google-site-verification: googlefbfddf59e706b96b.html

Latest topics

» TUS KAB MOB CANCER TXOV HMOOB LOS TAU ZE 600 TAWM XYOO & TSEEM YUAV MUAJ NTXIV
by Liajntsuab 13th April 2018, 11:57 am

» Ib tsoom Phoojywg Nej Nyob Licas lawm
by Liajntsuab 24th March 2018, 2:14 pm

» ***UA NEEB***
by shung 8th March 2018, 5:49 pm

» Neeb Saub ua rau neeg vwm
by shung 4th February 2018, 2:58 pm

» Xiong Chang
by koobpovtxuj 10th December 2017, 11:00 am

» Koobpovtxuj.
by koobpovtxuj 19th November 2017, 1:34 am

» kuv cov duab.
by koobpovtxuj 18th November 2017, 11:30 am

» KHAWV KOOB
by koobpovtxuj 30th September 2017, 4:29 pm

» tus Tswv Cheem Rog yog leeg twg ?
by koobpovtxuj 13th August 2017, 9:03 pm

» Nco txog Phas Nyas Tub Npis Lis Foom Txiaj Ntsim.
by Admin 1st August 2017, 5:12 pm

» Kiab toom lauj npliaj yob lub qub tsev.
by Admin 1st August 2017, 5:04 pm

» Kawm LUS ROV
by koobpovtxuj 10th July 2017, 1:54 pm

» Hmong dance hiphop 2017 [ dance zoo siav heev li]
by zabyaj 15th June 2017, 12:05 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    LIS CUAB PAS DEJ NTSUAB

    Share
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    LIS CUAB PAS DEJ NTSUAB

    Post  koojziagkabzaug on 30th November 2010, 1:59 pm







    Accueil

    Histoire

    Arbre généalogique

    Contact

    Histoire

    Peb pawg lis cuab no, lub keeb kwm los mus mas thaum ub nyob rau lub zos « Paj Dej Ntsuab » (Nong Khèo), Moos Noom Hej ( Nong-Het ), Xeev Xee Khuam ( XiengKhouang ), Los Tsuas Teb (LAOS).

    Paub tsis tau tseeb tias lub hauv paus thaum ub nyob rau quov twg, lub teb chaw twg los thiab tau tsawg tiam , tsawg phaj los lawm , tsuas hnov tej laus hais ua ntus zus los mus tias , thaum ub cov poj kooob lawv nyob rau tuam tshoj Suav teb, yawg thiab pog ntsuab xab raws neej tsa los nyob rau qab deg dej liab dej ntsuab (muj vam toob loob qab tsuas tuav ncuav ) , tso pog, yawg, niam txiv thiab cov kwv tij nyob rau hauv dej liab dej ntsuab ( khwv yees xyoo 1750 rau 1820 ) yawg thiab pog ntsuab xab tuag thiab faus rau saum roob (muj vam toob loob) ntawd, yawg thiab pog ntsuab xab yug tau 4 tug tub , 1 leeg ntxhais, cov tub xws li = Yawg Tshuas Nplooj , Yawg Xaiv Kos , Yawg Nyiaj Vws , Yawg Zam Laum , tus ntxhais tsis nco npe lawm.

    Los txog rau thaum rog hmoob thiab suav sib ntaus sib tua, hmoob swb suav , hmoob tawg khiav los rau xov tshoj teb , xws li teb chaws nyab laj , los tsuas , phab mab , thaib , los tau 30 xyoo lawm , lawv 4 tug kwv tij no mam li khiav lawv qab los , khwv yees xyoo 1830 , los txog rau noom hej (Nong-Het) , xeev xee khuam (XiengKhouang) los tsuas teb (LAOS). Khwv yees xyoo 1845-1850. Tus ntxhais los yog tus muam tso tseg nrog suav nyob rau tuam tshoj tsis coj los. Lawv khiav los txoj rau ntawm dej nab xub qab nab xub deg, poj nyiaj vws hlob (yog yawg ntxoov nab niam) ntog rau hauv dej (thaum hla dej) tau puas me nyuam tuag muab faus rau ntawm nab xub qab nab xub dej , muab tus qaib tsim , lub vaj lig , peb (3) taig kis , mam mus tawm tshais tom ntxa los rau tom tsev , muab tso tseg lawm , niam no peb thiaj li tawm tom tsev no mus rau tom ntxa vim ntshais tsam suav raws cuag thiab lub ntxa tsis txhim zeb los tej zaum yuav yog tso tseg rau thaum ntawv lawm, niam no peb thiaj tsis txhim zeb lawm, Thauv cov laus tuag nyob suav teb mas lub ntxa txhim zeb.

    Teb chaws noom hej (Nong-het) cov hmoob xub los mas los rau tiaj kab pas tsua liab ntawm ntug noom hej mus qaum teb hnub poob khwv yees 15 los 20 lav kev, Lawv 4 tug yawg no los nyob rau zaj yeej phaj, pas ntxhuav, pas ntxhw, pas os, thiab pas dej ntsuab(Nong-kèo), Yawg nyiaj vws tuag xyoo 1924, Yawg zamlaum tuag xyoo 1928, Hos Yawg tshuas nplooj, Yawg xaiv kos, Yawg moov, tsis paub tias tuag rau lub xyoo twg lawm.

    Cov tub cov kiv nyob txog xyoo 1945, nyij poos nce tuaj ntaus (Indochine) sawv daws kuj tseem nyob tau li qub, Xyoo 1953 lub 4 hlis ntuj nyab laj liab nce tuaj ntaus fab kis hauv tiaj rhawv zeb (Xiengkhouang) ua rau sawv daws noj tsis tau nyob tsis tau noom hej thiaj li khiav los mus nyob rau xeev xee khuam (lat-huang, san-song, phou-lu, roob tsuam yeej txog rau xyoo 1960 lub 12 hlis ntuj tag yuav tawm rau xyoo 1961 (kong-lé) nce (vientiane) los rau tiaj rhawv zeb xeev (Xiengkhouang) ua rau sawv daws no nyob tsis taus thiaj li tau tso vaj tse tseg khiav los hla (pa-duong) los nyob rau (pha-khao)thiab (long-cheng) los nyob txog rau xyoo 1975 lub 5 hlis ntuj, Tog los tsuas liab tau los tuav lub teb chaws ,suav daws pom tau hais tias yuav nyob tsis tau lawm suav daws thiaj tso vaj tso tsev tso tsiaj txhu tseg khiav tawm tuaj mus rau thaib teb(Thailande),Txoj kev khiav tuaj muab nyiaj txiag pua kev tuaj xwb cov tuaj raug tua tuag ntawm kev los muaj cov ho tuaj poob dej naj khoom (mékong) tuag los muaj , cov tuaj raug thaib fuab nyiaj los muaj, cov khiav tuaj tsis tau raug luag tua tuag kuj muaj, Muab suav tau tias zaum no yog ib zaug sawv daws tau txais kev piam sij thiab tau txais kev txom nyem loj kawg nkaus.

