Home
TSWV XYAS MUS UA TSOV
Thaum ub muaj ib tug yawg hu ua Tswv Xyas no, nws niaj hnub mus kawm puas tsav yam yees siv lauj ! Nws kawm txawj txhua yam, nws xav ua dab ua tsov los tau tib si. Nws mus pom Mab Sua tuaj muag ntaub, muag xov ; nws cia li mus ua tsov hem luag, luag ntshai luag khiav tso ntau xov tseg ces nws khaws. Pom Mab Sua tuaj ua luam,nws saib lawv muaj nyiaj, los nws cia li ua tsov dhia hem luag, luag ntshai, luag khiav ces nws khaws luag tej nyiaj tej kub…Ces nws muaj muaj nyiaj muaj kub lauj… Nyob nyob muaj ib xyoo noj Peb Caug tag, lawv peb kwv tij txiv tub txawm sib yaum mus xyuas teb ua noj. Lawv mus plaub hnub kev deb, lawv tseem mus ncig teb ntau ntau hnub thiab lauj ! Cov phooj ywg nrog nws mus txawm hais tias : « yawg Tsw ! Peb tuaj tau ntev hnub hwv lawm. Peb nqhis nqaij tas npaum no. Peb pom Suav cov twm nram tiaj nrad, koj mus tom ib tug los peb ua zaub naj ». Yawg Tswv txawm hais tias : « Yuav mus los tau kawg ! Tab sis kwv tij mas sib pab tiag tiag laiv ! » Cov kwv tij txawm hais tias : « Yauv mus ntshais dab tsi naj ? Peb coob tag npaum no, peb sawv daws pab yeej tau xwb ! » Yawg Tswv txawm hiab tsuag tsuag tau ib lub pob tawb. Yawg tswv txamw muaj looj kiag taub hau. Ces yawg tswv txawm dhia peb plhaw, nyooj peb suab, Yawg Tswv txawm tsheej kiag tib tug txiv yawg tsov lawm lauj ! Yawg tswv txawm khiav loo mus ib lwm, rov loo los kom sawv daws pab. Ces dawv daws ntaus pig poog pob tawb hle hlo. Tswv txawm hais tias : « Yog nej pab li no mas kuv mam mus ». Ces Yawg tswv rov muab looj kiag rau, Yawg Tswv txawm mus lawm lauj ! Yawg tswv txawm khiav ceev ceev mus txog nram cov niag twm. Ua cas Yawg Tswv tssi pom ib tug twm li, Yawg Tswv pàom pob zeb xwb. Yawg Tswv dhia plhaw lub, dhia plhaw lub los yog pob zeb xwb. Cov nyob pem no mas ntsia Yawg Tswv nim dhia dhia saum cov niag twm nraub qaum. Dhia ntev loo Ntuj thiaj pub ib tug niag maum twm laus laus rau Yawg Tswv tom. Yawg tswv thiaj li pom tu ntawd. Yawg Tswv thiaj tib kaug rau thiab muab kwv los. Kwv los txog cov kwv tij, Yawg Tswv muab tso plhuav rov poog. Cov kwv tij ntau lauj ! Ntau tas zog pob tawb tssi hle li. Lawv ntau li cas los pob tawb tssi hle li lawm lauj ! Yawg tswv txawm tij hlo los mus cuag poj niam me nyuam pab ntau. Poj niam me nyuam ntau tsis hle li thiab. Yawg Tswv los lawm cov kwv tij txawm muab niag twm laws tawv tsuag tsuag, nyuaj qhuav ua tiav tag, tseem ib leeg ci ib daig . Lub hnub tig hlo lawm, ua cas Yawg tswv tig hlo rov los txog ntua. Cov kwv tij rov qab ntau lub pob tawb tsis hle li. Yawg tswv txawm hais tias : « Uab ! Yog nej tsis pab tiag, kuv yuav muab nej ntxuav xwb lauj ! » Cov kwv tij sawv daws txawm thov thov tias : « Yawg tswv lauj ! Thov koj txhob muab peb ntxuag , peb yeej pab kawb nkaus tsis tau lawm. Thov koj tsis txhob muab peb ntxuag. » Yawg Tswv cia li ua tsov txij hnub ntawd lawm lauj ! Lawv rov los txog tsev, Yawg tswv quaj quaj lauj ! Nruab hnub Yawg tswv mus nyob tom hav zoov, hmo ntuj nws rov los pw hauv tsev. Nyob ib ntus, nruab hnub los Yawg tswv cia li nyob hauv zos. Muaj ib hnub tus kwv txawm hais tias : « Tswv koj nyob hauv tsev koj saib me nyuam nawb ! » Hnub ntawd tus kwv mus teb lawm yawg tswv nyob nws txawm saib xwb lauj ! Me nyuam quaj quaj yuav tuag saum txaj, me nyuam tso quav lo tas los Yawg tswv saib xwb lauj ! Ib chim tus kwv mus teb los txog, tus kwv hais tias : « Yawg Tswv ! kuv twb hais tias koj nyob hauv tsev koj pab saib me nyuam no ne ! Ua cas me nyuam lo quav tas, ceb muag tag li ! Txij no mus koj zov me nyuam, yog me nyuam tso quav koj muab ntxuav nawb ! » Yawg tswv thiaj teb tias : « Awj ! kuv nyob hauv tsev ib ntsis me nyuam tso quav kuv mam muab ntxuav . » Ces tus kwv txam rov mus ua teb lawm. Tus kwv txawm hais tias : « Tswv ! Koj nyob hauv tsev ib ntsis me nyuam tso quav thiab ceb muag no koj muab ntxuav nawb ! » Tus kwv txawm mus lawm lauj !Yawg Tswv nyob hauv tsev, ib tsam me nyuam ceb muag thiab tso quav ces Yawg tswv txawm muab me nyuam tom noj tas lawm lauj ! Hnub ntawd tus kwv los txog, tus kwv nug tias : « Me nyuam ne, Yawg tswv ? » Yawg tswv teb tias : « Koj twb hais tias kuv nyob hauv tsev, kuv saib me nyuam, yog me nyuam tso quav kuv muab ntxuav no. Ces me nyuam tso quav kuv ham tsis muaj ntxuav tag lawm les es ! » Tus kwv teb tias : » Kuv kom koj muab dej ntxuav xwb naj ! Cas yuav muab me nyuam ntxuav du dais li no ! Yuav ua li cas os ! Yawg tswv ? Yawg tswv teb tias : « Koj hais tias kom muab ntxuav no ces tso quav kuv kuj muab ntxuav xwb ! » Txij hnub ntawd los tus kwv chim chim lauj !Tus kwv txawm tawm tsev tsis nrog Tswv lawv nyob lawm. Tus kwv txawm tuav tau ib cov tshuaj phom qhuav qhuav nkig nkuav. Nws muab ntim hauv phom thiab rau ib ya muas txwv rau, nws txawm tuaj soj Yawg tswv tua lauj ! Tsaus ntuj zuag, Yawg tswv zaum tib tug niag ncaws nruj nris nram qab cub, tus kwv cia li tsa loo phom rau Yawg tswv log siab. Tib teg nrov nkig nkuav rau Yawg tswv, ua Yawg tswv ntog khwb nris nram qab cub, ua plua tshauv ncho log. Yawg tswv txawm nroo tias : « Ab ! Ua cas yuav heev ua luaj ! » Ces Yawg tswv txawm ntsoos ntsoos tau ibn tus yawg Tswv rov zoo los. Yawg Tswv Xyas txawm tu siab. Yawg txawm khiav mus nyob hav zoov lawm xwb ; tsis tshua nyob hauv tsev lawm lauj ! Thaum Yawg Tswv ua neej nyob yawg txawj txawj neeb, yawg mus nyob hav zoov lawm, yawg poj niam me nyuam muaj mob ces kib paj kws tshuag tshuaj rau saum Yawg lub thaj neeb, tawm mus raum zoov, tuaj raum zoov hu tias : « Yawg Tswv aw ! Hmo no koj los ua neeb saib me nyuam os ! » Ib chim tsaus ntuj yawg Tswv los zaum ntawm thaj neeb. Tib tug niag zoo li d e v ntse taws, nws ua neeb rov his his hws hws, nws ua tas ces nws mam ho lawm. Yawg Tswv tawm mus ncig ntuj ncig teb lauj ! Nws ncig mus txog Tuam tshoj teb, nws mus pom Huab Tais Tsov, mas loj tiag tiag li, loj luaj lub hauv rooblauj ! Yawg Tswv txawm mus hais tias : « Ab ! Txiv Huab Tais ! Wb sib kom tes taw yuad ! » Huab tais Tsob teb tias : « Me tub ! xav sim los sim tiag ! » Yawg tswv hais tias : « Txiv Huab Tais ! koj xub sim rau kuv saib tso seb koj txuj ci luaj li cas ? » Txiv Huab tais txawm teb tias : « Me Tub koj sim ua ntej tso , koj sim rau kuv saib, txiv mam sim rau koj saib . » Yawg tswv thiaj