov suab kab--------------quaj saum ntsis ntoo
Cua tuaj loo----------------------ua ntoo rawv tag
Wb tso dag-------------------tham luag mob plab
Tau sib thab-----------------------sib zeg taug kev
Pom txiv cev----------------------siav daj pes vog
Wb mus txog-------------------puag pem toj roob
Pom ntsuag xyoob------------sam leej zom zaws
Wb tshwm plaws-------------pem dej cawm siav
De nplooj txhiav-------------------los ce dej haus
Sib tham txaus-------------mus txog kev tshuam
Tej lus xuam------------------yav puag thaum ub
Kev sib hlub-----------------------rau sim neej no
Tham kev nco----------------- tuav rawv nws tes
Wb mus nres-----------------puag pem roob siab
Tham xiv nqiab----------------ncig mus yuj yeev
Nws txawm seev---------------suab hais lus taum
Wb mus zaum--------------puag nram toj ntxhab
Hnov suab kab-----------------quaj nrov zig ziag
Cua tuaj ntxiag------------------wb cev txias zias
Siab yuj lias-------------------------xav ya ua npoj
Wb tig zoj---------------------saib tim phab kheb
Hmoob luaj teb---------------ntuag toj ntuag pes
Wb sawv nres-----------------saib pem roob zoo
Pom hav ntoo---------------ntsuab xiab tsaus nti
Wb thiaj li----------------------rov mus nuam yaj
Kho siab tshaj----------------tsis xav ncaim mus
Nws tej lus--------------------tham seev yuj yees
Txoj kev plees---------------------ua ke tag hnub
Yav thaum ub-----------------------ua ke kaj niab
Zoo ntxim siab-------------------sib pab ev nplej
Caij kwv dej--------------------tej chaw sib tawb
Hav paj dawb------------------------fab ti kwj tse
Tim ncauj ke---------------------txoj uas kev tws
Kuv thiab nws------------------mus dob teb zaub
Noog puj daub-------------quaj nrov ntsho nrooj
Hmoob tshuab nplooj---------nrov kho siab zim
Sab puag tim-----------------lawv zos hav xyoob
Nyob pem roob-----------Hmoob lawv teb npleg
Tshuab tsis tseg------------suab nplooj xiv nqiab
Nrov kho siab-------------------tshaj plaws li tiag
Suab nplooj ntsiag---------------puag tim ntav toj
Wb rov zoj-------------------------rov los mus tsev
Taug tej kev---------------------------peb tuaj ua si
Nws thiaj li----------------muab kuv khawm puag
Li ho zuag--------------------tham lus tseem tseeb
Lus meej xeeb----------------wb tham khee kawv
Wb los sawv----------------------tim pas dej dawb
Dawm sib tawb------------------tham kev sib nco
Sim neej no--------------------------nco nws luaj li
Tham lus ntxhi--------------------rau kuv tsis tseg
Hnub tuaj ntseg---------------------wb tig rov qab
Tuaj nws npab--------------------los txog ntug zos
Hmoob tuav cos -------------suab nrov doog diaj
Hnov suab tsiaj------------------sib tog zom zaws
Wb tshwm plaws--------------ntawm peb tog tsev
Sib tham ntev-------------------tsis xav sib ncaim
Nws nyob nraim-------------hauv kuv nruab siab
Cia xyoo tshiab-----------------wb mam sib yuav
Nws quaj zuav--------------------tsis xav rov qab
Kuv siab fab--------------------tsis kam nws nrug
Siab kub lug--------------------txog kev sib tshua
Ob leeg ua --------------------kua muag ntws nto
Sim neej no-----------------------sib nco luaj tiag
Quaj kawg kiag-----------------vim sib nco dhau
Me nyuam yau---------------sawv phov txaj nrov
Kuv thiaj hnov------------------tsim dheev los no
Ua cas ho----------------------yog npau suab xwb
Kua muag twb-------------ntxaum hauv ncoo tag
Hais cuag dag-----------------ntub tog hauv ncoo
Nws ntub loo---------------npaum xuas dej tsuag
Rov qi muag------------------kom npau suav dua
Lawv sawv ua-----------------tshais ntxov los noj
Dab ntub ploj-----------------mas chim siab dhau
Zaum tsaws npau------------kho siab tshaj plaws
Vim teb chaws----------------thiaj tau ncaim mus
Wb tej lus----------------------tau hais qhov tseeb
Thiaj khuam xeeb--------------ua kua muag nrog
Nco los txog---------------------niaj hnub nim no
Kuv thiaj nco-------------------------nws ua luaj li
Hnub thawm hli-----------thiaj tseem nco ntsoov
Siab tsis hloov-----------------------nco nws li qub
Hmoob leej tub----------------tus me ntxim tshua
Ncaim dua ncua----------------tsis tau nrog nyob
Kuv siab mob----------------cuag kua txob ntsim
Lub siab chim---------------------mob tag ib tiam
Teb chaws piam-----------------ua neeg thoj nam
Thiaj sib plam----------------txoj kev txij nkawm
Kuv khiav tawm----------------tuaj rau thaib sab
Txoj kev tab----------------------lub cuab lub yig
Nws thiaj tig---------------------mus rau lwm tus
Me leej nus-----------------------kuv tsis tau nws
Kua muag ntws-----------------ces siav yuav yaj
Nco nws tshaj--------------------nyob rau tiam no
Xyov yuav nco---------------mus txog hnub twg
Me phooj ywg--------------------tus kuv hlub e!!