    Sawv daws tuaj nyob thaib teb tau 2 xyoos tawm xwb kuj pom tias yuav nyob tsis tau thiab sawv daws nyias tawm nyias tuaj rau teb chaws thib peb puv lub ntiaj teb no nyob xws li cov teb chaws loj (Amérique, Canada, France, Australie), Muaj ib co khiav tsis tau tseem nyob rau thaib teb, teb chaws los tsuas, Nyab laj teb.

    Tsis yog tias ib leeg xav nyob ib qho, Yog vim lub ntuj lub teb fav las lawm, Ib pab thiaj li mus nyob ib lub teb chaws ,Ib lub ntuj lawm los xij peem thov kom sawv daws sib hlub sib nug moo txob muab tso pov tseg ,( KOJ XAM MUAJ KUV, KUV XAM MUAJ KOJ ) ces twb zoo zoo lawm, Peb lub keeb kwm muab piav los xaus li no xwb, Txawm tias qhov twg los nqe twg piav tsis yog los tsis zoo, Thov zam txim ho pab kho rau tsis ua li cas.

    sau npe : LISNPLIAJMAIS Lis soob tsav

    © Copyright 2007 HmongLee Network Design by Cédric




    COV TXHEEJ TXHEEM MUAJ RAWS LI NRAM NO:


    P.2--P.3 Hais txog KEEB KWM LIS CUAB NYOB PAS DEJ NTSUAB
    P.4--P.53 Hais txog Ntawm tsev neeg hmoob lis tawm txij ntua ntawm YAWG, LIS NTSUAB XAB Yug los
    P.4--P.11 LIS TSHUAS NPLOOJ
    P.12--P.35 LIS NYIAJ VWS
    P.36--P.48 LIS ZAM LAUM
    P.49--P.53 LIS MOOV
    P.54 nco txog kev dab qhuas ntawm tsev neeg hmoob lis cuab
    P.55--P.56 Hais txog kev ua tus npua DAB ROOG
    P.57--P.60 Hais txog kev dab qhuas tus NPUA CAWV ,thiab tus NYUJ DAB,
    P.661--P.63 Hais txog kev TAW TXIM tus npua cawv thiab tus Nyuj dab
    P.64--P.66 Hais txog qauv tus NPUA CAWV
    P.67 Hais txog qauv tus NYUJ DAB
    P.68--P.69 Hais txog tus qaib los tus CAWV CHEEM
    P.70 Hais KEV LAIG CAWV THIAB MOV
    P.71--P.73 Hais txog Cov phaj thiab cov npe neeg tau DUA NRAM


    Vim hnub no, kuv xam pom tau hais tias kuv muaj hnub nyoog ntau lawm, kuv thiaj tau los khaws cov kev dab qhuas no los tsim sau ua 1 phau ntawv tseg cia rau cov tub cov kiv tau khaws cia tau siv mus lawm yav tom ntej.
    Kuv sau qhov twg tsis zoo, Tsis raug, Thiab tsis yog lawm los thov nej sawv daws zam lub txim rau kuv, ho pab qhia pab kho rau, Kom raug thiab yog raws peb dab qhuas .


    LYBLIAMAY Ly cha
    CHAW NYOB:
    7, cheminement Vincent D’ INDY
    Appt 722
    31100 TOULOUSE



    Last edited by koojziagkabzaug on 17th January 2013, 9:15 am; edited 1 time in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    Re: LIS CUAB PAS DEJ NTSUAB

    Post  koojziagkabzaug on 30th November 2010, 2:12 pm




    KEV DAB QHUAS UA TUS NPUA DAB ROOG
    Ua ntej yua ua npua dab roog mas yuav tsum npaj kom muaj 1 lub plhoj taub fwb dab roog, thiab 9 lub khob xyoob, 1 Lub hnab ntaub maj los ntim lub plhoj taub dab roog thiab cov khob, Thaum ua tiav tag dai cia, ( yog tsis muaj ntaub maj los muab ntaub dawb xaws ua los kuj tau tib yam ).
    1/ Mus txiav ib res nplooj ntseej, Ntseej dab roog,Rev tsaus tsaus tig rau sab hnub tuaj coj los yawm fwb dab roog.
    2/ Ib tug npua ‘‘tus nkauj’’ khwv yees muaj li ntawm 4 cheej loj mes ntsis los haj yam zoo los ua.
    3/ Ua thaum yuav tsaus ntuj, Muab ib lub vab tshaus los yog ib lub choo, 1 tug hluav taws tuav ntxuag lub choo, 1 lub qe qaib mus hu nram qhov rooj tag thiab qhov rooj txuas, Muab lub qe dov hauv lub vab tshaus hu, Yog caiv tsis tau tsis txhob yuav tus hluav taws ntxuag.
    4/ Caiv tsis pub hais lus mab, lus suav, los lus los tsuas, Thiab lwm yam lus tsis yog lus hmoob, Thaum ub mas caiv tiag tiag txwv tsis pub hais ib los li,Niam no yog caiv tau los haj yam zoo.
    5/ Hu raws li no, Koj niag niam txiv dab roog dab hluas txhiab niaj txhiab hmo tsis muab niag tsiaj niag txhuv los ua koj tug los ua koj npe, Hmo no zoo hnub zoo hmo muab niag tsiaj niag txhuv los ua koj tug ua koj npe tsis seev nraum rooj tsis seev raum ntsa,Yuav los zov vaj los zov tsev,Yuav los pov fwm niam pov fwm txiv, Los pov fwm tub pov fwm kiv, Los pov fwm tsiaj pov fwm txhu, Plig qoob plig loo,Plig nyiaj plig kub.
    6/ Hu tag lawm muab tus npua los tua tseev ua, ( Thaum ub peb muaj teb muaj chaw mas khawb ib lub qhov rau nram ib sab qhov rooj tag, tseev tus npua thiab noj ab tsi los muab pov rau lub qhov ntawv xwb, Tsis pub nqa nqaij thiab nyuag ub nyuag no tawm mus nraum zoov, Puv 3 hnub mam faus lub qhov ntawd ), Niam no ua tsis tau raws lub siab xav lawm, Vim yog luag vaj luag tsev xwb.
    7/ Tseev tau tus npua lawm , Muab cim sab tes lauj sab taw lauj thiab cim lub raum sab lauj tseg cia thiaj li tsis yuam kev , Muab cov hauv nqaij coj mus hau kom siav los, ces muab txhoov rau txim xwb.
    8/ Txhoov cov hauv nqaij, Xub muab lub hauv nrob txhoov ua ntej thiab rau ua ntej dua cov dua li muab yam twg los tau, 2 lub raum,Xub muab lub raum lauj txhoov thiab rau ua ntej , Lub raum sab xis lawv qab, Lub qhov muag lauj tso ua ntej, Tes lauj tso ua ntej, Lub qhov muag xis thiab tes xis mam tso lawv qab.
    9/ Cov txim muab 9 lub tais los rau,Teeb pem hauv ncoo mus rau nram ko taw, tiam sis niam no tsis zoo li thaum ub nyob ntuj qub qab lawm, Lub txaj tig Mus li cas los muaj, Kom nco ntsoov hais tias lub qhov cub nyob tog twg teeb cov txim tog ntawd los mus xwb . P.55