sim, Yawg tswv nyooj 3suab, dhia 3 plaw Yawg Tswv luaj nkaus lub hauv roob. Huab Tais tsov nug tias : « Koj muaj li ntawm ko xwb los me tub ? » Yawg tswv teb tias : « txiv Huab Tais ! kuv muaj li no xwb. » Txiv Huab tais tsov hais tias : « Yog li no kuv yuav sim rau koj saib nawb me Tub ! » Huab tais nyooj 3 suab, dhia 3 plaw luaj nkaus 3 lub hauv roob lauj ! Ces Yawg Tsawv txawm ua tsis tau li cas, nws txawm rov qab los mus tsev. Yawg Tswv yuav npaj ua rog rau Huab Tais tsov, Yawg Tswv txawm mus tos neeg ncig Qab Ntuj hauv Ntuj lauj ! Tos yav Qaum teb mus rau yav Qab teb, tos Nplog teb rau teb chaws Nyab Laj. Tos tus ub tus no, luag cav tus twg txawj dab tsis los Yawg tos tib si, txawj qeej, txawj ntawv, txawj kwv txhiaj, txawj zaj tshoob, txiv xaiv, loj muaj zog, zoo nkauj zoo nraug…Yawg tos tib si. Yawg yuav tos kom tau tus muaj zog thiaj loj tshaj Yawg es Yawg mam mus nrog Huab tais tsov sim txuj ci. Thaum lub caij ntawd mas tej neeg ntshai rhwg qhuas ib tug txawj ub txawj no, qhuas kiag xwb mas tuag kiag li lawm….Yawg tswv mas poj niam los tos, txiv neej los tos. Tos coob coob ces luag kho kho siab lauj ! Luag niaj hnub seev luag txiv, niaj hnub seev luag poj niam me tub me nyuam lauj ! Yawg Tswv txawm hais tias : « Tsis ntshai ! Nej tsis txhob kho kho siab, kuv mam mus tos neeg los ntxiv nej. » Yawg Tswv thiaj mus tos neeg ntxiv, thiaj tos tau Paj yias. Tsov Paj Yias mas loj loj li, tus kaus loj tshaj Yawg tswv li thiaj lauj ! Coj Paj yias los nyob tau 3 xyoos ces tsov Paj Yias tus kaus luaj nkaus li txha pob kws taj.
Muaj ib hnub tsov Paj yias txawm seev tias : « Ab ! chim rau Yawg tswv hwv lawm. Yawg tswv es nim los tos kuv , es kuv tso kuv poj niam me nyuam nyob rau tom qab. Cas yuav chim kuv siab ua luaj, cia muaj ib hnub kuv ob lub noob txiv taum ntaj nov foob qab tso, kuv sim yuav xyuas Yawg saib. Yawg tswv nim yuav ua tau npaum li cas. Cas yuav tos yus los, es yuav tseg yus tej poj niam me nyuam quaj ntsuag nqees rau tom qab. » Muaj ib tug txawm hnov lauj ! Nws txawm mus hais qhia Yawg tswv tias : « Yawg tswv ! Koj ceev faj ! Peb hnov Yawg paj yias seev tias ib hnub twg nws ob lub noob txiv taum ntaj foob qab mas yawg yuav nrog koj sib ntsuas zog no nawb ! Yawg paj Yias chim rau koj hwv lawm, koj mus tos yawg los lawm, nws tseg nws poj niam me nyuam quaj zom zaws rov tom qab. Muaj ib hnub nws yeej yuav nrog koj sib ntsuas zog xwb xwb li no. » Yawg tswv txawm teb tias : « Tiag tiag li lov ? » Cov niag teb tias : « Tiag tiag li, peb hnov yawg hais li ntawd tiag. » Ces Yawg tswv txawm xav tias nws zog twb loj ib yam yus lawm, yog hnub twg Yawg Paj Yias ob lub noob txiv taum ntaj foob qab nws sim ntshe kawg yus yuav tsis yeej nws li xwb. Muaj ib hnub Yawg paj Yias lawv tseem mus yos noj lawm. Yawg Tswv txawm mus tos kev, Yawg txawm coj ib tug nrog yawg, nkawd txawm mus nyob saum ib lub tshag av tos. Yawg Paj Yias lawv tseem tab tom mus yos noj los, Yawg paj Yias los ncag nkaus ces Yawg tswv txawm tib plaw mus khawm nkaus Yawg paj Yias caj dab lauj ! Yawg tswv muab yawg Paj Yias ncho ncho, Yawg Paj Yias tig los muab tsis tau Yawg tswv li, vim Yawg tswv khawm tau caj qwb lawm. Yawg paj Yias khawb khawb yawg Tswv ib ce to tag. Yawg tswv thiaj muab Yawg paj Yias ncho ncho Yawg paj Yias tuag lawm lauj ! Tab mas Yawg tswv sab heev, yawg tswv los ntsaj ntsaj tau 14-15 hnub mam zoo me ntsis. Yawg tswv txawm xav hais tias ntshe yuav tsis muaj neeg pab tau nws li lawm. Nws thiaj mus hais rau nws tus kwv hais tias : « Kwv Ntxawg lauj ! Koj tuav ib taub tshuaj phom zoo zoo, koj txiav 3 lub mos txwv nyiaj, 3 lub mos txwv tooj liab es koj nrog kuv mus yuad ! » Tus kwv teb tias : « Tij Lauj Tswv ! kuv yuav ua cas nrog koj mus tau ? » Yawg Tswv txawm hais tias : » Tsis ntshai, kuv tias tau ces yeej tau xwb, koj txhob ntshai ! » Tus kwv thiaj tuav tau ib taub tshuaj, nws txiav tau 3 lub mos txwv nyiaj, 3 lub mos txwv tooj liab, ces nws txawm nrog Yawg tswv mus lawm lauj ! Yawg tswv hais rau nws tias : « Los kuv ev koj ! » Tus kwv thiaj nce loo rau saum Yawg Tswv nraub qaum, Yawg tswv nkawd muc ib hnub , hnub tig hlo xwb mus txog ntuaj Huab Tais tsov teb chaws. Yawg tswv mus nrhiav tau ib lub hauv paus ntoo khoob loj loj rau nws tus kwv nkaum. Yawg Tswv txawm hais rau nws tus kwv tias : « Koj nyob tij ywm hauv nov nawb ! Thaum twg kuv hu luaj tuag txog, luag ua li cas los koj txhob ntshai nawb ! Thaum twg luag thiab kuv wb sib ntsuas zog, kuv hu koj tiag pab lauj ! Ces koj pab nawb, koj yeej meem rau ntua ntawm qia ntsej ntag nawb ! Tus kwv teb tias : Awj ! Yawg tswv txawm mus tuaj nram tiaj hu lauj ! Nws hu 3 suab tag nrho, ib pliag xwb Huab tais tsov ya tuaj txog ntua. Huab Tais tsov mas tib tug loj loj li tus kwv tau poob siab me ntsis. Yawg tswv txawm hais tias : » Txiv Huab Tais tau 3 xyoos no lawm, kuv tsis tau tuaj xyuas koj. Hnub no kuv rov tuaj xyuas koj ; wb sim sib sim tes taw me ntsis saib yuad ! » Huab Tais tsov txawm teb tias : « Yuav sim los tau kawg thiab tiag! Me tub koj pom xeeb tuaj sim tes taw diam, koj sim ua ntej rau txiv saib tso, txiv mam sim rau koj saib ! » Yawg tswv txawm teb tias : « Ua li los tau tiag. » Yawg tswv txawm nyooj laws 3 suab, dhia 3 plhaw, Yawg tswv luaj nkaus ib lub hauv roob ntag. Huab Tais hais tias : « me tub koj txuj tag li koj lawm lov ? » Yawg tswv teb tias : « A u b ! Kuv txuj tag li no lawm ! » Huab tais thiaj hais tias : « yog li no txiv mam sim rau koj saib ! » Huab Tais nyooj 3 suab, dhia 3 plhaw, Huab tais luaj nkaus 3 lub hauv roob lauj ! Yawg tswv xav tias : « Ab ! Ua kiag tso xij peem lauj ! » Tawg tswv txawm hais tias : « Txiv Huab tais ! koj txuj ci loj dua kuv tab sis wb sim sib ntsuas zog seb ! » Huab Tais teb tias : « Ntsuas los tau tiag me tub ! » Ces Yawg tswv thiab Huab Tais nkawd sib ntsuas zog lauj ! yawg tswv txawm xub sim, Yawg txawm xa tib teg rau Huab Tais tsov caj pas, Yawg tswv xa 4-5 nchos, Huab tais tsov sawv ntseg ntsees li qub. Huab Tais tsov thiaj ntsiab nkaus Yawg tswv xwb qwb, muab Yawg tswv nias nkaus rau hauv qab ; Yawg tswv xav zoj ntshe yuav tuag tiag lauj ! Yawg txawm hu tib suab tias : « Kwv Ntxawg , pab lauj! » Tus kwv thiaj li tib phom rau Huab Tais tsov qia ntsej, ua Huab tais tsov tuag kiag lawm lauj ! Ces ob kwv tij txawm rov qab los txog Yawg tswv txawm hais rau tus kwv tias : « Me kwv ! nyob teb chaws no txom nyem hwv lawm, tsis muaj dab tsi noj. Yuav mus noj luag dab tsi los luag cem ; yeej mus tom tsis tau luag ib yam dab tsi los noj li. Lam noj luag tej nyuaj qub pob kws, tej nyuag qos liab dog pes dig xwb txom nyem hwv kuv yuav mus nyob lawm Tuam tshoj teb. Nyob rau lub teb chaws Xov Tshoj no nqaim dhau txawm nyob los nrhiav noj nyuaj, Huab Tais tsov twb tuag lawm ces ntshe kuv yuav mus nyob lawm Tuam tshoj teb. » Ces tus kwv txawm rov qab los tsev lawm.