Es nws ne!! --------------------puas nco kuv thiab
Nraug toj siab-----------------------tus cev tsis loj
Nws niam noj---------------------dab tsi yug nws
Thiaj zoo xws-------------------me txiv nraug hli
Es thiaj ci---------------------mus thoob ntiaj teb
Ua rau peb-----------------------nco nws tag hnub
Vim tus hlub--------------------poob rau tom qab
Nyob leeg sab-------------------thiaj ncav tsis tau
Nws thiaj dhau----------------------mus zoo li no
Kuv thiaj nco-----------------------mus tag ib sim
Yeeb yog vim----------------zuag tau ntawv nco
Nyob tiam no-----------------tsis tau ntawv hlub
Nws thiaj rub--------------------tsis tau kuv npab
Ua nws nyab------------------mus nrog nws nyob
Siab thiaj mob-----------------cuag dej kub npau
Wb thiaj dhau--------------------mus ua dab neeg
Muab tham deeg----------------nrog huab cua ya
Li thov xa--------------------------ib tsab xov tuaj
Nrog suab quaj----------------saib nws puas hnov
Neej nram ntxov----------------nyob qub zej zos
Yog yuav tos-------------------ntev npaum li cas
Siab khis ras-------------------cuag rwj aws ncus
Tham lo lus-------------------yeej hais tsis tawm
Kev txij nkawm----------------yog yuav rov pib
Saib puas ntsib-----------------nyob rau zaum ob
Neej pov plob-----------------puas nphau rov los
Tej lus ntos--------------------------seev nws tas li
Zais tuag nthi----------------rau hauv nruab siab
Nws tus ntxhiab---------------kuv tseem cim cia
Ntsib mam qhia---------------rau nws lawm xwb
Hais txog wb-------------------lub neej pem suab
Thov saub muab------------wb ntawv nyiaj keeb
Los nrog teeb----------------ua ntawv puaj txwm
Tuav keeb kwm---------------kom ho muaj ntxiv
Thiaj tsis chiv-------------------kev mob siab dua
Xws nthwv cua---------nplawm ntuj ntws lawm
Kom hmoov sawm-------------wb txhob sib cais
Yog yuav hais----------------yeej tham tsis txhua
Thiaj li ua----------------------npau suav pom nws
Kuv siab ntsws----------------nco nws heev dhau
Thiaj li tau-------------------muab los tham tawm
Kom plawv nqawm-----------siab ntsws ho nqig
Tej tsuj plig-----------------------rov los puab cev
Siab ho ntev--------------------ua neeg mus ntxiv
Yog yuav chiv--------------------npau suav li qub
Puas muaj hnub-------------------ho rov ntsib nws
Nplooj siab ntsws--------------kev hlub yav dhau
Tseem nco tau-------------------nws txoj kev hlub
Ntsib dab ntub-------------tseem tham luag ntxhi
Nkauj hnub ci-----------------nco koj tshaj plaws
Yog tham ntxaws-------------ces kua muag poob
Me nraug Hmoob--------------tus me ntxim hlub
Nraug dab ntub-------------niam nkauj npau suav
Tham tsis dhuav-------------------ua ke tsis txaus
Hais tsis xaus-----------------------tej lus sib hlub
Nraug dab ntub------------thiab nkauj npau suav
Nws puas tshuav--------------ib zaug lawm thiab
Nraug toj siab---------------------tus me neeg zoo
Yog puag loo-------------------mus yeeb yaj kiab
Thiaj zoo siab-----------------------os me leej nus
Kuv tej lus-------------------thov tsis txhob chim
Vim koj dim----------------------mus ua luag txiv
Thiaj lam tiv-----------------nyob lwj siab ntsuav
Li noog puav-----------------------ua neej dai taw
Tsis muaj chaw-------------------li no lawm tiag
Lub xub ntiag--------------------thiaj pw txias to
Seev tag hmo---------------------rau tej npoo txaj
Lub ntuj kaj----------------------los tsis xav sawv
Ntuj yuas lawv-------------------tus me neeg zoo
Tsis muaj hmoo-----------thiaj plam txij nkawm
Yog tuag lawm-----------------wb puas sib ntsib
Nywj vag ib------------------nyob rau nruab dab
Tuav nws npab----------------haus paj zaub quag
Rov tau puag-----------------nyob kuv xub ntiag
Paj zaub qiag-----------------li kab npauj npaim
Ya nrog nraim----------------------ua ke ywj siab
Mus thawj thiab-----------------xeeb rov los dua
Kom txhob tshua-------------me nraug sim xeeb
Nkauj xab yeeb-----tseem tos nws nawb mog./.
( xaus li no )
.