    11/ Muab lub taub ntim kua kom puv nkaus rau, 9 lub khob los rau kua kom puv nkaus rau,ces muab lub taub fwb coj mus sam kua rau 9 lub khob ntawd.
    12/ Yaws fwb , Ib sab tes tuav lub taub fwb, Ib sab tes tuav res nplooj ntseej ntxuag tus hluav taws, Yaws 5 zaug mus, Ho hloov lub taub fwb thiab res nplooj ntxuag tus hluav taws mus rau lwm sab tes, Thaum hloov yog hloov nrog nrab qaum, Yawm 4 zaug rov ces tag li,( tus hluav taws yog tias thaum hu ntawm qhov rooj tsis muaj no tsis txhob muab),Yawm ib lwm sam kua npua rau cov khob ib zaug kom puv 9 zaug.
    13/ Yaws fwb, Leej twg txawj ntau ces twg hais ntau, Yus txawj npaum li cas ces yus tsuas hais npaum li ntawd xwb, Txawj pes tsawg lo hais pes tsawg lo xwb, Yog hais lo lus zoo ces yeej zoo tib yam.
    Yaws hais tias, Hnub no zoo hnub hmo no zoo hmo muaj ncos tsiaj ncos txhuv los ua niam txiv lauj looj dab roog dab hluas tug, Yuav los pov fwm niam pov fwm txiv, pov fwm tub pov fwm kiv,Yuav los pov fwm nyiaj pov fwm kub, Yuav los pov fwm tsiaj pov fwm txhuv, pov fwm qoob pov fwm loo, pov fwm qaib pov fwm npua, kom los nroo ntws puv vaj kom los puv nkuaj, Khwv nyiaj khwv txiaj kom los puv hnab.


    P.56

    -Tu tub ki kom los puv tsev.
    -Tu tsiaj txhu kom los puv nkuaj, Los puv qab vaj tsib taug.
    -Tu npua kom vam xws li zeb dub coj zeb daus.
    -Tu qaib kom vam xws li lau nraj yij lau tsaws.
    -Tu nyuj twm kom los puv qab vaj tsib taug.
    Hmoob tuaj hmoob coj plig tub plig ki tuaj, Mab sua tuaj mab suacoj plig nyiaj plig kub tuaj,Dab txeej dab qus tuaj, Niam txiv dab roog dab hluas kwv qws hlau caum ntaus tag dhau txuas, Ntau txuas dhau tag, Kom dab txeej dab qus tawm rooj tawm ntsa mus kom tag.

    LOS HAUS KUA FWB

    Ua tag lawm muab res nplooj ntseej thiab lub pob tsaig npua muab mus rhais rau tim kaum qhov txos tus yees tsev tseg cia ,Thaum twg muaj ua tus tshiab mam muab pov tseg cov khob thiab lub plhoj taub fwb muab ntim rau hauv lub hnab , Muab coj mus dai rau hauv txaj ib qho chaw zoo cia.

    TUS NPUA CAWV THIAB TUS NYUJ DAB

    Tus npua cawv 9 txim,tib yam li tus npua dab roog, Nws txawv cov hau nqaij, Txhoov ua ntej thiab rau ua ntej xwb, Xub muab lub hauv nrob los txhoov thiab rau ua ntej tso,Mam li muab lub raum xis los txhoov ua ntej thiab rau ua ntej, Lub raum laug txhoov ua qab thiab rau ua qab,Txuas ntxiv mus muab yam twg los tau tag, Qhov muag xis rau ua ntej, Qhov muag laug rau lawv qab, Tes xis rau ua ntej , Tes laug rau lawv qab, Taw xis rau ua ntej ,Taw laug rau lawv qab.
    LUB HAUV PAUS PIB MUS MUAJ XWS LI NRAM NO
    Thov kom tau cov thawj lwm thiab npaj kom tau cov khoom yuav los siv kom txhij tso.
    1-]...1 Tug txiv neeb
    2-]...Lu nruas ( kom yog lub nruas yug )
    3-]...1 Tug txiv qeej
    4-]...Tus laig dab ( los yog tus coj noj coj haus )
    5-]...2 Tug tuav tes
    6-]...Npaj tsoov tsho tus poj niam ( 1 daim tiab dawb, 1 lub tsho, 1 txoj siv ceeb khi )
    7-]...Npaj tsoov tsho tus txiv neej ( 1 lub tsho, 1 txoj phuam khi )
    8-]...1 Tug kuam xyoob
    9-]...1 Lub hleb, Lub hleb ntawd ua ib tug nkauj nyab tso pw rau hauv lub hleb, ( yog tus poj niam no hnav tiab dawb, Ib lub tsho, Ib txoj siv ceeb)-( yog tus txiv neej no hnav tsho tshaj sab, Ntoo ib txoj phuam),
    P.57

    Lub hleb ntawd tso rau ntawm tag tus txiv neeb nrab qaum, Tus txiv neeb ua neeb mus tos , Tus txiv neeb xa xov los mam li muab hlawv mus rau tus txiv neeb coj mus kho tus tuaj yuav nyuj lub tsev.
    10-]...Npaj tau cov hais los saum no txhij tag lawm.
    11-]...Hu cov thawj lwm tuaj txog tag lawm.