Nyob rau lub zos uas Yawg tswv lawv nyob , Yawg tswv txawm mus tos tau ib tug poj niam, nws tseg nws cov txiv tub nyob. Tus poj niam ntawd pheej rov qab mus pub nws tus me nyuam mis. Muaj tej hmo tus txiv tsis nyob lawm, tus txiv hu tias : « Koj niam ! kuv mus lawm ib pliag koj los pab saib me nyuam ov ! Koj los ua me nyuam luag pw ! » Ces nws pheej los ua cov me nyuam luag pw, los pub mis rau tus me nyuam yau noj. Ib taig kis nws rov mus ces Yawg tswv txawm hais tias : « Hais rau nej sawv daws paub ! Xyoo no peb yuav tsiv ! »
Yawg Tswv lawv yuav khiav mus nyob lawm Tuam Tshoj, Yawg tswv txawm tuaj mus hais nkoj rau puag nram ntuj dej Naj Khoos, tsos yuav hla mus rau Thaib teb, mam mus rau Tuam tshoj.
Yawg tswv thiaj tuaj hais rau Thaib hais tias : « Kuv xav ntiav nkoj hla dej, saib nej cov Thaib pab puas tau kuv ? »
Cov Thaib teb tias : « Tau kawg ! Yog koj ua hlob, koj yuav los mus no peb mam npaj tos. »
Yawg tswv thiaj li teem caij rau Thaib tas ; Yawg Tswv thiaj rov qab los txog. Tus poj niam uas Yawg tswv tos es pheej niaj hmo rov mus pub me nyuam mis ntawd txawm hais rau nws tus txiv tias : « Koj txiv ntshe peb yuav tsiv es ntshe kuv yuav tso nej cov txiv tub tseg tiag tiag li, ntshe peb yuav tsis sib pom lawm. Rau qhov peb yuav tsiv mus deb deb heev, ntshe yuav ntev ntev mam yuav sib pom ib zaug , koj nyob koj hlub kuv cov me nyuam mog ! »
Ces tus txiv teb tias : « koj niad ! thaum twg nej li mus ? »
Yog koj mus no koj hais rau peb pab paub mog, peb cov txiv tub nco nco koj li. Yog nyob ze ces sawv daws sib cuag tau, yuav hais dab tsi los hais tau. Tsam koj mus deb deb lawm peb cov txiv tub yuav ua cas nco koj ! Tej me nyuam nco nco koj, peb yuav ua cas nyob ? Ntshe tej me nyuam yuav tsis pom koj lawm. Hnub twg nej mus no koj hais rau kuv paub thiab mog koj niad ! »
Tus niam txawm hais rau tus txiv tias : « tshua 3 hnub xwb ces peb yuav mus nawb ! Yawg tswv twb mus hais tau nkoj lawm. Yawg tswv kom luag nrhiav nkoj nyob nram ntug dej Naj Khoos tos lawm. Peb yuav hla dej mus rau sab thaib teb peb mam mus rau Tuam tshoj. Muaj zoov ntau sawv daws mus coob coob thiaj li yuav nraim tau cev. »
Tus txiv txawm hais tias : « A u b ! yog li 3 hnub ces nej yuav mus tiag lov , koj niad! »
Nkawd sib tham li ntawd tag ces tus poj niad mus lawm lauj ! Tus txiv txawm mus hais rau cov Thaib uas yawg tswv tau mus teem tias : « Tshuab peb hnub yuav muaj ib pab neeg coob coob los mus, Nws tau tuaj kom nej nrhiav ib cov nkoj tos no puas muaj los tsis muaj ? »
Cov Thaib teb tias : « A u b ! muaj ib tug nom, Nws yuav tsiv teb tsaws chaw los mus lawm Tuam Tshoj teb ; nws pej xeem coob heev, nws tau tuaj teem nkoj tiag. »
Ces tus txiv uas tus poj niam los pub me nyuam ntawd txawm hais rau Thaib tias :
« Hais rau nej paub cov neeg yuav los ntawd mas tsis yog neeg saum Yaj no, lawv yog neeg nruab Yeeb xwb. Txog hnub ntawd mas nej nrhia kom tau cov nkoj uas nws tau teem tuaj ntawm no. Nej yeej meem nrhiav tub tej tub taws, npaj cuab yeej, riam phom kom khov kho tuaj tos nawb ! Nej yuav tsis txhob pub cov neeg ntawd hla los mus rau hauv nej lus teb chaws, yog lawv mus rau nej teb chaws mas tsis ntev xwb tej lub teb chaws yuav ntxhov xwb. Rau qhov cov neeg nov yog neeg nruab Yeeb, yeej muab peb cov Hmoob tos lawm coob kawg li. Nws yog ib tug neeg lub siab tsis ncaj, nws tos tos ua rau luag tej quaj ntsuag tas. Yog nej tsis pab tua kom cov neeg ntawd tu noob, nej cia lawv los los rau hauv nej teb chaws, nej teb chaws yuav lwj yuav liam tas. Kuv tsuas hais npaum no rau nej xwb. Txog hnub ntawd nej kav tsij npaj riam phom nyob pem toj thiab nram hav tos tib si. Nej cia cov neeg ntawd hla ntu nruag nrab. Thaum nej coj lawv txog ib nrab deg, nej muab lawv nchuav liam, nej mam ua luam dej tawm. Nej cov tuav riam tuav phom pem toj nram hav yuav tsum tua tsis txhob pub ib tug pom li. »
Cov Thaib teb tias : « A u b ! Yog muaj li koj hais tiag no, peb mam li npaj raws li koj hais rau peb paub. »
Cov Thaib thiaj npaj riam phom nyob pem toj ram hav. Tau 3 hnub Tswv lawv los lauj ! Yawg tswv mas yog tus thawj kiag ntag, nws ua ntej loo, rau tib nkawg khau tawv. Hos lawv ib leeg kwv ib rab phom suab yi nram ko taw. Cov txiv neej ib leeg muaj ib rab ntaj ( yog tsos tus ko tw, yees ua ntaj). Tsuas tias rau khau teeb ntxwv xwb, ib leej hnav ib ce zam hmoob dub nciab xwb lauj ! Hos cov poj niam mas ris me nyuam quaj zom zaws, tus tuav tes los tuav, tus ris los muaj. Yog nkaus li cov neeg tsiv teb chaws ntag. Me nyuam quaj zom zaws, lawv los so tib tiag, sab ntug dej tim ub uas nyob rau Nplog teb. Yawg Tswv mas tsuas hais ncig nquj nquas tom ub tom no. Yawg Tswv hais rau Thaib tias : « Ua li nej cov nkoj tuaj tag lawm los tsis tau ? »
Thaib teb tias : « A u b ! tuaj tsis tau txhij nawb ! »
Ib pliag Yawg tswv rov nug dua tias : « Txhij lawm los tsis tau ? »
Thaib teb tias : « Tuaj Txhij lawm lauj ! »
Yawg Tswv hais tias : « Nkoj tuaj txhij lawm, sawv daws tu khoom yuav mus lauj ! »
Sawv daws thiaj nce hauv nkoj . Yawg tsis pub ua ob peb fij li ntag. Sawv daws nce txhij lawm ces Yawg tswv ua tus them nyiaj rau Thaib. Lawv hais haum tas, Yawg Tswv hais tias : « Tiav tag lawm ces tib txhij mus nawb ! Tsis txhob ua ob peb fij ! »
Thaum Yawg tswv them nyiaj rau Thaib, lawv txais kuj yog Nyiaj tiag, zoo ib yam cov nyiaj Thaib niaj hnub siv ntag. Cov tswv nkoj thiaj li tib txhij nquam kiag cov nkoj mus txog tom plawv dej. Cov tswv nkoj cia li muab cov nkoj ntawd nchuav kiag rau hauv dej tag nrho lauj, ces lawv mam ua luam dej tawm. Cov tub tuav riam hpom peb toj nram hav tua ua dej txaws dawb qas vog, hos cov nkoj tawg ua lwj ua liam tag. Cov neeg ntawd thiaj raug tuag tas rau hauv dej NAJ Khoos lawm.
