koojziagkabzaug 12th November 2012, 11:04 pm
Nyob zoo phooj ywg Hnubqubntsa thiab tij laug Xyooj Tsab,
Tij laug, Hmoob kev ua nyuj dab mas tsis yog nco niam nco txiv, tab sis ntshai tsam niam txiv yuav noj haus tsis tau noj ces cab pob ntoos nkoj xwb os. Tsis yog ua rau tus tuag, yog txhaws cov ciaj qhov xwb. Hais txog Hmoob tej kab mob kev tuag thiab ua tshoob ua kos mas kuv tsis pom ib qho twg tau hais tias "ua yog lawm" no li. Tus mob, mob nyhav mas hais tias yog tim qhov ub qhov no, kho li cas los kho tag, thaum tsis zoo lawm mas tsuas hnov sawv daws hais tias" yog lawv ua li nov... mas yeej tsis tuag, twb yog lawv tsis ua es thiaj tuag." Ua tshoob los tib tam, kuv tsis tau pom dua ib lub tshoob twg es yuav npliag liag tsis muaj cob chim li, tus twg los "lawv ua yuam kev qhov nov, lawv ua txhaum qhov nov lawm...thiaj muab nplua..."
Hmoob tej kev ntseeg, yog coj li txheej thaum ub mas kuj yeej zoo thiab tsim nyog, tab sis tom qab no sawv daws ua neej muaj thiab muaj zab txuas ceg ntxiv thiab mas muab ua txab ua tshawv, yam li twb tsis yog ib txoj kev ntseeg lawm....Muaj hu plig qau, vim cov neeg lub ntuj tshiab, noj nqaij ntau, haus dej qab zib thiab npias ntau, ua rau lawv mob ntshav qab zib, me tub yau qaug zog, ces txawm xeeb muaj hu plig "qau" tseem cav kim kawg. Ntuj xeeb teb tshwm tsis tau hais tias ib yam khoom ntawm yus lub cev muaj ib tug plig, tsuas hais tias ib tug neeg ciaj sia muaj ib tug plig xwb. Muaj ua neeb saub, ua neeb ntuj, ua neeb niam toj txiv toj,...thc...Los tshuam rau Neeb Siv Yis, neeb puaj tiam.
Tham ib zaj kwv huam rau tij laug Xyooj Tsab mloog hais txog kev hlub niam hlub txiv.
Nyob Fab Kis teb, thaj tsam xyoo 2000 tawm, muaj ib tug niam pog Hmoob Lis, nws laus laus lawm, nws nrog tus tub nyob, nws niaj hnub nyob zaum tib lub rooj qub xwb, sawv tsis taus mus kev. Nws kuj tau nyiaj laus pab thiab, tab sis yog tus tub thiab tus nyab khaws. Nws xav noj dab tsis los tsis zoo li siab xav li thaum nws tseem ua taus, muaj ib hnub nws nqhis nqhis mov nplaum, nws taij nws tus tub, los tus tub hais tias tsis muaj mov nplaum. Ces nws taij taij tso tseg, nyob nyob muaj ib hnub tus xeeb ntxwv me me li 3-4 xyoos li txawm tuav ib thooj mov nplaum ntawm tes noj, leej niam txawm hais tus tub tias: "Me tub, es koj hais tias tsis muaj mov nplaum li no es qhov uas...N tab tom noj ntawd twb yog mov nplaum ne!" Ces tus tub teb tias: "Pog laus hu dab, yuav tuag ces tuag tsuag tsuag mus." Ces pog laus teb tias: "Siab phem siab tsis zoo, kuv twb muaj nyiaj thiab, kuv nqhis mov nplaum tag npaum no, tsis yuav rau kuv noj, kuv tuag mas txhob quaj nawb, quaj mas yuav pom xwb."
Ces tsis ntev tom qab no pog laus txawm tuag lawm, tuag lawv qhuab ke tag, sawv daws mus quaj, yawg tub txawm mus khoo hlo rau ntawm nws niam lub ntsej muag quaj naj ua cas: "Nws niam cia li npuav nkaus nws sab plhu lo nkaus tsis tso li lawm." Ua rau cov txiv neej uas nyob ntawd pab daws thiaj thov niam cuag dab tsi, ntev loo mam li plam. Lawv hais tias zoo nkaus li leej niam laub qhov ncauj cia li los nplaum kiag rau tus tub sab plhu lawm xwb, tsis yog tom no.
Last edited by koojziagkabzaug on 14th November 2012, 12:22 am; edited 1 time in total