    THAUM PIB UA

    Muab ib lub rooj, Hu rub cov thawj lwm los zaum.
    - Tus txiv neeb, Tus laig dab, Tus txiv qeej, 2 Tug tuav tes
    -Ce cawv thiab tsaws cawv rau cov thawj lwm ib leeg ib khob tag lawm, Los thov luag kom luag pab peb leg hau lwm kom tiav, Pe lawv ib leeg ib pes.
    -Thov tag lawm, Ce cawv cob hauj lwm rau cov thawj lwm pib mus.
    -Tus txiv neeb ua neeb mus tos tus tuaj yuav nyuj ua ntej, Mam li los tos tus tuaj ua luag lawv qab, Tos tuaj rau saum yees nthab yees tse tseg, Tus txiv neeb nqi neeb los, Pib ua mus.
    - Muab ib daim lev los pua pem hauv plag, Ces muab lub tsho thiab daim tiab coj mus tso rau, Tus ua luag tuaj tom hauv paus thawj txim(sab xis).
    - Lub nruas dai rau ntawm tus ncej tag.
    - Ua ib qho mov nrog ib lub qe ( faib rau ob leeg noj ).
    - Ce cawv rau tus laig dab thiab tus txiv qeej, Pib ua mus.

    UA TUS NPUA CAWV



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    Re: LIS CUAB PAS DEJ NTSUAB

    Post  koojziagkabzaug on 30th November 2010, 2:17 pm



    TAWM TAG KIS SAWV NTXOV

    -Rau 3.txog caw yuav coj mus taw nra yuav mus yuav tus nyuj laug[ib leeg 3txog caw]
    -Hiv mus taws nra, Tus nyab hlob taws ib teg tsau lawv tus txiv qeej qab.
    Coj mus ncig tshuav, Tus txiv neej no yog 9 ncig, Mus 5 ncig rov 4 ncig,
    Tus poj niam no yog 7 ncig mus 4 ncig rov 3 ncig.
    -Ncig puv lawm coj mus rau tsev tshiab, Rau ib leeg 3 txog caw so tsev tshiab.
    -Thiab so li 5 los 10 feeb.
    -Rau ib leeg 3 txog caw yuav coj mus rau tsev laus, Tus yuav nyuj ua ntej ,
    Tus ua luag lawv qab
    -Thaum mus txog rau tsev laus, Muab tus tuaj yuav nyuj tuaj rau sab xis thawj
    txim, tus ua luag rau sab laug txim ob, Rau ib leeg 3 txog caw.
    -Rau ib leeg 3 txog caw yuav muab nyuj laug rau tus tuaj yuav nyuj.
    -Rau 3 txog caw tiav lawm ntawg nyuj cob nyuj rau thiab tua nyuj rau.
    Rau cawv rau txiv qeej cob nyuj.
    -Tus nyuj kom tus zoo nkauj, Ib hom plaub, tsis lov kub tsis lov ceg,
    Tsis tu tw tsis txaij.



    Ce cawv rau txiv qeej tshuab qeej muab nyuj cob rau tus tuaj yuav nyuj .
    -Cim tes taw xis thiab lub raum xis cia.
    -Muab cov nqaij coj los hau siav lawm, npo los txhoov rau txim.
    -Rau txim tiav lawm, rau ib leeg 3 txoj cawv yuav taw txim.
    -3 txoj cawv taw txim tag, ce cia li taw txim mus xwb, Xub pib thawj txim tus tuaj yuavnyuj mus kom kawg tom ntsis tag, Laig cawv thiab laig mov nqaij rau noj.
    -Laig noj haus tag lawm,Rau ib leeg 3 txog cawv yuav yaws txim.( yaws txim pib tom ntsis los).
    -Yaws txim tiav tag, Yog muaj ntawv no hawv ntawv rau.
    -Rau cawv ib leeg 3 txog cawv rau yuav xa mus vaj mus tsev.
    -Rau 3 txog cawv xa mus vaj mus tsev tiav tag, Cia li ntaus kuam qhuav xa xwb.
    -Xa tiav tag lawm, Muab tus kuam rau niam tais liab xa rov mus.
    -Ua tiav tag lawm, Tus txiv neeb rov ua ib thaj neeb xa nyuj ,Xa tus tuaj yuav nyuj , Tus ua luag rov mus kom txog tsev,Ua nkuaj kaw nyuj cia tib si.
    -Dab qhuas txheev tiav tag lawm,Los ua ib rooj ntxuag los tiam txiv neeb,Thiab cov thawj lwm,thiab cov ua yawg,Ua txiv tau tuaj nrog saib dab saib qhua sawv daws tsaug, Pe ib leeg ib pes.

    KEV TAW TXIM TUS NPUA CAWV THIAB TUS NYUJ DAB

    Tsis hais tus npua cawv los yog tus nyuj dab yeej ua tib yam txawv qho los me ntsis xwb,Ua ntej koj yuav tawm txim,Yuav tsum rau cawv ib leeg 3 txoj cawv ceeb toom tso, Koj mam tawm txim.

    UA TXOJ CAWV YUAV TAW TXIM TUS NPUA CAWV TUS UA LUAG TUAJ:


    Tub los nyab.......... Hos koj ua tub koob tub xo nrog
    Txiv los niam..........Tuaj nrog .......Yuav tus nyuj laug nyuj kub nto ntuj
    Tw suab teb, Tsev peg tsis muaj nkuaj npuas, Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm,Yuav rau 3 Txoj cawv rau koj haus
    Tso yuav taw txoj taw txim rau koj, Koj txais thiaj li tau ( 1 txog,2 Txog,3 Txog ).
    P.61
    TUS TUAJ YUAV NYUJ:

    Txiv los niam........Hos koj 9 hnub taij tsis nrauj, 8 hmo taij tsis tseg,
    Yuav nrog .........Yuav tus nyuj kub nto ntuj tw suab teb, Tsev peg tsis muaj nkuaj npuas , Tsev taug tsis muaj nkuaj nyuj,
    Mus nrhiav tau nram mab nram suav los ua tau puv txoj puv txim lawm, Yuav rau 3 txoj cawv rau koj haus tso, Yuav taw txoj taw txim rau koj , Koj txais thiaj li tau,( 1 txog, 2 txog, 3 txog ).

    UA TXOJ CAW YUAV TAW TXIM TUS NYUJ DAB TUS TUAJ YUAV NYUJ:


    Txiv los niam........Hos koj 9 hnub taij tsis nrauj, 8 hmo taij tsis tseg, Yuav nrog .........Yuav tus nyuj kub nto ntuj tw suab teb, Tsev peg tsis muaj nkuaj npuas , Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm, Yuav rau 3 txoj cawv rau koj haus tso, Yuav taw txoj taw txim rau koj, Koj txais thiaj li tau,( 1 txog, 2 txog, 3 txog ).