A u b ! Yawg Tswv dhia dhia, Yawg Tswv dhia dim los rau sab ntug dej tim ub lawm. Yawg tswv rau mob lawm thiab lauj ! Thaum Yawg Tswv yuav tsis teb tsaws chaws Yawg tswv hais rau nws poj niam tias :
« Nej nyob, kuv mus rau Tuam Tshoj lawm. Xyov yuav phem los yuav zoo, kuv tsis paub. Nej nyob nej saib tsob xyoob nplooj dauv ywb yi tid, kuv lub chaw pw nyob hauv tsob qab xyoob ntawd. Yog peb sawv kev lawm, nej nco ntsoov saib tsob xyoob tid nawb mog ! Tsis yog ob peb hnub koj mam saib ib zaug xwb ! Nco ntsoov saib mog. Yog tias tsob xyoob ntawd ntsuab mus li, mas tej zaud yuav tsis ntshai. Yog tias tsob xyoob tid daj kiag lawm, koj kav tsij tuaj xyuas mog. »
Ces Yawg Tswv mus, Yawg Tswv raug mob, Yawg Tswv dhia dim rov qab los, Yawg txawm rov los pw Yawg lub chaw, hauv tsob qab xyoob uas tau hais tseg. Nws cov poj niam me nyuam tsis nco qab saib tsob xyoob lawm lauj ! Muaj ib hnub nws poj niam nras dheev tias : « Ab ! Yawg tswv kom kuv nyob kuv saib tsob xyoob no. Ua cas kuv tsis nco qab lawm ni ! Nws thiaj mam saib tsob xyoob ; ua cas tsob xyoob twb daj tag . Tus poj niam thiaj li khiav khiav mus xyuas . Ua cas Yawg Tswv twb los pw hauv Yawg tswv lub chaw, Yawg tswv twb tuag lawm. Kas twb npau xi lawm lauj ! Ces thiaj paub tias Yawg tswv lawv mus txog nram dej lawv raug li ntawd lawm.
Hos cov Thaib uas tau txais cov nyiaj ntawd, thaum sawv daws dhia tawm sab ntug dej tid tas lawm, lawv muab cov nyiaj thau los saib naj yog tib cov txiaj ntawv thaum neeg tuag es txiav xwb. Cov nyiaj ntawd tsis yog nyiaj saum Yaj, Thaib thiaj ua xov xwm ceeb toom tawm rau sawv daws saib. Yog Xyoo 1957-58 no xwb. Nyuam qhuav tau tsis ntev los no.
Tus hais: Ntxoov Thoj Vwj, Vib Nais, Loei, Thailand, 1985.
Ntev mus ntev tuaj, ces Tswv Xya thiaj ua tsheej ib tug dab tsov loj. Ces thiaj pib tom nyuj tom twm tuaj. Tej neeg zej zog pib muaj mob muaj tuag. Cov neeg uas tuag puav leej yog cov poj niam zoo nkauj thiab cov tub zoo nraug xwb. Dua li ntawd, ces Tswv Xya los tos cov neeg txawj neeg ntse thiab cov coj noj cov ua zuj zus. Thaum no, neeg zej zog sawv daws thiaj li ntshai ces thiaj li khiav ib co rau qhov ub ib co rau khov no. Lub sij hawm no mas, tus xwm txheej mas kub kub kawg li. Niam cem tsis tau txiv hais tias "Niag tsov tom" lossis "Niag Dabcab" "Koj yuav tuag laud". Hais tsis tau tej lus no li. Yog leej twg thiab tsev neeg twg siv cov lus no ces tus raug cem ntawd txawm tuag lawm ntag, vim Tswv Xya ua dab rov los tos ntag. Ua mus ua tuaj, tej tub zoo nraug, tej ntxhais zoo nkauj los yeej hais tsis tau hais tias "Zoo nkauj kawg" lossis "Zoo nraug kawg". Yog hais li no ces tsis ntev Tswv Xya lawv los tos mus li lawm thiab. Mas tej lus no caiv los txog niaj hnub nim no. Ib txhia twb tseem tsis tau kam qhua nws tej me tub me nyuam hais tias "Zoo nkauj, zoo nraug, txawj ntse, lossis paub ub paub no." Qhov neeg sij hais heev ces, tsuas yog hais tias "Phemquav kawg thiab mas" thiab "R.uam tsis paub dab tsi as no xwb". Vim dab tso hlob hlob li. Nyob lub zos Haiv Tais, kuv niam hais tias, peb cov kwvtij neej tsa mas phua tx.i.ag ntoo los xov zos thiab xov tsev. Cov t.x.iag ntoo uas ua lajkab xov tsev mas siab li 6 feet tawm siab, los cov tsov no yeej tsis txhawj dhia sab raud los tom nyuj tom npua thiab kwv dhia lajkab coj mus noj tom hav zoov. Muaj ib zaug, kuv niam tseem tab tom, tuav tuav co ntawm maum kaum, ua yog lub caij kab tua nas quaj zom zaws li thaj tsam 6 pm, ces tsov dhia los tom kuv pog lawv ib tug maum npua, thiab kwv dhia lajkab mus dua tom hav zoov. Hos muaj dua ib zaug, muaj ib yim Hmoob nyob ze ntawm kuv yawg lawv lub tsev thiab, yim Hmoob ntawd tus poj niam tab tom tsuav zaub npua ze rau ntawm ib sab phab ntsa, ces ib tug tsov khawb av sab nraum zoov tuaj, ces tus txov no cev tes los rub tus poj niam no txhais tes. Tus tsov no thiab tus poj niam no nkawv sib nriag sib nriag, ces zoo hmoov tus poj niam hmoob no xyuas ko taw nta phab ntsa ces tso thiaj rub tsis tau nws. Nkawv sib nriag ntev, nws tus txiv ho mus nrog cov kwv tij neej tsa caum tsov tom nyuj lawm, tseem tsis tau los, ces tus tsov no twb los cev tes lauj nws poj niam lawm. Tus poj niam no thiab tus tsov sib nriag sib nriag ntev uas tus tsov qaug zog, ces tus poj niam no mam li maj mam rub tus tsov txhais tes los teem ntawm lub tog tsuav zaub npua thiab mam li muab rab riam maum tws los txiav tus tsov ntawd txhais tes. Thaum tus tsov tib nriag rov sab nraum zoov, ces nws 2 txhais tes khawm tsov txhais tes khov kho, thiab nws xuas ko tawm nta kiag phab ntsa, tso zog ntaug kiag, nws rub kiag tsov txhais tes rov lso txiav dua. Ua mus ua los, tus poj niam no thiaj muab tus tsov uas ces tes nraum zoov los lauj nws ntawd, muab nws ib txhais tes txiav tu. Ib chim tav li thaj tsam 10 moo, uas tsaus ntuj ntawd, nws tus txiv mam li los txog tsev, tus txiv mam li pom nws poj niam qhwv tes ntshav liab vog, ces tus niam thiaj hais tias koj mus ntev ntev, tsov twb rub yuav luag tau nws mus tom lawm nraum zoov. Ces nws thiaj li qhia tias nws muab tsov ib txhais tes txiav tu rau tom lub tog tsuav zaub npua. Tus txiv thiaj mus pom ib txhais tes tso txiav tu rau tof tiag. Tag kis, kaj ntug, lawv thiaj mus tog tus tsov tes tu no qab, tus tsov no kuj tseem khiav tsis tau deb vim nws ib txhais tes tu lawm. Lawv thiaj mus raws qab thiab tua tau tus tsov no.