    TUS UA LUAG TUAJ:

    Tub los nyab......Hos, Yawg los Pog........9 hnub taij tsis nrauj, 8 hmo taij tsis tseg, Yuav nrog .......Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas, Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm, Koj ua tub koob tub xo nrog pog los yawg tuaj Yuav rau 3 txoj cawv rau koj haus tso, Yuav taw txoj taw txim rau koj, ( 1 txog, 2 txog, 3 txog ).

    TAW TXIM TUS NPUA CAWV

    TUS UA LUAG TUAJ:

    Tub los nyab......Hos, Koj ua tub koob tub xo nrog Yawg los Pog.......Tuaj nrog .
    Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas, Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm, Koj tuaj khob cawv no thiab txim no, ( koj muab tus kuam ntaus khob cawv ib teg, Ntaus tais txim ib teg ).
    P.62

    TUS TUAJ YUAV NYUJ:

    Txiv los niam........Hos koj 9 hnub taij tsis nrauj, 8 hmo taij tsis tseg,
    Yuav nrog .........Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas , Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm, Koj tuaj khob cawv no thiab txim no, ( koj muab tus kuam ntaus khob cawv ib teg, Ntaus tais txim ib teg ).

    TAW TXIM TUS NYUJ DAB

    TUS TUAJ YUAV NYUJ:
    Txiv los niam........Hos, koj 9 hnub taij tsis nrauj, 8 hmo taij tsis tseg,
    Yuav nrog .........Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas , Tsev taug tsis muaj nkuaj nyuj, Mus nrhiatau nram mab nram suav los ua tau puv txoj puv txim lawm, Koj tuaj khob cawv no thiab txim no, ( koj muab tus kuam ntaus khob cawv ib teg, Ntaus tais txim ib teg ).

    TUS UA LUAG TUAJ:

    Tub los nyab......Hos, Yawg los Pog.......9 hnub taij tsis nrauj, 8 hmo taij tsis tseg,Yuav nrog .........Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas, Tsev taug tsis muaj nkuaj nyuj, Mus nrhiav tau nram mab nram suav los ua tau puv txoj puv txim lawm, Koj ua tub koob tub xo Nrog Yawg los Pog tuaj, Koj tuaj khob cawv no thiab txim no, ( koj muab tus kuam ntaus khob cawv ib teg,Ntaus tais txim ib teg ).

    TAW TXIM 3 MUS TXOG TXIM KAWG, THIAB COV TUAJ SAIB TUAJ XYUAS

    Yawg , Pog .........Hos, Txiv los niam........ 9 hnub taij tsis nrauj, 8 hmo taij tsis tseg, Yuav nrog .........Yuav tus nyuj laug nyuj kub nto ntuj tw suab teb, Tsev peg tsis muaj nkuaj npuas , Tsev taug tsis muaj nkuaj nyuj,
    Mus nrhiav tau nram mab nram suav los ua tau puv txoj puv txim lawm, Suav daws yuav tuaj sib qo qeej sib qo nruas tuaj khob cawv no thiab txim no , ( koj muab tus kuam ntaus khob cawv ib teg, Ntaus tais txim ib teg ).








    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    Re: LIS CUAB PAS DEJ NTSUAB

    Post  koojziagkabzaug on 30th November 2010, 2:20 pm

    TUS QAUV LUB TAUB HAU NPUA YAS IB:
    - Tsis hais tus npua dab roog , Los tus npua cawv.
    - Lub taub hau npua muab phua raws li qhov hom cia ntawm no.
    - Tus npua cawv rau xis ua ntej, Tus npua dab roog rau laug ua ntej.


    COV TXIM






    Last edited by koojziagkabzaug on 1st December 2010, 11:24 am; edited 1 time in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    Re: LIS CUAB PAS DEJ NTSUAB

    Post  koojziagkabzaug on 1st December 2010, 11:19 am

    TUS QAUV COV CES NPUA YAS IB:

    - Tsis hais tus npua dab roog , Los tus npua cawv
    - Tom qab hlais ua 4 ces thiab txiav tus ko tw tawm tag lawm.
    - Cov ces muab los hlais ntxiv cov txim raws li hauv qab no.
    - Tus npua dab roog rau laug ua ntej, Tus npua cawv




    TUS QAUV NPUA CAWV LUB TAUB HAU THIAB COV CES YAS OB


    - Tsis hais tus npua cawv , Los tus npua dab roog.
    - Lub taub hau muab phua raws li qhov hom cia hauv qab no.
    - Tus npua cawv rau xis ua ntej, Tus npua dab roog rau laug ua ntej.

    COV TXIM



    TUS QAUV NYUJ DAB LUB TAUB HAU THIAB COV TES TAW:

    - Lub taub hau nyuj phua raws li qhov hom tseg cia xws li nram qab no.
    - Cov hauv nqaij xub muab lub hauv nrob los txhoov thiab rau ua ntej.
    - Lub raum xis muab los txhoov thiab rau ua ntej, Lub raum laug muab txhoov thiab rau tom qab.
    - Cim tes taw sab xis tseg cia thiab cim raum xis cia thiaj li tsis yuam kev.
    - Tes taw tso sab xis ua ntej.
    - Tus Nyuj ua 13 TXIM 3 NTSAU



    TUS QAIB CAWV LOS TUS CAWV CHEEM [ 5 TXIM ]


    Ua tus qaib cawv no , Twb vim yog tsis muaj nyuj tsis muaj nyiaj yuav nyuj los ua
    Thiaj ua tus qaib cawv no cheem tos ,Tab sis yuav tsum yog cuaj neeb yim tsawv hais tias tseeb tseeb tiag mam li ua , Tau ua tus qaib cawv cheem no lawm tsis pub dhau ib xyoos, Txawm tias muaj thiabpluag los yuav tsum nrhiav kom tau nyuj los ua thiaj tag.

    TUS QAIB CAWV NO MUAJ

    1- 1-tug kuam xyoob
    2- 1-tug qaib
    3- 1-fwj cawv
    4- 1-daim txiag ntoo 30x30
    Tus qaib cawv no ua ntawm tus ncej tag los tus ncej dab ncej qhua, Muab daim txiag ntoo los tso rau ntawm tus ncej tag, Ua 3 txoj cawv tos tuaj , Mas muab tus qaib los ntawg rau , Muab tua tseev coj los hau kheej kom siav,Muab los txoov ua 5 daig muab 5 lub tais ra ntawm tus ncej tag mus rau pem hauv plag.