Cov tsov dab no mas, tab meeg los tom luag tej nees tom nkuaj, tom tej las npua tsiab nram nkuaj, tom tej txiv heev nyuj nram nkuaj li. Cov tsov no tseem tom kiag ib tug poj niam Hmoob mus ris dej ntawm lub zos hav tais thiab. Tus tsov no tom tau tus poj niam no, muab noj tas 1 ceg ncej puab. Ces cov kwv tij sawv daws thiab nws tus txiv chim chim ces, lawv thiaj li mus zov tua tus tsov uas tom tus poj niam no. Lawv mus ua ib lub txaj ntoo siab siab puag saum ntsis ntoo zov. Thaum tus tsov los yuav luag txog, cov dab poj ntxoog ua rau tus poj niam cia li sawv tsees thiab luag nyav, ces tus tsov ntsia dheev tuaj rau saum ntoo uas lawv nyob zov. Lawv thiaj tua tib tsaug phom Hmoob shaum ntoo tuaj raug kiag tus tsov. Lawv thiaj muab tus tsov kwv los thiab muab tus poj niam uas tsov tom no kwv los thas thiab faus. Dab tsov hlob hlob li, neeg tuag los npau, tsov ho tom los npau, ces ib txhia li kuv pog kuv yawg lawv thiaj khiav los rau xeev teb lawm.
Cov tsov dab no mas, tab meeg los tom luag tej nees tom nkuaj, tom tej las npua tsiab nram nkuaj, tom tej txiv heev nyuj nram nkuaj li. Cov tsov no tseem tom kiag ib tug poj niam Hmoob mus ris dej ntawm lub zos hav tais thiab. Tus tsov no tom tau tus poj niam no, muab noj tas 1 ceg ncej puab. Ces cov kwv tij sawv daws thiab nws tus txiv chim chim ces, lawv thiaj li mus zov tua tus tsov uas tom tus poj niam no. Lawv mus ua ib lub txaj ntoo siab siab puag saum ntsis ntoo zov. Thaum tus tsov los yuav luag txog, cov dab poj ntxoog ua rau tus poj niam cia li sawv tsees thiab luag nyav, ces tus tsov ntsia dheev tuaj rau saum ntoo uas lawv nyob zov. Lawv thiaj tua tib tsaug phom Hmoob shaum ntoo tuaj raug kiag tus tsov. Lawv thiaj muab tus tsov kwv los thiab muab tus poj niam uas tsov tom no kwv los thas thiab faus. Dab tsov hlob hlob li, neeg tuag los npau, tsov ho tom los npau, ces ib txhia li kuv pog kuv yawg lawv thiaj khiav los rau xeev teb lawm.
Tham txuas mus.
Ntawm lub zos haiv tais, thaum tus tsov tom tus poj niam Hmoob ntawd tas, es lawv muab tus tsov ntawd tua tau lawm, tsis ntev muaj ib co niam txiv tub ho mus ua teb, daim teb kuj nyob tsis deb ntawm zos Haiv Tais, tab sis lawv ua teb lig lawm, ces txawm ua ib siab pw nram tsev teb. Thaum lawv ua hmo noj tas nrho ib pliag, ces tus poj niam tseem ua me ntsis hauj lwm thiab nws tseem ris rawv ib tug me nyuam me. Muaj ib tug tsov cia li dhia ib plhaw nraum lub qhov muag tsev los tom kiag tus poj niam no thiab kwv kiag nws dhia tib plhaw rau nraum zoov, ces tus me nyuam me uas leej niam ris nraum nraub qaum thiaj li mus poob nthav nraum zoov. Tus txiv mam muab rab phom hmoob los ntim txhuaj ces mam taw tsau mus xyuas nraum zoov, thiaj pom nws tus me nyuam poob nraud, tab sis tsov kwv nws poj niam ntshav liab vog dua pem hav zoov lawm. Tus txiv thiaj li mus muab tus me nyuam nqa los tsev. Hmo ntawd, lawv 2-3 txiv tub nyob ib hmo, tsis pw li. Tag kis kaj ntug, cov txiv tub thiaj li los rau pem zos loj los hais coj kwv tij thiab zej zog, ces lawv thiaj coj* kwv phom mus raws tus tsov qab, tus tsov no twb muab tus poj niam noj tas 2 ceg qab, lawv lam khaws tus niam yav cev los pam lawm xwb.
Nyob rau lub Zos Hav Tais tib yam, muaj ib tug kwvtij hu ua Ntsuab Kos no mus raws npua teb. Thaum lub caij ntawd kuv niam mus ua teb nram teb, daim teb mas hais li kuv niam hais mas tsuas nyob deb li 1/2 mile ntawm ntug zos xwb, ces Ntsuab Kos txawm mus tua npua teb ze rau ntawd. Txawm muaj ib tug tsov dhia tom Ntsuab Kos qab thaum nws nyas npua teb, ces tus tsov no muab Ntsuab Kos tom sab sab, tab sis nws tua tsis tau tus tsov no. Thaum neeg zej zog hnov Ntsuab Kos thiab tsov qw nta hav vos, ces cov txiv neej thiaj li kwv phom mus pab. Thaum lawv mus txog ces Ntsuab Kos twb yuav tuag. Lawv muab nws kwv los txog pem tsev ces nws tuag lawm.
Muaj ib zaug ib tug kwv tij txawm mus yos hav zoov tib yam. Tab sis zaum no tus kwv tij no ho muaj hmoo. Nws yos los txog ntawm ib lub laj roob ntsia ntsoov tuaj rau tim zos. Lub sij hawm no hnub tab tom qaij hlo, kwv yees 1-2 pm xwb. Cov Hmoob tim zos ntau nruas neeb ua neeb, nrov nphas nphas, no ces tus tsov txawm sawv tsees nram yav qab cav ntsia ntsoov rau tim zos, tus tsov txawm quaj (mlos, mlos) nrog lub nruas. Nws thiaj ntsia dheev pom tus tsov, tab sis tus tsov tsis pom nws vim tus tsov saib mus rau tim zos lawm, ces tus kwv tij no thiaj li ceev nrooj los tsev. Yawg los txog tsev mas, yawg ntshai ntshai. Txij ntawd yawg thiaj li tsis mus yos hav zoov ib leeg lawm.
Qhov no yog kuv tham txog tsov los tom nyuj tom twm, thiab tom neeg hauv zos Hav Tais xwb. Lwm zaus kuv mam tham txuas ntawm Tsov Paj Yias thiab Tsov Paj Raus. Ua tsaug koj los mloog dab neeg.
Ua ntej thaum cov tsov yuav los tom lawv li koj tham no ces, txawm pib muaj ib tug ntxhais zoo nkauj tsawv, txawm sawv ua niam ntuj (ua saub) no los mas. Tus ntxhais no kuj saib qee yam leej thiab. Ces cov niam txiv sawv daws kuj ntseeg nws. Nws thiaj hu cov ntxhais coob tus mus nrog nws ua haujlwm saub. Lawv vwm saub li no tau muaj ib tog xyoo. Muaj ib hmo, ces lawv sawv daws txawm ua li ua neeb mos caum. Cov ntxhais thiab cov tub txawm tuaj tag nrho rau hauv ib lub tsev. Cov tub thiab cov ntxhais no txawm dhia dhia, ces ib chim lawv cia li hloov kev dhia ntawd. Lawv txawm los nkag li cov xov pav, ces cov tub txawm nce tom qab tuaj. Cov ncaj ces lam ua li txoj kev cai uas tus ntxhais saub no hais xwb. Cov hluas uas tsis txhua ncaj es xav tham hluas nkauj ces, lawv cia li kav seem qhov nkag ntawd nce cov ntxhais thiab deev tiag tiag. Lawv ua mos caum vwm li no, tau kiag ib tog xyoo, ces thiaj li mus txog qhov koj tham tias tsov yuav los nrog lawv ua r.o.g no los mas. Thaum cov tsov no pib los, ces cov tsov no los tom lawv tej tsiaj tuag pawg pes lug rau ub rau no. Tom lawv tej npua, nyuj, nees. Neeg zej zog thiaj pib cem tias ua cas yuav muaj tsov coob ua luaj li los tom lawv tej tsiaj. Tus ntxhais saub no thiaj li hais tias, nej tsis txhob cem cem cov xov pav no, lawv tseem yuav los nrog nej ua puv thiab. Ces cov laus thiaj li nug koj nqe lus ntawd hais tias ua li thaum twg cov tsov no los nrog lawv ua puv? Tus ntxhais ntawd thiaj li qhia rau cov laus neeg. Ua ntej lawv kuj tsis tshua ntseeg thiab, tab sis ua cas cov tsov pheej los tom lawv tej tsiaj heev zuj zus, ces txawm muaj ib hnub, thiaj muaj tus ntxhais saub ntawd thiab ib tug tub hluas nkawv thiaj hnav ris tsho li koj tham no. Nkawv thiaj hnav zam li yuav mus pov pob, tab sis twb tsis yog txog 30 caug. Nkawv cia li vwm, hais ib co lus txawv txawv lawm, thiab seev yees mus dua pem ntug zos li koj tham no, ces cov laus saib nkawv ua txawv dhau hwv lawm, lawv thiaj ceev ceev mus zij kiag nkawv rov los. Ib pliag tus ntxhais saub no thiab feeb rov los tham tias cov xov pav no hu nkawv, nkawv thiaj li mus. Luag tab tom los nrog lawv cov neeg hauv lub zos no ua r.o.g. Thaum no, cov txiv neej thiaj li mus npaj phom tag nrho. Lawv thiaj sau zog los nyob ua ke rau 2-3 lub tsev sib ze ntawd. Lawv muab cov txiv neej uas paub tua phom faib ib yig no 5-6 leej txiv neej. Tab sis lub caij no, tus puav thiaj muaj cov phom Fab Kis 3 teg thiab 5 teg ntawd xwb. Dua li feem coob tseem tua phom Hmoob xwb. Lawv thiaj li kib tshuaj phom nkig nkuav tos. Thaum hnub qaij hlo, kab tua nas pib quaj zom zaws ces cov tsov no pib los. Lawv thiaj li taws teeb roj npuas thoob tsev zov. Nraum zoov ces tsov pib los tom lawv tej tsiaj, tej npua, tej nees, thiab tej nyuj. D.ev mas tom quaj pos tw nthoob rau ub rau no xwb. Thaum tseem pom kev zem zuag, ces twb pib pom tus puav tsov los tshwm hauv plawv zos, ces lawv twb pib xyuas phom tua tuag tus puav lawm. Ib pliag thaum tsaus ntuj kiag, ntawd ces cov tsov pib los tawm tsam lawv li koj tham no. Cov tsov no muaj muaj zog, nws txim kiag tim tej qhov phab ntsa lossis qhov nruab los. Thaum sawv daws pom txim los mas zoo li luaj tus miv xwb, tab sis thaum lawv tua ib tsaug phom rau tus tsov. Tus tsov tuag kiag lawm ces yeej loj li cov tsov loj ntawd lawm ntag. Lawv thiaj tua tua txog ib tag hmo, ces lawv thiaj tua tau tus tsov daj thiab tus tsov dub li koj tham. Qaib pib qua ces cov tsov pib thim zuj zus mus. Kaj ntug kiag ces cov tsov thiaj li thim tas, tsis muaj tsov lawm. Cov neeg zej zog thiaj li mam los muab cov tsov no suav. Cov uas lawv tua tuag ntawm zos kiag muaj ze li ntawm 10-20 tus tsov. Cov khiav ntshav liab vos lawm muaj ntau. Ces cov neeg ntawm lub zos no ntshai ntshai, yog li ntawd, cov neeg zos ntawd thiaj li tsij tag nrho los nrog lub zos loj nyob lawm. Tsij ntawd los zoo li thiaj li tsis muaj tsov los tom neeg hauv zos lawm.
Kuv tham txuas koj qhov uas TSWV XYA tas kee muaj fwv seej ua dab tsov. Raws li tej laus tham ua ntuv zus los es yus nco tau tias Tswv Xya tuag tom thib 2 ntawd mas muaj li no:
1. Yog Tswv Xya tuag thaum lawv los tom cov neeg zos nyob rau lub zos me me uas koj thiab kuv wb tham los saum no, es lawv muab cov xovpav no tua tuag coob coob, ces txij ntawd los thiaj li tsis txhua muaj tsov tom neeg lawm.
2. Yog Tswv Xya lawv pab tsov no rov mus hla Dej Liab thiab Dej Ntsuab rov mus lawm pem tuam tshoj, es lawv mus poob deg tuag tas lawm, vim tias tus Dej Liab thiab Dej NTsuab no loj heev li. Cov laus tham tias thaum lawv mus txog ntawm tus ntug Dej Ntsuab ces lawv txawm txia ua neeg. Lawv tau mus thov cov NCuav Dawb (Thai Dum ) muab nkoj los nquam xa lawv hla dej. Cov Ncuav Dawb no xa thawj thawj nkoj hla dej txog sab tim ub lawm, ces cov Ncuav Dawb no rov los tos 2 pab tom qab. Thaum thawj pab lawv muab xa dhau dej ntawd them nyiaj rau cov Ncuav Dawb mas kuj yog nyiaj tiag, tab sis thaum cov Ncuav Dawb no txais lawv cov nyiaj tas, es rov los yuav txog 2 pab tom qab, ua cas cov nyiaj uas thawj thawj pab them rau cov Ncuav Dawb no yog xav txheej xwb, tsis yog nyiaj, ces cov Ncuav Dawb no thiaj paub hais tias cov no tsis yog neej, lawv yog dab xwb. Thaum no, cov Ncuav Dawb thiaj li rov los tos pab nruab nrab. Cov Ncuav Dawb no xa lawv mus txog nrab deg ntawm tus Dej Ntsuab, lawv thiaj li muab cov tsov no nchuav rau hauv dej. Ces pab nruab nrab thiaj li tuag tas lawm. Tshuav pab thib 3 ces lawv thiaj li khiav rov qab lawm. Txij ntawd los ces, Tswv Xya moo los tos neeg thiab tom neeg thiaj li ntsiag lawm. Thiab cov Tsov Dab no thiaj li tsis muaj muaj fwjchim lawm vim Tswv Xya tuag lawm. Hais txog qhov tsov tom neeg thiab tom nyuj, twm, nees, thiab npua thiaj li tsawg lawm thiab hais txog cov Tsov Dab no rov los tos neeg thiaj li tsis tshua muaj heev heev lawm.