    TUS QAIB TXOOV LI NO

    -Txiav txij yav caj dab rau lub taub hau
    -Tus qaib phua ua ob sab, ib sab txiav ua 2 daim txiav txij ntshua tsos



    TXIM 1 LAIG LI NO

    Txiv los niam…Yawg los pog… cuaj hnub taij tsis nrauj yim hmo taij tsis tseg yuav tuaj nrog….NYIAJ HLAU.. yuav tus nyuj kub nto ntuj tw suab teb , Tsiaj txhu tseem tsis tau loj , Thov ua tus cawv cheem tos.

    TXIM 2 MUS RAU TXIM 5 LAIG LI NO
    [ Hu cov POG cov YAWG , Niam HLOB Txiv HLOB, Niam Ntxawm Txiv Ntxawm, cov Tij laug Niam Tij , cov Kwv Niam Ntxawm,] Yawg los pog………., cuaj hnub taij tsis nrauj yim hmo taij tsis tseg yuav tuaj nrog….NYIAJ HLAU.. yuav tus nyuj kub nto ntuj tw suab teb , Tsiaj txhu tseem tsis tau loj , Thov ua tus cawv cheem tos.
    Ua tag lawm muab tus kuam coj mus khaws cia rau saum tus yees nthab yees tsev tseg , Thaum twg nrhiav tau tus nyuj los ,Yuav ua nyuj dab mam li mus muab tus kuam rov los ua.
    NTAWM TUS QAIB CAWV CHEEM NO ,Tsis kawg kev yuav ua,Vim hais tias niam no tsis zoo li yav ntuj thaum ub lawm, Tsuas yog kom sawv daws nco ntsoov hais tias peb caj HMOOB LIS CUAB no ,Ib txwm muaj tus qaib cawv cheem no.

    ……………xaus li no …………………………….




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3529
    Date d'inscription : 2010-02-28

    Re: LIS CUAB PAS DEJ NTSUAB

    Post  koojziagkabzaug on 1st December 2010, 11:25 am



    KEV UA TXOJ CAWV 3 TXOG LOS 3 ZAUG CAWV

    -Laig li no :Yuav haus kev tshaib kev nqhis,Tuaj yuav nqa 9 hau kuab 8 hau tshuaj tuaj kho………… Luag ib tsev 20 leej tsis pub muaj mob muaj nkeeg, Kom noj qab nyob zoo ,Nyob ntshiab li dej ntsuab li zoov, Rov yuav sau mob sau ntsaj rov.
    [ Koj muab khob cawv hliv me ntsis rau ]

    KEV LAIG CAWV THIAB MOV


    Tsis hais tus npua cawv los tus nyuj dab ,Laig cawv thiab laig mov laig tib yam
    Nws tsuas txawv lo haus cawv thiab lo mov qaij xwb.

    TXIM 1 LAIG LI NO


    Yawg los Pog… koj cuaj hnub taij tsis nrauj yim hmo taij tsis tseg yuav tuaj nrog……………. Yuav tuaj yuav tus nyuj kub nto ntuj tw suab teb , Tsev peg tsis muaj nkuaj txu tsev taug tsis muaj nkuaj nyuj , Mus nrhiav tau nram mab nram sua los ua tau puv txoj puv txim lawm, Koj yuav tuaj haus cawv los noj mov noj nqaij , Koj tuaj los noj nqaij yuav tuaj pov fwm pov yawm , Yuav thaiv mob thaiv ntsaj thaiv mob thaiv nkeeg,Tuaj mas yuav nqa cuaj hauv kuab yim hauv tshuaj tuaj kho luag ib tsev nees nkaum leej kom nyob ntshiab li dej ntsuab li zoov ,Rov yuav sau mob sau ntsaj sau mob sau nkeegr ov qab.

    TXIM 2 LAIG LI NO

    Tub los Nyab ……Koj ua tub koob tub xov nrog Yawg los Pog…….,Tuaj nrog ………., yuav tus nyuj kub nto ntuj tw suab teb , Tsev peg tsis muaj nkuaj txu tsev taug tsis muaj nkuaj nyuj , Mus nrhiav tau nram mab nram sua los ua tau puv txoj puv txim lawm, Koj yuav tuaj haus cawv los noj mov noj nqaij , Koj tuaj los noj nqaij yuav tuajpov fwm pov yawm , Yuav thaiv mob thaiv ntsaj thaiv mob thaiv nkeeg,Tuaj mas yuav nqa cuaj hauv kuab yim hauv tshuaj tuaj kho luag ib tsev nees nkaum leej kom noj qab nyob zoo nyob ntshiab li dej ntsuab li zoov ,Rov yuav sau mob sau ntsaj sau mob sau nkeegr ov qab.

    TXIM 3 MUS RAU KAWG LAIG LI NO

    Yawg thiab pog , Niam hlob txiv hlob, Niam ntxawm txiv ntxawm……….Yawg los Pog…….. cuaj hnub taij tsis nrauj yim hmo taij tsis tseg yuav tuaj nrog……………. Yuav tuaj yuav tus nyuj kub nto ntuj tw suab teb , Tsev peg tsis muaj nkuaj txu tsev taug tsis muaj nkuaj nyuj , Mus nrhiav tau nram mab nram sua los ua tau puv txoj puvtxim lawm, Sawv daws yuav tuaj nrog haus cawv los nrog noj mov noj nqaij , Tuaj noj tuav haus yuav tuaj pov fwm pov yawm , Yuav thaiv mob thaiv ntsaj thaiv mob thaiv nkeeg,Tuaj mas yuav nqa cuaj hauv kuab yim hauv tshuaj tuaj kho luag ib tsev nees nkaum leej kom nyob ntshiab li dej ntsuab li zoov ,Rov yuav sau mob sau ntsaj sau mob sau nkeeg rov qab.

    P.70

    HAIS TXOG COV DUA NRAM LAWM

    Pawg hmoob lis cuab nyob pas dej ntsuab ntawm [ Nong-khéo, Nong-Het ]
    Xeev [ XIENGKHOUANG ] Teb chaws los tsuas [ LAOS ].
    Nyob zoo txog rau cov yawg, cov txiv ,cov tij ,cov kwv, thiab cov tub ki sawv daws Kuv xam pom hais tias peb cov laus duam nram mus zuj zus lawm, Cov hluas tus paub dab qhuas los kuj paub,Tus tsis paub los kuj tsis paub tiag, Yog li no mas kuv thiaj li tau los tshawb xyuas, Cov laus tau duam nram lawm lub npe los sau rau hauv tsab ntawv no, Tseg cia rau cov me tub me nyuam tau coj los siv lawm yav tom ntej , Suav txij li ntawm YAWG tshua nplooj,YAWG xaiv ko, YAWG nyiaj vws, YAWG zam laum, YAWG moov Lawv 5 tug kwv tij no tawm suav teb los rau los tsuas teb mas khwv yees ntawm xyoo 1840, Los txog rau ntawm Nong-Het 1850 txij thaum ntawv los txog rau niaj hnub no kuj muaj cov duam nram coob leej neeg thiab muaj ntau phaj los mus lawm.
    Cov phaj thiab cov npe neeg tau duam nram muaj xws li nram no.