3. Raws li tej laus tham qhov tseeb tseeb tiag tiag mas yog Tswv Xya Lauj tus kwv uas hu ua Tooj Pov Lauj no rov muab Tswv Xya tua tuag lawm xwb. Qhov teeb meem uas Tooj Pov Lauj muab Tswv Xya tua no mas, tej laus tham meej meej hais tias nyob rau lub zos Haiv Ntoo Qaub ntawd, muaj ib xyoo, Tswv Xya pheej los heev heev, los nrog Tswv Xya tsev neeg thiab Tooj Pov Lauj lawv tsev neeg nyob. Tswv Xya los thiab los ces Tswv Xya cia li tshwm sim txia los ua neeg nrog lawv nyob. Muaj ib hnub, Tswv Xya tsawm hais rau Tooj Pov Lauj hais tias Tswv Xya nqhis nqhis dej, ces Tooj Pov tsis totaub, Tooj Pov txawm tso cai hais tias, nqhis dej ces yus kuj mus haus yus. Ces Tswv Xya txawm sawv mus haus dej lawm. Tswv Xya mus haus dej tas ces Tswv Xya rov los nyob li qub. Thaum no Tooj Pov mam nco nrhiav Tooj Pov ib tug me nyuam tub yau, tab sis nrhiav qhov twg los nrhiav tsis tau li lawm, ces Tooj Pov thiaj li nug Tswv Xya hais tias, ua Tswv Xya puas paub Tooj Pov tus me nyuam tub yau no mus dua qhov twg lawm? Tswv Xya mam qhia hais tias vim Tswv Xya nqhis nqhis dej, es Tswv Xya muab nws ua dej haus lawm. Thaum no Tooj Pov mam totaub tias thaum Tswv Xya taij taij Tooj Pov tias Tswv Xya nqhis nqhis dej ntawd yog nws xav noj Tooj Pov tus tub me ntawd ntag. Tooj Pov nkawv 2 niam txiv xav mus xav los, chim nkawv heev, ces muaj ib hnub Tooj Pov thiaj li nrhiav ib lub tswv yim tua Tswv Xya. Tooj Pov thiaj li mus ntaus ib lub muas txwv nyiaj thiab npaj ib rab phom Hmoob ntev 8 dos. Muab lub muas txwv nyiaj ntawd ntim rau hauv rab phom nrog rau 1 lag tshuaj phom. Thaum Tooj Pov rov pom Tswv Xya los, ces Tooj Pov thiaj li ua txuj mus ua teb thiab tawm mus nraum zoov lawm. Tooj Pov mam nyas rov los, thiab taw phom nraum qhov tsev twm ywm tuaj. Thaum Tswv Xya mus mus los los ze rau Tooj Pov rab phom uas zoo tsam thawj tua, ces Tooj Pov thiaj li qib kiag Tooj Pov rab phom rau. Rab phom txhais nrov npoog ces thiaj li raug kiag Tswv Xya nruab log siab. Tswv Xya thiaj li tuag kiag. Thaum Tswv Xya tuag lawm, Tswv Xya yog ib tug tsov loj loj lawm xwb. Txij li qhov no los ces thiaj li tsis muaj Dab Tsov Tswv Xya lawm. Thiab qhov uas lawv los tos neeg thiaj li tas rau qhov no.
Qhov tiag tiag ces yog Tswv Xya tsev neeg rov muab nws tua tuag lawm xwb, vim nws tos neeg los tos tas npaud, tom neeg noj los tom tas npaud, ces nws tsev neeg thiaj li rov muab nws tua tuag. Dab Tsov thiaj li tas rau qhov no. Cov tsov uas los tom cov Hmoob nyob rau lub zos me me uas tham los saum no yuav yog Tswv Xya cov tubr.o.g tsov lawm xwb, los tsis paub.
txawm NTxuaj Teg Vaj yog peb ib tug phauj uas yog kuv txiv lawv ib tug cousin nyob rau lub zos Hav Ntoo Qaub ntawd, ntshe yuav yog thaj tsam 1920-30 ntawd. Ntxawm Ntxuaj Teg mas nws yug los thiab loj hlob los, nws yog ib tug ntxhais ncaj ncees, tsis ua plees yi, thiab pab niam pab txiv ua noj ua haus. Nws yog ib tug ntxhais liaj ntxhais teb xwb. Thaum lub sijhawm uas Tswv Xya tseem muaj muaj power ntawd, ces Ntxawm Ntxuaj Teg sawv ua saub "Psychic". Tej thaum kuj zoo li nws becomes schizophrenia thiab, tab sis qhov neeg zej zog ntseeg nws thiab tej niam tej txiv ntseeg nws mas, vim nws saib dab khoom ploj khoom xiam kuj leej xws li npua ploj, nees ploj, nyuj ploj, nyiaj ploj, neeg muaj mob thiab neeg mus tsham zoov tsham tshuaj poob zoo. Nws saib leej heev. Ua mus ua tuaj ces cov dab Tswv Xya no pheej los nrog nws tham thiab los qhia nws. Leej twg mob yuav kho tsis zoo los Ntxawm paub. Leej twg mob, ho kho yuav zoo los Ntxawm paub tib si. Thaum ho muaj ib tug neeg tuag lawm, los nws los hais rau Ntxawm, kom NTxawm hais rau nws tsev neeg tsis txhob quaj quaj los NTxawm kuj ua tau. Raws li cov laus tham, thaum Ntxawm paub txog psychic ntawd tsuas muaj kwv yees li 3-4 lub xyoo xwb ces Ntxawm txawm tuag lawm.
Ntxawm muaj 2 lub nicks. Ib lub hu ua Ntxawm Ntxuaj Teg, hos ib lub hu ua Ntxawm Ntaus Ncas. Lub nick uas hu ua Ntxawm ntaus ncas mas yog dua vim nws siv rab ncas los hu thiab tham nrog cov tsov Tswv Xya. Lawv cov niam cov txiv ua li lub tsev me me rau Ntxawm teev tiam cov Dab Tswv Xya no. Yog leej twg thov txog Ntxawm, thiab xav nrog nws cov neeg tuag lawm tham, ces Ntxawm mam mus hu nram Ntxawm lub tsev uas Ntxawm teev cov dab no xwb. Thaum NTxawm hu cov dab no, Ntxawm siv ib rab ncas los hu lawv. Muaj dab tsi cov dab no mam los qhia rau Ntxawm. Tom qab ntawd Ntxawm mam li los qhia rau tus neeg ntawd. Yog li no lawv thiaj hu ua Ntxawm ntaus ncas. Qhov lawv hu nws ua Ntxawm NTxuaj Teg mas kuj yog thiab, vim thaum nws ntaus nws rab ncas, ces kuj zoo li nws ntxuaj ntxuaj nws txhais tes.
Ua ntej thaum Ntxawm yuav tuag, muaj ib xyoo cov dab no cia li los hu Ntxawm mus ciaj ciaj lawm. Ntxawm cia li ploj lawm xwb. Nrhiav qhov twg los kuj tsis pom Ntxawm li lawm. Cov niam cov txiv thiaj li ua neeb thiab fiv yeem kom Ntxawm rov qab los. Ces cov dab no thiaj li rov coj Ntxawm los. Thaum Ntxawm los, lawv cov niam cov txiv thiaj nug hais tias yog ua cas? Ntxawm ho ploj lawm? Ntxawm thiaj qhia tias yog Tswv Xya lawv los coj Ntxawm mus lawm. Ntxawm mus nyob tau 4-5 hnub rau tom hav zoo mas Ntxawm tshaib tshaib plab, vim Ntxawm nrog tsis tau lawv noj nqaij nyoos, nqaij lwj, noj raubris, noj nplooj hmab nplooj ntoo, thiab noj av, ces cov poj ntxoog thiaj sij los muab Hmoob tej mov su thiab los muab tej mov hauv tsu lossis laujkaub, nqa mus rau Ntxawm noj. Lub sij hawm uas Ntxawm nyob tom hav zoov ntawd, Ntxawm mus nrog nws 2 tug txiv Ntxawm xws li Paj Yias thiab Paj Raus nkawv nyob ua ke. Cov dab tsov no mas lawv coob coob nyob puv roob puv hav li. Thaum Ntxawm rov los zaum no, Ntxawm los nyob tau li ib tog xyoo xwb, ces cov dab no rov los tos Ntxawm dua. Ntxawm cia li pheej si thiab tsis noj mov zuj zus xwb. Muaj ib hnub ces Ntxawm cia li ua ib tug npaws ces Ntxawm txawm mob tau li 1-2 nyuag hnub xwb ces, Ntxawm cia li tuag lawm. Thaum Ntxawm tuag tas, Ntxawm niam Ntxawm txiv quaj quaj Ntxawm, Ntxawm kuj tseem ua tau dab rov los hais rau Ntxawm niam thiab txiv kom tsis txhob quaj quaj, yog Tswv Xya lawv los tos Ntxawm lawm xwb. Txij thaum Ntxawm NTxuaj Ntaus Ncas tuag tas, ces tsis muaj psychic Hmoob lawm. Tsis muaj neeg txuas tau dab thiab neej lus lawm. Txuas ntxiv ntawd, thaum hnov hais tias Tooj Pov Lauj uas yog Tswv Xya tus kwv ntawd rov muab Tswv Xya tua tuag lawm, ces cov dab no thiaj li ntsiag txiaj ntsiag moo tos los txog ntua rau thaum teb chaws tawg es peb khiav tuaj lawm xwb. Dua li yav nram ntej mas, yeej tsis muaj leej twg tuav tau lawv npe tham txog lawv dab tsi. Leej twg tham dab tsi txog lawv ces ib chim xwb, cov dab tswv xyas no yeej los hem nws li lawm.