    Phaj0:YAWG paj sua txiv muam lis , .......Tuag nyob rau suav teb
    Phaj0:YAWG meej seem lis ,....................Tuag nyob rau suav teb, Muaj 4 tug tub.

    Phaj0:YAWG Txawj lauv, Tuag nyob rau suav teb (2 tug hlob khiav los mus-
    -ntawm xyoo1810)
    YAWG Txiaj yws, ..Tuag nyob rau suav teb
    YAWG Xis, ..........Tuag nyob rau suav teb
    YAWG Ntsuab Xab,Tuag nyob rau mus toob loob suav teb,Khwv yees ntawm xyoo 1780 mus rau 1830, Yawg yog tus yug cov YAWG, Tshuas nplooj, xaiv ko, nyiaj vws , zam laum Los rau los tsuas teb
    Phaj1: YAWG TSUAS NPLOOJ “1 “
    YAWG XAIV KO “1 “
    YAWG NYIAJ VWS “1.2.3 “
    YAWG ZAM LAUM “1 “
    YAWG MOOV “1 “
    P.71
    Phaj 2: NTXOOV NAB “1”, NOM LWM”1,2,3”, TXIAJ VAJ”1,2”, NTXHAIV NTXAWG”1”,VAM KAWV”1,2”,S OOB NAS”1”, PAJ YIAS”1,2”, TXHIAJ ZEB”1,2”, TXIAJ TSWB”1,2”XOV KAUB”1”, XOV TXAIS”1”, TOOJ XEEB”1”, FAIV NTAJ”1”, NTXOOV HUAS”1”,TXIAJ KUAM”1”, XAIV XWM”1”, TXOOV TUB”1”, TSUJ LEEV”1”,PHAUJ NTXHAIS(pog dab)KAWM, YAWG LWJ.

    Phaj 3:VAM KHWB”1,2”, TXOOV TEEV”1”, XAIV XWM”1”, SOOB NTXAWG”1”, SUAV TUAM”1”NTXOOV XEEB”1”, NPLIAJ MAIS”1,2”, NYIAJ LOOJ”1”, PAJ VWS”1”, ZAM TEEV”1”,PAJ VWS, TXAWJ YIAS”1”, NYIAJ XYOOJ”2,4”, POG NOM TSAS”1,2,3”, NTSUAB KAUB, TXAM, NPLIAJ, PAJCAI”1”, NTSUAB LAUJ”1”, NEEJ THOOB”1,2”, TXOS, TXAiM,NTSUAB VAJ”1,4”, POG NOM PUS”1”, NPLIAJ TXOOV”1,2”, SHUAS NTXAWG”1,2”,NYIAJ THOOB”1,2”, TXHIAJ VWJ”1”, NPLIAJ YOB, TOOJ CIB, TXIAJ XAUV, TXIAJ VAS”1”XAIV SUAV”1”, TXIAJ TSAB, NYIAJ TSAWB”1”, TOOJ POV”1,2”, PAJ KAWM”1”,NYIAJ TEEV”1”, YOB,KHWB, XAUV”1,2,3”, VAM XEEB”1”, MAIV,TSAV YAJ, TXOOJ TUB”1”,XEEB,VWJ,LAUB,VAM NEEB,NYIAJ FUAS,

    Phaj 4: LOOJ, NTSUABVAJ,PAJ LWJ, NYIAJ XAUV”1”, NPLIAJ XAB, TXHIAJ FOOM, ZAM TEEV”1”,NYIAJ TSAS”1,2”, PAJ TSAB, TSWB, MAIB, NYIAJ KAWM”1”, TOOJ VAS”1”, XAB,POG SOOB TSAV”3”, NTSUAB TXOS, VAM KAIM”1”, NTSUAB XAB”1”, NYIAJ VWS, RIAM,VAM MEEJ”1”, TOOJ CHOJ, TUB LIS, POG LIS NOOS”1”, ZAM YIAS, NPIS, TOOJ XEEB,PAJ TXIAB, NOM LWM, TSAB, LIAB, KUAM, PAJ TUB”1”, TXOOV TUAM”1,2,3”, TSU, XAB,FAIV NTAJ, NYIAJ TEEB”1,2”, MAIB, THOOS, TXIAJ KUAM, VAJ KUB, XOV TXIAB”1,2”,YIAS PAJ MIB”1”, TUAM, KUAM, YAJ, NKA, NPUAG VAJ, NTSUAB TXOS, TSAV NTXAWG,NOM YEEJ”2”, POG NPUAG FWM”1,2”, VAM TXOS, NYIAJ HAWJ, NOM TXAIS,POG TXAWJ TOOG”1”, LIS VOOS, POG SOOB LWJ”1”, TXHIAJ TSWB PAJ TSHEEM, LIAB,KHEEM,


    Phaj 5:VAM NRUAS, SAWM, VAJ TSUA, POB ZEB, VAJ KUB, KAB YEEB, NPLIAM, CHOJ, NAB, NYIAJ, NTXOOV ZEB, PAJ VWS, TXIAV LAM, PEEJ TSAB, ZEB, TXOOJ CAWV, LIS TEEB, NPIS,TXAM, SUAV, POS, LIS XYOOB, Nyab LIS KAUS”1”, LIS TXOS”1,2”, TXOOV, TXHIAJ,Nyab TXOOV TUB”1”, NOM KHWB, POS, TSHIM, NTXOOV NAB, TSAV TXHIAJ, NTXAWG,POS,

    Phaj 6:MAUV,

    Phaj 7:

    P.72
    FAJ SEEB:

    “1”.........TUS POJ NIAM 1 .....DUA NRAM
    “2”.........TUS POJ NIAM 2 .....DUA NRAM
    “3”.........TUS POJ NIAM 3 .... DUA NRAM
    “4”.........TUS POJ NIAM 4 .... DUA NRAM
    “5”.........TUS POJ NIAM 5 .... DUA NRAM






    Yog nej leej twg ho pom hais tias tseem tshuav tej tug kuv muab sau tsis tau rau hauv
    phau ntawv no, Nej ho pab muab sau npe ntxiv rau tsis ua li cas.

    ua tsaug ntau.