Txuas ntawm no mus, ho tham me ntsis qhia nej txog ntawm Tsov Paj Yias. Kuv tham li uas kuv nco tau kuv yawg piav xwb. Paj Yias Vaj mas yog kuv yawg ib tug cousin thiab. Thaum Paj Yias ua neej nyob, nws txawj zajtshoob, txiv xaiv. Nws ua kavxwm thiab ua mejkoob. Nws yog ib tug neeg uas pab neeg heev rau fab tshoob kos, tsis hais txhoob zawj, tshoob nkauj poj nraug qab, nraug pom nkauj lw, lossis tshoob qhaib. Hais txog fab kev mob nkeeg, nws txawj txiv xaiv thiab paub foomkom, uas teb chaws qhuas thiab cav nws. Cov kwv tij tham ua 2 lo lus rau kuv. LAwv tham hais tias Paj Yias tuag nyob rau lub zos Roob Tuam Phuv Lis. Ib txhia kwv tij hais tias tuag nyob lub zos Hav Ntoo Qaub no thiab. Ib txhia kwv tij ho hais tias muaj 2 tug Paj Yias, ib tug yog Paj Yias tub, hos ib tug yog Paj Yias txiv. Tus Paj Yias tub thiaj li mus ua tsov no, tab sis kuv yawg yeej tham meej meej, thiab kuv nco tau mas tus Paj Yias uas mus ua tsov nrog Tswv Xya lawv ntawd yog kuv yawg phaj. Nws hu kuv yawg ua Tij laug.
Tham raws li nco tau uas kuv yawg piav txog Txov Paj Yias. Thaum Paj Yias mob mob es nws tuag lawm ces nws txawm mus ua ib tug tsov nyob rau ntawm Tswv Xya uas yog tus mus pab Tswv Xya. Dab no kuj muaj zoo politic thiab. Paj Yias yog tus pha cov tsov mus tom nyuj tom twm thiab mus nrhiav noj nrhiav haus. Thaum Ntxawm NTxuaj Teg hu Tsov Paj Yias los nrog kuv yawg tham, nkawv tham ib tag hmo dua. Kuv yawg los kuj yog neeg haus yeeb, hos Paj Yias thaum ua neej nyob los, kuj haus yeeb thiab. Kuv yawg pua chaw pw ntawm Ntxawm Ntxuaj Teg niam thiab txiv lawv lub hauv plag. Thaum neeg pw ntsiag zog lawm ces, Paj Yias txawm los li uas kuv tham los saum toj no. Kuv yawg txawm hnov d.ev. tom ntsuag qees tom ntug zos los. Ib pliag ntshis xwb ces Paj Yias txawm yog tus xub hu kuv yawg hais tias, "Tij laug! koj tuaj lawm los?" Kuv yawg txawm teb tias, "Aws!, kuv tuaj lawm." Nkawv txawm pib sib tham. Kuv yawg thiaj li nug me ntsis txog ntawm peb pog li kuv tham los saud. Ces Tsov Paj Yias thiaj li teb hais tias, "Peb pog tseem mus tsis tau puv ib xyoo, tseem hais tsis tau laib lus, thiaj tsis los." Dhau ntawd peb yawg txawm cev ko kublub rau nraum zoov tias, "Koj puas haus yeeb lawm nas?" Paj Yias hais tias kuv haus thiab mas. Ces kuv yawg saib mus rau nraum zoov, kuj tsis pom Paj Yias, tab sis Paj Yias kuj nqus yeeb li ib tug neeg ciaj lawm thiab. Dhau ntawd ces nkawv thiaj li tham txog Paj Yias lub neej uas mus ua tsov ne zoo li cas? Paj Yias thiaj li tham tias, lub neej mus ua tsov mas txom txom nyem. Dab muaj rule muaj cai. Lub ntuj tsis pub cov tsov no tom tsiaj ywjsiab. Lub ntuj pub lawv noj tus twg, lawv tsuas tau noj tus ntawd xwb. Lawv tom tau ib tug tsiaj, ces sawv daws los noj tus ntawd xwb. Tej nqaij tsiaj no tsis zoo li saum neej no es yuav khaws tau cia. No tsis tas, ces tsw lwj lawm los, yeej kawg yauv rov los noj xwb, vim tsis muaj dab tsi noj. Zoo li uas kuv nco tau mas, 7 hnub twg lub ntuj mam pub lawv noj ib tug tsiaj xwb. Yog li no, mus ua tsov mas tshaib tshaib plab. Thaum lawv tom tsis tau tsiaj los noj ces kawg yuav tau noj av lawm xwb. Tej thaum lawv tshaib plab dhau hwv lawm ces, lawv thiaj li los ua bau suav rau alwv tej neeg, los thov qaib, thov qe ntawm lawv tej neeg. Yog lawv los ua bau suav hais tias, lawv los thov koj ib lub qe, es koj kam rau lawv lawm ces, tej thaum ces, lawv los tom koj ib tug bua, lossis ib tug nyuj, ib tug nees. Yog koj hmoov zoo, es hauv nruab dabntub, koj yeej tsis kam, ces cov tsov no thiaj li tsis tom koj tej tsiaj xwb.
Lub caij no, nyob rau sab Xas Niam no mas, tsov coob coob li. Koj mus ua teb, es koj tsuj koj tej neev taw rau ntawm tej kev uas nqos thiab noo, ib chim koj mus ua teb los, tsov twb los tsuj koj tej neev tawm lawm thiab. Mus txoj kev twg los, yog mus 1-2 leeg ces tssi tau luag li. Cov neeg ib txhia nyob sab Xas Niam no kuj raug tsov tom noj lawm ib txhia.
Hnov neeg tham tias Tsov Paj Yias tuag no yog nws mus tom lawv ib tug heev nyuj. Tsov Paj Yias muab noj tas ib ceg, ces lawv mam li mus nrhiav tau lawv tus nyuj. Lawv thiaj li caw phom rau thiaj li mag tsov Paj Yias tuag lawm. Qhov uas paub li no, yog cov dab tsov no los ua bau suav qhia sawv daws, es thiaj li assume li ntawd xwb, vim tias thaum NTxawm NTxuaj teg tuag tas alwm ces, neej thiab dab sib txuas lus tsis tau lawm. Tsov Paj Yias hais rau kuv yawg ib los hais tias, nws laj laj ua tsov li lawm, vim tias lawv txom txom nyem. Yog yauv mus thawj dua thiab ces yauv tau mus plhis zaj plhis zuag es thiaj li mus thawj thiab tau. Qhov meaning uas mus plhis zam plhis zuag no tej zaum yog qhov uas cia neeg tua kom tau lawv tuag es thiaj li tau mus thawj dua thiab xwb.
Last edited by koojziagkabzaug on 28th June 2010, 9:35 am; edited 1 time in total