    LIS SOOB TSAV



    P.73
    KEEB KWM LIS CUAB NYOB PAS DEJ NTSUAB


    Peb pawg hmoob lis cuab no, lub keeb kwm los mus mas thaum ub nyob rau lub zos « Paj Dej Ntsuab » [Nong Khèo], Moos Noom Hej [ NongHet ], Xeev Xee Khuam [XiengKhouang ], Los Tsuas Teb (LAOS).
    Paub tsis tau tseeb tias lub hauv paus thaum ub nyob rau qhov twg, lub teb chaws twg los thiab tau tsawg tiam , tsawg phaj los lawm , tsuas hnov tej laus hais ua ntu zus los mus tias , thaum ub cov poj koob lawv nyob rau tuam tshoj Suav teb, yawg thiab pog ntsuab xab raws neej tsa los nyob rau qab deg dej liab dej ntsuab (muj vam toob loob qab tsuas tuav ncuav ) , tso pog, yawg, niam txiv thiab cov kwv tij nyob rau hauv dej liab dej ntsuab ( khwv yees xyoo 1750 rau 1820 ) yawg thiab pog ntsuab xab tuag thiab faus rau saum roob (muj vam toob loob) ntawd, yawg thiab pog ntsuab xab yug tau 4 tug tub , 1 leeg ntxhais, cov tub xws li = Yawg Tshuas Nplooj , Yawg Xaiv Kos , Yawg Nyiaj Vws , Yawg Zam Laum , tus ntxhais tsis nco npe lawm.
    Los txog rau thaum rog hmoob thiab suav sib ntaus sib tua, hmoob swb suav,hmoob tawg khiav los rau xov tshoj teb , xws li teb chaws nyab laj , los tsuas ,phab mab, thaib , los tau 30 xyoo lawm , lawv 4 tug kwv tij no mam li khiav lawv qab los ,khwv yees xyoo 1830 , los txog rau noom hej (Nong-Het) , xeev xee khuam (XiengKhouang) los tsuas teb (LAOS). Khwv yees xyoo 1845-1850. Tus ntxhais los yog tus muam tso tseg nrog suav nyob rau tuam tshoj tsis coj los. Lawv khiav los txog rau ntawm dej nab xub qab nab xub deg, poj nyiaj vws hlob (yog yawg ntxoov nab niam) ntog rau hauv dej (thaum hla dej) tau puas me nyuam tuag muab faus rau ntawm nab xub qab nab xub dej , muab tus qaib tsim , lub vaj lig , peb (3) taig kis , mam mus tawm tshais tom ntxa los rau tom tsev , muab tso tseg lawm , niam no peb thiaj li tawm tom tsev no mus rau tom ntxa vim ntshais tsam suav raws cuag thiab lub ntxa tsis txhim zeb los tej zaum yuav yog tso tseg rau thaum ntawv lawm, niam no peb thiaj tsis txhim zeb lawm, Thauv cov laus tuag nyob suav teb mas lub ntxa txhim zeb.
    Teb chaws noom hej (Nong-het) cov hmoob xub los mas los rau tiaj kab pas tsua liab ntawm ntug noom hej mus qaum teb hnub poob khwv yees 15 los 20 lav kev, Lawv 4 tug yawg no los nyob rau zaj yeej phaj, pas ntxhuav, pas ntxhw, pas os, thiab pas dej ntsuab(Nong-kèo), Yawg nyiaj vws tuag xyoo 1924, Yawg zamlaum tuag xyoo 1928, Hos Yawg tshuas nplooj , Yawg xaiv kos, Yawg moov ,tsis paub tias tuag rau lub xyoo twg lawm.
    Cov tub cov kiv nyob txog xyoo 1945, nyij poos nce tuaj ntaus (Indochine) sawv daws kuj tseem nyob tau li qub, Xyoo 1953 lub 4 hlis ntuj nyab laj liab nce tuaj ntaus fab kis hauv tiaj rhawv zeb (Xiengkhouang) ua rau sawv daws noj tsis tau nyob tsis tau noom hej thiaj li khiav los mus nyob rau xeev xee khuam (lat-huang, san-

    P.2
    song, phou-lu, roob tsuam yeej txog rau xyoo 1960 lub 12 hlis ntuj tag yuav tawm rau xyoo 1961 (kong-lé) nce (vientiane) los rau tiaj rhawv zeb xeev (Xiengkhouang) ua rau sawv daws no nyob tsis taus thiaj li tau tso vaj tse tseg khiav los hla (pa-duong) los nyob rau (pha-khao)thiab (long-cheng) los nyob txog rau xyoo 1975 lub 5 hlis ntuj, Tog los tsuas liab tau los tuav lub teb chaws ,suav daws pom tau hais tias yuav nyob tsis tau lawm suav daws thiaj tso vaj tso tsev tso tsiaj txhu tseg khiav tawm tuaj mus rau thaib teb(Thailande),Txoj kev khiav tuaj muab nyiaj txiag pua kev tuaj xwb cov tuaj raug tua tuag ntawm kev los muaj cov ho tuaj poob dej naj khoom (mékong) tuag los muaj , cov tuaj raug thaib fuab nyiaj los muaj, cov khiav tuaj tsis tau raug luag tua tuag kuj muaj, Muab suav tau tias zaum no yog ib zaug sawv daws tau txais kev piam sij thiab tau txais kev txom nyem loj kawg nkaus.

    Sawv daws tuaj nyob thaib teb tau 2 xyoos tawm xwb kuj pom tias yuav nyob tsis tau thiab sawv daws nyias tawm nyias tuaj rau teb chaws thib peb puv lub ntiaj teb no nyob xws li cov teb chaws loj (USA, Canada, France, Australie), Muaj ib co khiav tsis tau tseem nyob rau thaib teb, teb chaws los tsuas , Nyab laj teb.
    Tsis yog tias ib leeg xav nyob ib qho, Yog vim lub ntuj lub teb fav las lawm, Ib pab thiaj li mus nyob ib lub teb chaws ,Ib lub ntuj lawm los xij peem thov kom sawv daws sib hlub sib nug moo txob muab tso pov tseg ,( KOJ XAM MUAJ KUV, KUV XAM MUAJ KOJ ) ces twb zoo zoo lawm, Peb lub keeb kwm muab piav los xaus li no xwb, Txawm tias qhov twg los nqe twg piav tsis yog los tsis zoo, Thov zam txim ho pab kho rau tsis ua li cas.


    Sau npe : LISNPLIAJMAIS Lis soob tsav



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    Sponsored content

    Re: LIS CUAB PAS DEJ NTSUAB

    Post  Sponsored content


      Current date/time is 24th June 2018, 2:12 pm